Mathiơ 26

1Bră tom tơlôh tơm tô̆ Yang Jesu sŏng tơs bơtău lơ̆gay kơp jơno rơ̆, Kơnràñ tơs î lơ̆gay cro bơtê mơ̆n lah: 2“Oh mi gư̆t lah bea nge te rơp trôh jơno Bơjư̆m-Sa Swà-Găn, gừn Kon-Mơnùs rơp kŏng nap lơi kŏng pư̆ng điñ cŭngsî sî pư̆ng.” 3Dơ̆ rơ̆, lơ̆gay cro gơnoăr bơlăm-găl ăn jơno duh-khoai dơng gư̆m lơ̆gay cro kwăng kra nơ̆m lang bol bơjư̆m wăl nơ̆m gơlăng cro gơnoăr bơlăm-găl ăn jơno duh-khoai dơng, sơnăn la Kaiphe. 4Ƀòn gô tơmbơyê î găp lơi ƀòn gô digơlăn ngui jơno kai-kơnĕ lăc leo kơ̆p jư Yang Jesu î tơngsơ̆t Kơnràñ. 5Mơya ƀòn gô tơs: “Ơ̆-iyŏ nơ̆m nge bơjư̆m-sa, lơi jơno sơlô̆ng-sơlăng ơ̆ tom tơlôh nhòng lang bol.”

6Jơ gư̆n, tơm tô̆ Yang Jesu ăm nơ̆m Ƀethani, nơ̆m hîh Simôn, cro kŏng kòp dun, 7du hôi cro-ua iyà băl klŏ lô̆ mang bîng mơñà kàs ƀôhơ̆ ngăn trôh en Kơnràñ, gừn amî-ua tôh cŭngsî găl Kơnràñ, ndăng jơ nggui sa. 8Mơya ma-ngkơi jơ tơmpơl tîgư̆n, lơ̆gay cro bơtê tơcao, tơs lah: “Lơh pơle tîdô lơi no-gwơh? 9Bơh mơñà dô digơlăn brău dî khăi priè gừn e gời ma cro kơsòt.” 10Mơya gư̆t jơno dô, Yang Jesu tơs î ƀòn gô: “Ngglơh oh mi lơh kălkê cro-ua dô? Bơh amî-ua sŏng lơh du-lăm bră niem ma Ăñ. 11Bơh oh mi dî miek cro kơsòt ăm î mơ̆n, mơya ơ̆-iyŏ oh mi dî miek Ăñ. 12Bơh tơm tô̆ amî-ua tôh mơñà dô cŭngsî să ăñ, amî-ua sŏng lơh tîgư̆n ma bră bơbua tăp Ăñ. 13Iyŏ ngăn, ăñ tơs î oh mi, dilah anẵu găy Jơno Niem dô dî tơs bơtău nơ̆m lơ̆gay dunya, gừn bră amî-ua dô sŏng lơh kŭng dî tơs trôh nơ̆m jơno kah sơdơ bơh amî-ua.”

14Dơ̆ gư̆n, du hôi nơ̆m jư̆t-bea hê cro gơnoăr bơtău, sơnăn la Juđa Iskariôt, ma-ngkơi jơ swà trôh ma lơ̆gay cro gơnoăr ăn jơno duh-khoai, 15sŏng tơs lah: “Ƀòn ông kơñ kla ma ăñ nhẵư, sŏng gư̆n ăñ rơp nap cro rơ̆ ma ƀòn ông?” Tîrơ̆ la, ƀòn gô e ma Juđa păy-jư̆t plờk priè. 16Gừn bơh tô̆ tơnge gư̆n, gô sơntơm jôi tô̆ lơwah lơi digơlăn jao nap Kơnràñ.

17Jơ gư̆n, mơ̆t nơ̆m nge dơ̆ sơm nơ̆m nge Bơjư̆m-Sa Ƀăñ Ơ̆ Tom Dong, lơ̆gay cro bơtê trôh en Yang Jesu, lùp lah: “Cro bơtău kơñ ƀòn hî rcăng ma cro bơtău sa jơno Bơjư̆m-Sa Swà-Găn anẵu găy?” 18Sŏng gư̆n Kơnràñ tơs lah: “Swà mơ̆t cĕ nơ̆m ƀòn dơng, trôh î du hôi cro năy gừn tơs î gô: ‘Cro Bơtău tơs lah: “Tô̆ tơnge cro bơtău gừn mơñ trôh; cro bơtău rơp Bơjư̆m-Sa Swà-Găn nơ̆m hîh mê dê băl î lơ̆gay cro bơtê cro bơtău.”’” 19Lơ̆gay cro bơtê lơh gư̆ptî Yang Jesu sơđah ƀòn gô, gừn ƀòn gô rcăng jơno sa Bơjư̆m-Sa Swà-Găn.

20Jơ gư̆n, tơm tô̆ brê tơmăng trôh, Kơnràñ nggui sa băl î jư̆t-bea hê cro bơtê. 21Tơm tô̆ ƀòn gô ndăng sa, Kơnràñ tơs lah: “Iyŏ ngăn, ăñ tơs î oh mi lah du hôi cro nơ̆m oh mi rơp tơmdră ăñ.” 22Bơh moat-jrum ngăn, kơp du hôi cro sơntơm tơs î Kơnràñ lah: “Ơ Yang, ơ̆-iyŏ la ăñ ơ̆h?” 23Mơya lơi kla dẵư, Kơnràñ tơs lah: “Cro sŏng iyrù tê sătan nơ̆m nhòng sơlao băl î ăñ, cro gư̆n rơp tơmdră ăñ. 24Bulah Kon-Mơnùs rơp swà, jăt gư̆ptî jơno sŏng cêh bơh Kơnràñ, mơya sơòs-sơngeh ma cro rơ̆, bơh gô mà Kon-Mơnùs kŏng blơ̆-dră! Dilah cro rơ̆ ơ̆ bơda tơlôh gừn niem rlo ma gô.” 25Mơya tơm tô̆ kla dẵư, Juđa, cro tơmdră Kơnràñ, tơs lah: “Ơ Raƀi, tom iyŏ la ăñ?” Kơnràñ tơs î ông: “Sătan mê sŏng tơs lờt.”

26Jơ gư̆n, tơm tô̆ ƀòn gô ndăng sa, dơ̆ dưñ ƀăñ î ưnngai lờt, Yang Jesu sŏng pêh ƀăñ. Gừn ma-ngkơi tơm jơ dờp ma lơ̆gay cro bơtê, Kơnràñ tơs lah: “Dưñ cĕ, sa jờh. Dô la să-jăn ăñ jê.” 27Gừn dơ̆ dưñ wan î ưnngai lờt, Kơnràñ sŏng dờp ma ƀòn gô, tơs lah: “Lơ̆gay să ñô cĕ anẵu wan dô. 28Bơh dô la mham hăư băl ăñ dê sŏng dî tôh bơh khăi cro ăn lơi ma jơno toh glài. 29Mơya ăñ tơs î oh mi bơh tô̆ tơnge dô, ăñ nên-nôn ngăn rơp ơ̆ ñô anẵu dà ple ño dô trôh dî nge rơ̆, la dơ̆ mà ăñ ñô dà ño mhăy băl î oh mi nơ̆m lơgơ Bàp ăñ jê.”

30Ma-ngkơi jơ đas-sờ, ƀòn gô swà nơ̆m yồ Ôlibe. 31Dơ̆ gư̆n, Yang Jesu tơs î ƀòn gô: “Nơ̆m tơmăng dô, lơ̆gay oh mi rơp sơmăm tìs anẵu ăñ, bơh tom jơno cêh lah:

‘Ăñ rơp pơng lơh cro jư sŏng gư̆n mpôl belàt rơp kŏng kơ̆mprah-kơ̆mprĭng.’

32Gừn ma-ngkơi jơ ăñ dî lơh jîng wăl, ăñ rơp swà lai oh mi trôh nơ̆m Galile.” 33Mơya kla wăl dẵư, Pier tơs î Kơnràñ lah: “Bulah lơ̆gay jơno sơmăm tìs anẵu cro bơtău, mơya ăñ rơp ơ̆ dơ̆ găy kŏng sơmăm tìs.” 34Yang Jesu tơs î ông: “Iyŏ ngăn, ăñ tơs î mê, lah nơ̆m tơmăng dô, lai matô̆ ia ndro, mê rơp khan ăñ păy dơ̆.” 35Pier tơs î Kơnràñ lah: “Tien gơs dilah ăñ păl sơ̆t î cro bơtău, ăn nên-nôn ngăn rơp ơ̆ khan cro bơtău.” Gừn lơ̆gay cro bơtê kŭng tơs gư̆p tîgư̆n.

36Ma-ngkơi gư̆n, Yang Jesu swà băl î ƀòn gô trôh nơ̆m du-anẵu sơnăn la Ghetsemane, î Kơnràñ pơđơ lơ̆gay cro bơtê: “Ăm nggui madô trôh jơ ăñ swà manăy hôi-dăn.” 37Ma-ngkơi jơ bơlăm băl î Pier gư̆m bea hê kon klo Seƀeđe, Kơnràñ sơntơm moat-jrum gư̆m mơrêh-mơrăñ. 38Dơ̆ gư̆n, Kơnràñ tơs î ƀòn gô: “Hwîng-soan ăñ ndăng moat-jrum ngăn trôh dî sơ̆t. Ăm wăl cĕ nơ̆m dô gư̆m kah-rngăl băl î ăñ.” 39Tơm tô̆ swà wĭc dư̆ng-iè te, Kơnràñ cun măt mơ̆n nteàh, hôi-dăn î tơs lah: “Ơ Bàp kon dê, dilah jơno la digơlăn, dăn e wan dô tơlôh bơh kon. Bulah tîgư̆n, ơ̆ gư̆ptî nùs-kơñ Kon, mà la gư̆ptî Bàp.” 40Sŏng gư̆n Kơnràñ trôh î lơ̆gay cro bơtê gừn tơmpơl ƀòn gô ndăng bĭc, gừn Kơnràñ tơs î Pier: “Tîgư̆n la, oh mi ơ̆ lôh kah-rngăl băl î ăñ dî du-jơ ya? 41Kah-rngăl cĕ î hôi-dăn lơi oh mi ơ̆ gôtơmơ̆t nơ̆m jơno pơlum. Bulah hwîng-nùs gư̆n kơñ ngăn, mà să-jăn gừn lơbăn-lơñô.” 42Du dơ̆ te, tơm tô̆ tơlôh swà nơ̆m dơ̆ bea, Kơnràñ hôi-dăn, lah: “Ơ Bàp kon dê, dilah bră dô ơ̆ digơlăn swà găn, nư̆ng sî kon păl ñô wan rơ̆, gừn dăn nùs-kơñ Bàp tom dî.” 43Ma-ngkơi jơ trôh du dơ̆ te, Kơnràñ tơmpơl ƀòn gô ndăng bĭc, bơh măt ƀòn gô kŏng kơjơ̆ măt bĭc ngăn. 44Gừn du dơ̆ te, ma-ngkơi jơ lơi ƀòn gô wăl sŏng gư̆n swà, Kơnràñ hôi-dăn dơ̆ păy, tơs te lơ̆gay jơno gư̆ptî gư̆n te. 45Ma-ngkơi gư̆n, Kơnràñ trôh î lơ̆gay cro bơtê gừn tơs î ƀòn gô lah: “Oh mi hôm ndăng bĭc lơhà î bơdê ya? Lăng năy, jơ mơñ trôh lờt, gừn Kon-Mơnùs ndăng kŏng nap lơboh nơ̆m tê tơmpôl cro tồi-glài. 46Ñă atẵy cĕ, ƀòn mơ̆n păl swà jờh. Lăng năy, cro tơmdră ăñ sŏng trôh lờt.”

47Tơm tô̆ Kơnràñ hôm ndăng tơs, gừn lăng năy, Juđa, du hôi nơ̆m jư̆t-bea hê cro bơtê, trôh, gừn băl î gô la du tơmpôl cro khăi ngăn iyà đao gư̆m mư̆ng, bơh anẵu lơ̆gay cro gơnoăr bơlăm-găl ăn jơno duh-khoai dơng î lơ̆gay cro kwăng kra nơ̆m lang bol dê. 48Jơ gư̆n, cro tơmdră Kơnràñ sŏng e ƀòn gô du-lăm têl, lah: “Cro găy mà ăñ cư̆m gừn la cro gư̆n. Kơ̆p cĕ ông gư̆n.” 49Ƀăt jơ gư̆n, ma-ngkơi jơ swà trôh Yang Jesu, gô tơs: “Dăn còp-să Raƀi!” sŏng gư̆n gô cư̆m Kơnràñ. 50Mơya Yang Jesu tơs î gô: “Ơ bơyô, bơh jơno dô mà mê trôh nơ̆m dô.” Pơnjăt te, ma-ngkơi tơm jơ trôh en, ƀòn gô e tê sơbê̆ Yang Jesu î kơ̆p jư Kơnràñ. 51Gừn lăng năy, du hôi nơ̆m tơmpôl cro swà băl î Yang Jesu, tơm tô̆ e tê, sŏng tă đao mơ̆n makin gừn păc cro dê̆-gơna cro gơnoăr bơlăm-găl ăn jơno duh-khoai dơng, koh tĕ tua cro klo dô. 52Dơ̆ gư̆n, Yang Jesu tơs î cro rơ̆: “Prăp cĕ đao mê nơ̆m anẵu gô, bơh lơ̆gay tơmpôl cro găy iyà đao rơp sơ̆t bơh đao. 53Hala mê kơlôi lah ăñ ơ̆ dî gơnoăr dăn Bàp ăñ, sŏng gư̆n Kơnràñ pơđơ trôh jai ma ăñ rlo jư̆t-bea tơmpôl cro gơndrơh hala ơ̆h? 54Tîgư̆n, lơh amơh lơ̆gay jơno nơ̆m Sră-Goh dî sơlôh jîng iyŏ ngăn, lah bră dô păl tom tơlôh tîgư̆n?” 55Nơ̆m jơ gư̆n, Yang Jesu tơs î tơmpôl lang bol: “Ƀòn ông swà iyà băl î đao gư̆m mư̆ng lơi kơ̆p ăñ gư̆ptî kơ̆p du hôi cro kơntô̆ng ya? Kơp nge, ăñ nggui bơtău nhòng duh-khoai mà ƀòn ông ơ̆ kơ̆p ăñ. 56Mơya lơ̆gay bră dô tom tơlôh lơi lơ̆gay jơno cêh cro gơnoăr-hwơr digơlăn dî sơlôh jîng iyŏ ngăn.” Dơ̆ gư̆n, tơm tô̆ lơi căư Kơnràñ lờt, lơ̆gay cro bơtê sŏng toat ămpôn.

57Jơ gư̆n, tơmpôl cro kơ̆p Yang Jesu sŏng iyà Kơnràñ trôh ma cro gơnoăr bơlăm-găl ăn jơno duh-khoai dơng sơnăn Kaiphe, la anẵu mà tơmpôl cro bơtău jơno-bơlăm î lơ̆gay cro kwăng kra sŏng ăm bơjư̆m băl î găp. 58Hôm Pier swà jăt Kơnràñ bơh đah ma wĭc trôh anẵu ƀlang cro gơnoăr bơlăm-găl ăn jơno duh-khoai dơng. Tơm tô̆ mơ̆t nhòng lờt, ông nggui nteàh băl î tơmpôl lĭñ ăm jư lơi lăng jơno dơ̆t-lŭi bră mơmơh tîgay. 59Jơ gư̆n, lơ̆gay cro gơnoăr bơlăm-găl ăn jơno duh-khoai dơng gư̆m lơ̆gay Tơmpôl Jơnư̆m ndăng jôi jơno lơh cư̆ng blăc blơ̆ tơmdră wăl Yang Jesu, lơi lơh mơmơh ƀòn gô digơlăn lơh-glài tơngsơ̆t Kơnràñ. 60Gừn ƀòn gô ơ̆ jôi dî jơno găy, bulah khăi cro sŏng ñă lơh cư̆ng-blăc. Mơya ma-ngkơi gư̆n, tom bea hê cro tơlôh, 61sŏng tơs lah: “Cro dô sŏng tơs bơtău lah: ‘Ăñ digơlăn phà tơngroh hîh jư̆m Yang Tơm Trồ dê î băt tơngñă wăl gô nơ̆m păy nge.’” 62Ma-ngkơi jơ ñă atẵy, cro gơnoăr bơlăm-găl ăn jơno duh-khoai dơng lùp Kơnràñ: “Mê ơ̆ kla dẵư ơ̆h? Tơmpôl ƀòn dô ndăng lơh cư̆ng tơmdră wăl mê tî năy teh?” 63Mơya Yang Jesu ăm-ƀơt. Cro gơnoăr bơlăm-găl ăn jơno duh-khoai dơng tơs î Kơnràñ: “Bơh Yang Tơm Trồ jîng miek, ăñ pơđơ bơtrôt mê lơi mê tơs ma ƀòn hî gư̆t mê gừn tom iyŏ la Yang Dŏng-Klàs, Kon Yang Tơm Trồ, hala ơ̆h?” 64Yang Jesu tơs băl î ông gư̆n: “Să tơm ông sŏng tơs dêh tîgư̆n. Bulah tîgư̆n, ăñ tơs ma ƀòn ông gư̆t, bơh tô̆ tơnge dô, ƀòn ông rơp tơmpơl Kon-Mơnùs nggui đah tê ma Bơtao Gơnăp-Gơnoăr dê; î sơđah cŭngsî khô̆k tô̆ trồ.” 65Dơ̆ gư̆n, cro gơnoăr bơlăm-găl ăn jơno duh-khoai dơng crề ao rơnjai mơ̆n, tơs lah: “Gô tơs jơno sơmăm tìs-glài î Yang Tơm Trồ. Ngglơh ƀòn mơ̆n hôm jôi cro lơh cư̆ng te? Toh tò, jơ dô ƀòn ông sŏng kơnău jơno tơs sơmăm tìs-glài î Yang Tơm Trồ lờt. 66Ƀòn ông kơlôi mơmơh?” Gừn tơm tô̆ kla dẵư, ƀòn gô tơs lah: “Gô ngăn la păl sơ̆t.” 67Ma-ngkơi gư̆n, ƀòn gô soh nơ̆m măt Kơnràñ, pơng lơh Kơnràñ, sŏng gư̆n pah Kơnràñ, 68lah: “Ơ Yang Dŏng-Klàs, tơs hwơr cĕ ma ƀòn hî hă. Mơ̆t cro la cro sŏng pơng lơh ông?”

69Jơ gư̆n, Pier ndăng nggui đah makin ƀlang, gừn du hôi cro dê̆-gơna ua trôh en ông, tơs lah: “Mê kŭng ăm băl î Jesu, cro Galile.” 70Mơya ông khan sơđàp măt lơ̆gay ƀòn gô, lah: “Ăñ ơ̆ tom gư̆t e ndăng tơs jơno găy.” 71Gừn ma-ngkơi jơ swà tơlôh trôh mpông, du hôi cro dê̆-gơna ua nde sŏng lăng tơmpơl ông gư̆m tơs î tơmpôl cro ăm nơ̆m gư̆n: “Cro dô kŭng ăm băl î Jesu, cro Nasaret.” 72Gừn ông khan te î dul jơno sràt-să, lah: “Ăñ ơ̆ gư̆t cro gư̆n!” 73Mơya du-yoa te, tơmpôl cro ñă en gư̆n, ma-ngkơi jơ trôh en, sŏng tơs î Pier: “Iyŏ ngăn ông kŭng la du hê nơ̆m tơmpôl ƀòn gô, bơh jơno tơs ông dê lơh ông tơlôh lơ̆gay bră.” 74Dơ̆ rơ̆, ông sơntơm wac-rma, î sràt-să lah: “Ăn ơ̆ tom gư̆t cro gư̆n,” sŏng gư̆n ƀăt jai gư̆n, ia ndro. 75Gừn Pier sơdơ wăl lơ̆gay jơno Yang Jesu sŏng tơs, lah: “Lai matô̆ ia ndro, mê rơp khan ăñ păy dơ̆.” Gừn tơm tô̆ swà tơlôh makin, ông ñim lơngŏ-lơngañ jê-nùs jê-tua.