Mathiơ 23

1Tơmjăt bơh gư̆n, Yang Jesu tơs î tơmpôl lang bol gư̆m lơ̆gay cro bơtê mơ̆n, 2lah: “Lơ̆gay cro bơtău jơno-bơlăm gư̆m tơmpôl cro Pharisi nggui nơ̆m kơgề Môise dê. 3Bơh gư̆n, dilah ƀòn gô ƀăn bơtău oh mi rôh lŏ kơp jơno găy, lơh cĕ î prăp jư lơ̆gay jơno. Mơya bư̆ng lơh-jăt lơ̆gay jơno ƀòn gô lơh, bơh ƀòn gô tơs ma ơ̆ tom lơh. 4Ƀòn gô kăt lơ̆gay jơno kơjơ̆-kơjùt î añ ơ̆ dơi, sŏng gư̆n ƀòn gô tơng-añ cŭng mơnì cro nde, mơya sătan ƀòn gô ơ̆ kơñ tơbi kon tê mơ̆n nơ̆m gư̆n. 5Ƀòn gô lơh kơp bră mơ̆n dê lơi dî cro nde lăng tơmpơl. Bơh ƀòn gô lơh lơ̆gay thô̆ng prăp sră jơno-bơlăm mơ̆n jîng dơng gư̆m sî lơ̆gay tieng ao mơ̆n jîng lơmŏng. 6Ƀòn gô kơñ nggui anẵu màng-ryŭ nơ̆m jơno ñô sa, î lơ̆gay anẵu nggui kơgề mađàp nơ̆m hîh jư̆m, 7băl î lơ̆gay jơno còp-să nơ̆m anẵu drà, gừn dî lang bol sơnăn la ‘Raƀi.’ 8Mơya oh mi rôh lŏ ơ̆ dî păl dî sơnăn la ‘Raƀi,’ bơh cro bơtău oh mi rôh lŏ tom nư̆ng dul, hôm lơ̆gay oh mi rôh lŏ la cro bơtê. 9Gừn oh mi rôh lŏ bư̆ng sơnăn cro găy nơ̆m ù la ‘bàp’ bơh oh mi rôh lŏ tom nư̆ng du hôi Bàp cŭngsî trồ. 10Kŭng bư̆ng lơi mơ̆n dî sơnăn la ‘cro bơtău,’ bơh cro bơtău oh mi rôh lŏ tom nư̆ng du hôi — rơ̆ la Yang Dŏng-Klàs. 11Mơya cro dơng rlo nơ̆m nhòng oh mi rôh lŏ rơp la cro dê̆-gơna oh mi rôh lŏ. 12Hôm cro găy yŏk tơngyơng dêh să rơp kŏng tơngduh nteàh; gừn cro găy tơng-êt să nteàh rơp dî tơngyơng.

13Mơya sơòs-sơngeh ma ƀòn ông, tơmpôl cro bơtău jơno-bơlăm gư̆m cro Pharisi, ơ tơmpôl cro nùs don mablăc năy! Bơh ƀòn ông kơl mpông lơgơ Yang cŭngsî trồ sơđàp măt cro nde. Bơh ƀòn ông gừn ơ̆ mơ̆t nơ̆m nhòng, kŭng ơ̆ lơi ma cro găy mơ̆t dî nhòng. 14[Sơòs-sơngeh ma ƀòn ông, tơmpôl cro bơtău jơno-bơlăm î cro Pharisi, ơ tơmpôl cro nùs don mablăc năy! Bơh ƀòn ông lon sa hîh lơ̆gay cro mơ̆ndro, mà hôi dăn dubă lơmŏng nơ̆m jơno blăc blơ̆.] Tài bơh jơno rơ̆, ƀòn ông rơp kŏng cahrña kơjơ̆ rlo. 15Sơòs-sơngeh ma ƀòn ông, tơmpôl cro bơtău jơno-bơlăm gư̆m cro Pharisi, ơ tơmpôl cro nùs don mablăc! Bơh ƀòn ông swà găn dàlîng gư̆m ù rău-răñ lơi lơh du hôi cro mơ̆t nơ̆m gung duh-khoai, gừn tơm tô̆ cro gư̆n sŏng gôjîng tîgư̆n, ƀòn ông lơh cro rơ̆ gôjîng kon so brah-nting rlo bea dơ̆ ƀòn ông.

16Sơòs-sơngeh ma ƀòn ông, tơmpôl cro ñô̆ng măt bơlăm gung, rơ̆ la tơmpôl cro tơs: ‘Cro găy sràt-să bơh hîh duh-khoai gừn ơ̆ tom jơno găy ơ̆h. Mơya cro găy sràt-să bơh màh hîh duh-khoai dê gừn rơ̆ la kađòng.’ 17Ơ tơmpôl cro wì-lơngôh gư̆m tơmpôl ñô̆ng măt năy! Bơh jơno găy la mang rlo — màh hala hîh duh-khoai lơh màh gôjîng dî sang-goh? 18Hôm wăl: ‘Cro găy sràt-să bơh kaƀang duh-khoai gừn ơ̆ tom jơno găy ơ̆h. Mơya cro găy sràt-să bơh jơno ăn cŭngsî kaƀang duh-khoai gừn rơ̆ la kađòng.’ 19Ơ tơmpôl cro wì-lơngôh gư̆m tơmpôl ñô̆ng măt năy! Bơh jơno găy la mang rlo, jơno ăn duh-khoai hala kaƀang duh-khoai lơh jơno ăn duh-khoai gôjîng dî sang-goh? 20Gư̆n-jîng, cro găy sŏng sràt-să bơh kaƀang duh-khoai gừn sràt-să bơh kaƀang duh-khoai gư̆m bơh lơ̆gay jơno cŭngsî kaƀang gư̆n. 21Cro găy sŏng sràt-să bơh hîh duh-khoai gừn sràt-să bơh hîh duh-khoai gư̆m bơh Bơtao ăm nơ̆m gư̆n. 22Gừn cro găy sŏng sràt-să bơh trồ gừn sràt-să bơh sơban Yang Tơm Trồ dê, gư̆m bơh Bơtao ăm nơ̆m gư̆n.

23Sơòs-sơngeh ma ƀòn ông, ơ tơmpôl cro bơtău jơno-bơlăm gư̆m cro Pharisi, tơmpôl cro nùs don mablăc! Bơh ƀòn ông ăn pơnah jư̆t bièp sî-sơdao hơ, gừn la bièp ƀô î bièp krô̆ng, mà lơi căư lơ̆gay bră dơng mang rlo jơno-bơlăm dê — rơ̆ la jơno tơpăt-durư̆ng, nùs kơñ-kơloh î jơno don-tơpăt. Pơnah nde, rơ̆ la jơno dî păl lơi lơh lơ̆gay bră dô, gừn ơ̆ lơi căư lơ̆gay bră năy. 24Ơ tơmpôl cro ñô̆ng măt bơlăm gung năy, rơ̆ la tơmpôl cro plồ jîng du-lăm sơmô̆ êt, mơya lon lơ̆ du-lăm lakđa!

25Sơòs-sơngeh ma ƀòn ông, tơmpôl cro bơtău jơno-bơlăm gư̆m cro Pharisi, ơ tơmpôl cro nùs don mablăc! Bơh ƀòn ông rao lơhiê tikîng wan î sơlao, mơya nơ̆m nhòng gừn gô bîng-jut jơno kơntô̆ng-kơño î jơno khăt-gơboh. 26Ơ tơmpôl cro Pharisi ñô̆ng măt năy! Lai ngăn, rao lơhiê cĕ nơ̆m nhòng wan î sơlao, lơi makin gô dê kŭng gôjîng lơhiê-lơhàc.

27Sơòs-sơngeh ma ƀòn ông, tơmpôl cro bơtău jơno-bơlăm gư̆m cro Pharisi, ơ tơmpôl cro nùs don mablăc năy! Bơh ƀòn ông gư̆ptî mơ̆ntô ƀùc brah cua bẵu, la lơ̆gay jơno bulah makin lăng mơ-nĕ manai, mơya nơ̆m nhòng gừn bîng katîng cro sơ̆t î wêl-tăl jơno sơmơ̆-sơmĭñ. 28Kŭng gư̆p tîgư̆n, bulah đah makin ƀòn ông lơh gư̆ptî tơpăt-durư̆ng sơmăt cro nde, mơya nhòng nùs ƀòn ông gừn bîng jơno mablăc î jơno tồi-glài bờk-mơsăk.

29Sơòs-sơngeh ma ƀòn ông, tơmpôl cro bơtău jơno-bơlăm gư̆m cro Pharisi, ơ tơmpôl cro nùs don mablăc năy! Bơh ƀòn ông băt tơngñă matô ƀùc ma lơ̆gay cro gơnoăr-hwơr î mhơ̆ matô ƀùc cro tơpăt-durư̆ng dê. 30Ƀòn ông tơs lah: ‘Dilah ƀòn hî jîng nơ̆m rai ông-pang mơ̆n, gừn ngăn la ƀòn hî sŏng ơ̆ lơh lơ̆gay cro ngui băl î ƀòn gô anẵu mham lơ̆gay cro gơnoăr-hwơr.’ 31Gư̆n-jîng, ƀòn mê lơh cư̆ng dêh bơh sătan lah mơ̆n la kon so tơmpôl cro sŏng tơngsơ̆t lơ̆gay cro gơnoăr-hwơr dê, 32gừn ƀòn ông kŭng lơh tư̆ng bîng-tăl dơnău tồi-glài bờk mơsăk ông-pang mơ̆n dê! 33Ơ nŏk-noi beh năy, nŏk-noi beh tơ̆nglơ dê, amơh ƀòn mê rơp pleh klàs dî bơh jơno lơh-glài nơ̆m brŏng-oềs dô? 34Tài bơh jơno dô, lăng cĕ năy, ăñ rơp pơđơ lơ̆gay cro gơnoăr-hwơr, cro jăk-sai gư̆m cro bơtău jơno-bơlăm trôh ma î ƀòn ông. Bơh nhòng ƀòn gô, ƀòn ông rơp tơngsơ̆t î pư̆ng điñ, kŭng bơh nhòng ƀòn gô, ƀòn ông rơp pơng lơh nơ̆m lơ̆gay hîh jư̆m mơ̆n î tơte bơh ƀòn dô trôh ƀòn năy, 35amơh digơlăn trôh cŭngsî ƀòn ông lơ̆gay mham tơpăt-durư̆ng sŏng kŏng tôh nơ̆m ù, bơh mham Abel, cro tơpăt-durư̆ng dê, trôh dî mham Sacari dê, kon klo Ƀaraci, cro mà ƀòn ông sŏng tơngsơ̆t sơ̆t nhòng anẵu sang-goh î kaƀang duh-khoai. 36Iyŏ ngăn, ăn tơs î ƀòn ông, lơ̆gay bră gư̆n rơp tơmtom trôh ma nŏk-noi dô.

37Ơ Jerusalem, Jerusalem, mê sŏng tơngsơ̆t lơ̆gay cro gơnoăr-hwơr gư̆m kơ̆ndang lô̆ lơ̆gay cro dî pơđơ swà trôh î mê! Nhẵư dơ̆ ăñ kơñ bơjư̆m wăl kon so mê dê, gư̆ptî ia măy trư̆p ia kon nơ̆m phôm mơnơ, ma mê ơ̆ kơñ! 38Lăng tò, hîh ƀòn ông rơp kŏng lơi căư ngêt-ngờt ma ƀòn ông. 39Bơh ăñ tơs î ƀòn ông, ƀòn ông nên-nôn ngăn rơp ơ̆ tơmpơl ăñ bơh dô trôh dî jơ găy ƀòn ông tơs lah: ‘Jong-rơ Bơtao trôh nơ̆m sơnăn Yang.’”