Mathiơ 24

1Ma-ngkơi jơ tơlôh bơh hîh duh-khoai, Yang Jesu swà gung te. Sŏng gư̆n lơ̆gay cro bơtê Kơnràñ trôh en lơi sơđah ma Kơnràñ lăng lơ̆gay bră băt-tơngñă hîh duh-khoai dê. 2Mơya tơm tô̆ kla dẵư wăl, Kơnràñ tơs î ƀòn gô lah: “Oh mi ơ̆ lăng tơmpơl lơ̆gay jơno gư̆n ơ̆h? Iyŏ ngăn, ăñ tơs î oh mi, anẵu dô nên-nôn ngăn rơp ơ̆ tom khô̆k lô̆ găy hôm ăm cŭngsî du-khŏk lô̆ nde mà ơ̆ kŏng tơlah-rlăm.”

3Jơ gư̆n, tơm tô̆ Kơnràñ ndăng nggui nơ̆m yồ Ôlibe, lơ̆gay cro bơtê trôh tơmtom dêh Kơnràñ, tơs lah: “Dăn e ƀòn hî gư̆t jơ găy lơ̆gay bră rơ̆ rơp tơmtom, î têl phadêh jơno trôh cro bơtău dê gư̆m nge lŭi-dơ̆t rơp la jơno găy?” 4Tơm tô̆ kla dẵư, Yang Jesu tơs î ƀòn gô lah: “Kơhea cĕ bư̆ng lơi cro găy digơlăn lơh oh mi swà tìs gung. 5Bơh tom khăi cro rơp e sơnăn ăñ, tơs lah: ‘Ăñ la Yang Dŏng-Klàs,’ gừn rơp lơh khăi cro swà tìs gung. 6Pơnah nde, oh mi rơp kơnău bơh jơno kơlîn-kơtoă gư̆m lơ̆gay jơno pơndrơ bơh kơlîn-kơtoă. Oh mi păl kơhea cĕ, bư̆ng kŏng mơrêh-mơrăñ, bơh bră rơ̆ gô păl tơmtom; mơya hôm dahrăư iyŏ la lŭi-dơ̆t. 7Bơh lang bol dô rơp rơndôh ñă tơmdră wăl lang bol nde, lơgơ dô tơmlơh î lơgơ năy, sŏng gư̆n rơp tom jơno jơgloh î wăñ tơlăm ù nơ̆m kơp anẵu. 8Mơya lơ̆gay bră dô la sơntơm lơ̆gay jơno jê-kơkua bơda dê. 9Tơmjăt bơh gư̆n, cro nde rơp tơmơ̆t oh mi nơ̆m anẵu jơno rŭng-rai sŏng gư̆n tơngsơ̆t oh mi, gừn oh mi rơp kŏng kơp lang bol tơcao tài bơh sơnăn ăñ. 10Sŏng gư̆n khăi cro rơp sơmăm tìs, tơmdră găp, gư̆m tơmngañ găp. 11Khăi cro gơnoăr-hwơr mablăc rơp rơndôh ñă gừn lơh ma khăi cro swà tìs gung. 12Tài bơh jơno tồi-glài bờk-mơsăk rơp jîng khăi, jơno kơñ-kơloh khăi cro dê rơp jîng lơngềt. 13Mơya cro găy bơkhê nùs trôh dî lŭi-dơ̆t, cro gư̆n rơp dî dŏng-klàs. 14Jơno Niem dô bơh lơgơ trồ rơp dî tơs bơtău nơ̆m lơ̆gay dunya lơi lơh du jơno cư̆ng ma lơ̆gay lang bol, bơh gư̆n jơno lŭi-dơ̆t rơp trôh.

15Gư̆n-jîng, tơm tô̆ oh mi lăng tơmpơl jơno sơmơ̆-sơmĭñ jơno gơprah-gơprĭng, la jơno sŏng dî cro gơnoăr-hwơr Daniel tơs trôh, ăn nơ̆m anẵu sang-goh” (cro đŏk păl wơng), 16“dơ̆ gư̆n, cro găy ăm nơ̆m lơgơ Juđe toat ămpôn cĕ trôh nơ̆m yồ, 17cro găy ăm cŭngsî tơkang hîh, bư̆ng jư dưñ jini-jơno găy bơh nơ̆m hîh mơ̆n, 18gừn cro găy ăm nơ̆m ƀlang srăy bư̆ng blăc trê wăl dưñ ao răm mơ̆n. 19Mơya sơòs-sơngeh ngăn ma cro-ua tơwă gư̆m lơ̆gay cro găy ndăng e ma kon pô nơ̆m kơp nge gư̆n! 20Mơya hôi-dăn cĕ lơi jơno toat oh mi dê ơ̆ duh tơmơ̆t nơ̆m kơnnhe lơngềt, hala nơ̆m nge Saƀat. 21Bơh dơ̆ rơ̆ rơp tom jơno rŭng-rai dơng, hôm dahrăư tom tơlôh gư̆p tîgư̆n bơhsơm bơjîng dunya trôh dî nge dô, gừn nên-nôn ngăn kŭng rơp ơ̆ tom wăl te. 22Dilah lơ̆gay nge rơ̆ ơ̆ tom gơtơnghuc, gừn nên-nôn ngăn la lơ̆gay să-jăn ơ̆ dî dŏng-klàs. Mơya tài bơh tơmpôl cro dî săc-rwơh, lơ̆gay nge gư̆n rơp dî gơtơnghuc. 23Dơ̆ gư̆n, dilah du hôi cro găy tơs î oh mi: ‘Lăng năy, Yang Dŏng-Klàs ăm nơ̆m dô!’ hala ‘Nơ̆m gư̆n!’ gừn oh mi bư̆ng don. 24Bơh lơ̆gay yang dŏng-klàs mablăc băl î lơ̆gay cro gơnoăr-hwơr mablăc trôh sơđah-să î lơh tơlôh lơ̆gay têl phadêh băl î jơno phadêh-phadai dơng mang tien gơs lơh swà tìs gung, dilah digơlăn, gừn ƀăt băl î tơmpôl cro dî săc-rwơh. 25Lăng dô, ăñ sŏng tơs lai ma oh mi lờt. 26Tîgư̆n, dilah cro nde tơs î ƀòn mê: ‘Lăng năy, Kơnràñ ndăng ăm nơ̆m ƀlang-càs,’ gừn oh mi bư̆ng swà nơ̆m anẵu gư̆n. Hala ‘Lăng dô, anẵu kơp ơdô̆ ndăp,’ gừn oh mi bư̆ng don. 27Bơh lơp ang gơcrà tơlôh bơh đah măt tơnge sŏng gư̆n ang trôh đah măt tơnge ñăp tîgay, gừn jơno trôh wăl Kon-Mơnùs dê kŭng la tîrơ̆. 28Dilah ƀùc sơ̆t nơ̆m anẵu găy, klang rơp tơmƀù wăl anẵu gư̆n.

29Mơya ma-ngkơi jơno rŭng-rai nơ̆m kơp nge gư̆n, măttơnge rơp kơnăm ñô̆ng wăl, mătkhe rơp ơ̆ ang te, lơ̆gay sơmăñ rơp bơh cŭngsî trồ duh, î lơ̆gay gơnoăr-pran cŭngsî trồ rơp wăñ ndrăm. 30Dơ̆ gư̆n, têl phadêh bơh Kon-Mơnùs rơp dî sơđah-să cŭngsî trồ, bơh gư̆n lơ̆gay nŏk-noi nơ̆m ù rơp ñim-rèa. Ƀòn gô rơp tơmpơl Kon-Mơnùs trôh nơ̆m khŏk tô̆ trồ î gơnăp-gơnoăr gư̆m jơno gơklŏ dơng. 31Kơnràñ rơp pơđơ lơ̆gay cro gơndrơh Kơnràñ băl î jơno kơluôk kơ̆ntàs dơng, gừn ƀòn gô rơp bơjư̆m wăl tơmpôl cro dî săc-rwơh Kơnràñ bơh puôn đah trồ, bơh jư̆ng trồ dô trôh dî jư̆ng trồ năy.

32Pơnah nde, bơtê gư̆t cĕ jơno pơ̆niyô dô bơh sî-hra. Tơm tô̆ mbơlong gô gôjîng lơmhên gư̆m sơ̆mbơ̆t nha lờt, gừn oh mi gư̆t lah kơnnhe dôh mơñ trôh. 33Kŭng jăt bră gư̆p tîgư̆n, tơm tô̆ oh mi tơmpơl lơ̆gay jơno dô, gừn oh mi gư̆t lah Kơnràñ ndăng ăm en, ƀăt nơ̆m mpông. 34Iyŏ ngăn, ăñ tơs î oh mi, lah nŏk-noi rai dô nên-nôn ngăn rơp ơ̆ swà găl trôh dî jơ găy lơ̆gay kơp jơno gư̆n sŏng tom tơlôh. 35Trồ î ù rơp roh, mơya lơ̆gay jơno ăñ tơs nên-nôn ngăn rơp ơ̆ tom roh. 36Hôm gôtrê bơh nge î jơ gư̆n gừn ơ̆ tom cro găy gư̆t, gư̆m băl lơ̆gay cro gơndrơh cŭngsî trồ hala Kon, nư̆ng sî Bàp gư̆t gời. 37Bơh nơ̆m rai Nôe mơmơh tîgay, gừn jơno trôh Kon-Mơnùs rơp la gư̆p tîrơ̆. 38Bơh gư̆ptî nơ̆m lơ̆gay nge mađàp dà rlîng, kon-mơnùs kư̆ ñô sa, tơmhòp tơngsa trôh dî nge Nôe mơ̆t nơ̆m ahẵu, 39gừn ƀòn gô ơ̆ gư̆t đăl trôh dî dơ̆ dà-lăp dàlîng trôh gừn iyon lơ̆gay ƀòn gô — jơno trôh Kon-Mơnùs dê kŭng rơp la gư̆ptî gư̆n. 40Dơ̆ rơ̆, bea hê cro-klo ndăng ăm nơ̆m ƀlang srăy — du hôi rơp kŏng iyà swà, du hôi cro dî lơi wăl. 41Bea hê cro-ua ndăng ăm ƀŏ nơ̆m mpăl — du hôi cro rơp kŏng iyà swà, du hôi cro dî lơi wăl. 42Gư̆n-jîng, kơhea cĕ tài bơh oh mi ơ̆ gư̆t nơ̆m nge găy Yang mơ̆n rơp trôh. 43Mơya oh mi păl gư̆t bră dô, lah dilah cro pơnhơm hîh sŏng gư̆t cro kơntô̆ng trôh nơ̆m jơ găy tơmăng, gừn nên-nôn ngăn la ông rơ̆ sŏng kơhea gừn ơ̆ tom lơi ma hîh mơ̆n kŏng cro kơntô̆ng mơ̆t. 44Tài bơh jơno dô, oh mi kŭng păl rcăng cang cĕ, bơh Kon-Mơnùs rơp trôh nơ̆m jơ oh mi ơ̆ kơlôi trôh.

45Gư̆n-jîng, mơ̆t cro la dê̆-gơna don-tơpăt gư̆m jăk-sai mà cro pơnhơm jao ăm lăng hîh cro pơnhơm lơi e jơno sa ma ƀòn gô nơ̆m ñăm tô̆ tơnge? 46Lơnge ma cro dê̆-gơna gư̆n, la cro mà cro pơnhơm mê, ma-ngkơi jơ trôh, rơp tơmpơl mê ndăng lơh tîgư̆n. 47Iyŏ ngăn ăñ tơs î oh mi lah cro pơnhơm rơp tơngñă mê ăm lăng lơ̆gay kơp jini-jơno cro pơnhơm. 48Mơya dilah cro dê̆-gơna bờk-mơsăk gư̆n tơs nơ̆m nùs mơ̆n lah: ‘Cro pơnhơm ăñ băt trôh,’ 49gừn sơntơm pơng lơh lơ̆gay oh mi bơyô cro dê̆-gơna mơ̆n dê, mà ñô sa î tơmpôl mañơ̆l alăk, 50gừn cro pơnhơm cro dê̆-gơna gư̆n rơp trôh nơ̆m nge mà gô ơ̆ kơlôi î nơ̆m jơ mà gô ơ̆ gư̆t. 51Ông rơ̆ rơp pơng lơh gô dubă căk-cê î rơp lơh nên anẵu ma gô băl î tơmpôl cro nùs don mablăc, nơ̆m anẵu gư̆n rơp tom jơno ñim-rèa î tơget sề.