Mathiơ 21

1Tơm tô̆ ƀòn gô mơñ trôh nơ̆m ƀòn dơng Jerusalem, gừn swà trôh nơ̆m Ƀetphage, đah Yồ Ôlibe, dơ̆ rơ̆ Yang Jesu pơđơ bea hê cro bơtê, 2pơđơ ƀòn gô: “Swà mơ̆t cĕ nơ̆m ƀòn êt sơđàp măt oh mi, sŏng gư̆n oh mi rơp tơmpơl jai du-lăm alang măy cro kăt băl î du-lăm alang kon gô dê. Ma-ngkơi jơ hồ săy kăt, lơboh cĕ gô trôh ma ăñ. 3Gừn dilah du hôi cro găy gư̆n tơs jơno găy î oh mi, gừn oh mi rơp tơs lah: ‘Yang kơñ ngui gô,’ sŏng gư̆n cro gư̆n rơp e jai lơi gô swà.” 4Pơnah nde, bră dô tom tơlôh lơi jơno tơs bơh cro gơnoăr-hwơr digơlăn sơlôh jîng iyŏ ngăn, lah:

5“Pơđơ cĕ kon-ua Siôn dê:

Lăng năy, Bơtao e trôh băl ma e,

tơng-êt să î hao alang

— rơ̆ la cŭngsî alang kon, kon alang măy dê.”

6Jơ gư̆n, lơ̆gay cro bơtê, ma-ngkơi jơ swà î lơh-jăt gư̆ptî jơno Yang Jesu sŏng bơtău sơđah ƀòn gô, 7sŏng iyà alang măy î alang kon trê, gừn deh ao mơ̆n cŭngsî gô, sŏng gư̆n Kơnràñ hao nggui cŭngsî gư̆n. 8Jơ gư̆n, khăi ngăn cro nơ̆m lang bol deh ao mơ̆n nơ̆m gung, hôm du pơnah nde gừn păc mbơlong sî gừn deh gô nơ̆m gung. 9Bơh gư̆n, lơ̆gay tơmpôl lang bol swà lai Kơnràñ gư̆m jăt ma-ngkơi sŏng dreo dơng, lah:

“Hôsana kon bơtao Dabit!

Păl jong-rơ Bơtao trôh nơ̆m sơnăn Yang.

Hôsana nơ̆m anẵu yơng rlo!”

10Ma-ngkơi jơ Kơnràñ mơ̆t nơ̆m ƀòn dơng Jerusalem, lơ̆ ƀòn dơng kŏng sơlô̆ng-sơlăng, tơs lah: “Gư̆n la mơ̆t cro?” 11Bơh gư̆n tơmpôl lang bol kla dẵư lah: “Rơ̆ la cro gơnoăr-hwơr Jesu, bơh Nasaret, lơgơ Galile.”

12Yang Jesu swà mơ̆t nơ̆m hîh jư̆m, gừn Kơnràñ tơmprơh lơ̆gay cro kă-brău nơ̆m hîh jư̆m, î tơlơ̆ tơlơ̆p kaƀang cro bơgăl priè dê gư̆m kơgề cro brău sêm kơ̆ntơp dê. 13Kơnràñ tơs î ƀòn gô: “Jơno sŏng dî cêh lah: ‘Hîh Ăñ rơp dî sơnăn la hîh hôi-dăn,’ mơya ƀòn ông sŏng lơh gô jîng trôm cro kơntô̆ng.” 14Sŏng gư̆n tơmpôl cro ñô̆ng măt î cro kwe trôh en Kơnràñ nơ̆m hîh jư̆m, gừn Kơnràñ sămƀeah ma ƀòn gô. 15Mơya lơ̆gay cro gơnoăr ăn jơno duh-khoai î cro bơtău jơno-bơlăm, ma-ngkơi jơ tơmpơl lơ̆gay jơno phadêh-phadai mà Kơnràñ lơh, gừn tơmpôl kơmom dreo dơng nơ̆m hîh jư̆m, lah: “Hôsana kon bơtao Dabit,” gừn ƀòn gô tơcao ngăn. 16Ƀòn gô tơs î Kơnràñ: “Cro bơtău tom kơnău ƀòn gô tơs jơno găy ơ̆?” Mơya Yang Jesu kla dẵư ƀòn gô: “Tom! Ƀòn ông hôm dahrăư đŏk lah: ‘Yang sŏng rcăng lai jơno jong-rơ bơh dẵư khwên-kơmom gư̆m lơ̆gay kơmom hôm pô toh,’ hala ơ̆h?” 17Ma-ngkơi jơ lơi căư ƀòn gô, Kơnràñ swà tơlôh makin ƀòn dơng swà trôh nơ̆m Ƀethani î bơdê tơmăng nơ̆m gư̆n.

18Trôh ang ndrư̆m, tơm tô̆ ndăng mơ̆t nơ̆m ƀòn dơng, gừn Kơnràñ jơgloh. 19Ma-ngkơi jơ lăng tơmpơl du-lăm sî-hra ma lik gung, Kơnràñ swà trôh anẵu sî rơ̆ gừn ơ̆ tơmpơl jơno găy cŭngsî gô nư̆ng nha gời. Kơnràñ tơs î gô: “Ple rơp ơ̆ tom tơlôh te anẵu mê te trôh dî miek miek,” gừn ƀăt jơ gư̆n, sî-hra gư̆n bồi rău jai. 20Tơmpơl gư̆ptî gư̆n lờt, lơ̆gay cro bơtê ndrăt-ndròt, tơs lah: “Lơh amơh gôlơh sî-hra sŏng bồi rău khơñ ngăn tîgư̆n?” 21Gừn tơm tô̆ kla dẵư, Yang Jesu tơs î ƀòn gô lah: “Iyŏ ngăn, ăn tơs î oh mi, dilah oh mi dî jơno don gừn ơ̆ pên wêl-wăl, gừn oh mi rơp ơ̆ dî nư̆ng jơno dô ma sî-hra gời, mơya tien gơs dilah oh mi pơđơ yồ dô: ‘Tơyŏk cĕ cŭngsî î tơngduh să nơ̆m dàlîng,’ gừn bră rơ̆ rơp tơlôh. 22Kơp jơno, bulah lơ̆gay jơno găy oh mi răc-dăn nơ̆m jơno hôi dăn, gừn oh mi rơp dưñ-lăñ dî nơ̆m jơno don.”

23Gừn tơm tô̆ Kơnràñ mơ̆t nơ̆m hîh jư̆m lờt, lơ̆gay cro gơnoăr bơlăm-găl ăn jơno duh-khoai dơng băl î cro kwăng kra nơ̆m lang bol trôh tơmtom Kơnràñ nơ̆m jơ Kơnràñ bơtău, lùp lah: “Bơh jơno gơnoăr găy cro bơtău lơh kơp bră dô, gừn cro găy sŏng e ma cro bơtău jơno gơnoăr rơ̆?” 24Mơya lơi kla dẵư, Yang tơs î ƀòn gô lah: “Ăñ kŭng lùp ƀòn ông du gung, mà dilah ƀòn ông digơlăn kla dẵư ăñ, gừn ăñ kŭng rơp tơs ma ƀòn ông gư̆t bơh jơno gơnoăr găy ăñ ndăng lơh kơp jơno dô. 25Gơnoăr ƀaptem Jăng dê — gơnoăr rơ̆ bơh sơgăy? Bơh trồ hala bơh kon-mơnùs?” Gư̆n-jîng, ƀòn gô tơmbơkai î găp, lah: “Dilah ƀòn mơ̆n tơs: ‘Bơh trồ,’ gừn gô rơp tơs î ƀòn mơ̆n: ‘Gừn tài bơh jơno găy mà ƀòn ông ơ̆ don gô?’ 26Hôm dilah ƀòn mơ̆n tơs lah: ‘Bơh kon-mơnùs,’ gừn ƀòn mơ̆n kơ̆mbrit lang bol, bơh lơ̆gay ƀòn gô lăng Jăng la du hôi cro gơnoăr-hwơr.” 27Gư̆n-jîng tơm tô̆ kla dẵư Yang Jesu, ƀòn gô tơs lah: “Ƀòn hî ơ̆ gư̆t.” Kơnràñ kŭng tơs î ƀòn gô: “Ăñ kŭng ơ̆ e ma ƀòn ông gư̆t, ăñ lơh lơ̆gay bră dô bơh jơno gơnoăr găy. 28Mơya, ƀòn ông kơlôi mơmơh? Du hôi cro năy dî bea hê kon klo, gừn ma-ngkơi tơm jơ trôh î kon dơ̆ sơm, ông tơs lah: ‘Ơ kon klo, nge dô kon swà lơh cĕ bră nơ̆m buơn ño.’ 29Mơya tơm tô̆ kla wăl dẵư, gô tơs lah: ‘Kon ơ̆ kơñ swà,’ mơya ma-ngkơi gư̆n, tơm tô̆ kơlôi wăl, gừn gô swà. 30Hôm ma-ngkơi jơ trôh tơmtom kon dơ̆ bea, cro bàp kŭng tơs gư̆ptî gư̆n, Gừn, tơm tô̆ kla dẵư, gô tơs lah: ‘Kon dô, ơ bàp,’ mà gô ơ̆ tom swà. 31Nơ̆m bea hê kon klo rơ̆, cro găy lơh-jăt nùs bàp mơ̆n dê?” Ƀòn gô kla dẵư: “Kon dơ̆ sơm.” Yang Jesu tơs î ƀòn gô: “Iyŏ ngăn, ăñ tơs î ƀòn ông lah tơmpôl lơboh-dia î cro-ua kliê rơp mơ̆t nơ̆m lơgơ Yang Tơm Trồ lai ƀòn ông. 32Bơh Jăng sŏng trôh ma ƀòn ông nơ̆m gung tơpăt-durư̆ng, mà ƀòn ông ơ̆ don gô. Hôm tơmpôl lơboh-dia gư̆m cro-ua kliê gừn don gô, Mơya ƀòn ông, bulah lăng tơmpơl lờt, sŏng ơ̆ kơñ tơcao mbư̆ng glài ma-ngkơi gư̆n lơi don Jăng.

33Iet kơnău cĕ du-lăm jơno pơ̆niyô nde. Tom du hôi cro pơnhơm ù, la cro sŏng tăm du buơn ño, lơh pơga tĕdơ buơn rơ̆, tẵư du-lăm trôm păt alăk nơ̆m gư̆n, băt-tơngñă du-lăm thăñ ăm jư lăng gừn e tơmpôl tăm ño lơh mơn gô, sŏng ông swà ma lơgơ nde. 34Jơ gư̆n, nơ̆m kơnnhe pĕ ple mơñ trôh, ông pơđơ nhẵư hê cro dê̆-gơna mơ̆n trôh tơmtom tơmpôl lơh buơn ño lơi tơnggom pơnah công nha ông dê. 35Mà tơm tô̆ kơ̆p jư tơmpôl cro dê̆ gơna pơnhơm lờt, tơmpôl tăm ño pơng lơh cro kon dô, tơngsơ̆t cro kon năy, kơdang lô̆ cro kon tò. 36Ông pơđơ wăl lơ̆gay cro dê̆-gơna nde trôh, khăi rlo bơh lai, mơya ƀòn tăm ño lơh ƀòn gô kŭng gư̆p tîgư̆n. 37Gừn ma-ngkơi dơ̆t-lŭi, ông pơđơ sătan kon klo mơ̆n trôh tơmtom ƀòn gô, lah: ‘Ƀòn gô rơp kingam kon klo mơ̆n.’ 38Mơya tơmpôl tăm ño, ma-ngkơi jơ tơmpơl kon klo rơ̆, sŏng bơyê băl î găp: ‘Dô la kon klo sơndơn. Hă, ƀòn mơ̆n tơngsơ̆t cĕ gô sŏng dưñ tơmpìt srăy-brê gô.’ 39Dơ̆ kơ̆p jư kon klo gư̆n lờt, ƀòn gô tư̆ng kon gư̆n makin buơn ño gừn tơngsơ̆t gô. 40Gừn, tơm tô̆ cro pơnhơm buơn ño trôh, ông gư̆n rơp lơh mơmơh tîgay î tơmpôl cro tăm ño gư̆n?” 41Ƀòn gô kla wăl dẵư î Kơnràñ lah: “Ông rơ̆ rơp tơngsơ̆t tơmpôl bờk-mơsăk năy dubă kơjơ̆ ngăn, gừn rơp e ma tơmpôl cro tăm ño nde ơpah buơn, la tơmpôl cro rơp nap wăl ma ông pơnah công nha nơ̆m kơnnhe pĕ ƀòn gô.” 42Yang Jesu tơs î ƀòn gô: “Tom iyŏ ƀòn ông hôm dahrăư đŏk nơ̆m Sră-Goh:

‘Ne-lô̆ mà tơmpôl cro jăt băt lơi căư,

gô sŏng jîng mơ̆m lô̆ joñ hîh.

Bră dô tơlôh bơh Yang,

gừn gô ngăn la jơno crêh-crai nơ̆m măt ƀòn mơ̆n?’

43Tài bơh jơno dô, ăñ tơs î ƀòn ông lah lơgơ Yang Tơm Trồ dê rơp kŏng dưñ tă bơh ƀòn ông gừn rơp jao ma du lang bol lơgơ rơ̆ ma lơh tơlôh ple. 44Cro găy sơmăm blă nơ̆m ne-lô̆ dô rơp kŏng bơcah-lề, hôm ne-lô̆ duh cŭngsî cro găy, gô rơp kơtơ̆ lề cro gư̆n.” 45Ma-ngkơi jơ kơnău lơ̆gay jơno pơ̆niyô Kơnràñ, lơ̆gay cro bơlăm-găl ăn jơno duh-khoai dơng gư̆m tơmpôl cro Pharisi gư̆t đăl lah, Kơnràñ ndăng tơs bơh ƀòn gô. 46Tơm tô̆ jôi jơno kơ̆p Kơnràñ, ƀòn gô kơ̆mbrit tơmpôl lang bol, bơh lang bol lăng Kơnràñ la du hôi cro gơnoăr-hwơr.