Mathiơ 20

1Bơh lơgơ Yang cŭngsî trồ gừn sơntu gư̆ptî du hôi cro pơnhơm ù, la cro tơlôh swà nơ̆m tơmdrư̆m lơi mơn cro lơh bră ma buơn ño mơ̆n. 2Jơ gư̆n, ma-ngkơi jơ du nùs băl î tơmpôl cro lơh bră bơh priè du-dơñe ma du-nge, ông pơđơ ƀòn gô mơ̆t nơ̆m buơn ño gô dê. 3Gừn tơm tô̆ swà tơlôh nơ̆m jơ dơ̆ păy, ông tơmpơl du pơnah nde ndăng ñă ăm gời nơ̆m drà. 4Ông tơs î ƀòn gô lah: ‘Nhẵư hê ƀòn mê kŭng mơ̆t cĕ nơ̆m buơn ño, gừn priè tô̆ tơnge găy la dî păl, gừn ăñ rơp kla ma ƀòn mê.’ 5Sŏng gư̆n ƀòn gô swà jăt. Ma-ngkơi jơ swà tơlôh te nơ̆m jơ dơ̆ pro î dơ̆ sơ̆n, ông kŭng lơh gư̆p tîgư̆n. 6Bơh gư̆n,, dơ̆ swà tơlôh nơ̆m jơ dơ̆ jư̆t-dul, ông tơmpơl du khà cro ndăng ăm ñă, gừn ông tơs î ƀòn gô lah: ‘Ngglơh ƀòn mê ăm ñă gời du-nge nơ̆m dô?’ 7Ƀòn gô kla dẵư î ông lah: ‘Tài bơh ơ̆ tom cro găy mơn ƀòn hî.’ Ông tơs î ƀòn gô: ‘Ƀòn mê kŭng mơ̆t lơh bră cĕ nơ̆m buơn ño.’ 8Sŏng gư̆n trôh brê mhău ñô̆ng, cro pơnhơm buơn ño pơđơ cro ăt-bồ hîh mơ̆n dê: ‘Hôi cĕ tơmpôl cro lơh mơn trôh gừn kla priè tô̆ tơnge ma ƀòn gô, sơntơm bơh cro ma-ngkơi trôh dî cro bơhsơm.’ 9Ma-ngkơi jơ swà trôh, tơmpôl cro lơh mơn nơ̆m jơ jư̆t-dul, kơp cro lăñ dî du-dơñe. 10Hôm tơmpôl cro lơh mơn bơhsơm, dơ̆ swà trôh, sŏng kơlôi lah mơ̆n rơp dưñ-lăñ khăi rlo, mà ƀòn gô kŭng dưñ-lăñ du-dơñe ma kơp cro. 11Mơya ma-ngkơi jơ lăñ priè lờt, ƀòn gô ƀoah-rƀu bơh cro pơnhơm ù, 12lah: ‘Nhẵư hê cro lơh mơn ma-ngkơi gư̆n sŏng lơh bră nư̆ng du jơ, mà cro pơnhơm lơi ƀòn gô durư̆ng băl î ƀòn hî, la tơmpôl cro kŏng sơòs-sơngeh lơ̆ du nge băl jơno dôh tơal kato.’ 13Mơya lơi kla wăl dẵư, cro pơnhơm tơs î du hôi cro nơ̆m ƀòn gô lah: ‘Ơ cro bơyô, ăñ ơ̆ tom lơh tìs î ƀòn mê. Ơ̆-iyŏ ƀòn mê sŏng du nùs băl î ăñ khà du-dơñe hala ơ̆h? 14Dưñ cĕ priè mê dê gừn swà jờh. Hôm ăñ gừn kơñ kla ma lơ̆gay cro ma-ngkơi dô kŭng gư̆ptî mê yà. 15Hala ơ̆ dî gơnoăr ma ăñ lơi lơh jơno ăñ kơñ î lơ̆gay jơno mơ̆n? Hala nơ̆m măt mê gừn ơ̆ sô̆k ăm tài bơh ăñ dî nùs niem?’ 16Kŭng gư̆p tîgư̆n, cro ma-ngkơi rơp gôjîng dơ̆ sơm gừn cro dơ̆ sơm rơp gôjîng ma-ngkơi.”

17Tơm tô̆ ndăng swà nơ̆m ƀòn dơng Jerusalem, Yang Jesu iyà jư̆t-bea hê cro bơtê dêh î mơ̆n, gừn nơ̆m gung swà, Kơnràñ tơs î ƀòn gô: 18“Lăng dô, ƀòn mơ̆n ndăng swà trôh nơ̆m Jerusalem, gừn Kon-Mơnùs rơp kŏng nap ma lơ̆gay cro gơnoăr dơng ăn jơno duh-khoai gư̆m lơ̆gay cro bơtău jơno-bơlăm, sŏng gư̆n ƀòn gô rơp lơh nên glài tơngsơ̆t Kơnràñ 19gừn rơp jao Kơnràñ ma lang bol bơdih lơi tơngñŏ, pơng lơh, î pư̆ng điñ Kơnràñ cŭngsî sî pư̆ng. Sŏng gư̆n nơ̆m nge dơ̆ păy, Kơnràñ rơp jîng wăl.”

20Dơ̆ gư̆n, mơi bea hê kon klo Seƀeđe dê băl î lơ̆gay kon mò trôh en Kơnràñ, cun-khoai î răc-dăn du-lăm jơno bơh Kơnràñ. 21Sŏng gư̆n Kơnràñ tơs î mò: “Jơno găy e kơñ?” Mò kla dẵư î Kơnràñ: “Dăn e gơnoăr lơi bea hê kon klo ăñ dô, du hôi digơlăn nggui đah ma, gừn du hôi nggui đah eo cro bơtău nơ̆m dà lơgơ cro bơtău dê.” 22Mơya tơm tô̆ kla wăl dẵư: Yang Jesu tơs lah: “Păy hê ƀòn mê ơ̆ gư̆t mơ̆n ndăng dăn jơno găy ơ̆h. Bea hê oh mi digơlăn ñô wan mà ăñ sơmơn ñô ơ̆h?” Ƀòn gô tơs î Kơnràñ: “Ƀòn hî digơlăn.” 23Kơnràñ tơs î ƀòn gô: “Bulah oh mi rơp ñô wan ăñ jê, mơya lơi nggui đah ma gừn đah eo ăñ jê ơ̆-iyŏ la bră ăñ lơh nên, mơya la ăn lơi ma tơmpôl cro sŏng dî rcăng bơh Bàp ăñ dê.” 24Ma-ngkơi jơ kơnău gư̆t jơno dô, jư̆t hê cro bơtê năy tơcao nùs î bea hê oh mi. 25Mơya dơ̆ sŏng hôi ƀòn gô trôh î mơ̆n, Yang Jesu tơs lah: “Oh mi gư̆t lah lơ̆gay cro kwăng bơtao lang bol bơdih dê gừn lơh rôn-bơklơ̆n lang bol, gừn tơmpôl cro lơh dơng gừn dưñ ngui gơnoăr-pran ăt-bồ cŭngsî cro nde. 26Nơ̆m oh mi gừn ơ̆-iyŏ tîgư̆n. Ala sơgư̆n, dilah cro găy kơñ lơh dơng nhòng oh mi, gừn cro rơ̆ păl lơh cro duh bră oh mi, 27gừn cro găy kơñ bơlăm-găl nơ̆m oh mi gừn rơp lơh cro dê̆-gơna oh mi dê, 28tien gơs gư̆ptî Kon-Mơnùs ơ̆ trôh lơi dî duh bră, mơya la lơi duh bră cro, î lơi phi jơno jîng mơ̆n gư̆ptî jơno tơwai-glài ala ma khăi cro.”

29Gừn tơm tô̆ ƀòn gô bơh ƀòn dơng Jerikô swà tơlôh, du tơmpôl lang bol khăi swà jăt Kơnràñ. 30Gừn lăng năy, bea hê cro ñô̆ng măt ndăng nggui malik gung. Ma-ngkơi jơ kơnău lah Yang Jesu ndăng swà găn, ƀòn gô dreo dơng, lah: “Ơ Yang, Kon bơtao Dabit, dăn sơmah-kơloh ƀòn hî.” 31Mơya lang bol ƀoah-đas bea hê ƀòn gô, lơi ƀòn gô ăm-ƀơt cĕ, mơya tîgư̆n ƀòn gô dreo dơng rlo te, lah: “Ơ Yang, Kon bơtao Dabit, dăn kơñ-kơloh ƀòn hî.” 32Tơm tô̆ ñă wăl lờt, Yang Jesu hôi ƀòn gô trôh gừn tơs lah: “Ƀòn mê kơñ ăñ lơh jơno găy ma ƀòn mê?” 33Ƀòn gô kla dẵư î Kơnràñ lah: “Ơ Yang, rơ̆ la dăn pẵư măt ma ƀòn hî dî ang.” 34Jơ gư̆n, bơh dî nùs kơñ-kơloh, Yang Jesu tơbi nơ̆m măt ƀòn gô. Ƀăt jơ gư̆n, ƀòn gô dî ang măt jai gừn swà jăt Kơnràñ.