Mathiơ 19

1Bră tom tơlôh la tơm tô̆ Yang Jesu bơtău sŏng lơ̆gay jơno rơ̆, Kơnràñ tơlôh bơh nơ̆m Galile gừn swà trôh nơ̆m lơgơ Juđe ăm manăy dà măy Jôđăn. 2Lơ̆gay tơmpôl lang bol khăi jăt Kơnràñ gừn Kơnràñ sămƀeah ma ƀòn gô nơ̆m anẵu gư̆n.

3Nhẵư hê cro Pharisi trôh en Kơnràñ, lòng Kơnràñ gừn tơs lah: “Cro-klo tom dî gơnoăr lơi căư bo-ua mơ̆n tài bơh kơp jơno găy ơ̆h?” 4Tơm tô̆ kla dẵư, Kơnràñ tơs lah: “Ƀòn ông dahrăư đŏk sră lah Bơtao mon bơjîng bơh dơ̆ sơm sŏng mon jîng ƀòn gô, du hôi cro-klo gư̆m du hôi cro-ua, 5î tơs lah: ‘Tài bơh rơ̆, cro-klo rơp lơi mơi bàp mà kađie-tanăc î bo-ua mơ̆n, gừn lơ̆ bea hê rơp gôjîng du rlău hala amơh.’ 6Tien gơs, ƀòn gô ơ̆ hôm la bea, mơya la du rlău băl. Bơh gư̆n, jơno găy Yang Tơm Trồ sŏng tơmkot î găp, gừn kon-mơnùs ơ̆ dî gơnoăr tơmcơlah.” 7Ƀòn gô tơs î Kơnràñ: “Tîgư̆n, ngglơh Môise bơtău pơđơ dờp sră cư̆ng-tang tơmlơi sŏng gư̆n lơi căư bo-ua?” 8Kơnràñ tơs î ƀòn gô lah: “Bơh jơno kơdăng nùs ƀòn ông dê mà Môise sŏng e gơnoăr ƀòn ông tơmlơi bo-ua mơ̆n, mơya bơhsơm, jơno gư̆n ơ̆-iyŏ la tîgư̆n. 9Mơya ăñ tơs î ƀòn ông lah nư̆ng sî bơh tồi-glài rês-àr bơnan, cro găy lơi căư bo-ua mơ̆n sŏng tơmhòp cro nde gừn tìs-glài rês-àr bơnan; cro tơmhòp cro sŏng lơi căư kŭng tìs-glài rês-àr bơnan.” 10Lơ̆gay cro bơtê tơs î Kơnràñ: “Dilah jơno bo-klo băl î bo-ua mơ̆n la tîgư̆n, gừn niem rlo bư̆ng jôi bo.” 11Mơya Kơnràñ tơs î ƀòn gô: “Ơ̆-iyŏ cro găy kŭng digơlăn dưñ prăp jơno bơtău dô, mơya la ăn lơi ma lơ̆gay cro găy mà jơno gư̆n dờp e. 12Bơh tom lơ̆gay cro konđơi, la lơ̆gay cro dî bơda bơh nơ̆m klô̆ng mơi sŏng tom tîgư̆n; tom cro konđơi ma kŏng cro nde lơh jîng konđơi, gừn tom cro lơh dêh sătan jîng konđơi tài bơh lơgơ trồ. Cro găy digơlăn dưñ prăp jơno bơtău dô, cro gư̆n kư̆ dưñ prăp.”

13Tơmjăt bơh gư̆n, lơ̆gay kơmom êt dî lơboh trôh ma Kơnràñ lơi Kơnràñ ăn tê cŭngsî ƀòn gô î hôi-dăn, mơya lơ̆gay cro bơtê ƀoah-đas ƀòn gô. 14Mơya, Yang Jesu tơs lah: “Lơi cĕ kơmom êt trôh î ăñ, gừn bư̆ng cơkhă ƀòn gô, bơh lơgơ Yang cŭngsî trồ gôtrê ma tơmpôl cro găy gư̆p tîgư̆n.” 15Ma-ngkơi jơ ăn tê cŭngsî ƀòn gô, Kơnràñ bơh gư̆n swà nơ̆m gung.

16Gừn lăng năy, du hôi cro tò trôh en Kơnràñ, sŏng tơs lah: “Ơ cro bơtău, ăñ păl lơh bră niem găy lơi ăñ dî jơno hôm jîng miek miek?” 17Sŏng gư̆n Kơnràñ tơs î gô: “Ngglơh mê lùp ăñ bơh bră niem? Tom nư̆ng du Bơtao la lơbăn-niem gời, hôm dilah mê kơñ mơ̆t dî nơ̆m jơno jîng, prăp jư cĕ lơ̆gay jơno pơđơ bơlăm.” 18Cro gư̆n tơs î Kơnràñ lah: “Lơ̆gay jơno-bơlăm găy?” Sŏng gư̆n Yang Jesu kla dẵư: “Bư̆ng tơngsơ̆t cro, bư̆ng tìs-glài rês-àr bơnan, bư̆ng kơntô̆ng-kơño, bư̆ng lơh cư̆ng blăc, 19don-duh cĕ bàp mơi, î kơñ-kơloh cro tĕdơ mê gư̆ptî sătan mơ̆n.” 20Cro pơnu rơ̆ tơs î Kơnràñ lah: “Ăñ sŏng prăp jư lơ̆gay kơp jơno rơ̆. Ăñ hôm prŏi jơno găy te?” 21Yang Jesu tơs î gô: “Dilah mê kơñ dî wêl-tăl, swà cĕ, brău lơ̆gay jơno găy mơ̆n dî gừn tơmpà ma cro kơsòt-rƀah, gừn mê rơp dî phăn-màng ăm cŭngsî trồ; gừn swà jăt ăñ cĕ!” 22Mơya tơm tô̆ kơnău bră rơ̆ lờt, cro pơnu sŏng swà mơn dê bơh gô moat-jrum, bơh gô dî khăi ngăn phăn-ƀan.

23Jơ gư̆n, Yang Jesu tơs î lơ̆gay cro bơtê mơ̆n: “Iyŏ ngăn, ăñ tơs î oh mi lah, cro kơnhơ̆p-mơ̆nda rơp mơ̆t nơ̆m lơgơ Yang cŭngsî trồ dubă kălkê ngăn. 24Mơya ăñ kŭng tơs ma oh mi gư̆t, lơi lakđa tơcô̆ mơ̆t găn tî trôm jrư̆m la ƀoan rlo cro kơnhơ̆p-mơ̆nda mơ̆t nơ̆m lơgơ Yang Tơm Trồ.” 25Jơ gư̆n, ma-ngkơi tơm jơ kơnău tîgư̆n, lơ̆gay cro bơtê ndrăt-ndròt ngăn, tơs lah: “Tîrơ̆ gừn măt cro digơlăn dî dŏng-klàs?” 26Lăng nê̆ ƀòn gô, Yang Jesu tơs î ƀòn gô lah: “Jăt kon mơnùs, bră dô la ơ̆-rgê lơh, mơya jăt Yang Tơm Trồ, lơ̆gay bră gừn digơlăn.” 27Dơ̆ gư̆n, lơi kla wăl dẵư, Pier tơs î Kơnràñ lah: “Cro bơtău lăng, ƀòn hî sŏng lơi căư lơ̆gay kơp jơno gừn jăt cro bơtău. Tîgư̆n rơp tom jơno găy ăn lơi ma ƀòn hî?” 28Sŏng gư̆n Yang Jesu tơs î ƀòn gô: “Iyŏ ngăn, ăñ tơs î oh mi, lah oh mi, rơ̆ la tơmpôl cro sŏng jăt ăñ, nơ̆m rai bơgăl mhăy, tơm tô̆ Kon-Mơnùs nggui cŭngsî sơban gơklŏ mơ̆n, gừn oh mi kŭng rơp nggui cŭngsî jư̆t-bea sơban, cahrña jư̆t-bea nŏk-noi Israel. 29Kơp cro, rơ̆ la dilah cro găy sŏng lơi căư hîh tơ̆m, oh mi, rôh lŏ, mơi, bàp, kon, bo-ua hala ù-teàh srăy-brê bơh sơnăn ăñ dê, rơp dưñ-lăñ du-rhieng dơ̆ rlo gư̆m dî sơndơn jơno hôm jîng miek miek. 30Mơya khăi cro bơhsơm rơp gôjîng ma-ngkơi, gừn lơ̆gay cro ma-ngkơi rơp gôjîng bơhsơm.