Mathiơ 18

1Nơ̆m jơ gư̆n, lơ̆gay cro bơtê trôh en Yang Jesu, lùp lah: “Dơ̆t-lŭi gừn mơ̆t cro la dơng mang rlo nơ̆m lơgơ Yang cŭngsî trồ?” 2Gừn ma-ngkơi jơ hôi du hôi kơmom êt trôh î mơ̆n, Kơnràñ ăn gô ăm nhòng ƀòn gô 3gừn tơs lah: “Iyŏ ngăn, ăñ tơs î oh mi, dilah oh mi ơ̆ tơmbơgăl gư̆m gôjîng gư̆ptî kơmom êt, gừn nên-nôn ngăn oh mi rơp ơ̆ dî swà mơ̆t nơ̆m lơgơ Yang cŭngsî trồ. 4Tîgư̆n, kơp cro găy tơng-êt să mơ̆n gư̆ptî kơmom êt dô, gừn cro rơ̆ la dơng mang rlo nơ̆m lơgơ Yang cŭngsî trồ. 5Dilah cro găy e sơnăn ăñ wă-rẵu du hôi kơmom êt gư̆ptî dô, gừn cro gư̆n rơp wă-rẵu ăñ. 6Mơya cro găy lơh sơmăm tìs du hôi nơ̆m lơ̆gay cro kơmom êt dô, rơ̆ la tơmpôl cro don anẵu ăñ, gừn jơno dî ngăn ma cro gư̆n rơ̆ la du-lăm mpăl ăn lơi ma alang dî pùc tĕdơ ngkău gô, sŏng gư̆n gô kŏng tơngkrăm nơ̆m dàlîng jrô.

7Sơòs-sơngeh ngăn ma dunya bơh lơ̆gay jơno lơh sơmăm tìs! Tài bơh lơ̆gay jơno lơh sơmăm tìs păl trôh la jơno dî ngăn, bulah tîgư̆n, sơòs-sơngeh ngăn ma cro bơh jơno lơh sơmăm tìs trôh ma cro rơ̆. 8Pơnah nde, dilah tê hala jư̆ng oh mi lơh oh mi sơmăm tìs, păl koh lơi căư cĕ gô gừn tư̆ng wĭc bơh oh mi. Rơ̆ la jơno niem ma oh mi lơi kŏng dơ̆t tê hala kwềt jư̆ng sŏng mơ̆t nơ̆m jơno jîng, rlo la dî tăl bea ƀĕ tê hala bea ƀĕ jư̆ng gừn kŏng tư̆ng nơ̆m oềs hôm miek miek. 9Dilah gơ-măt oh mi lơh oh mi sơmăm tìs, păl kơkwè cĕ gô makin gừn tư̆ng wĭc bơh oh mi. Rơ̆ la jơno niem ma oh mi lơi hôm nư̆ng du-lăm măt sŏng mơ̆t nơ̆m jơno jîng, rlo la dî tăl lơ̆ bea ne gơ-măt gừn kŏng tư̆ng nơ̆m brŏng-oềs rhô. 10Păl kơhea cĕ, oh mi bư̆ng lăng ơ̆săp du hôi nơ̆m lơ̆gay kơmom êt dô. Bơh ăñ tơs î oh mi lah lơ̆gay cro gơndrơh ƀòn gô dê cŭngsî trồ lăng tơmpơl miek măt Bàp ăñ ăm cŭngsî trồ. 11(Bơh Kon-Mơnùs sŏng trôh lơi dŏng-klàs cro kŏng roh-rùi.) 12Oh mi kơlôi amơh? Dilah du hôi cro năy dî du-rhieng lăm belàt, mà du-lăm nơ̆m khà mpôl gô swà tìs-kơ̆mprah, gừn ơ̆-iyŏ ma-ngkơi tơm jơ lơi wăl sơ̆n-jư̆t sơ̆n-lăm nơ̆m yồ gừn swà gung, cro gư̆n jôi lăng belàt kŏng tìs-kơ̆mprah hala ơ̆h? 13Dilah cro rơ̆ digơlăn jôi tom gô, gừn iyŏ ngăn, ăñ tơs î oh mi lah cro gư̆n rơp sơhờp-sờhơn bơh gô rlo la bơh sơ̆n-jư̆t sơ̆n-lăm belàt ơ̆ swà tìs-kơ̆mprah. 14Jăt gư̆p tîgư̆n, jơno kơñ sơđàp măt Bàp cŭngsî trồ oh mi ơ̆ iyŏ la lơi du hôi nơ̆m lơ̆gay cro kơmom êt dô kŏng sơ̆t roh-rùi.

15Pơnah nde, dilah du hôi oh mi rôh lŏ nde lơh tìs î oh mi, swà cĕ, păl ƀoah-đas gô nhòng oh mi î cro gư̆n gời. Dilah cro gư̆n iet kơnău oh mi, gừn oh mi rôh lŏ rơp dî wăl cro oh mi rôh lŏ mơ̆n. 16Mơya dilah cro gư̆n ơ̆ iet jăt, bơlăm iyà cĕ du hôi hala bea hê oh mi te, lơi bơh dẵư tơs bea hala păy hê cro lơh cư̆ng, gừn kơp jơno tơs digơlăn dî lơh nên. 17Hôm dilah cro gư̆n khan ơ̆ kơñ iet kơnău jăt ƀòn gô, tơs e tơnggư̆t cĕ ma Hîh Jư̆m Goh. Mà dilah cro gư̆n kŭng ơ̆ kơñ kơnău Hîh Jư̆m Goh, gừn jăt bơh oh mi rôh lŏ, cro gư̆n tien gơs gư̆ptî lang bol bơdih î cro lơboh-dia. 18Iyŏ ngăn, ăñ tơs î oh mi, dilah oh mi kăt jơno găy nơ̆m ù, gừn jơno rơ̆ rơp kŏng kăt cŭngsî trồ; gừn dilah oh mi pẵư kơp jơno găy nơ̆m ù, gừn jơno rơ̆ rơp dî pẵư cŭngsî trồ. 19Du dơ̆ te, iyŏ ngăn, ăn tơs î oh mi lah dilah bea hê cro nơ̆m oh mi rôh lŏ du nùs băl î găp ăm nơ̆m ù bơh lơ̆gay jơno găy mà dilah ƀòn gô hôi-dăn, gừn jơno gư̆n rơp dî lơh tơngsŏng ma ƀòn gô bơh Bàp ăñ cŭngsî trồ. 20Bơh anẵu găy tom bea hala păy hê cro e bơjư̆m wăl nơ̆m sơnăn ăñ, gừn ăñ ăm nhòng ƀòn gô nơ̆m anẵu gư̆n.”

21Tơmjăt bơh gư̆n, ma-ngkơi jơ trôh en, Pier lùp Kơnràñ lah: “Khoai Yang, du hôi oh mi ăñ rơp tìs-glài tơmdră î ăñ gừn ăñ rơp hồ glài ma amî gư̆n nhẵư dơ̆? Iyŏ ngăn trôh dî poh dơ̆ ya?” 22Yang Jesu tơs î ông: “Ăñ ơ̆ tơs î mê trôh poh dơ̆, mơya la trôh poh-jư̆t dơ̆ poh. 23Tài bơh jơno dô, lơgơ Yang cŭngsî trồ digơlăn sơntu gư̆ptî du hôi cro lơh bơtao, mà cro rơ̆ kơñ katîng khà î lơ̆gay cro dê̆ mơ̆n. 24Jơ gư̆n, tơm tô̆ bơtao sơntơm kla katîng khà, du hôi cro kađòng dồs jư̆t rbô talơng dî iyà lơboh trôh ma bơtao. 25Mơya cro gư̆n ơ̆ digơlăn kla dồs, gư̆n-jîng bơtao pơđơ cro-klo gư̆n păl brău să mơ̆n, băl î bo, kon, gư̆m lơ̆gay jini-jơno mơ̆n dî, sŏng gư̆n kla dồs. 26Bơh gư̆n la ma-ngkơi tơm jơ blă nteàh, cro dê̆ gư̆n cun-khoai sơđàp bơtao, tơs lah: ‘Ơ cro pơnhơm, dăn ăt-ăl î ăñ, sŏng gư̆n ăñ rơp kla wăl ma ông lơ̆gay.’ 27Jơ gư̆n, bơh nùs kơñ-kơloh, pơnhơm cro dê̆ gư̆n sŏng e gôtrê î lơi căư dồs ma gô. 28Mơya dơ̆ tơlôh makin lờt, cro dê̆ gư̆n tơmtom du hôi bơyô mơ̆n dê lơh bră băl, la cro hôm kađòng priè gô du-rhieng dơñe, gừn ma-ngkơi jơ kơ̆p cro gư̆n, gô cơpă ngkău, pơđơ lah: ‘Mê kađòng jơno găy gừn kla cĕ.’ 29Bơh gư̆n la, ma-ngkơi tơm jơ cun gơtăng, cro bơyô lơh bră băl î gô răc-dăn gô, lah: ‘Dăn ăt-ăl î ăñ, sŏng gư̆n ăñ rơp kla wăl ma mê.’ 30Mơya cro gư̆n ơ̆ kơñ. Ala sơgư̆n, tơm tô̆ swà gung, gô hwa cro năy mơ̆t nơ̆m hîh jam trôh dî jơ cro gư̆n kla lơ̆ priè kađòng. 31Tîgư̆n, ma-ngkơi tơm jơ tơmpơl bră sŏng tom tơlôh, lơ̆gay bơyô lơh bră băl gô moat-jrum ngăn. Tơm tô̆ swà trôh lờt, ƀòn gô tơs tơnggư̆t î cro pơnhơm mơ̆n lơ̆gay jơno sŏng tom tơlôh. 32Tơmjăt bơh gư̆n, ma-ngkơi jơ hôi cro dê̆ rơ̆ trôh, cro pơnhơm gô tơs î gô lah: ‘Ơ cro dê̆ bờk-mơsăk năy, ăñ sŏng lơi căư lơ̆gay jơno kađòng priè gư̆n ma mê bơh mê sŏng răc-dăn ăñ. 33Bră kŭng kơñ lơh ăn ma mê ơ̆-iyŏ la kơñ-kơloh cro bơyô lơh bră băl î mơ̆n, kŭng gư̆ptî ăñ kơñ-kơloh mê, hala ơ̆h?’ 34Bơh kŏng gơhao tơcao tîgư̆n, cro pơnhơm gô sŏng jao gô ma tơmpôl ăt-bồ hîh jam trôh dî jơ gô kla lơ̆ jơno găy hôm kađòng priè. 35Bàp ăñ ăm cŭngsî trồ kŭng rơp kla wăl ma oh mi rôh lŏ dubă tîgư̆n, dilah kơp cro nơ̆m oh mi rôh lŏ ơ̆ hồ glài ma oh mi mơ̆n gôjîng bơh nùs-nhơ̆m mơ̆n.”