Mathiơ 15

1Tơmjăt bơh gư̆n, tơmpôl cro Pharisi î cro bơtău jơno-bơlăm bơh Jerusalem trôh ma Yang Jesu, tơs lah: 2“Ngglơh lơ̆gay cro bơtê cro bơtău dê lơh tìs lơ̆gay jơno ờs yo tơmpôl kwăng kra dê? Tài bơh ƀòn gô ơ̆ rao tê tơm tô̆ sa ƀăñ.” 3Mơya tơm tô̆ kla dẵư, Kơnràñ tơs î ƀòn gô lah: “Ngglơh ƀòn ông lơh tìs jơno-bơlăm Yang Tơm Trồ tài bơh lơ̆gay jơno ờs yo mơ̆n dê? 4Bơh Yang Tơm Trồ sŏng pơđơ mơntău, lah: ‘Don dôh cĕ mơi bàp kon dê,’ gừn ‘Cro găy wac-rma mơi hala bàp, păl tơngsơ̆t cro gư̆n.’ 5Mơya ƀòn ông tơs lah: ‘Cro găy tơs î mơi hala bàp mơ̆n: “Dilah jơno găy bơh anẵu kon digơlăn lơh kwơ ma mơi bàp gừn la jơno ăn duh-khoai ma Yang Tơm Trồ,”’ 6gừn cro rơ̆ ngăn ơ̆-iyŏ don dôh bàp mơ̆n. Tîgư̆n, ƀòn ông sŏng lơi căư jơno tơs Yang Tơm Trồ tài bơh jơno ờs yo mơ̆n dê. 7Ơ tơmpôl cro nùs don mablăc năy! Esai sŏng tơs hwơr iyŏ ngăn bơh ƀòn ông, lah:

8‘Lang bol dô don dôh Ăñ nơ̆m kơ̆mbung yôi lơm-piet,

mơya nùs ƀòn gô gừn wĭc ngăn bơh sơ Ăñ.

9Mơya ƀòn gô duh-khoai Ăñ dubă ơ̆ kwơ,

tơm tô̆ ƀăn mơntău lơ̆gay jơno tơpăt la lơ̆gay jơno pơđơ kon-mơnùs dê.’”

10Gừn ma-ngkơi tơm jơ hôi tơmpôl lang bol trôh, Kơnràñ tơs î ƀòn gô lah: “Iet gư̆m wơng cĕ: 11Ơ̆ tom jơno găy swà mơ̆t nơ̆m dẵư lơh sơmơ̆-sơmĭñ dî cro găy, mơya la jơno tơlôh bơh dẵư, jơno dô lơh sơmơ̆-sơmĭñ cro rơ̆.” 12Ma-ngkơi gư̆n, tơm tô̆ sŏng trôh en, lơ̆gay cro bơtê tơs î Kơnràñ lah: “Cro bơtău gư̆t lah tơmpôl cro Pharisi kŏng lăng sơmăm tìs ma-ngkơi tơm jơ kơnău jơno rơ̆ ơ̆?” 13Mơya tơm tô̆ kla dẵư, Kơnràñ tơs lah: “Kơp sî mà Bàp ăñ cŭngsî trồ ơ̆ tăm rơp kŏng bŭi bơh sơ tơm-rieh. 14Lơi cĕ bră gô! Ƀòn gô la cro ñô̆ng bơlăm gung. Mà dilah cro ñô̆ng bơlăm gung cro ñô̆ng, gừn lơ̆ bea hê rơp duh nơ̆m trôm.” 15Jơ gư̆n tơm tô̆ kla wăl dẵư, Pier tơs î Yang lah: “Dăn tơs jơno gơtha pơ̆niyô rơ̆ ma ƀòn hî.” 16Mơya Kơnràñ tơs: “Tien gơs trôh dî jơ dô, oh mi kŭng hôm dahrăư wơng ơ̆h? 17Oh mi ơ̆ wơng gư̆t lah lơ̆gay jơno găy sa mơ̆t nơ̆m dẵư gừn swà jư nhòng klô̆ng sŏng gư̆n dî tơlôh nơ̆m hîh katiu hala ơ̆h? 18Mơya lơ̆gay jơno tơs tơlôh bơh nơ̆m dẵư gôjîng bơh nơ̆m nùs, gừn gô lơh sơmơ̆-sơmĭñ cro nde. 19Bơh nơ̆m nùs gôjîng lơ̆gay jơno kơlôi bờk-mơsăk, tơngsơ̆t cro, rês-àr bơnan, sơlăp-sơbêl, kơntô̆ng-kơño, lơh cư̆ng-blăc gư̆m jơno tơs tral-sơbêl. 20Gư̆n la lơ̆gay jơno lơh sơmơ̆-sơmĭñ cro, hôm sa bơh î tê hôm dahrăư rao gừn ơ̆ lơh sơmơ̆-sơmĭñ ma cro nde.”

21Gừn ma-ngkơi tơm jơ tơlôh bơh nơ̆m gư̆n, Yang Jesu ruc trê kơp đah tơ-nhal nơ̆m ƀòn dơng Tirơ gư̆m Siđôn. 22Gừn lăng năy, tom du hôi cro-ua cro Kanaan, ma-ngkơi tơm jơ bơh anẵu gư̆n trôh, sŏng dreo dơng, lah: “Khoai Yang, Kon bơtao Dabit, dăn sơmah-kơloh ăñ! Kon-ua ăn kŏng cà lơh sơòs-sơngeh ngăn.” 23Mơya Kơnràñ ơ̆ kla wăl mò du-dẵư găy. Ma-ngkơi tơm jơ trôh en Kơnràñ, lơ̆gay cro bơtê dăn Kơnràñ, lah: “Dăn cro bơtău pơđơ mò gư̆n swà cĕ, bơh mò kư̆ dreo kơkrẵy bơh đah ma-ngkơi ƀòn mơ̆n.” 24Hôm dơ̆ kla dẵư, Kơnràñ tơs lah: “Ăñ sŏng ơ̆ dî pơđơ trôh, dilah ơ̆-iyŏ ma lơ̆gay belàt tìs kơ̆mprah hîh Israel dê gời.” 25Mơya ma-ngkơi jơ trôh, mò gư̆n cun-khoai sơđàp Kơnràñ, tơs lah: “Ơ Yang, dăn dŏng ăñ.” 26Jơ gư̆n, tơm tô̆ kla wăl dẵư, Kơnràñ tơs lah: “Dưñ ƀăñ kon so dê sŏng e ma său kon la ơ̆ niem.” 27Mơya mò rơ̆ tơs lah: “Khoai Yang, ngăn tîgư̆n, nư̆ng la lơ̆ mpôl său kon gừn dî sa anẵu lơ̆gay blieng kơnhia ƀăñ duh nteàh bơh kaƀang cro pơnhơm gô.” 28Dơ̆ gư̆n, lơi kla wăl dẵư, Yang Jesu tơs î gô lah: “Ơ cro-ua năy, jơno don mò dơng ngăn. Bră păl dî lơh ma mò jăt gư̆ptî jơno mò kơñ.” Gừn kon ua mò dî sămƀeah nơ̆m jơ gư̆n.

29Ma-ngkơi tơm jơ tơlôh bơh anẵu rơ̆, Yang Jesu swà găn dàlîng Galile, gừn dơ̆ hao cŭng-yồ mơnăm lờt, Kơnràñ nggui nơ̆m anẵu gư̆n. 30Sŏng gư̆n lơ̆gay tơmpôl lang bol khăi swà trôh ma Kơnràñ, tom lơ̆gay cro kwềt-kơte, cro ñô̆ng măt, cro pă-le, cro kơmblău, gư̆m khăi cro nde băl î ƀòn gô. Ƀòn gô ăn lơ̆gay cro gư̆n nơ̆m anẵu jư̆ng Kơnràñ gừn Kơnràñ sămƀeah ma ƀòn gô, 31tien gơs, tơmpôl lang bol ndrăt-ndròt tơm tô̆ tơmpơl cro kơmblău tơs dî, cro pă-le gừn dî ƀeah, cro kwềt-kơte lơbà swà gư̆m cro ñô̆ng măt lăng tơmpơl, sŏng gư̆n ƀòn gô jong-rơ Yang Tơm Trồ Israel dê.

32Jơ gư̆n, tơm tô̆ hôi lơ̆gay cro bơtê mơ̆n wăl, Yang Jesu tơs lah: “Ăñ kơloh-kơlài î tơmpôl lang bol, bơh ƀòn gô kư̆ ăm î ăñ păy nge lờt mà ơ̆ dî jơno găy lơi sa. Ăñ ơ̆ kơñ e ƀòn gô trê bơh klô̆ng jơgloh, kơ̆mbrit ƀòn gô hwơi-nùs jơgloh nơ̆m gung.” 33Lơ̆gay cro bơtê tơs î Kơnràñ lah: “Nơ̆m ƀlang ngêt-ngờt gừn bơh sơgăy dî khăi ƀăñ tîgư̆n, lơi ƀòn hî e ma tơmpôl lang bol khăi tò sa hơm?” 34Yang Jesu tơs î ƀòn gô: “Oh mi dî nhẵư lăm ƀăñ?” Sŏng gư̆n ƀòn gô kla dẵư lah: “Poh-lăm, gư̆m bea păy-lăm ka ahên.” 35Gừn ma-ngkơi tơm jơ pơđơ ma tơmpôl lang bol nggui nơ̆m ù. 36Kơnràñ iyà poh-lăm ƀăñ gư̆m bea păy-lăm ka, gừn ma-ngkơi tơm jơ ưnngai, Kơnràñ pêh ƀăñ dờp ma lơ̆gay cro bơtê, sŏng gư̆n lơ̆gay cro bơtê tơmpà wăl ma tơmpôl lang bol. 37Lang bol să băl gừn dî hơm-le. Ƀòn gô tơmƀù wăl lơ̆gay jơno sa ngkah dî bîng poh bai. 38Jơ gư̆n, khà cro sa la puôn-rbô hê cro-klo, ơ̆ yà cro-ua î kơmom êt. 39Tơm tô̆ sŏng e lang bol trê, Kơnràñ mơ̆t nơ̆m ahẵu swà găn nơ̆m anẵu Magadan.