Mathiơ 16

1Ma-ngkơi jơ trôh en, lơ̆gay cro Pharisi gư̆m cro Saduse — bơh lòng Kơnràñ — sŏng dăn Kơnràñ e ma ƀòn gô du-lăm têl phadêh-phadai bơh trồ. 2Mơya dơ̆ kla wăl dẵư, Kơnràñ tơs î ƀòn gô lah: [“Tơm tô̆ trôh brê mhău ñô̆ng, ƀòn ông tơs lah: ‘Tô̆ tơnge niem, bơh trồ brông.’ 3Tơm ang ndrư̆m dô gừn tơs lah: ‘Tô̆ tơnge nge dô mih rbơ̆t, bơh trồ brông, kơnăm thăñ.’ Bulah ƀòn ông gư̆t đăl nên tăp trồ, mơya ơ̆-rgê lăng đăl jơno têl sơđah tô̆ tơnge.”] 4“Du nŏk-noi bờk-mơsăk gư̆m rês-àr bơnan jôi lăng têl phadêh, mơya têl phadêh rơp ơ̆ dî e ma gô, nư̆ng sî têl phadêh Jôna dê.” Gừn Kơnràñ lơi ƀòn gô gư̆n swà.

5Hôm lơ̆gay cro bơtê gừn hwơbê̆ iyà ƀăn, ma-ngkơi jơ swà trôh mamằ-manăy. 6Jơ gư̆n, Yang Jesu tơs î ƀòn gô lah: “Păl kơhea cĕ î lăng nê̆ bơh dong tơmpôl cro Pharisi î Saduse dê.” 7Mơya, ƀòn gô kư̆ tơmbơkai tơs î găp lah: “Rơ̆ la bơh ƀòn mơ̆n ơ̆ tom iyà băl î ƀăñ.” 8Mơya tơm tô̆ gư̆t jơno dô, Yang Jesu tơs lah: “Ơ tơmpôl cro êt jơno don năy, ngglơh oh mi tơmbơkai î găp lah rơ̆ la bơh mơ̆n ơ̆ tom dî ƀăñ? 9Oh mi hôm dahrăư wơng kŭng ơ̆ sơdơ prăm ƀĕ ƀăñ e ma prăm-rbô hê cro sa, sŏng gư̆n oh mi tơmƀù wăl dî gư̆t nhẵư bai ơ̆h? 10Hala poh ƀĕ ƀăñ e puôn-rbô hê cro sa, sŏng gư̆n oh mi tơmƀù wăl dî nhẵư bai ơ̆h? 11Amơh lơh mà oh mi ơ̆ tom wơng dî lah ăñ ơ̆ tơs jơno găy î oh mi bơh ƀăñ? Mơya păl kơhea lăng bơh dong tơmpôl cro Pharisi î Saduse dê.” 12Dơ̆ gư̆n ƀòn gô wơng lah Kơnràñ ơ̆ pơđơ ƀòn gô kơhea bơh dong ƀăñ, mơya la bơh jơno tơs bơtău tơmpôl cro Pharisi î Saduse dê.

13Jơ gư̆n, ma-ngkơi jơ swà trôh nơ̆m anẵu ƀòn dơng Sesare Philip, Yang Jesu sŏng lùp lơ̆gay cro bơtê mơ̆n, lah: “Cro nde tơs Kon-Mơnùs la măt cro?” 14Sŏng gư̆n ƀòn gô tơs lah: “Du khà cro tơs la Jăng Ƀaptis; hôm du khà cro tơs la Êli; mà du khà nde gừn tơs la Jeremi hala du hôi nơ̆m lơ̆gay cro gơnoăr-hwơr.” 15Kơnràñ tơs î ƀòn gô: “Hôm oh mi tơs ăñ la măt cro?” 16Bơh gư̆n la, tơm tô̆ kla dẵư, Simôn Pier tơs lah: “Cro bơtău la Yang Dŏng-Klàs, Kon Yang Tơm Trồ jîng miek.” 17Jơ gư̆n, tơm tô̆ kla dẵư, Yang Jesu tơs î ông lah: “Ơ Simôn, kon Jôna, mê dî lơnge ngăn, bơh ơ̆-iyŏ rlău î mham sŏng e ma mê gư̆t, mơya la Bàp ăñ jê cŭngsî trồ. 18Hôm ăñ kŭng tơs î mê gư̆t lah mê la Pier, gừn cŭngsî lô̆ dô, ăñ rơp băt-tơngñă Hîh Jư̆m Goh ăñ jê, gừn lơ̆gay mpông lơgơ lang-ƀùc rơp ơ̆ pha-lĭn dî Hîh Jư̆m gư̆n. 19Ăñ rơp jao ma mê lơ̆gay cơ-khwà mpông lơgơ trồ dê, dilah jơno găy mê kăt nơ̆m ù gừn rơp kŏng kăt cŭngsî trồ, gừn dilah jơno găy mê pẵư nteàh ù gừn rơp dî pẵư cŭngsî trồ.” 20Tơmjăt bơh gư̆n, Kơnràñ bơkô̆ lơ̆gay cro bơtê lơi ƀòn gô ơ̆ tơs ma cro găy gư̆t Kơnràñ la Yang Dŏng-klàs.

21Bơh jơ gư̆n, Yang Dŏng-klàs Jesu sơntơm e ma lơ̆gay cro bơtê mơ̆n gư̆t lah Kơnràñ păl swà trôh Jerusalem, gừn kŏng khăi jơno jê-sồt sơòs-sơngeh bơh anẵu tơmpôl cro kwăng kra, lơ̆gay cro gơnoăr dơng ăn jơno duh-khoai băl î cro bơtău jơno-bơlăm, sŏng kŏng tơngsơ̆t gừn dî lơh jîng wăl nơ̆m nge dơ̆ păy. 22Gừn ma-ngkơi jơ kơtô̆k Kơnràñ ăm du đah, Pier sơntơm đas Kơnràñ, lah: “Ơ Yang, Yang Tơm Trồ e nùs niem î Kơnràñ. Bră gư̆n rơp ơ̆ jơ găy tơlôh ma cro bơtău.” 23Mơya tơmblăc să wăl, Kơnràñ tơs î Pier: “Ơ Satan, rîc wăl cĕ ma-ngkơi Ăñ! Mê la lô̆ lơh sơmăm jư̆ng Ăñ, bơh mê ơ̆ kơlôi trôh bră Yang Tơm Trồ dê, mơya la lơ̆gay bră cro nde.” 24Tơmjăt bơh gư̆n, Yang Jesu tơs î lơ̆gay cro bơtê Kơnràñ dê lah: “Dilah cro găy kơñ jăt ma-ngkơi ăñ, gừn cro gư̆n păl lơi căư dêh sătan, tî băl sî pư̆ng mơ̆n dê gừn jăt ăñ. 25Bơh dilah cro găy kơñ dŏng jơno jîng mơ̆n gừn rơp roh gô, hôm cro găy roh jơno jîng sătan tài bơh ăñ gừn rơp jôi dî wăl gô. 26Bơh du hôi cro rơp dî kwơ găy dilah dî lơ̆ dunya, mơya kŏng roh jơno jîng mơ̆n? Hala du hôi cro rơp e jơno găy lơi tơmbơgăl dî jơno jîng mơ̆n? 27Bơh Kon-Mơnùs mơñ trôh nơ̆m jơno gơklŏ Bàp Kơnràñ dê băl î lơ̆gay cro gơndrơh Kơnràñ. Gừn nơ̆m jơ gư̆n, Kơnràñ rơp kla ma kơp cro jăt gư̆ptî bră ƀòn gô lơh. 28Iyŏ ngăn, ăñ tơs î oh mi lah tom nhẵư hê cro ndăng ñă nơ̆m dô, la tơmpôl cro nên-nôn ngăn rơp ơ̆ tơmtom jơno sơ̆t trôh dî jơ ƀòn gô tơmpơl Kon-Mơnùs trôh nơ̆m lơgơ Kơnràñ.”