Mathiơ 14

1Nơ̆m tô̆ tơnge gư̆n, Herôt bơtao oh kơnău jơno pơndrơ bơh Yang Jesu. 2Bơtao tơs î lơ̆gay dê̆-gơna mơ̆n lah: “Rơ̆ la Jăng Ƀaptis. Ông rơ̆ sŏng dî lơh jîng wăl bơh anẵu sơ̆t, gư̆n-jîng bơh gư̆n, lơ̆gay bră gơnăp-gơnoăr ndăng lơh nơ̆m anẵu cro dô.” 3Bơh Herôt, ma-ngkơi tơm tô̆ kơ̆p sŏng pơđơ căp Jăng, gừn tơng-gron tơmơ̆t nơ̆m hîh jam, tài bơh Herôdias, bo-ua Philip dê, oh klo bơtao. 4Bơh Jăng sŏng tơs î bơtao lah: “Đah pơnah bơtao, ơ̆ dî gơnoăr ăm î ua gư̆n.” 5Gừn bulah kơñ tơngsơ̆t Jăng cĕ, mơya bơtao kơ̆mbrit lang bol, bơh ƀòn gô lăng Jăng gư̆ptî du hôi cro gơnoăr-hwơr. 6Mơya tơm tô̆ trôh bơjư̆m-sa kah nge bơda Herôt dê, kon-ua Herôdias tơmya nơ̆m nhòng anẵu ñô sa gừn lơh niem nùs Herôt. 7Gư̆n-jîng, bơtao sŏng hăư băl î du jơno sràt-să lơi dờp e ma gô bulah jơno găy mà gô dăn. 8Jơ gư̆n, tơm tô̆ sŏng kŏng pơđơ-bơtrôt lai gư̆n bơh mơi gô, gô tơs lah: “Dăn e ma kon ƀăt jơ dô, kơdò găl Jăng Ƀaptis dê ăn nơ̆m sơlao.” 9Gừn bulah moat-jrum ngăn, mơya tài bơh jơno sràt-să mơ̆n dê gư̆m lơ̆gay tơmpôl cro năc nggui sa băl, gừn bơtao sŏng pơđơ gơnoăr lơi lơh jăt nùs kon-ua. 10Ma-ngkơi jơ pơđơ cro swà, bơtao pơđơ koh ngkău Jăng nơ̆m hîh jam. 11Kơdò găl Jăng dê dî iyà trôh ăn nơ̆m sơlao sŏng gư̆n dî dờp ma kon-ua, gừn gô iyà lơboh ma mơi gô. 12Tơm tô̆ dî trôh en lờt, lơ̆gay cro bơtê Jăng dê dưñ ƀùc gừn iyà tăp ông. Gừn dơ̆ sŏng swà trôh, ƀòn gô tơs wăl ma Yang Jesu.

13Jơ gư̆n, tơm tô̆ kơnău lờt, Yang Jesu pleh bơh anẵu gư̆n mơ̆t nơ̆m du-lăm ahẵu, swà trôh anẵu ngêt-ngờt ăm dêh du hôi mơ̆n. Bơh kơnău gư̆t tîgư̆n, lơ̆gay lang bol bơh lơ̆gay ƀòn dơng swà jư̆ng jăt Kơnràñ. 14Gừn tơm tô̆ swà tơlôh, Kơnràñ tơmpơl lang bol khăi, gừn e nùs lơngŏ-lơngañ kơñ-kơloh î tơmpôl lang bol gừn Kơnràñ sămƀeah lơ̆gay cro lơbăn-lơñô ƀòn gô dê. 15Jơ gư̆n, tơm tô̆ trôh mhău ñô̆ng, lơ̆gay cro bơtê trôh î Kơnràñ, tơs lah: “Anẵu dô gừn ngêt-ngờt, î jơ dô gừn brê kŭng mhău lờt. Dăn cro bơtău e tơmpôl lang bol trê lơi tơm tô̆ swà trôh nơ̆m kơp ƀòn lờt, ƀòn gô digơlăn tăc jơno sa ma mơ̆n.” 16Mơya Yang Jesu tơs î ƀòn gô lah: “Ƀòn gô ơ̆ păl cang swà. Oh mi păl e ma ƀòn gô sa.” 17Dơ̆ gư̆n, ƀòn gô tơs î Kơnràñ lah: “Nơ̆m dô ƀòn hî ơ̆ tom dî jơno găy, nư̆ng prăm-lăm ƀăñ î bea-lăm ka.” 18Sŏng gư̆n Kơnràñ tơs lah: “Iyà cĕ jơno gư̆n trôh ma ăñ.” 19Gừn tơm tô̆ pơđơ ma tơmpôl lang bol nggui nteàh khơ̆ lờt, tơm tô̆ iyà prăm-lăm ƀăñ î bea-lăm ka, ngẵư măt cŭngsî trồ, Kơnràñ ưnngai, î pêh ƀăñ, Kơnràñ dờp jơno sa ma lơ̆gay cro bơtê, hôm lơ̆gay cro bơtê tơmpà ma tơmpôl lang bol. 20Lơ̆gay lang bol sa băl gừn dî hơm-le. Sŏng gư̆n cro săc lơ̆gay kơ̆ndrai-ru hôm wăl bơh kơp kơ̆ndrai ƀăñ — dî jư̆t-bea bai bîng. 21Jơ gư̆n, khà cro sa la mơñ prăm-rbô hê cro-klo, hôm dahrăư yà cro-ua î kơmom ahên.

22Ƀăt jơ gư̆n, Kơnràñ pơtĕo lơ̆gay cro bơtê lơbà mơ̆t nơ̆m ahẵu gừn swà găn lai Kơnràñ mamằ-manăy, tơm tô̆ Kơnràñ pơđơ tơmpôl lang bol cơlah trê. 23Dơ̆ sŏng e lang bol trê, Kơnràñ swà cŭng-yồ mơnăm lơi hôi-dăn dêh. Trôh tơmăng, Kơnràñ ăm du hôi nơ̆m gư̆n. 24Hôm ahẵu ăm nhòng dàlîng gừn kŏng ryà dà sơn-gàc kơdăng ngăn, bơh cal khôm tơblơ̆. 25Jơ gư̆n, nơ̆m jơ dơ̆ puôn tơmăng rơ̆, Kơnràñ trôh băl ma ƀòn gô, tơm tô̆ swà jư̆ng tî măt dàlîng. 26Mơya ma-ngkơi tơm jơ tơmpơl Kơnràñ lơbà swà tî măt dàlîng, lơ̆gay cro bơtê kơ̆mbrit-kơ̆mbròt, tơs lah: “Gư̆n la phùc,” sŏng gư̆n ƀòn gô dreo dơng nơ̆m jơno kơ̆mbrit. 27Bơh gư̆n la, Yang Jesu pẵư dẵư tơs î ƀòn gô lah: “Kơđư̆ng nùs cĕ! La ăñ dô. Bư̆ng kơ̆mbrit!” 28Jơ gư̆n, tơm tô̆ kla dẵư Kơnràñ, Pier tơs lah: “Khoai Yang, dilah ngăn la cro bơtău, dăn e gơnoăr ma ăñ swà tî măt dàlîng trôh ma cro bơtău.” 29Sŏng gư̆n Kơnràñ tơs lah: “Swà trôh cĕ.” Gừn ma-ngkơi tơm jơ swà tơlôh bơh nơ̆m ahẵu, Pier lơbà swà tî măt dàlîng trôh ma Yang Jesu. 30Mơya tơm tô̆ tơmpơl cal kơdăng, ông kơ̆mbrit ngăn, gừn dơ̆ mơñ gôkrăm nơ̆m dà, ông kơkrẵy dơng, lah: “Ơ Yang, dăn dŏng ăñ!” 31Ƀăt jơ gư̆n, ma-ngkơi tơm jơ e tê, Yang Jesu sơbê̆ kơ̆p yŏk Pier gừn tơs î ông lah: “Ơ cro êt jơno don, tài bơh jơno găy mà mê pên wêl-wăl?” 32Dơ̆ ƀòn gô lơbà mơ̆t nơ̆m ahẵu lờt, cal bơdê pôh. 33Hôm tơmpôl cro nơ̆m ahẵu gừn duh-khoai Kơnràñ lah: “Iyŏ ngăn, cro bơtău la Kon Yang Tơm Trồ.”

34Dơ̆ swà găn trôh ma năy lờt, ƀòn gô mơ̆t nơ̆m mamằ nơ̆m Genesaret. 35Ma-ngkơi tơm jơ gư̆t đăl Kơnràñ, lang bol nơ̆m rơ̆ pơđơ cro tơs pơndrơ kơp anẵu tĕdơ gư̆n, gừn cro nde lơboh trôh ma Kơnràñ khăi cro kòp jê. 36Ƀòn gô dăn Kơnràñ lơi ƀòn gô digơlăn tơbi nơ̆m tieng ao Kơnràñ dê, gừn kơp cro găy tơbi gừn dî ƀeah kòp.