Mathiơ 12

1Nơ̆m tô̆ tơnge gư̆n, Yang Jesu swà găn lơ̆gay srăy kôi-mi nơ̆m nge Saƀat, mà lơ̆gay cro bơtê Kơnràñ dê jơgloh gừn ƀòn gô sơntơm katĕ ngkơ̆m kôi gừn sa. 2Mơya ma-ngkơi tơm jơ tơmpơl jơno gư̆n, lơ̆gay cro Pharisi tơs î Kơnràñ lah: “Lăng tò, lơ̆gay cro bơtê ông dê lơh jơno ơ̆ dî gơnoăr lơh nơ̆m nge Saƀat.” 3Mơya, Kơnràñ tơs î ƀòn gô lah: “Ƀòn ông ơ̆ lăng sră cêh bơh jơno Dabit sŏng lơh nơ̆m jơ bơtao î tơmpôl cro swà băl î mơ̆n kŏng jơgloh hala ơ̆h? 4Tîgay bơtao sŏng mơ̆t nhòng hîh Yang Tơm Trồ dê î sa ƀăñ ăn pơn-dư̆ng, mà ƀăñ gư̆n gừn ơ̆ e gơnoăr bơtao î tơmpôl cro swà băl î bơtao sa, sî nư̆ng ăn lơi ma cro gơnoăr ăn jơno duh-khoai. 5Hala ƀòn ông ơ̆ đŏk tơmpơl nơ̆m jơno-bơlăm lah nơ̆m nge Saƀat, lơ̆gay cro gơnoăr ăn jơno duh-khoai nơ̆m hîh duh-khoai lơh tìs jơno nơ̆m nge Saƀat mà ƀòn gô ơ̆ tom glài ơ̆h? 6Mơya ăñ tơs î ƀòn ông lah du hôi Bơtao dơng rlo hîh duh-khoai ndăng ăm nơ̆m dô. 7Mơya dilah lơ̆gay ƀòn ông ờs sŏng wơng gư̆t jơno gơtha seng dô la jơno găy: ‘Ăñ kơñ nùs kơñ-kơloh sơmah ơ̆-iyŏ jơno ăn duh-khoai,’ gừn nên-nôn ngăn la ƀòn ông sŏng ơ̆ lơh nên glài cro ơ̆ tom glài. 8Bơh Kon-Mơnùs la Yang nge Saƀat dê.”

9Gừn tơm tô̆ sŏng tơlôh bơh nơ̆m gư̆n, Kơnràñ mơ̆t nơ̆m hîh jư̆m ƀòn gô dê. 10Lăng năy, tom du hôi cro kŏng sìa kơ̆mpang tê, gừn ƀòn gô khao lùp Yang Jesu, lah: “Tom iyŏ dî gơnoăr sămƀeah nơ̆m nge Saƀat?” lơi ma ƀòn gô digơlăn kơ̆p glài Kơnràñ. 11Mơya Kơnràñ tơs î ƀòn gô lah: “Tom cro găy nơ̆m ƀòn ông, mà cro rơ̆ dî du-lăm belàt, gừn dilah gô duh nhòng trôm jrô nơ̆m nge Saƀat, gừn cro rơ̆ ơ̆ dưñ kơ̆p bơkhê gô gừn kơtô̆k cŭngsî? 12Gừn kon-mơnùs gừn dơng mang rlo ma belàt gư̆t nhẵư! Gư̆n-jîng, dî gơnoăr lơh bră niem nơ̆m nge Saƀat.” 13Ma-ngkơi gư̆n, Kơnràñ tơs î cro rơ̆ lah: “Yŏk cĕ tê mê cŭngsî.” Cro rơ̆ yŏk tê cŭngsî gừn tê dî ƀeah pran-kơdăng, gư̆ptî kơ̆mpang tê năy. 14Mơya ma-ngkơi tơm jơ swà tơlôh, tơmpôl cro Pharisi jôi kai kơnĕ tơmdră Kơnràñ lơi ƀòn gô lơh mơmơh digơlăn tơngsơ̆t Kơnràñ.

15Mơya bơh sŏng gư̆t tîgư̆n, Yang Jesu ruc pleh bơh anẵu gư̆n. Khăi cro sŏng swà jăt Kơnràñ, sŏng gư̆n Kơnràñ sămƀeah ma lơ̆gay ƀòn gô, 16gừn Kơnràñ khă đas ƀòn gô lơi ƀòn gô bư̆ng lơh Kơnràñ tơlôh să, 17lơi ma jơno sŏng dî tơs kơnơm bơh cro gơnoăr-hwơr Esai dî sơlôh jîng iyŏ ngăn, lah:

18“Lăng năy, dê̆-gơna Ăñ, Cro mà Ăñ sŏng săc-rwơh;

Cro kơñ-kơloh Ăñ jê, mà nơ̆m anẵu Gô, hwîng-soan Ăñ niem-nùs lơ̆ kơp jơno.

Ăñ rơp ăn Hwîng Ăñ nơ̆m Gô,

gừn Gô rơp tơs bơtău jơno tơpăt-durư̆ng ma lang bol bơdih.

19Gô rơp ơ̆ tơmbơkai hala dreo dơng;

kŭng ơ̆ tom cro găy rơp kơnău dẵư Gô nơ̆m gung dơng.

20Gô rơp ơ̆ geh sî proh sŏng pă-le;

Gô rơp ơ̆ tơngsơ̆t oềs đeng mơñ sơ̆t,

trôh dî jơ Gô lơh jơno tơpăt-durư̆ng pha rlo,

21gừn lơ̆gay lang bol bơdih rơp dî jơno cang-kơnơm anẵu sơnăn Gô.”

22Ma-ngkơi gư̆n, du hôi cro ñô̆ng măt gư̆m kơmblău kŏng cà lơh dî lơboh trôh ma Kơnràñ, gừn Kơnràñ sămƀeah ma cro gư̆n, lơh cro kơmblău dô tơs dî gư̆m tơmpơl. 23Du tơmpôl lang bol ndrăt-ndròt î tơs lah: “Jơno cro dô la kon Dabit dê?” 24Hôm tơmpôl cro Pharisi, ma-ngkơi tơm jơ kơnău bră dô, sŏng tơs lah: “Ông gư̆n ơ̆-rgê tơmprơh cà dî, dilah ơ̆ kơnơm bơh Ƀeelseƀul la bơtao cà.” 25Mơya bơh sŏng gư̆t jơno kơlôi ƀòn gô dê, Kơnràñ tơs î ƀòn gô lah: “Lơ̆gay lơgơ kăp-crề tơmdră nư̆ng găp gừn rơp kŏng roh kơ̆mprah-kơ̆mprĭng, gừn lơ̆gay ƀòn dơng hala hîh kŏng kăp-crề tơmcah dêh nư̆ng găp gừn rơp ơ̆ ñă kơđư̆ng. 26Dilah cà Satan tơmprơh Satan, gừn gô kŏng kăp-crề tơmdră dêh nư̆ng gô. Gư̆n-jîng, amơh lơgơ gô ñă kơđư̆ng dî? 27Gừn dilah ăñ bơh Ƀeelseƀul lơi tơmprơh cà, gừn kon so ƀòn ông bơh cro găy lơi tơmprơh ƀòn gô? Bơh jơno dô, ƀòn gô rơp la tơmpôl cro cahrña ƀòn ông. 28Mơya dilah ăñ tơmprơh lơ̆gay cà-ràk kơnơm bơh Hwîng Yang Tơm Trồ dê, tîgư̆n lơgơ Yang Tơm Trồ sŏng trôh nơ̆m ƀòn ông. 29Hala amơh cro găy digơlăn mơ̆t nơ̆m hîh du hôi cro pran-kơdăng gừn kơntô̆ng jơno cro rơ̆, dilah lai ngăn cro gư̆n ơ̆ căp wăl cro pran-kơdăng rơ̆? Sŏng ma-ngkơi gư̆n, cro dô rơp kơntô̆ng jơno nơ̆m hîh cro gư̆n? 30Cro găy ơ̆ ăm băl î ăñ la tơmdră wăl ăñ, gừn cro găy ơ̆ bơjư̆m băl î ăñ gừn kơ̆mprah-kơ̆mprĭng. 31Bơh jơno dô, ăñ tơs î ƀòn ông, kơp jơno tồi-glài gư̆m jơno sơmăm tìs î Yang Tơm Trồ rơp dî hồ glài ma cro, mơya jơno tơs sơmăm tìs trôh Yang Hwîng Goh gừn rơp ơ̆ dî hồ glài. 32Dilah cro găy tơs jơno tơmdră î Kon-Mơnùs, gừn cro rơ̆ rơp dî hồ-toh. Mơya cro găy tơs jơno tơmdră î Yang Hwîng Goh, gừn cro rơ̆ rơp ơ̆ dî hồ-toh, băl nơ̆m rai dô hala rai ma-ngkơi. 33Hala, rong sî niem gừn ple gô niem, hala rong sî ƀiƀà gừn ple gô ƀiƀà, bơh sî dî đăl gư̆t kơnơm bơh ple gô dê. 34Ơ nŏk-noi beh tơ̆nglơ năy, bơh la bờk-mơsăk, ƀòn ông amơh digơlăn tơs jơno niem teh? Bơh dẵư tơs tơlôh jơno bîng-jut nơ̆m nùs. 35Cro lơbăn-niem, bơh nơ̆m nùs bîng-jut jơno niem tơs tơlôh jơno niem, ma cro bờk-mơsăk bơh nơ̆m nùs bîng-jut jơno bờk-mơsăk tơs tơlôh jơno bờk-mơsăk. 36Mơya ăñ tơs î ƀòn ông lah, lơ̆gay jơno tơs ơ̆ kwơ mà cro nde tơs, ƀòn gô rơp tơs tơlôh jơno tơs wăl gôtrê bơh gô nơ̆m nge cahrña. 37Tài bơh lơ̆gay jơno tơs mơ̆n dê, ƀòn ông rơp dî sơnăn la tơpăt-durư̆ng, gừn bơh lơ̆gay jơno tơs mơ̆n, ƀòn ông rơp kŏng lơh nên glài.”

38Ma-ngkơi gư̆n, du khà cro bơtău jơno-bơlăm gư̆m cro Pharisi kla dẵư î Kơnràñ lah: “Ơ cro bơtău, ƀòn hî kơñ tơmpơl anẵu cro bơtău du-lăm têl phadêh-phadai.” 39Mơya lơi kla wăl dẵư, Kơnràñ tơs î ƀòn gô lah: “Du nŏk-noi bờk-mơsăk gư̆m rês-àr bơnan jôi lăng du jơno têl phadêh-phadai, mơya ơ̆ tom jơno têl phadêh-phadai găy dî e gời ma gô, nư̆ng sî jơno têl phadêh-phadai bơh cro gơnoăr-hwơr Jôna. 40Bơh Jôna sŏng ăm nơ̆m klô̆ng ka dơng păy nge gư̆m păy măng tîgay, gừn Kon-Mơnùs rơp ăm păy nge gư̆m păy măng ngglăm ù tîgư̆n. 41Nơ̆m nge cahrña, lang bol Ninibe rơp ñă cŭngsî î nŏk-noi dô gừn lơh nên glài gô. Bơh ƀòn gô sŏng tơcao mbư̆ng glài bơh nơ̆m jơno bơtău Jôna, gừn lăng năy, Bơtao dơng rlo Jôna ăm nơ̆m dô. 42Nơ̆m nge cahrña, bơtao ua đah mađăm rơp ndôh ñă î nŏk-noi dô gừn lơh nên glài gô, bơh anẵu dơ̆t-lŭi ple-ù, mò sŏng trôh lơi kơnău jơno jăk-sai Salômôn dê, gừn lăng năy, Bơtao dơng rlo Salômôn ăm nơ̆m dô. 43Rlo tîgư̆n, tơm tô̆ hwîng cà sŏng tơlôh bơh du hôi cro, gô swà găn kơp anẵu rău-răñ, jôi anẵu bơdê mà ơ̆ tom. 44Dơ̆ gư̆n, gô tơs lah: ‘Ăñ rơp trê wăl nơ̆m hîh ăñ mà ăñ sŏng tơlôh swà bơh anẵu rơ̆.’ Ma-ngkơi jơ trôh, gô tơmpơl hîh hwơng gời, sŏng dî was pàs lơhiê î rơndăp niem. 45Ma-ngkơi gư̆n, gô swà gừn bơlăm băl poh-lăm hwîng nde bờk-mơsăk rlo gô, gừn tơm tô̆ sŏng mơ̆t nhòng, lơ̆gay du tơmpôl jîng ăm nơ̆m gư̆n. Gừn rai-jîng cro rơ̆ gôjîng bờk-mơsăk rlo bơh mađàp ƀua. Nŏk-noi bờk-mơsăk dô kŭng rơp gư̆p tîgư̆n.”

46Nơ̆m jơ Kơnràñ hôm ndăng tơs-brê î lang bol, lăng năy, mơi î lơ̆gay oh Kơnràñ trôh ăm ñă makin, jôi jơno răk-sa tơs-brê î Kơnràñ. 47Jơ gư̆n, du hôi cro năy tơs î Kơnràñ: “Lăng năy, mơi î lơ̆gay oh cro bơtău ăm ñă makin, jôi jơno lơi răk-sa tơs-brê î cro bơtău.” 48Mơya tơm tô̆ kla dẵư, Kơnràñ tơs î cro răk-sa băl î mơ̆n lah: “Măt cro la mơi ăñ î măt cro la oh mi ăñ?” 49Gừn ma-ngkơi tơm jơ dờp tê mơ̆n ma đah lơ̆gay cro bơtê mơ̆n: Kơnràñ tơs: “Lăng năy, mơi ăñ î lơ̆gay oh mi ăñ dô! 50Bơh dilah cro găy lơh-jăt jơno kơñ Bàp ăñ dê cŭngsî trồ, gừn cro rơ̆ la oh klo, oh ua î mơi ăñ dê.”