Mak 11:24

1Tơm tô̆ ƀòn gô swà trôh en nơ̆m Jerusalem, trôh nơ̆m Ƀetphage î Ƀethani, bơlao mađah yồ Ôlibe, Kơnràñ pơđơ bea hê cro bơtê Kơnràñ swà, 2gư̆m tơs î ƀòn gô lah: “Swà mơ̆t cĕ nơ̆m ƀòn êt sơđàp măt oh mi, ƀăt tơm jơ mơ̆t trôh nơ̆m gư̆n, oh mi rơp tơmpơl du-lăm alang kon kŏng kăt, hôm dahrăư tom cro găy hao cŭngsî rô̆ng gô. Hồ cĕ săy kăt ma gô gừn tề gô trê ma dô. 3Dilah cro găy lùp oh mi lah: ‘Ngglơh ƀòn amî lơh tîgư̆n?’ gừn kla cĕ dẵư lah: ‘Yang kơñ nggui gô î Kơnràñ rơp lơboh kla wăl gô.’” 4Ƀòn gô tơlôh swà gừn tơmpơl du-lăm alang kon kŏng kăt ƀăt sî mpông makin tikîng gung, gư̆n-jîng ƀòn gô hồ săy ma alang. 5Bea păy hê cro ñă sơgư̆n tơs î ƀòn gô lah: “Jơno bea hê ƀòn mê lơh gư̆n mà hồ î săy kăt alang kon gư̆n?” 6Ƀòn gô kla wăl dẵư ƀòn gư̆n gư̆ptî Yang Jesu sŏng ƀăn tơngkah, gừn lơ̆gay ƀòn gư̆n lơi ma ƀòn gô swà. 7Ƀòn gô iyà alang kon trê ma Yang Jesu sŏng gư̆n deh ao rơnjai ƀòn gô cŭngsî rô̆ng gô, gừn Kơnràñ nggui cŭngsî gư̆n. 8Khăi cro deh ao ƀòn gô nơ̆m gung, hôm du pơnah nde, gừn deh lơ̆gay mbơlong sî sŏng păc bơh makin ƀlang săy. 9Băl lơ̆gay cro swà lai gư̆m lơ̆gay cro jăt ma-ngkơi dreo dơng lah:

“Hôsana! Jong-rơ Bơtao e sơnăn Yang jư trôh.

10Lơnge ma lơgơ rơp trôh ông-pang Dabit ƀòn mơ̆n!

Hôsana nơ̆m anẵu yơng rlo lơ̆gay!”

11Kơnràñ sŏng swà mơ̆t nơ̆m ƀòn dơng Jerusalem, mơ̆t nơ̆m hîh duh-khoai, gừn tơm jơ sŏng lăng tĕdơ lơ̆gay jơno, tài bơh jơ gư̆n kŭng mhău ñô̆ng lờt, Kơnràñ tơlôh swà trôh nơ̆m Ƀethani băl î jư̆t-bea hê cro bơtău. 12Nge ma-ngkơi, dơ̆ ƀòn gô swà tơlôh sŏng bơh Ƀethani, gừn Kơnràñ jơgloh. 13Tơm tô̆ lăng tơmpơl du ƀĕ sî ƀăl dî khăi nha bơh ma wĭc, Kơnràñ trôh, amơh gư̆t Kơnràñ rơp jôi tom ple găy nơ̆m sî hă ơ̆. Mơya dơ̆ sŏng trôh nơ̆m anẵu sî gư̆n, Kơnràñ ơ̆ tơmpơl jơno găy sî nư̆ng nha, bơh hôm dahrăư trôh kơnnhe ple sî ƀăl. 14Lơi wăl bră dô, Kơnràñ tơs î sî gư̆n lah: “Rơp ơ̆ tom dơ̆ găy cro sa ple bơh anẵu mê te.” Lơ̆gay cro bơtê Kơnràñ kơnău jơno gư̆n.

15Tơm tô̆ swà trôh nơ̆m Jerusalem, î mơ̆t nơ̆m hîh duh-khoai, Kơnràñ sơntơm tơmprơh cro kă-brău cro tăc nơ̆m hîh duh-khoai tơlôh makin, Kơnràñ tơlơ̆ tơ̆ngblă kaƀang cro bơgăl jên-priè î kơgề lơ̆gay cro brău sêm kơ̆ntơp. 16Kơnràñ ơ̆ e gơnoăr kơp cro găy iyà jini-jơno swà găn anẵu hîh duh-khoai. 17Sŏng gư̆n Kơnràñ ƀăn mơntău ƀòn gô î tơs lah: “Ơ̆-iyŏ jơno tom cêh lah:

‘Hîh ăñ rơp dî sơnăn la hîh hôi-dăn ma lơ̆gay lang bol’ ya?

Mơya lơ̆gay ƀòn mê sŏng lơh gô gôjîng trôm tơmpôl kơntô̆ng-kơño.”

18Lơ̆gay cro gơnoăr ăn jơno duh-khoai î cro gơnoăr cêh kơnău tîgư̆n, gừn ƀòn gô jôi kơp jơno mà ƀòn gô digơlăn tơngsơ̆t Kơnràñ, bơh ƀòn gô kơ̆mbrit Kơnràñ, tài bơh du lang bol ndrăt-ndròt bơh jơno bơtău Kơnràñ dê. 19Trôh brê mhău ñô̆ng, ƀòn gô tơlôh bơh ƀòn dơng.

20Nơ̆m brê tơm ndrư̆m, tơm jơ ndăng swà găn, ƀòn gô tơmpơl sî ƀăl sŏng rău bơh tơm-rieh. 21Ma-ngkơi jơ sơdơ wăl, Pier tơs î Kơnràñ lah: “Raƀi, lăng tò! Sî ƀăl mà cro bơtău sràt-rma rău lờt.” 22Tơm tô̆ kla wăl dẵư, Yang Jesu tơs î ƀòn gô lah: “Păl dî jơno don anẵu Yang Tơm Trồ. 23Iyŏ ngăn, ăñ tơs î oh mi, lah cro găy tơs î dô̆ng yồ dô: ‘Bŭi tơbŭi cĕ gư̆m mbư̆ng nơ̆m dàlîng,’ mà ơ̆ ping wêl-wăl nơ̆m ngglăm nùs mơ̆n, mơya don lah jơno mơ̆n tơs mơñ tơngtrôh, gừn bră rơp sơlôh ngăn ma cro gư̆n. 24Gư̆n jîng, ăñ tơs î oh mi, jơh lơ̆gay kơp jơno oh mi hôi-dăn gư̆m răc-dăn, păl don lah oh mi sŏng dưñ dî lờt, gừn jơno gư̆n rơp dî sơlôh ngăn ma oh mi. 25Tơm tô̆ oh mi ñă hôi-dăn, dilah oh mi tom jơno tơmdră î cro găy, gừn păl hồ-toh cĕ, lơi Bàp oh mi dê la Bơtao ăm cŭngsî trồ kŭng hồ-toh oh mi bơh lơ̆gay jơno tìs oh mi dê.” 26(Mơya dilah oh mi ơ̆ hồ-toh, gư̆n Bàp oh mi dê la Bơtao ăm cŭngsî trồ kŭng rơp ơ̆ hồ-toh lơ̆gay jơno tìs oh mi dê)

27Sŏng gư̆n ƀòn gô swà trôh te nơ̆m Jerusalem gư̆m tơm tô̆ Kơnràñ ndăng swà nơ̆m hîh duh-khoai, lơ̆gay cro gơnoăr dơng ăn jơno duh-khoai, lơ̆gay cro bơtău jơno-bơlăm, gư̆m lơ̆gay cro kwăng kra trôh ma Kơnràñ. 28Ƀòn gô tơs î Kơnràñ lah: “Bơh gơnoăr găy mà ông lơh lơ̆gay bră gư̆n gư̆m mơ̆t cro sŏng dờp ma ông gơnoăr dô lơi ông digơlăn lơh lơ̆gay jơno gư̆n?” 29Mơya Yang Jesu tơs î ƀòn gô: “Ăñ kŭng rơp lùp lơ̆gay ông du jơno, gừn Kla cĕ dẵư ăñ, sŏng gư̆n ăñ rơp tơs ma lơ̆gay ông bơh gơnoăr găy mà ăñ lơh lơ̆gay bră gư̆n. 30Gơnoăr ƀaptem Jăng dê la bơh trồ hala bơh cro dê? Kla cĕ dẵư ăñ.” 31Ƀòn gô tơmbơyê î găp lah: “Ƀòn mơ̆n tơs amơh lơh dô? Dilah ƀòn mơ̆n tơs: ‘Bơh trồ’ cro dô rơp tơs: ‘Dilah tîgư̆n, bơh jơno găy mà lơ̆gay ông sŏng ơ̆ don Jăng teh?’ 32Tơblơ̆ wăl, dilah ƀòn mơ̆n tơs lah: ‘Bơh cro dê,’ …” (ƀòn gô kơ̆mbrit lang bol, bơh jơh lơ̆gay cro kŭng lăng lah Jăng iyŏ ngăn la du hôi cro gơnoăr hwơr.) 33Gư̆n tơm tô̆ kla dẵư Yang Jesu, ƀòn gô hăư: “Ƀòn hî ơ̆ gư̆t.” Yang Jesu tơs î ƀòn gô: “Ăñ kŭng ơ̆ tơs î lơ̆gay ƀòn ông bơh gơnoăr găy mà ăñ lơh lơ̆gay bră gư̆n.”