Jăng 9

1Sŏng gư̆n nơ̆m jơ ndăng swà gung, Kơnràñ tơmpơl du hôi cro ñô̆ng măt bơh jơ mhăy bơda. 2Lơ̆gay cro bơtê Kơnràñ lùp Kơnràñ lah: “Raƀi, cro găy tìs-glài, amî gư̆n hala mơi bàp amî gư̆n, lơi bơh gư̆n amî gư̆n mhăy bơda kŏng ñô̆ng măt?” 3Yang Jesu kla dẵư lah: “Ơ̆-iyŏ amî gư̆n tìs-glài, kŭng ơ̆-iyŏ mơi bàp amî gư̆n, mơya rơ̆ la lơi bră lơh Yang Tơm Trồ dî rang sơđah nơ̆m anẵu amî gư̆n. 4Dô la jơno păl lơh ma ƀòn mơ̆n lơi lơh bră Bơtao pơđơ ăñ nơ̆m jơ hôm ang. Tơmăng mơñ trôh la jơ ơ̆ cro găy digơlăn lơh bră dî. 5Nơ̆m jơ ăñ ăm nơ̆m dunya, ăñ la jơno ang dunya dê.” 6Ma-ngkơi jơ nhẵư jơno gư̆n, Kơnràñ soh nơ̆m ù, gư̆n î dà dreo, Kơnràñ cơpă jîng bŏ, sŏng gư̆n bŏng ma amî gư̆n bŏ gư̆n nơ̆m bea đah măt amî gư̆n. 7Kơnràñ tơs î gô lah: “Swà cĕ, rao nơ̆m tơlô̆ng dà Silôe” (gô gơtha la “Dî Pơđơ Swà”). Gư̆n-jîng, gô swà gừn rao măt, sŏng gư̆n dî ang wăl măt. 8Tơmjăt te, lơ̆gay oh mi ăm băl du ƀòn î tơmpôl cro lăng tơmpơl gô bơh lai ƀua, bơh jơ gô la cro dăn sa, ƀòn gô tơs lah: “Ơ̆-iyŏ dô la cro ờs nggui dăn sa ya?” 9Du pơnah cro tơs lah: “Gư̆n la amî gư̆n.” Pơnah cro nde tơs lah: “Ơ̆-iyŏ ơ̆h, mơya, cro gư̆n gư̆ptî amî gư̆n.” Gô gừn kư̆ tơs lah: “Ăñ dô.” 10Gư̆n-jîng, ƀòn gô tơs î amî gư̆n lah: “Amơh lơh măt mê ang wăl dî?” 11Amî gư̆n kla dẵư lah: “Cro dî sơnăn la Jesu sŏng pơiyuă bŏ gừn bŏng măt ăñ, sŏng gư̆n pơđơ ăñ lah: ‘Swà cĕ trôh tơlô̆ng Silôe gừn rao.’ Gư̆n-jîng, ma-ngkơi jơ swà gừn rao, ăñ lăng tơmpơl dî.” 12Ƀòn gô tơs î amî gư̆n lah: “Cro gư̆n anẵu găy?” Gô kla dẵư lah: “Ăñ ơ̆ tom gư̆t.”

13Ƀòn gô lơboh amî gư̆n, cro lai mađàp gư̆n kŏng ñô̆ng măt, trôh anẵu cro Pharisi. 14(Bơh jơ gư̆n la nge Saƀat, Yang Jesu sŏng pơiyuă bŏ gừn pẵư măt amî gư̆n nơ̆m nge gư̆n.) 15Tơmjăt te, tơmpôl cro Pharisi kŭng lùp amî gư̆n lơh amơh mà amî gư̆n dî ang măt. Sŏng gư̆n amî gư̆n tơs î ƀòn gô lah: “Ông gư̆n bŏng bŏ nơ̆m măt ăñ, gừn ăñ swà rao gừn tơmpơl dî.” 16Sŏng gư̆n, nhẵư hê cro nơ̆m pơnah tơmpôl cro Pharisi tơs lah: “Cro dô ơ̆ gôtrê ma Yang Tơm Trồ, bơh gô ơ̆ prăp ăn nge Saƀat.” Pơnah nde gừn tơs lah: “Lơh amơh du hôi cro, la cro tìs-glài, digơlăn lơh lơ̆gay têl phadêh tîgư̆n?” Bơh gư̆n tom jơno tơmcơlah nơ̆m nhòng ƀòn gô. 17Gư̆n-jîng ƀòn gô lùp amî ñô̆ng măt du dơ̆ te lah: “Mê tơs jơno găy bơh ông gư̆n, bơh tơm tô̆ ông gư̆n pẵư măt mê?” Bơh gư̆n, amî gư̆n tơs lah: “Ông gư̆n la du hôi cro gơnoăr-hwơr.” 18Gư̆n-jîng, cro Juđa ơ̆ don bơh bră amî gư̆n lah bơh lai gư̆n amî gư̆n ñô̆ng măt mà dî lăng tơmpơl wăl, trôh dî jơ ƀòn gô hôi mơi bàp amî gư̆n, la cro sŏng dî sămƀeah măt. 19Ƀòn gô lùp mơi bàp amî gư̆n lah: “Tom iyŏ dô la kon ông mò, cro mà ông mò tơs la mhăy bơda sŏng ñô̆ng măt? Tîgư̆n, amơh lơh jơ dô amî gư̆n tơmpơl dî?” 20Bơh gư̆n la mơi bàp amî gư̆n kla dẵư gừn ƀòn gô tơs lah: “Ƀòn hî đăl gư̆t lah dô la kon klo ƀòn hî, gừn gô mhăy dî bơda gừn ñô̆ng măt. 21Mơya jơ dô, amơh gô lăng tơmpơl dî, ƀòn hî ơ̆ gư̆t, hala cro găy sŏng pẵư măt gô dê, ƀòn hî kŭng ơ̆ gư̆t. Dăn lùp gô; gô tăl têh dơng. Gô rơp tơs dêh bơh sătan gô.” 22Mơi bàp amî gư̆n tơs bea păy jơno tîgư̆n bơh ƀòn gô kơ̆mbrit cro Juđa. Tài bơh cro Juđa sŏng tơmbơyê lờt, lah dilah cro găy sơnăn Kơnràñ la Yang Dŏng-Klàs, gừn cro rơ̆ kŏng tơmprơh tơlôh bơh nơ̆m hîh jơnư̆m. 23Tài bơh jơno gư̆n, mơi bàp amî gư̆n sŏng tơs lah: “Gô têh dơng sŏng, dăn lùp gô.” 24Gư̆n-jîng, trôh dî dơ̆ bea, ƀòn gô pơđơ hôi cro mà bơh lai sŏng kŏng ñô̆ng măt gừn tơs î gô lah: “Ăn cĕ jơno jong-rơ ma Yang Tơm Trồ. Ƀòn mơ̆n gư̆t lah cro gư̆n la cro tìs-glài.” 25Bơh gư̆n la amî gư̆n kla dẵư lah: “Ông gư̆n la cro tìs-glài hala ơ̆, ăñ ơ̆ gư̆t. Ăñ gư̆t du-lăm jơno, rơ̆ la bulah kŏng ñô̆ng măt, mơya jơ dô ăñ lăng tơmpơl dî.” 26Pơnjăt te, ƀòn gô tơs î amî gư̆n lah: “Cro gư̆n lơh jơno găy ma mê? Ông gư̆n sŏng pẵư măt mê amơh tîgay?” 27Amî gư̆n kla dẵư ƀòn gô lah: “Ăñ tơs sŏng ma ƀòn ông lờt, mà ƀòn ông ơ̆ kơnău? Amơh ƀòn ông kơñ iet wăl? Ơ̆-iyŏ ƀòn ông kŭng kơñ lơh jîng cro bơtê ông gư̆n ya?” 28Bơh gư̆n ƀòn gô tơngyŏ-tơnghiel amî gư̆n gừn tơs lah: “Mê gư̆n la cro bơtê cro gư̆n, hôm ƀòn hî la cro bơtê Môise dê. 29Ƀòn hî gư̆t la Yang Tơm Trồ tơs î Môise, mơya cro dô, ƀòn hî ơ̆ gư̆t la bơh sigăy trôh.” 30Cro-klo kla dẵư gư̆m tơs î ƀòn gô lah: “Gư̆n jơno dô gư̆n la jơno phadêh ngăn, lah ông gư̆n sŏng pẵư măt ăñ mà ƀòn ông ơ̆ gư̆t ông gư̆n la bơh sigăy trôh. 31Ƀòn mơ̆n gư̆t lah Yang Tơm Trồ ơ̆ iet kơnău jơno tơmpôl cro tìs-glài, mơya dilah cro găy dî nùs don kơnơm î lơh-jăt jơno nùs-kơñ Kơnràñ, gừn Kơnràñ iet kơnău cro gư̆n. 32Bơh rai yo ƀua, hôm dahrăư dî kơnău bră du hôi cro găy pẵư măt ma cro ñô̆ng măt bơh mhăy bơda. 33Dilah cro dô ơ̆-iyŏ la bơh Yang Tơm Trồ, gừn cro gư̆n ơ̆ lơh dî kơp bră găy.” 34Ƀòn gô kla dẵư gư̆m tơs î amî gư̆n lah: “Mê dî bơda nơ̆m tồi-glài mà mê ndăng ƀăn mơntău ƀòn hî ya?” Sŏng gư̆n ƀòn gô tơmprơh amî gư̆n tơlôh.

35Yang Jesu kơnău gư̆t la ƀòn gô sŏng tơmprơh amî gư̆n tơlôh makin gừn jôi tơmtom amî gư̆n, Kơnràñ tơs lah: “Mê tom don anẵu Kon-Mơnùs ya?” 36Amî gư̆n kla dẵư î tơs lah: “Cro gư̆n la mơ̆t cro, ơ Kơnràñ, lơi ăñ digơlăn don nơ̆m gô?” 37Yang Jesu tơs î amî gư̆n lah: “Mê kŭng tơmpơl gô sŏng, gừn rơ̆ la cro ndăng tơs î mê dô.” 38Bơh jơ gư̆n, amî gư̆n tơs lah: “Ơ Yang, ăñ don”, gừn amî gư̆n duh-khoai Kơnràñ. 39Yang Jesu tơs lah: “Ăñ sŏng trôh nơ̆m dunya dô tài bơh jơno cahrña, lơi ma tơmpôl cro ơ̆ tơmpơl digơlăn tơmpơl dî, gừn tơmpôl cro lăng tơmpơl gôjîng ñô̆ng măt.” 40Bơh nơ̆m tơmpôl cro Pharisi ndăng ăm sơgư̆n î Kơnràñ, ƀòn gô kơnău lơ̆gay jơno gư̆n, gừn lùp Kơnràñ lah: “Jơno ƀòn hî kŭng kŏng ñô̆ng măt?” 41Yang Jesu tơs î ƀòn gô lah: “Dilah ƀòn ông kŏng ñô̆ng măt gừn nên-nôn ngăn la ƀòn ông ơ̆ tom glài, mơya jơ dô ƀòn ông tơs lah: ‘Ƀòn hî tơmpơl dî.’ Gư̆n-jîng, glài ƀòn ông hôm sơgư̆n.”