Jăng 10

1“Iyŏ ngăn, iyŏ ngăn, ăñ tơs î ƀòn ông, cro găy ơ̆ swà găn mpông tơm tô̆ swà mơ̆t nơ̆m wa belàt, mà hao mơ̆t bơh î tîgung nde, gư̆n la cro kơntô̆ng-kơño. 2Mơya cro swà mơ̆t bơh tî mpông la cro jư belàt. 3Cro ăm jư mpông rưng pẵư mpông ma cro gư̆n, gừn belàt kơnău dẵư cro jư, sŏng gư̆n cro jư hôi sơnăn belàt mơ̆n mà tề-bơlăm ƀòn gô tơlôh makin. 4Tơm tô̆ cro iyà lơ̆gay belàt mơ̆n tơlôh, gô swà mađàp belàt, hôm belàt jăt ma-ngkơi gô, bơh belàt đăl gư̆t dẵư cro jư. 5Mơya gô nên-nôn ngăn rơp ơ̆ swà jăt cro nde, tơblơ̆ wăl, ƀòn gô toat ămpôn bơh gô, bơh gô ơ̆ đăl gư̆t dẵư tơmpôl cro nde.” 6Yang Jesu tơs jơno sơntu dô ma ƀòn gô, mơya ƀòn gô ơ̆ wơng gư̆t lơ̆gay jơno Kơnràñ tơs î ƀòn gô la jơno găy.

7Gư̆n-jîng, Yang Jesu tơs wăl î ƀòn gô lah: “Iyŏ ngăn, iyŏ ngăn, ăñ tơs î ƀòn mê lah ăñ la mpông belàt dê. 8Lơ̆gay cro găy trôh lai ăñ la cro kơntô̆ng-kơño, mơya belàt ơ̆ iet jăt ƀòn gô. 9Ăñ la mpông. Dilah cro găy swà mơ̆t kơnơm bơh ăñ, gừn cro gư̆n rơp dî dŏng-klàs, sŏng gư̆n cro rơ̆ rơp swà mơ̆t, swà tơlôh gừn jôi tơmpơl ƀlang khơ̆. 10Cro kơntô̆ng ơ̆ trôh dilah ơ̆-iyŏ la bơh kơntô̆ng, tơngsơ̆t î tơngroh. Ăñ trôh lơi belàt dî jơno jîng gư̆m dî dubă tơngkah-tơngkăñ. 11Ăñ la cro jư belàt lơbăn-niem. Cro jư belàt lơbăn-niem kŏng roh rai-jîng mơ̆n bơh belàt. 12Cro lơh mơn, bơh ơ̆-iyŏ la cro jư belàt, mà belàt ơ̆-iyŏ la jơno gô, gư̆n-jîng gô tơmpơl său-cơho trôh gừn lơi căư belàt gừn toat klàs sătan mơ̆n, hôm său-cơho kơ̆p belàt î lơh kơ̆mprah-kơ̆mprĭng, 13tài bơh gô la cro lơh mơn gư̆n-jîng jăt î gô, jơno kơlôi ơ̆-iyŏ la bơh belàt. 14Ăn la cro jư lơbăn-niem, ăñ đăl gư̆t belàt ăñ dê, gừn belàt ăñ dê đăl gư̆t ăñ, 15gư̆ptî Bàp gư̆t ăñ, ăñ kŭng gư̆t Bàp; gừn ăñ phi rai-jîng mơ̆n bơh belàt. 16Ăñ dî lơ̆gay belàt nde mà ơ̆ ăm nơ̆m wa dô. Gô kŭng tîrơ̆, kơñ ăñ iyà trê, gừn gô rơp kơnău dẵư ăñ, sŏng gư̆n rơp nư̆ng du mpôl belàt, băl î du hôi cro jư. 17Bơh jơno dô, Bàp kơloh ăñ, tài bơh ăñ phi rai-jîng mơ̆n lơi du dơ̆ te, ăñ digơlăn dưñ dî gô. 18Ơ̆ cro găy tă rai-jîng ăñ bơh ăñ, mơya, ăñ phi dêh să-jăn ăñ. Ăñ dî gơnoăr phi rai-jîng ăñ, gừn ăñ dî gơnoăr dưñ-lăñ gô du dơ̆ te. Ăñ sŏng dưñ jơno pơđơ dô bơh Bàp ăñ.”

19Jơno tơmcơlah te tom tơlôh nhòng tơmpôl cro Juđa tài bơh lơ̆gay jơno gư̆n. 20Bơh gư̆n, khăi cro nơ̆m ƀòn gô tơs lah: “Cro dô kŏng cà lơh î roh tơngoh. Ngglơh ƀòn mê iet jơno gô?” 21Du pơnah nde gừn tơs lah: “Dô ơ̆-iyŏ la jơno tơs cro kŏng cà lơh. Jơno cà digơlăn pẵư măt cro ñô̆ng măt?”

22Sŏng gư̆n, Nge Bơjư̆m-Sa Ăn Hîh Duh-Khoai tom tơlôh nơ̆m anẵu Jerusalem. Jơ gư̆n la kơnnhe lơngềt, 23gừn Yang Jesu ndăng swà bơdăc nơ̆m hîh duh-khoai nơ̆m ƀlang Salômôn. 24Tơmjăt bơh gư̆n, tơmpôl cro Juđa swà ăm tĕdơ Kơnràñ, gừn ƀòn gô tơs î Kơnràñ lah: “Cro bơtău kư̆ lơh wêl-wăl nùs-nhơ̆m ƀòn hî dê trôh dî jơ găy? Dilah cro bơtău la Yang Dŏng-Klàs, tơs cĕ dubă khăt-gơboh loh-lang ma ƀòn hî.” 25Yang Jesu kla dẵư ƀòn gô lah: “Ăñ sŏng tơs î ƀòn ông gừn ƀòn ông ơ̆ don. Lơ̆gay bră mà ăñ lơh nơ̆m sơnăn Bàp ăñ, ƀòn gô lơh cư̆ng bơh ăñ. 26Mơya, ƀòn mê ơ̆ don bơh ƀòn mê ơ̆ gôtrê ma belàt ăñ jê. 27Belàt ăñ kơnău dẵư ăñ, hôm ăñ đăl gư̆t gô, gừn gô jăt ăñ. 28Ăñ kŭng dờp ma gô jơno jîng miek miek, gừn gô nên-nôn ngăn ơ̆ kŏng roh trôh dî miek miek, gừn rơp ơ̆ cro găy kơntô̆ng dî kơp belàt găy nơ̆m khà gô bơh tê ăñ. 29Bàp ăñ, la Bơtao sŏng dờp gô ma ăñ, la dơng mang rlo lơ̆gay, gừn ơ̆ cro găy digơlăn kơntô̆ng gô bơh tê Bàp. 30Ăñ î Bàp la dubă băl.” 31Tơmpôl cro Juđa dưñ te lô̆ lơi digơlăn kơ̆ndang Kơnràñ. 32Yang Jesu kla dẵư î ƀòn gô lah: “Ăñ sŏng rang sơđah ma ƀòn ông khăi bră niem bơh Bàp. Ƀòn ông kơ̆ndang ăñ î lô̆ bơh bră găy nơ̆m khà lơ̆gay bră gư̆n?” 33Lơ̆gay Cro Juđa kla dẵư Kơnràñ lah: “Ƀòn hî ơ̆ kơ̆ndang ông î lô̆ bơh bră niem, mơya bơh glài sơmăm tìs î Yang, î bơh ông, la du hôi kon-mơnùs, ndăng sơnăn dêh mơ̆n la Yang Tơm Trồ.” 34Yang Jesu kla dẵư î ƀòn gô lah: “Nơ̆m jơno-bơlăm ƀòn ông dê, ơ̆-iyŏ tom jơno dî cêh lah: ‘Ăñ tơs lah: “Ƀòn kon la hwîng”’ iyŏ hă ơ̆h? 35Dilah Kơnràñ hôi ƀòn gô, rơ̆ tơmpôl cro mà jơno Yang Tơm Trồ dê trôh, la hwîng (gừn Sră-Goh ơ̆ dî kŏng lơi căư), 36gừn mơmơh ƀòn ông tơs î Bơtao mà Yang Tơm Trồ sŏng ăn dêh î pơđơ trôh nơ̆m dunya lah: ‘Mê sơmăm tìs î Yang,’ bơh ăñ tơs lah: ‘Ăñ la Kon Yang Tơm Trồ’? 37Dilah ăñ ơ̆ ndăng lơh lơ̆gay bră Bàp ăñ dê, gừn bư̆ng don ăñ. 38Mơya dilah ăñ ndăng lơh, bulah ƀòn ông ơ̆ don ăñ, gừn don cĕ lơ̆gay bră gư̆n, lơi ƀòn ông digơlăn gư̆t î wơng lah Bàp nơ̆m ăñ, î ăñ nơ̆m Bàp.” 39Gư̆n-jîng, ƀòn gô jôi te kơp jơno lơi kơ̆p Kơnràñ, mà Kơnràñ klàs bơh tê ƀòn gô.

40Du dơ̆ te, Kơnràñ blăc trê wăl mamằ manăy dà măy Jôđăn, trôh anẵu mà bơh lai ƀua Jăng lơh ƀaptem sŏng gư̆n Kơnràñ ăm wăl nơ̆m gư̆n. 41Khăi cro trôh ma Kơnràñ gừn ƀòn gô tơs lah: “Bulah Jăng ơ̆ lơh têl phadêh găy, mơya kơp jơno mà Jăng sŏng tơs bơh cro dô la ngăn.” 42Gừn nơ̆m anẵu gư̆n, khăi cro ăn nùs don nơ̆m anẵu Kơnràñ.