Jăng 11

1Bơh jơ gư̆n, tom du hôi cro năy kŏng kòp, sơnăn Lasarơ, cro Ƀethani, ăm nơ̆m ƀòn Mari dê gừn amî-ua gô dê la Mathe. 2Hôm Mari la cro bŏng mơñà ƀôhơ̆ ma Yang sŏng gư̆n jut jư̆ng Kơnràñ bơh î sŏ mơ̆n dê, mà oh klo gô dê la Lasarơ ờs ndăng kòp jê. 3Gư̆n jîng, bea hê rôh-ua kơnơm cro pơyoa jơno tơs trôh ma Kơnràñ lah: “Ơ Yang, lăng tò, cro mà Kơnràñ kơñ-kơloh ndăng kŏng kòp.” 4Mơya ma-ngkơi jơ kơnău tîgư̆n, Yang Jesu tơs lah: “Kòp dô ơ̆ păl trôh dî sơ̆t, mơya, bơh jơno gơklŏ Yang Tơm Trồ dê, lơi Kon Yang Tơm Trồ dî jong-rơ kơnơm bơh bră gư̆n.” 5(Yang Jesu kơñ-kơloh Mathe, oh ua gô dê, î Lasarơ.) 6Gư̆n-jîng, tơm tô̆ Kơnràñ kơnău gư̆t lah Lasarơ ndăng kòp jê, bulah jơ gư̆n, Kơnràñ grat ăm wăl bea nge anẵu mà Kơnràñ ndăng ăm. 7Pơnjăt te, ma-ngkơi bơh bră gư̆n, Kơnràñ tơs î lơ̆gay cro bơtê: “Ƀòn mơ̆n păl swà trôh nơ̆m lơgơ Juđe du dơ̆ te.” 8Lơ̆gay cro bơtê tơs î Kơnràñ lah: “Raƀi, jơ dô cro Juđa ndăng jôi jơno kơ̆ndang lô̆ Cro Bơtău, mà Cro Bơtău hôm swà trê anẵu gư̆n du dơ̆ te ya?” 9Yang Jesu kla dẵư lah: “Ơ̆-iyŏ tom jư̆t-bea jơ nơ̆m du-nge ơ̆h? Dilah cro găy swà nơ̆m brê tơnge gừn cro gư̆n ơ̆ duh sơmprah, bơh cro lăng tơmpơl jơno ang dunya dê dô. 10Hôm dilah cro găy swà nơ̆m brê tơmăng, gừn cro rơ̆ duh sơmprah, bơh jơno ang ơ̆ ăm nơ̆m anẵu cro gư̆n.” 11Kơnràñ sŏng tơs gư̆p tîgư̆n, sŏng gư̆n ma-ngkơi gư̆n, Kơnràñ tơs î ƀòn gô lah: “Lasarơ, cro bơyô ƀòn mơ̆n dê, sŏng krăm nơ̆m jơno lơhà bĭc, mơya ăñ trôh la lơi ăñ digơlăn ble amî gư̆n lôh.” 12Gư̆n-jîng, lơ̆gay cro bơtê tơs î Kơnràñ lah: “Ơ Yang, dilah amî dô sŏng krăm nơ̆m jơno lơhà bĭc, gừn amî dô rơp dî pran wăl.” 13(Jơ gư̆n, Yang Jesu ờs tơs bơh jơno sơ̆t Lasarơ dê, mơya tơmpôl ƀòn gư̆n tôn-lah Kơnràñ ndăng tơs bơh jơno ăm bơdê jơno bĭc dê.) 14Gư̆n-jîng, jơ gư̆n Yang Jesu tơs nê̆-năn ma ƀòn gô lah: “Lasarơ sơ̆t sŏng. 15Ăñ sơhờp-sờhơn bơh jơno dî kwơ oh mi dê tài bơh ăñ ơ̆ tom măt nơ̆m gư̆n, lơi oh mi digơlăn don. Mơya bulah tîgư̆n, ƀòn mơ̆n păl trôh î amî gư̆n.” 16Bơh gư̆n, Thôma, dî sơnăn la Didim, tơs î lơ̆gay cro bơtê swà jăt băl î Kơnràñ lah: “Ƀòn mơ̆n kŭng păl swà lơi ƀòn mơ̆n digơlăn sơ̆t băl î Kơnràñ.”

17Gư̆n-jîng, tơm tô̆ trôh anẵu, Yang Jesu tơmpơl amî gư̆n ăm nơ̆m mơ̆ntô ƀùc puôn nge lờt. 18Jơ gư̆n, Ƀethani ăm en Jerusalem, bơh sơgư̆n pơngăp jư̆t-prăm ettađơ. 19Khăi cro nơ̆m khà tơmpôl cro Juđa sŏng swà trôh î Mathe î Mari lơi ƀòn gô digơlăn mơ̆ndơm-mơ̆nieng bea hê ƀòn gư̆n bơh oh klo. 20Bơh gư̆n, tơm tô̆ Mathe kơnău lah Yang Jesu trôh, gô swà wă-rẵu Kơnràñ, hôm Mari nggui nhòng hîh. 21Jơ gư̆n, Mathe tơs î Yang Jesu lah: “Ơ Yang, dilah Kơnràñ ờs ăm nơ̆m dô, gừn nên-nôn ngăn la oh klo ăñ ơ̆ sơ̆t ơ̆h. 22Mơya, tien gơs nơ̆m jơ dô, ăñ gư̆t lah lơ̆gay jơno găy mà Kơnràñ dăn î Yang Tơm Trồ, Yang Tơm Trồ rơp dờp ma Kơnràñ.” 23Yang Jesu tơs î gô lah: “Oh klo e dê rơp jîng wăl.” 24Mathe tơs î Kơnràñ lah: “Ăñ gư̆t lah oh klo rơp jîng wăl nơ̆m jơno jîng wăl nơ̆m nge lŭi-dơ̆t.” 25Yang Jesu tơs î gô lah: “Ăñ la jơno jîng wăl î jơno jîng; cro găy don anẵu ăñ rơp jîng, bulah sơ̆t sŏng lờt; 26hôm cro găy jîng mà don anẵu ăñ gừn nên-nôn ngăn ơ̆ tom sơ̆t trôh dî miek miek. E tom don jơno dô ya?” 27Gô kla dẵư Kơnràñ lah: “Ời, ơ Yang, ăñ don lah Kơnràñ la Yang Dŏng-Klàs, Kon Yang Tơm Trồ, la Bơtao păl trôh nơ̆m dunya.” 28Tơs sŏng tîgư̆n, gô blăc trê gừn hôi dêh Mari, oh mơ̆n, tơs lah: “Cro Bơtău ăm nơ̆m dô gừn ndăng hôi oh.” 29Tơm tô̆ cro-ua gư̆n kơnău tîgư̆n, gừn gô sơbăc-sơbăng ñă atẵy gừn swà trôh î Kơnràñ. 30Jơ gư̆n, Yang Jesu hôm dahrăư mơ̆t nơ̆m ƀòn mơya hôm ăm nơ̆m anẵu mà Mathe tơmtom Kơnràñ. 31Jơ gư̆n, nhẵư hê cro Juđa, la tơmpôl cro ndăng ăm î gô nơ̆m hîh î mơ̆ndơm-mơ̆nieng gô, tơm tô̆ tơmpơl lah Mari sơbăc-sơbăng ñă atẵy î swà tơlôh makin, gừn swà jăt gô, tôn-lah gô swà trôh nơ̆m mơ̆ntô ƀùc lơi gô ñim anẵu gư̆n. 32Bơh gư̆n, tơm jơ Mari trôh anẵu Yang Jesu ăm bơdê, tơm tô̆ lăng tơmpơl Kơnràñ, gô tơmbĭc să anẵu jư̆ng Kơnràñ, tơs î Kơnràñ lah: “Ơ Yang, dilah Kơnràñ ờs ăm nơ̆m dô, gừn nên-nôn ngăn la oh klo ăñ ơ̆ sơ̆t ơ̆h.” 33Gừn, tơm tô̆ Yang Jesu tơmpơl gô ñim, gư̆m tơmpôl cro Juđa swà băl î gô kŭng ñim, Kơnràñ mơrêh-mơrăñ ngglăm nùs-nhơ̆m gừn sătan Kơnràñ rngoh-rngăc. 34Kơnràñ lùp lah: “Oh mi rôh lŏ ăn amî gư̆n anẵu găy?” Ƀòn gô tơs î Kơnràñ lah: “Ơ Yang, dăn trôh gừn lăng.” 35Yang Jesu ñim. 36Gư̆n-jîng, nhẵư hê cro Juđa tơs lah: “Lăng tò, ông gư̆n kơñ kơloh amî gư̆n gư̆t nhẵư!” 37Mơya nhẵư hê cro nơ̆m khà ƀòn gô tơs lah: “Ông dô, la cro sŏng pẵư măt ma cro ñô̆ng măt, gư̆n ơ̆ lơh dî jơno găy lơi ma cro dô bư̆ng sơ̆t ya?” 38Gư̆n-jîng, nơ̆m jơ mơrêh-mơrăñ ngglăm nùs mơ̆n, Yang Jesu swà trôh nơ̆m mơ̆ntô ƀùc. Jơ gư̆n, gư̆n la du trôm lô̆, î du ne-lô̆ cơkhă mađàp mpông. 39Yang Jesu tơs lah: “Tơlơ̆ cĕ ne-lô̆ mande.” Mathe, amî-ua cro sơ̆t gư̆n, tơs î Yang lah: “Ơ Yang, ƀùc oh klo gư̆n ƀô ôm lờt, bơh nge dô la nge dơ̆ puôn.” 40Yang Jesu tơs î gô lah: “Ơ̆-iyŏ ăñ sŏng tơs î e lah dilah e don, gừn e rơp tơmpơl jơno gơklŏ Yang Tơm Trồ dê ya?” 41Gư̆n-jîng, ƀòn gô tơlơ̆ ne-lô̆ mande. Sŏng gư̆n Yang Jesu ngẵư măt cŭngsî trồ gừn tơs lah: “Ơ Bàp, kon ưnngai Bàp bơh Bàp iet kơnău kon. 42Mà kon ờs sŏng gư̆t lah Bàp iet kơnău miek miek, mơya kon tơs tơlôh tài bơh tơmpôl lang bol ndăng ăm ñă tĕdơ dô, lơi ƀòn gô digơlăn don lah Bàp pơđơ kon trôh.” 43Gừn ma-ngkơi jơ sŏng tơs tîgư̆n, Kơnràñ hôi dơng dẵư lah: “Lasarơ, tơlôh cĕ makin!” 44Cro sơ̆t lờt swà tơlôh makin, jư̆ng î tê hôm kŏng pùc î bơtơi, hôm măt gô ndăng kŏng pùc î bơnan. Yang Jesu tơs î ƀòn gô lah: “Hồ tơmdŏng cĕ măư ma amî î lơi amî gư̆n swà.”

45Gư̆n-jîng, khăi cro nơ̆m tơmpôl cro Juđa, la tơmpôl cro trôh còp-să Mari gừn ma-ngkơi jơ tơmpơl bră Kơnràñ lơh, ƀòn gô sŏng ăn nùs don nơ̆m anẵu Kơnràñ. 46Mơya nhẵư hê cro nơ̆m ƀòn gô swà trôh tơmtom tơmpôl cro Pharisi gừn tơs wăl ma tơmpôl ƀòn dô lơ̆gay bră mà Yang Jesu sŏng lơh.

47Gư̆n-jîng, lơ̆gay cro gơnoăr bơlăm-găl ăn jơno duh-khoai băl î cro Pharisi hôi bơjư̆m wăl Tơmpôl Jơnư̆m Cro Juđa î bơyê bră: “Ƀòn mơ̆n păl lơh mơmơh dô, bơh cro dô lơh khăi têl phadêh oañ? 48Dilah ƀòn mơ̆n lơi ông gư̆n tîgư̆n, gừn khăi cro rơp don nơ̆m ông gư̆n, sŏng gư̆n cro Rôma rơp trôh gừn tơmpìt dưñ lơ̆gay anẵu dô băl î dà lơgơ ƀòn mơ̆n dê.” 49Mơya, Kaiphe, du hôi cro nơ̆m khà ƀòn gô, la cro gơnoăr bơlăm-găl ăn jơno duh-khoai nơ̆m năm gư̆n, tơs î ƀòn gô lah: “Ƀòn ông ơ̆ gư̆t jơno găy ơ̆h. 50Ƀòn ông ơ̆ lăng swì lah gư̆n la jơno niem rlo ma ƀòn ông tơm tô̆ lơi du hôi cro sơ̆t ala ma lang bol mà du lang bol ơ̆ kŏng tơngroh sơ̆t ơ̆h?” 51Jơ gư̆n, ông gư̆n sŏng tơs jơno gư̆n ơ̆-iyŏ trôh bơh sătan ông, mơya bơh la cro gơnoăr bơlăm-găl ăn jơno duh-khoai nơ̆m năm gư̆n, gư̆n-jîng ông sŏng tơs jơno hwơr lah Yang Jesu sơmơn păl kŏng sơ̆t bơh lang bol, 52gừn ơ̆ nư̆ng la bơh lang bol dô, mà hôm lơi kon so Yang Tơm Trồ dê kŏng kơ̆mprah-kơ̆mprĭng kơ̆p anẵu digơlăn bơjư̆m wăl du noh. 53Gư̆n-jîng, bơh nge gư̆n, ƀòn gô jôi kai-kơnĕ lơi ƀòn gô iyà Kơnràñ nơ̆m anẵu sơ̆t.

54Gư̆n-jîng, Yang Jesu ơ̆ tom swà rang sơđah nhòng tơmpôl cro Juđa te, mơya Kơnràñ tơlôh bơh nơ̆m anẵu gư̆n swà trôh bơlao en ƀlang-càs, nơ̆m du ƀòn dơng sơnăn la Epraim. Kơnràñ ăm wăl nơ̆m anẵu gư̆n băl î lơ̆gay cro bơtê. 55Jơ gư̆n, Nge Bơjư̆m-Sa Swà-Găn lang bol Juđa mơn trôh, khăi cro bơh ƀòn êt swà lêh nơ̆m Jerusalem lai mađàp nge Bơjư̆m-Sa Swà-Găn lơi ƀòn gô digơlăn lơh lơhiê sătan mơ̆n. 56Bơh gư̆n la, ƀòn gô jôi Yang Jesu, gư̆m tơs î găp tơm jơ ăm ñă nơ̆m hîh duh-khoai lah: “Î ƀòn ông, bră gư̆n amơh? Lah ông gư̆n nên-nôn ngăn rơp ơ̆ trôh swà bơjư̆m?” 57Jơ gư̆n, lơ̆gay cro gơnoăr bơlăm-găl ăn jơno duh-khoai î cro Pharisi sŏng e gơnoăr pơđơ, lơi dilah cro găy gư̆t Kơnràñ ăm anẵu găy, cro gư̆n păl tơs wăl lơi ƀòn gô digơlăn kơ̆p Kơnràñ.