Jăng 8

1Jơ gư̆n, Yang Jesu swà lêh nơ̆m yồ Ôlibe. 2Mơya nơ̆m brê ang drư̆m, Kơnràñ swà te nơ̆m hîh duh-khoai, gừn lơ̆gay cro hwa găp trôh ma Kơnràñ. 3Jơ gư̆n, lơ̆gay cro bơtău jơno-bơlăm î lơ̆gay cro Pharisi iyà trôh du hôi cro-ua kŏng tơmtom nơ̆m jơno kon bo-nai, sŏng gư̆n ƀòn gô lơi ua-gư̆n ăm lăp bơlao nhòng. 4Bơh lòng Kơnràñ, lơ̆gay cro gơnoăr ăn jơno duh-khoai tơs î Kơnràñ lơi ƀòn gô dî jơno kơ̆p glài tơmdră wăl Kơnràñ: “Ơ cro bơtău, cro-ua dô kŏng kơ̆p wăl bơh jơno tìs-glài kon bo-nai. 5Pơnah nde, nơ̆m jơno-bơlăm, Môise sŏng tơs păl kơ̆ndang lô̆ tơmpôl cro gư̆p tîgư̆n, hôm jơ dô, cro bơtău tơs amơh?” 6Mơya ma-ngkơi jơ cun nteàh, Yang Jesu cêh nơ̆m ù bơh î kon tê mơ̆n. 7Nơ̆m jơ gư̆n, ƀòn gô kư̆ jôi jơno khao lùp, Kơnràñ ngẵư măt cŭngsî gừn tơs î ƀòn gô lah: “Cro găy nơ̆m ƀòn ông ơ̆ tìs-glài, kơdang cĕ lô̆ nơ̆m să cro-ua dô lai ngăn.” 8Sŏng gư̆n cun nteàh, Kơnràñ cêh te nơ̆m ù î kon tê mơ̆n. 9Mơya bơh gư̆n, kơp du hôi du hôi cro nơ̆m lơ̆gay cro Juđa gư̆n swà tơlôh trê, sơm ngăn la lơ̆gay cro dơng năm, tien gơs lơ̆gay ƀòn gô rîc lơ̆ ma-ngkơi, gừn nư̆ng du hôi Kơnràñ ăm wăl, băl î cro-ua ndăng ăm lăp bơlao nhòng. 10Bơh gư̆n la, ma-ngkơi jơ ngẵư măt cŭngsî, Yang Jesu tơs î cro-ua gư̆n lah: “Ƀòn gô anẵu găy? Ơ̆ cro găy kơ̆p glài e ya?” 11Gừn amî-ua kla dẵư lah: “Ơ̆ tom cro găy ơ̆h, ơ Yang.” Sŏng gư̆n Yang Jesu tơs lah: “Ăñ kŭng ơ̆ kơ̆p glài e. E swà cĕ, bơh dô bư̆ng tìs-glài te.”]

12Tơmjăt te, Yang Jesu tơs te î ƀòn gô lah: “Ăñ la jơno ang dunya dê, cro găy jăt ăñ nên-nôn ngăn rơp ơ̆ lơbà swà nơ̆m kơnăm ñô̆ng, mơya dî jơno ang jơno jîng dê.” 13Sŏng gư̆n, nhẵư hê cro Pharisi tơs î Kơnràñ lah: “Mê lơh cư̆ng bơh sătan mê gừn jơno lơh cư̆ng mê dê la ơ̆ don dî.” 14Yang Jesu kla dẵư gư̆m Kơnràñ tơs î ƀòn gô lah: “Bulah ăñ lơh cư̆ng bơh sătan ăñ, gừn jơno lơh cư̆ng ăñ la păl don. Bơh ăñ gư̆t ăñ bơh anẵu găy trôh î ăñ sơmơn swà anẵu găy, hôm ƀòn ông ơ̆ gư̆t ăñ trôh bơh anẵu găy hala ăñ sơmơn swà anẵu găy. 15Ƀòn ông cahrña jăt să-jăn; Ăñ ơ̆ cahrña kơp găy cro. 16Mơya dilah ăñ cahrña, gừn jơno cahrña ăñ dê la tơpăt-ngăn bơh ăñ ơ̆ ăm du hôi, mà ăñ băl î Bàp, la Bơtao pơđơ ăñ. 17Pơnah nde, nơ̆m jơno-bơlăm ƀòn ông dê tom cêh lah jơno lơh cư̆ng bea hê cro gừn păl don. 18Ăñ la cro lơh cư̆ng bơh sătan ăñ, gừn Bàp, la Bơtao pơđơ ăñ, lơh cư̆ng bơh ăñ.” 19Gư̆n-jîng, ƀòn gô tơs î Kơnràñ lah: “Bàp cro bơtău dê anẵu găy?” Yang Jesu kla dẵư lah: “Ƀòn ông ơ̆ gư̆t ăñ, kŭng ơ̆ gư̆t Bàp ăñ; dilah ƀòn ông gư̆t ăñ, gừn nên-nôn ngăn la ƀòn ông kŭng gư̆t Bàp ăñ.” 20Kơnràñ tơs lơ̆gay jơno dô nơ̆m anẵu prăp priè rê̆dăl, nơ̆m jơ ndăng bơtău nơ̆m hîh duh-khoai, mơya ơ̆ cro găy kơ̆p jư Kơnràñ bơh tô̆ jơ Kơnràñ dê hôm dahrăư trôh.

21Sŏng gư̆n, Kơnràñ tơs te î ƀòn gô lah: “Ăñ swà, gừn ƀòn ông rơp jôi ăñ, sŏng ƀòn ông rơp sơ̆t nơ̆m tồi-glài mơ̆n. Anẵu ăñ swà, ƀòn mê ơ̆ swà trôh dî.” 22Bơh gư̆n la cro Juđa tơs lah: “Jơno cro dô rơp tơngsơ̆t să, bơh ông gư̆n tơs lah: ‘Anẵu ăñ swà ƀòn ông ơ̆ swà trôh dî’?” 23Gừn Kơnràñ tơs î ƀòn gô lah: “Ƀòn ông bơh nteàh tơlôh, ăñ bơh cŭngsî tơlôh. Ƀòn ông gôtrê ma dunya dô, ăñ ơ̆ gôtrê ma dunya dô. 24Gư̆n-jîng, ăñ tơs î ƀòn ông lah ƀòn ông rơp sơ̆t nơ̆m tồi-glài mơ̆n. Bơh dilah ƀòn ông ơ̆ don lah ăñ ngăn tîgư̆n, gừn ƀòn ông rơp sơ̆t nơ̆m tồi-glài mơ̆n.” 25Gư̆n-jîng, ƀòn gô tơs î Kơnràñ lah: “Cro bơtău la mơ̆t cro?” Yang Jesu tơs î ƀòn gô lah: “Jơno găy mà ăñ tơs sŏng î ƀòn ông ƀăt bơh sơm? 26Ăñ dî khăi jơno lơi tơs î lơi cahrña bơh ƀòn mê. Bulah tîgư̆n, Bơtao pơđơ ăñ la tơpăt-ngăn; mơya lơ̆gay jơno găy ăñ kơnău bơh anẵu Kơnràñ gừn ăñ tơs wăl lơ̆gay jơno gư̆n ma dunya.” 27Ƀòn gô ơ̆ gư̆t lah Kơnràñ ndăng tơs bơh Bàp ma ƀòn gô. 28Bơh gư̆n, Yang Jesu tơs î ƀòn gô lah: “Tơm tô̆ ƀòn mê iyông Kon-Mơnùs cŭngsî, gừn jơ rơ̆ ƀòn ông rơp gư̆t lah ăñ ngăn tîgư̆n, gừn Ăñ ơ̆ dêh sătan ăñ lơh bră găy. Tơblơ̆ wăl, ăñ tơs lơ̆gay jơno dô jăt gư̆ptî jơno Bàp sŏng bơtău ăñ. 29Bơtao pơđơ ăñ ăm băl î ăñ; Kơnràñ ơ̆ lơi căư ăñ ăm du hôi, bơh ăñ lơh miek jơno niem-nùs Kơnràñ.” 30Nơ̆m tơm jơ Kơnràñ ndăng bơtău lơ̆gay jơno gư̆n, khăi cro ăñ nùs don nơ̆m anẵu Kơnràñ.

31Sŏng gư̆n Yang Jesu tơs î tơmpôl cro Juđa sŏng don Kơnràñ lah: “Dilah ƀòn ông kư̆ ăm nơ̆m jơno bơtău ăñ dê, gừn ƀòn ông ngăn la cro bơtê ăñ dê; 32ƀòn ông rơp gư̆t jơno-tơpăt ngăn, gừn jơno-tơpăt ngăn rơp dŏng-tă ƀòn ông.” 33Ƀòn gô kla wăl dẵư î Kơnràñ lah: “Ƀòn hî la kon so Abraham î hôm dahrăư dơ̆ găy lơh dê̆ ma du hôi cro găy; mơmơh cro bơtău tơs lah: ‘Ƀòn hî rơp dî jơno khăt-gơboh’?” 34Yang Jesu kla dẵư ƀòn gô lah: “Iyŏ ngăn, iyŏ ngăn, ăñ tơs î ƀòn ông, lah cro găy tìs-glài gừn la cro lơh dê̆ ma tồi-glài. 35Pơnah nde, cro lơh dê̆ ơ̆ ăm miek nơ̆m hîh, Kon gừn kư̆ ăm miek miek. 36Gư̆n-jîng, dilah Kon dŏng-tă ƀòn ông, gừn ƀòn ông rơp ngăn dî khăt-gơboh. 37Ăñ gư̆t lah ƀòn ông la kon so Abraham, mơya ƀòn ông jôi kơp jơno tơngsơ̆t ăñ bơh jơno ăñ ơ̆ tom anẵu nơ̆m ƀòn ông. 38Ăñ tơs lơ̆gay jơno ăñ tơmpơl nơ̆m anẵu Bàp; hôm ƀòn ông gừn lơh lơ̆gay bră ƀòn ông kơnău bơh anẵu Bàp mơ̆n.” 39Ƀòn gô kla dẵư gư̆m tơs î Kơnràñ lah: “Bàp ƀòn hî la Abraham.” Yang Jesu tơs î ƀòn gô lah: “Dilah ƀòn ông la kon so Abraham dê, gừn ƀòn ông lơh sŏng lơ̆gay bră lơh Abraham dê. 40Mơya jai dô, ƀòn ông jôi kơp jơno tơngsơ̆t ăñ, du hôi cro sŏng tơs ma ƀòn ông jơno-tơpăt ngăn, la jơno ăñ kơnău bơh Yang Tơm Trồ. Abraham ơ̆ tom lơh jơno gư̆p tîgư̆n. 41Ƀòn ông lơh lơ̆gay bră bàp mơ̆n dê.” Gư̆n-jîng, ƀòn gô tơs î Kơnràñ lah: “Ƀòn hî dî bơda ơ̆-iyŏ bơh jơno rês-àr bơnan; ƀòn hî dî du hôi Bàp, la Yang Tơm Trồ.” 42Yang Jesu tơs î ƀòn gô lah: “Dilah Yang Tơm Trồ la Bàp ƀòn ông dê, gừn nên-nôn ngăn la ƀòn ông kơñ kơloh ăñ sŏng, bơh ăñ trôh bơh Yang Tơm Trồ, gừn tom măt nơ̆m anẵu dô; bơh ăñ ơ̆ swà dêh, mơya sătan Kơnràñ pơđơ ăñ. 43Ngglơh mà ƀòn ông ơ̆ wơng jơno răk-sa dô ăñ dê? Rơ̆ la bơh ƀòn ông ơ̆ tom iet lơ̆gay jơno tơs ăñ jê. 44Ƀòn ông gôtrê ma bàp mơ̆n, rơ̆ la cà-ràk, gừn ƀòn ông kơp kơñ lơh-jăt lơ̆gay nùs ham-kơñ bàp mơ̆n dê. Ƀăt bơhsơm gô la cro tơngsơ̆t cro î ơ̆ ñă kơđư̆ng nơ̆m jơno-tơpăt ngăn, bơh ơ̆ tom jơno-tơpăt ngăn nơ̆m gô. Tơm tô̆ gô tơs jơno blăc blơ̆, gừn gô tơs bơh sătan gô dê bơh gô la cro tơs blăc î la bàp jơno tơs blăc dê. 45Mơya bơh ăñ tơs ngăn, gư̆n-jîng ƀòn ông ơ̆ don ăñ. 46Cro găy nơ̆m ƀòn ông sơđah dî ăñ tom glài? Dilah ăñ tơs jơno ngăn, ngglơh ƀòn ông ơ̆ don ăñ? 47Cro găy gôtrê ma Yang Tơm Trồ gừn iet jơno Yang Tơm Trồ dê; bơh jơno tơpăt gư̆n ƀòn ông ơ̆ iet tài bơh ƀòn ông ơ̆ gôtrê ma Yang Tơm Trồ.” 48Cro Juđa kla dẵư gư̆m tơs î Kơnràñ lah: “Ƀòn hî tơs ơ̆ iyŏ ya, lah ông la ƀòn cro Samari î kŏng cà lơh?” 49Yang Jesu kla dẵư lah: “Ăñ ơ̆ kŏng cà lơh, tơblơ̆ wăl, mơya ăñ jong-rơ Bàp ăñ, hôm ƀòn ông gừn tơngyŏ-tơnghiel ăñ. 50Pơnah nde, ăñ ơ̆ jôi swì jơno gơklŏ mơ̆n dê; tom du hôi Bơtao jôi swì î cahrña. 51Iyŏ ngăn, iyŏ ngăn, ăñ tơs î ƀòn ông, dilah cro găy prăp ăn jơno ăñ, gừn cro rơ̆ nên-nôn ngăn rơp ơ̆ tơmpơl jơno sơ̆t trôh dî miek miek.” 52Cro Juđa tơs î Kơnràñ lah: “Jơ dô ƀòn hî đăl gư̆t nê̆ lah ông kŏng cà lơh. Abraham î lơ̆gay cro gơnoăr-hwơr sơ̆t lờt, gừn mà ông tơs lah: ‘Dilah cro găy prăp ăn jơno ăñ, cro rơ̆ nên-nôn ngăn rơp ơ̆ kŏng jơno sơ̆t trôh dî miek miek.’ 53Jơno ông dơng mang rlo ma ông-pang Abraham ƀòn hî dê, la du hôi cro sơ̆t lờt ya? Lơ̆gay cro gơnoăr-hwơr kŭng sơ̆t lờt. Ông sơnăn dêh sătan mơ̆n la mơ̆t cro?” 54Yang Jesu kla dẵư lah: “Dilah ăñ jong-rơ dêh sătan mơ̆n, gừn jơno gơklŏ Ăñ jê ơ̆ la jơno găy ơ̆h; Bàp ăñ la Bơtao jong-rơ ăñ, mà ƀòn ông sơnăn Bơtao gư̆n lah Kơnràñ la Yang Tơm Trồ mơ̆n dê. 55Ƀòn ông ờs ơ̆ gư̆t Kơnràñ, mơya ăñ gư̆t Kơnràñ. Gừn dilah ăñ tơs lah: ‘Ăñ ơ̆ gư̆t Kơnràñ,’ gư̆n ăñ la cro tơs blăc kŭng gư̆ptî ƀòn ông. Mơya, ăñ gư̆t Kơnràñ gư̆m prăp ăn jơno Kơnràñ. 56Abraham, ông-pang ƀòn ông sơhờp-sờhơn lơi digơlăn tơmpơl nge ăñ dê, gô sŏng tơmpơl gừn sơhờp-sờhơn.” 57Bơh gư̆n la cro Juđa tơs î Kơnràñ lah: “Mê hôm dahrăư dî prăm-jư̆t năm, mà mê tơmpơl Abraham ya?” 58Yang Jesu tơs î ƀòn gô lah: “Iyŏ ngăn, iyŏ ngăn, ăñ tơs î ƀòn ông, lai tô̆ jơ tom măt Abraham, ăñ JÎNG MIEK MIEK.” 59Bơh gư̆n, ƀòn gô săc lơi lô̆ kơdang Kơnràñ, mơya Yang Jesu pleh gừn swà tơlôh bơh nhòng hîh duh-khoai.