Jăng 7

1Ma-ngkơi lơ̆gay bră gư̆n, Yang Jesu swà sơdô sơdă nơ̆m lơgơ Galile, bơh Kơnràñ ơ̆ tom kơlôi swà trôh nơ̆m Juđe bơh cro Juđa ndăng jôi jơno tơngsơ̆t Kơnràñ. 2Jơ gư̆n, Nge Bơjư̆m-Sa Kơjang Bơdơh, du jơno bơjư̆m-sa cro Juđa dê, mơñ trôh en sŏng. 3Bơh gư̆n, lơ̆gay oh klo Kơnràñ tơs î Kơnràñ lah: “Swà tơlôh cĕ bơh anẵu dô gừn swà trôh nơ̆m Juđe, lơi lơ̆gay cro bơtê mê dê kŭng rơp tơmpơl lơ̆gay bră lơh mê dê mà mê lơh dî. 4Bơh ơ̆ cro găy lơh du-lăm jơno găy nơ̆m ndăp-ndơ mà jôi dêh mơ̆n ăm nơ̆m anẵu khăi cro. Dilah mê lơh dî lơ̆gay bră tîgư̆n, sơđah cĕ sătan mơ̆n ma dunya”. 5Tài bơh ƀăt să tơm ƀòn oh Kơnràñ kŭng ơ̆ dî jơno don anẵu Kơnràñ. 6Gư̆n-jîng, Yang Jesu tơs î ƀòn gô lah: “Tô̆ jơ ăñ dê hôm dahrăư trôh, mơya tô̆ jơ ƀòn oh gừn jơ găy kŭng sơmơn. 7Dunya ơ̆ tom ngañ ƀòn oh, mơya dunya ngañ ăñ bơh ăñ lơh cư̆ng bơh dunya lah lơ̆gay bră lơh gô dê la bờk-mơsăk. 8Ƀòn oh swà bơjư̆m-sa cĕ; ăñ hôm dahrăư swà bơjư̆m-sa dô dî, bơh tô̆ jơ ăñ hôm dahrăư dî wêl-tăl.” 9Jơ gư̆n, ma-ngkơi jơ tơs tîgư̆n î ƀòn gô, Kơnràñ kư̆ ăm nơ̆m Galile.

10Mơya, tơm tô̆ lơ̆gay oh mi Kơnràñ swà bơjư̆m-sa, gừn dơ̆ rơ̆ Kơnràñ kŭng swà, mơya la jăt dubă ndăp-ndơ, sơđah-să ơ̆ nê̆-năn. 11Gư̆n-jîng, cro Juđa jôi Kơnràñ nơ̆m nge bơjư̆m-sa, gừn tơs lah: “Ông gư̆n anẵu găy?” 12Tom khăi cro nhòng tơmpôl lang bol rƀu bơh Kơnràñ. Khăi cro tơs lah: “Ông gư̆n la cro niem.” Mơya pơnah nde tơs lah: “Ơ̆-iyŏ ơ̆h, tơblơ̆ wăl, ông gư̆n tề-bơlăm lang bol swà tìs gung.” 13Bulah tîgư̆n, ơ̆ cro găy tơs dubă khăt-gơboh bơh Kơnràñ bơh kơ̆mbrit cro Juđa.

14Bơh jơ gư̆n, mơ̆t nơ̆m nggùl tô̆ tơnge nge bơjư̆m-sa lờt, Yang Jesu swà lêh nơ̆m hîh duh-khoai gừn bơtău. 15Bơh gư̆n la cro Juđa ndrăt-ndròt tơm tô̆ tơs lah: “Amơh cro dô wơng gư̆t lơ̆gay jơno phadêh-phadai gư̆n, bulah hôm dahrăư dî bơtê?” 16Bơh gư̆n, Yang Jesu kla dẵư ƀòn gô, gừn Kơnràñ tơs lah: “Jơno bơtău ăñ ơ̆-iyŏ la jơno ăñ, mơya la jơno Bơtao pơđơ ăñ. 17Dilah cro găy kơp kơñ lơh-jăt nùs-kơñ Kơnràñ, cro gư̆n rơp gư̆t bơh jơno bơtău dô tom iyŏ trôh bơh Yang Tơm Trồ hala tài bơh sătan ăñ tơs tơlôh. 18Cro găy bơh sătan mơ̆n mà tơs, cro gư̆n kơp kơñ jơno gơklŏ dêh ma sătan mơ̆n, mơya cro jôi jăt jơno gơklŏ Bơtao pơđơ mơ̆n gư̆n la cro tơpăt-ngăn, gừn ơ̆ tom jơno bờk ăm nơ̆m cro gư̆n. 19Ơ̆-iyŏ Môise sŏng dờp jơno-bơlăm ma ƀòn ông ya? Mà ơ̆ tom cro găy nơ̆m ƀòn ông prăp jư jơno-bơlăm. Ngglơh ƀòn ông jôi kơp jơno lơi tơngsơ̆t ăñ?” 20Lang bol kla dẵư wăl lah: “Mê kŏng cà lơh sŏng! Cro găy kơñ tơngsơ̆t mê?” 21Yang Jesu kla dẵư, gừn Kơnràñ tơs î ƀòn gô lah: “Ăñ sŏng lơh du bră, gừn ƀòn ông păl ndrăt-să. 22Bơh jơno gư̆n, Môise sŏng e gơnoăr koh kato ma ƀòn ông (ơ̆-iyŏ gơnoăr gư̆n dî bơh Môise, mơya la bơh lơ̆gay ông-pang), gừn ƀòn ông lơh jơno koh kato ma cro-klo nơ̆m nge Saƀat. 23Dilah du hôi cro kŏng gơnoăr koh kato nơ̆m nge Saƀat lơi ơ̆ tìs jơno-bơlăm Môise, gừn ngglơh ƀòn ông tơcao nùs î ăñ bơh ăñ lơh du hôi cro sơlôh gôjîng pran-kơdăng nơ̆m nge Saƀat? 24Bư̆ng cahrña jăt đah makin, mà păl cahrña bơh î jơno cahrña tơpăt-durư̆ng.”

25Pơnjăt bơh gư̆n, nhẵư hê cro nơ̆m lang bol Jerusalem tơs lah: “Ơ̆-iyŏ dô la cro mà cro ndăng jôi lơi tơngsơ̆t ya? 26Tò, ông gư̆n tơs dubă khăt-gơboh mà ơ̆ cro găy tơs jơno găy î ông gư̆n. Jơno cro kwăng ăt-bồ dưñ-lăñ ngăn lah cro dô la Yang Dŏng-Klàs? 27Mơya, ƀòn mơ̆n sŏng gư̆t cro dô bơh ƀòntơm găy. Hôm tơm tô̆ Yang Dŏng-Klàs trôh, ơ̆ cro găy gư̆t ƀòntơm Kơnràñ anẵu găy.” 28Ma-ngkơi gư̆n, nơ̆m hîh duh-khoai, Yang Jesu bơtău dơng dẵư gừn tơs lah: “Ƀòn ông mhăy gư̆t ăñ, mhăy gư̆t ăñ trôh bơh ƀòntơm găy. Ăñ ơ̆ trôh dêh, mơya la Bơtao pơđơ ăñ la tơpăt-ngăn, la Bơtao mà ƀòn ông ơ̆ gư̆t. 29Ăñ gư̆t Kơnràñ bơh ăñ tơlôh bơh Kơnràñ, gừn Kơnràñ pơđơ ăñ.” 30Gư̆n-jîng, ƀòn gô jôi jơno kơ̆p Kơnràñ, mà ơ̆ cro găy e tê tơmpơ̆p nơ̆m Kơnràñ bơh tô̆ jơ Kơnràñ hôm dahrăư trôh. 31Mơya, khăi cro nơ̆m lang bol ăn jơno don anẵu Kơnràñ gừn ƀòn gô tơs lah: “Tơm tô̆ Yang Dŏng-Klàs trôh, rơ̆ jơno Kơnràñ rơp lơh khăi têl phadêh rlo ma lơ̆gay jơno găy cro dô sŏng lơh?” 32Cro Pharisi kơnău lang bol rơm mhòc nhẵư jơno dô gôtrê bơh Yang Jesu, gừn lơ̆gay cro gơnoăr bơlăm-găl ăn jơno duh-khoai băl î cro Pharisi pơđơ tơmpôl lĭñ swà lơi ƀòn gô kơ̆p Kơnràñ. 33Gư̆n-jîng, Yang Jesu tơs lah: “Ăñ ăm î ƀòn ông du êt tô̆ nge te, sŏng gư̆n ăñ swà trôh nơ̆m anẵu Bơtao pơđơ ăñ. 34Ƀòn ông rơp swà jôi ăñ mơya ƀòn ông rơp ơ̆ tơmtom ăñ, î anẵu ăñ ăm ƀòn ông ơ̆ trôh dî.” 35Bơh gư̆n, cro Juđa tơm lùp găp lah: “Cro dô sơmơn swà anẵu găy mà ƀòn mơ̆n rơp ơ̆ jôi dî ông gư̆n? Jơno ông gư̆n sơmơn swà trôh î lang bol ndrah-ndring nơ̆m tơmpôl Grek sŏng gư̆n bơtău ma lang bol Grek? 36Jơno dô gơtha mơmơh mà ông gư̆n tơs lah: ‘Ƀòn ông rơp jôi ăñ mơya ƀòn ông rơp ơ̆ tơmtom, î anẵu ăñ ăm ƀòn ông ơ̆ swà trôh dî’?”

37Mơya, nơ̆m nge dơ̆t-lŭi, la nge dơng mang ngăn nơ̆m nge bơjư̆m-sa, Yang Jesu ñă atẵy sŏng gư̆n dơng dẵư tơs lah: “Dilah cro găy tơhiê trôh cĕ ma ăñ gừn ñô. 38Cro găy don anẵu ăñ, gừn gư̆ptî Sră-Goh cêh: ‘Dà jîng miek miek rơp hua tơlôh bơh ngglăm nùs mơ̆n.’” 39Jơ gư̆n, Kơnràñ tơs jơno gư̆n gôtrê bơh Yang Hwîng Goh, Bơtao mà lơ̆gay cro găy don anẵu Kơnràñ mơñ dưñ-lăñ dî, bơh Yang Hwîng Goh hôm dahrăư trôh bơh Yang Jesu hôm dahrăư dî jong-rơ. 40Pơnjăt bơh gư̆n, tơm tô̆ kơnău lơ̆gay jơno gư̆n, nhẵư hê cro nơ̆m lang bol tơs lah: “Cro dô iyŏ ngăn la cro gơnoăr-hwơr.” 41Du pơnah nde tơs lah: “Cro dô la Yang Dŏng-Klàs.” Mơya du pơnah cro tơs lah: “Jơno Yang Dŏng-Klàs cro ƀòntơm bơh Galile ya? 42Ơ̆-iyŏ Sră-Goh tơs lah Yang Dŏng-Klàs rơp tơlôh bơh nŏk-noi Dabit, gừn la cro ƀòntơm anẵu Ƀêtlehem, la lang bol mà Dabit îng ăm ya?” 43Gư̆n-jîng, jơno tơmcơlah tom tơlôh nơ̆m lang bol tài bơh Kơnràñ. 44Jơ gư̆n, nhẵư hê cro nơ̆m ƀòn gô kơñ kơ̆p Kơnràñ, mơya ơ̆ cro găy e tê tơmpơ̆p nơ̆m Kơnràñ dî.

45Ma-ngkơi gư̆n, lơ̆gay cro lĭñ blăc trê tơmtom kơp cro gơnoăr bơlăm-găl ăn jơno duh-khoai î cro Pharisi, lơ̆gay ƀòn gư̆n lùp ƀòn gô lah: “Ngglơh ƀòn mê ơ̆ iyà lơboh ông gư̆n trê?” 46Lơ̆gay cro lĭñ kla dẵư lah: “Hôm dahrăư tom cro găy ƀăn mơntău gư̆ptî cro dô.” 47Bơh gư̆n la, lơ̆gay cro Pharisi kla dẵư ƀòn gô lah: “Jơno ƀòn mê kŭng kŏng pơlum lờt ya? 48Tom cro găy nơ̆m lơ̆gay cro ăt-bồ hala nơ̆m tơmpôl cro Pharisi don anẵu ông gư̆n? 49Mơya, tơmpôl lang bol ơ̆ gư̆t jơno-bơlăm dô, ƀòn gô iyŏ ngăn păl kŏng sràt-rma!” 50Nikôđem (cro trôh tơmtom Kơnràñ bơh lai gư̆n, la du hôi cro gôtrê mađah ƀòn gư̆n) tơs î ƀòn gô lah: 51“Jơno-bơlăm ƀòn hî dê ơ̆ e cahrña du hôi cro găy, sî lai ngăn ăm iet bơh cro gư̆n î gư̆t cro gư̆n lơh jơno găy, iyŏ ơ̆h?” 52Ƀòn gô kla dẵư, gư̆m tơs î ông lah: “Jơno ông kŭng gôtrê mađah lang bol Galile? Lăng swì cĕ î ngơ lăng, lah ơ̆ tom cro gơnoăr-hwơr găy dî tơlôh bơh Galile.”

53[Sŏng gư̆n kơp cro swà trê nơ̆m hîh mơ̆n.