Jăng 4

1Tîrơ̆ gư̆n, tơm tô̆ Yang Jesu gư̆t bră la cro Pharisi sŏng kơnău lah Kơnràñ bơtao jîng gư̆m lơh ƀaptem ma khăi cro bơtê rlo Jăng 2(bulah ơ̆-iyŏ să tơm Yang Jesu lơh ƀaptem, mà la lơ̆gay cro bơtê Kơnràñ dê), 3gừn Kơnràñ tơlôh bơh Juđe î swà trê wăl Galile. 4Mơya bră gư̆n kơ̆p kơñ Kơnràñ păl swà găn Samari. 5Gư̆n la Kơnràñ swà trôh nơ̆m du ƀòn gôtrê ma bơlao Samari sơnăn la Sikha, en pơnah ù mà Jakôp sŏng tơmpà ma Jôsep, kon klo mơ̆n. 6Anẵu dô tom tơlô̆ng dà Jakôp dê. Jơ gư̆n, bơh Yang Jesu sŏng sơòs-gleh tài bơh swà gung, Kơnràñ nggui ndăng đah tơlô̆ng dà. Dơ̆ gư̆n pơngăp nơ̆m jơ dơ̆ pro. 7Du hôi cro-ua gôtrê ma lơgơ Samari trôh lơi bơ̆ dà, Yang Jesu tơs î ua gư̆n lah: “Dăn e ăñ ñô dà.” 8Bơh lơ̆gay cro bơtê Kơnràñ dê sŏng swà mơ̆t nơ̆m ƀòn lơi ƀòn gô digơlăn tăc jơno sa. 9Gư̆n la cro-ua Samari tơs î Kơnràñ lah: “Amơh lơh ông, la du hôi cro Juđa, kơñ dăn ñô dà bơh ma ăñ, la du hôi cro-ua Samari?” (Bơh cro Juđa ơ̆ tơmklăc-băl î cro Samari.) 10Yang Jesu kla dẵư, gư̆m Kơnràñ tơs î a: “Dilah a sŏng dưñ gư̆t jơno dờp gời Yang Tơm trồ dê, gư̆m cro găy la cro ndăng tơs î a: ‘Dăn e ăñ ñô dà,’ gừn a digơlăn rơp dăn cro gư̆n, gư̆m cro rơ̆ digơlăn rơp dờp ma a dà jîng.” 11Cro-ua tơs î Kơnràñ: “Ơ ông, ông ơ̆ tom jơno bơ̆ dà, gư̆m tơlô̆ng dà gừn jrô. Tîgư̆n, bơh sigăy mà ông tom dà jîng gư̆n? 12Amơh digơlăn la ông dơng rlo Jakôp, ông-pang ƀòn hî, cro sŏng lơi wăl ma ƀòn hî tơlô̆ng dà dô, mà bơh sătan gô, cro sŏng ñô dà băl î kon so cro gư̆n gư̆m jơno puôn jư̆ng cro dê?” 13Yang Jesu kla dẵư lah gư̆m Kơnràñ pơđơ mò: “Kơp hê cro găy ñô anẵu dà tơlô̆ng dô rơp wăl tơhiê, 14mơya dilah cro găy ñô anẵu dà mà ăñ e rơp ơ̆ tom jơ găy tơhiê e trôh dî miek miek. Rlo ma gư̆n, dà ma ăñ dờp rơp sơlôh jîng sơdieng dà nhòng să cro gư̆n sơndồc bîng trôh jơno jîng miek miek.” 15Cro-ua tơs î Kơnràñ lah: “Ơ ông, dăn e ăñ dà gư̆n lơi e ăñ ơ̆ kŏng tơhiê, gư̆m kŭng ơ̆ kă trôh anẵu dô lơi bơ̆ dà.” 16Yang Jesu pơđơ mò: “Swà cĕ, hôi bo-klo a gư̆n trê wăl ma dô.” 17Cro-ua kla dẵư, gư̆m gô tơs î Kơnràñ: “Ăñ ơ̆ tom bo-klo.” Yang Jesu tơs î mò: “A tơs iyŏ ngăn lah: ‘Ăñ ơ̆ tom bo-klo,’ 18bơh a sŏng tom prăm hê bo-klo, gư̆m cro ma a dô ndăng tom gừn ơ̆-iyŏ la bo-klo a! Jơno a tơs la ngăn!” 19Cro-ua tơs î Kơnràñ lah: “Ơ ông, ăñ gư̆t lah ông la du hôi cro gơnoăr-hwơr. 20Ông-pang ƀòn hî duh-khoai nơ̆m cŭngsî yồ dô, hôm lơ̆gay ƀòn ông tơs lah anẵu mà cro păl duh-khoai la nơ̆m anẵu Jerusalem.” 21Yang Jesu tơs î mò lah: “Dô mò, don cĕ ăñ, lah jơ mơñ trôh, la dơ̆ lơ̆gay cro rơp duh-khoai Bàp ơ̆-iyŏ nơ̆m yồ dô, kŭng ơ̆-iyŏ anẵu Jerusalem. 22Ƀòn ông duh-khoai jơno mơ̆n ơ̆ gư̆t. Ƀòn hî duh-khoai jơno ƀòn hî gư̆t, bơh jơno dŏng-klàs la bơh cro Juđa. 23Mơya, jơ mơñ trôh gư̆m jơ dô ndăng trôh, tơm tô̆ lơ̆gay cro duh-khoai ngăn rơp duh-khoai Bàp î hwîng-nùs gư̆m jơno ngăn, bơh Bàp kŭng jôi jăt lơ̆gay cro gư̆p tîgư̆n, la lơ̆gay cro duh-khoai Kơnràñ. 24Yang Tơm Trồ la Hwîng, gư̆n jîng cro găy duh-khoai Kơnràñ păl duh-khoai î hwîng-nùs gư̆m jơno ngăn.” 25Cro-ua tơs î Kơnràñ lah: “Ăñ gư̆t Bơtao Dî Bŏng Mơñà (Bơtao dî sơnăn la Yang Dŏng-Klàs) mơñ trôh. Tơm tô̆ Kơnràñ trôh, să tơm Kơnràñ rơp tơs tăl kơp bră ma ƀòn hî.” 26Yang Jesu tơs î mò lah: “Să tơm ăñ dô, la cro ndăng răk-sa î a.”

27Dơ̆ dô, lơ̆gay cro bơtê Kơnràñ swà trê, gư̆m ƀòn gô tơmpơl phadêh bơh Kơnràñ ndăng răk-sa î du hôi cro-ua. Bulah tîgư̆n, ơ̆ cro găy lùp: “Cro Bơtău jôi jơno găy?” hala: “No-gwơh cro bơtău răk-sa î mò gư̆n?” 28Tîrơ̆ gư̆n, cro-ua lơi wăl pŏk dà mơ̆n dê, mò swà mơ̆t nơ̆m ƀòn dơng, gư̆m tơs î lang bol: 29“Trôh cĕ, tơmtom du hôi cro, ma cro gư̆n tơs ma ăñ gư̆t jơh lơ̆gay tăl kờp bră ăñ sŏng lơh. Gư̆n ơ̆-iyŏ la Yang Dŏng-Klàs ya?” 30Ƀòn gô swà tơlôh bơh ƀòn dơng gư̆m trôh băl î Kơnràñ. 31Nơ̆m nhòng tô̆ tơnge gư̆n, lơ̆gay cro bơtê răc-dăn Kơnràñ, kla dẵư lah: “Ơ Raƀi, dăn sa cĕ.” 32Mơya Kơnràñ tơs î ƀòn gô lah: “Ăñ dî jơno lơi sa mà oh mi ơ̆ gư̆t.” 33Gư̆n-jîng, lơ̆gay cro bơtê tơs băl î găp lah: “Hala du cro găy gư̆n sŏng iyà jơno sa ma Kơnràñ sa?” 34Yang Jesu tơs î ƀòn gô lah: “Jơno sa ăñ rơ̆ la ăñ lơh-jăt nùs-kơñ Bơtao pơđơ ăñ î lơh sŏng bră Kơnràñ dê. 35Ơ̆-iyŏ oh mi tơs lah: ‘Hôm puôn kơnnhe te, sŏng gư̆n trôh kơnnhe koh’ ya? Dô, Ăñ tơs î oh mi, ngẵư cĕ măt mơ̆n cŭngsî gừn lăng lơ̆gay ƀlang srăy, bơh gô ndăng rcăng ma kơnnhe koh! 36Cro koh dưñ-lăñ priè tơnge î tơnggom ple ma jơno jîng miek miek, lơi cro sêh î cro koh păl sơhờp-sờhơn băl î găp. 37Bơh jơno tơs ma-ngkơi dô iyŏ ngăn, lah: ‘Cro dô la cro sêh, gừn cro nde la cro koh.’ 38Ăñ pơđơ oh mi koh pĕ jơno mà oh mi ơ̆ tom kŏng sơòs-gleh. Tơmpôl cro nde sŏng kŏng sơòs-gleh, hôm oh mi lơbà mơ̆t dưñ-lăñ công nha ƀòn gô.”

39Bơh jơ gư̆n, khăi cro Samari nơ̆m ƀòn dơng gư̆n ăn nùs don nơ̆m anẵu Kơnràñ kơnơm bơh jơno cro-ua lơh cư̆ng lah: “Kơnràñ tơs î ăñ lơ̆gay bră mà ăñ lơh.” 40Gư̆n-jîng tơm tô̆ tơmpôl cro Samari trôh tơmtom Kơnràñ, ƀòn gô dăn Kơnràñ ăm wăl î ƀòn gô, gừn Kơnràñ ăm wăl nơ̆m gư̆n bea nge. 41Sî nge sî khăi cro don bơh jơno tơs Kơnràñ dê. 42Ƀòn gô tơs î cro-ua lah: “Ƀòn hî don ơ̆ nư̆ng kơnơm bơh jơno tơs bơh e ơ̆h, bơh sătan ƀòn hî sŏng kơnău, gừn ƀòn hî gư̆t lah cro dô ngăn la Yang Dŏng-Klàs dunya.”

43Bea nge ma-ngkơi, Kơnràñ tơlôh bơh anẵu gư̆n trôh nơ̆m Galile. 44Bơh sătan Yang Jesu sŏng lơh cư̆ng lah du hôi cro gơnoăr-hwơr ơ̆ dî kingam nơ̆m ƀòntơm mơ̆n. 45Bơh gư̆n, tơm tô̆ Kơnràñ swà trôh nơ̆m Galile, lang bol Galile wă-rẵu Kơnràñ, bơh tom tơmpơl lơ̆gay bră Kơnràñ sŏng lơh anẵu Jerusalem nơ̆m nge bơjư̆m-sa, tài bơh ƀòn gô kŭng swà bơjư̆m-sa băl.

46Ma-ngkơi gư̆n, Kơnràñ swà te nơ̆m lơgơ Kana nơ̆m ƀòn Galile, anẵu mà Kơnràñ lơh dà jîng alăk, gừn tom du hôi cro kwăng dơng năy, kon klo ông ờs ndăng kòp jê nơ̆m Kapenaum. 47Tơm tô̆ kơnău gư̆t lah Yang Jesu bơh Juđe sŏng trê trôh nơ̆m Galile, ông gư̆n trôh tơmtom Kơnràñ gư̆m răc-dăn mơmơh Kơnràñ digơlăn swà jư trôh gừn sămƀeah ma kon klo gô, bơh gô mơñ sơ̆t. 48Bơh gư̆n, Yang Jesu tơs î ông lah: “Dilah ƀòn mê ơ̆ tơmpơl lơ̆gay jơno têl phadêh-phadai gư̆m lơ̆gay bră phadêh, gừn ƀòn mê nên-nôn ngăn ơ̆ don.” 49Cro kwăng dơng tơs î Kơnràñ lah: “Ơ Kơnràñ, dăn trôh lai matô̆ kon ăñ sơ̆t.” 50Yang Jesu tơs î ông lah: “Swà trê cĕ, kon klo mê hôm jîng.” Cro-klo dô don jơno mà Yang Jesu sŏng tơs î mơ̆n, gừn ông swà gung. 51Nơ̆m jơ ông ndăng swà gung, lơ̆gay cro lơh dê̆ ông dê trôh tơmtom ông gư̆m tơs wăl, tơs lah kon klo ông hôm jîng. 52Gừn, ông lùp nơ̆m anẵu ƀòn gô nơ̆m jơ găy mà kon klo sơntơm pran wăl. Tîrơ̆ la ƀòn gô kla wăl dẵư î ông lah: “Nge ma-ua, nơ̆m jơ dơ̆ poh, jơno kòp tơlôh bơh kon êt.” 53Kơnơm bơh gư̆n, cro bàp sơdơ wăl lah gư̆n la nơ̆m tô̆ jơ mà Yang Jesu tơs î gô: “Kon klo mê hôm jîng.” Sătan ông don băl î lơ̆gay cro hîh nhă mơ̆n. 54Hôm Yang Jesu sŏng lơh te jơno têl phadêh dơ̆ bea dô, ma-ngkơi jơ swà bơh Juđe trôh nơ̆m Galile.