Jăng 5

1Ma-ngkơi lơ̆gay bră gư̆n, tom du nge bơjư̆m-sa cro Juđa dê, gừn Yang Jesu swà trôh lêh nơ̆m ƀòn dơng Jerusalem. 2Jơ gư̆n, nơ̆m Jerusalem, sî Mpông Belàt, tom du tơlô̆ng dà, dî sơnăn la Ƀetetđa nơ̆m jơno tơs Heƀrơ, gư̆m prăm-lăm mpông rưng. 3Du ƀù tơmpôl cro kòp jê, ñô̆ng măt, kwèt-kwe, kwềt-kơte ndăng bĭc ăm nơ̆m lơ̆gay anẵu mpông rưng gư̆n. 4(Bơh du hôi cro gơndrơh Yang dê, nơ̆m ñăm tô̆ tơnge lơh nên, jư nơ̆m tơlô̆ng dà gư̆m lơh wăñ-lơnggơh dà, gư̆n-jîng cro găy lơbà jư lai tơm tô̆ dà wăñ-lơnggơh gừn dî ƀeah, bulah kòp mơmơh tîgay jơ gư̆n) 5Nơ̆m anẵu gư̆n tom du hôi cro-klo năy, kŏng păy-jư̆t pham năm kòp jê nơ̆m sătan mơ̆n. 6Tơm tô̆ Yang Jesu tơmpơl cro dô ndăng bĭc ăm nơ̆m gư̆n, î gư̆t lah amî dô ăm nơ̆m anẵu gư̆n jŏ nge sŏng, Kơnràñ tơs î gô lah: “Mê tom kơñ dî ƀeah kòp ya?” 7Cro kòp kla dẵư Kơnràñ lah: “Ơ Kơnràñ, ăñ ơ̆ tom cro găy lơi tơm tô̆ dà wăñ-lơnggơh gừn cro gư̆n digơlăn iyà ăñ jư nơ̆m tơlô̆ng dà. Pơnah nde, nơ̆m dơ̆ ăñ swà jư nơ̆m tơlô̆ng dà, gừn cro nde kư̆ jư lai ăñ.” 8Yang Jesu tơs î gô lah: “Ñă cĕ atẵy, tî cơnờng mê cŭngsî gừn lơbà swà.” 9Khơñ ngăn, cro-klo gư̆n gôjîng pran-kơdăng wăl, gô tî cơnờng mơ̆n cŭngsî, gừn lơbà swà.

Nge gư̆n la nge Saƀat. 10Bơh gư̆n la cro Juđa tơs î cro sŏng dî sămƀeah lah: “Nge dô la nge Saƀat, gừn ơ̆ e gơnoăr mê tî cơnờng mơ̆n.” 11Mơya amî gư̆n kla wăl dẵư î ƀòn gô lah: “Cro sŏng lơh ma ăñ pran-kơdăng, sătan cro gư̆n pơđơ ăñ: ‘Tî cĕ cơnờng mơ̆n cŭngsî gừn lơbà swà.’” 12Ƀòn gô lùp ăñ lah: “Cro găy la cro tơs î mê ‘Tî cĕ cơnờng cŭngsî gừn lơbà swà’?” 13Mơya, cro dî sămƀeah ơ̆ gư̆t gư̆n la cro găy, bơh Yang Jesu mơ̆t tơcô̆ nơ̆m tơmpôl lang bol ndăng tom măt nơ̆m anẵu gư̆n. 14Ma-ngkơi lơ̆gay bră gư̆n, Yang Jesu swà tơmtom gô nơ̆m hîh duh-khoai gừn Kơnràñ tơs î gô lah: “Tò, mê sŏng gôjîng pran-kơdăng sŏng! Bư̆ng tìs-glài te, lơi ma jơno bờk rlo ơ̆ tơngtrôh ma mê.” 15Cro-klo dô tơlôh swà gừn tơs î cro Juđa lah gư̆n la Yang Jesu, cro sŏng sămƀeah ma mơ̆n jîng pran-kơdăng. 16Tài bơh jơno gư̆n, cro Juđa kơ̆p kơryăn Yang Jesu, tài bơh Kơnràñ sŏng lơh lơ̆gay bră gư̆n nơ̆m nge Saƀat. 17Mơya Kơnràñ kla dẵư ƀòn gô lah: “Bàp ăñ kŭng hôm ndăng lơh bră trôh dî jơ dô, ăñ kŭng lơh bră gư̆p tîgư̆n.” 18Bơh jơno tơs dô, gư̆n-jîng cro Juđa sî jôi jơno tơngsơ̆t Kơnràñ bơh Kơnràñ ơ̆ nư̆ng tơngroh nge Saƀat, mà hôm sơnăn Yang Tơm Trồ la Bàp mơ̆n, tơngyơng dêh sătan mơ̆n durư̆ng băl î Yang Tơm Trồ.

19Gư̆n-jîng, Yang Jesu sŏng kla dẵư gư̆m tơs î ƀòn gô lah: “Iyŏ ngăn, iyŏ ngăn, ăñ tơs î ƀòn ông, Kon ơ̆ bơh sătan mơ̆n lơi lơh kơp bră găy, nư̆ng sî jơno găy mà Kon tơmpơl Bàp lơh, bơh lơ̆gay bră găy Bàp lơh gừn lơ̆gay bră gư̆n Kon kŭng lơh gư̆p tîgư̆n. 20Bơh Bàp kơloh Kon î sơđah ma Kon lơ̆gay jơno mà sătan Bàp lơh, gư̆n-jîng Kơnràñ rơp sơđah ma Kon lơ̆gay bră dơng rlo ma rơ̆ te lơi ƀòn mê păl ndrăt-ndròt. 21Bơh Bàp lơh cro sơ̆t jîng wăl gư̆m dờp ma ƀòn gô jơno jîng mơmơh tîgay, gừn Kon kŭng dờp jơno jîng ma cro găy Kon kơñ gư̆p tîgư̆n. 22Bơh tien gơs Bàp kŭng ơ̆ cahrña cro găy, mơya Kơnràñ sŏng jao wêl-tăl gơnoăr cahrña ma Kon, 23lơi lơ̆gay cro don kingam Kon gư̆ptî ƀòn gô kingam Bàp. Cro găy ơ̆ kingam Kon gừn ơ̆ kingam Bàp, la Bơtao pơđơ Kon. 24Iyŏ ngăn, iyŏ ngăn, ăñ tơs î ƀòn mê, rơ̆ la cro găy iet jơno tơs ăñ gư̆m don Bơtao pơđơ ăñ gừn dî jơno jîng miek miek, gừn cro rơ̆ ơ̆ swà trôh nơ̆m jơno cahrña, mơya sŏng swà găn bơh jơno sơ̆t lơi trôh nơ̆m jơno jîng. 25Iyŏ ngăn, iyŏ ngăn, ăñ tơs î ƀòn mê lah tô̆ jơ mơñ trôh, gừn jơ gư̆n la tơm tô̆ mà cro sơ̆t rơp kơnău dẵư Kon Yang Tơm Trồ dê, gừn tơmpôl cro găy kơnău rơp jîng. 26Bơh Bàp dî jơno jîng nơ̆m Kơnràñ mơmơh tîgay, gừn Bàp kŭng dờp e ma Kon lơi dî jơno jîng nơ̆m Kon gư̆p tîgư̆n, 27gư̆m Bàp sŏng dờp ma Kon gơnoăr lơh jơno cahrña bơh Kon la Kon-Mơnùs. 28Bư̆ng ndrăt-ndròt bơh jơno dô, bơh rơp trôh tô̆ jơ mà nơ̆m jơ gư̆n, lơ̆gay cro nơ̆m mơ̆ntô ƀùc rơp kơnău dẵư Kơnràñ dê 29gừn ƀòn gô rơp swà tơlôh makin — tơmpôl cro găy lơh jơno niem gừn gôtrê trôh jơno jîng wăl ma jơno jîng, hôm tơmpôl cro sŏng lơh jơno bờk-mơsăk gừn gôtrê trôh jơno jîng wăl ma jơno cahrña.

30Ăñ ơ̆ kơnơm bơh anẵu sătan ăñ lơi lơh kơp bră găy. Ăñ cahrña jăt gư̆ptî jơno ăñ kơnău, gừn jơno cahrña ăñ jê la jơno tơpăt-durư̆ng bơh ăñ ơ̆ jôi jơno nùs-kơñ dêh ăñ dê, mơya la jôi jăt nùs-kơñ Bơtao pơđơ ăñ. 31Dilah ăñ lơh cư̆ng dêh gôtrê bơh sătan ăñ, gừn jơno lơh cư̆ng ăñ dê la ơ̆ don dî. 32Tom du hôi cro nde, la cro lơh cư̆ng gôtrê bơh ăñ, gừn ăñ gư̆t lah jơno lơh cư̆ng mà cro gư̆n tơs gôtrê bơh ăñ la tơpăt ngăn. 33Ƀòn mê sŏng pơđơ cro trôh tơmtom Jăng, gừn Jăng sŏng lơh cư̆ng bơh jơno ngăn. 34Bulah ăñ ơ̆ dưñ-lăñ jơno lơh cư̆ng bơh kon-mơnùs, mơya ăñ tơs lơ̆gay jơno dô la lơi ƀòn ông digơlăn dî dŏng-klàs. 35Jăng ờs la kơlŏ đeng ndăng hit î jroh bơang, hôm ƀòn ông kơñ sơhờp-sờhơn nơ̆m anẵu bơh jơno ang ông gư̆n nơ̆m du tô̆ tơnge. 36Mơya ăñ dî jơno lơh cư̆ng dơng rlo jơno lơh cư̆ng Jăng dê lah: rơ̆ la lơ̆gay bră mà Bàp sŏng jao ma ăñ lơi ăñ lơh wêl-tăl gô — rơ̆ la lơ̆gay bră mà ăñ lơh — lơh cư̆ng gôtrê bơh ăñ lah Bàp sŏng pơđơ ăñ. 37Sătan Bàp, Bơtao pơđơ ăñ sŏng lơh cư̆ng gôtrê bơh sătan ăñ. Ƀòn ông hôm dahrăư dơ̆ găy kơnău dẵư Kơnràñ, kŭng hôm dahrăư lăng tơmpơl să-jăn Kơnràñ. 38Ƀòn ông ơ̆ tom jơno Kơnràñ ăm nơ̆m ƀòn ông, bơh Bơtao mà Kơnràñ sŏng pơđơ, gừn ƀòn ông ơ̆ tom nùs don nơ̆m anẵu Bơtao gư̆n. 39Ƀòn ông lăng swì Sră-Goh bơh ƀòn ông tôn-lah kơnơm bơh gư̆n gừn dî jơno jîng miek miek, mà lơ̆gay jơno gư̆n la lơ̆gay jơno lơh cư̆ng bơh ăñ, 40î ƀòn ông ơ̆ kơñ trôh î ăñ lơi dî jơno jîng. 41Ăñ ơ̆ tom dưñ jơno gơklŏ bơh anẵu cro dê, 42mơya, ăñ gư̆t bơh ƀòn ông lah nùs kơñ-kơloh Yang Tơm Trồ ơ̆ tom ăm nơ̆m ƀòn ông. 43Ăñ sŏng swà trôh tơm sơnăn Bàp ăñ, gừn ƀòn ông ơ̆ dưñ dờp ăñ. Mơya dilah cro nde găy trôh bơh sơnăn dêh mơ̆n dê, gừn ƀòn ông dưñ dờp cro gư̆n. 44Lơh amơh ƀòn ông digơlăn don, tơm tô̆ ndăng dưñ-lăñ jơno gơklŏ bơh cro nde î ơ̆ jôi jăt jơno gơklŏ trôh bơh Yang Tơm Trồ nư̆ng dul? 45Bư̆ng kơlôi la sătan ăñ rơp kơ̆p glài ƀòn ông sơđàp măt Bàp. Cro kơ̆p glài ƀòn ông la Môise, cro mà ƀòn mê ăn jơno don kơnơm. 46Bơh dilah ƀòn ông don Môise, gừn ƀòn ông kŭng don ăñ, rơ̆ la bơh ông gư̆n sŏng cêh bơh ăñ. 47Mơya dilah ƀòn ông ơ̆ don lơ̆gay jơno ông gư̆n cêh, gừn mơmơh mà ƀòn ông rơp don jơno ăñ tơs?”