Jăng 3

1Mơya gư̆n, tom du hôi cro gôtrê bơnòr cro Pharisi, du hôi cro kwăng ăt-bồ lang bol Juđa dê, sơnăn ông la Nikôđem. 2Ông dô trôh tơmtom Yang Jesu nơ̆m brê tơmăng, gư̆n tơs î Kơnràñ: “Ơ Cro Bơtău, ƀòn hî gư̆t lah Cro Bơtău la cro bơtău trôh bơh Yang Tơm Trồ, bơh ơ̆ cro găy digơlăn lơh dî lơ̆gay têl phadêh dô, la lơ̆gay jơno Cro Bơtău lơh, dilah Yang Tơm Trồ ơ̆ ăm băl cro gư̆n.” 3Yang Jesu kla dẵư gư̆m tơs î ông: “Iyŏ ngăn, iyŏ ngăn, ăñ tơs î ông, dilah cro găy ơ̆ dî bơda wăl, gừn cro gư̆n ơ̆ rgê tơmpơl dî lơgơ Yang Tơm Trồ dê.” 4Nikôđem tơs î Kơnràñ lah: “Lơh amơh du hôi cro, tơm tô̆ la du hôi cro kra, digơlăn dî bơda wăl? Amơh cro gư̆n digơlăn mơ̆t wăl nhòng klong mơi mơ̆n dơ̆ bea sŏng gừn dî bơda wăl ya?” 5Yang Jesu hăư lah: “Iyŏ ngăn, iyŏ ngăn, ăñ tơs î ông, dilah cro găy ơ̆ dî bơda wăl bơh dà î Yang Hwîng, gừn cro gư̆n ơ̆ rgê mơ̆t nơ̆m lơgơ Yang Tơm Trồ dê. 6Jơno găy dî bơda bơh poăc-să la poăc-să, gư̆n jơno găy dî bơda bơh Yang Hwîng la hwîng. 7Bư̆ng ndrăt-să bơh ăñ sŏng tơs î ông: ‘Jơno kơp kơñ ma ông lah dî bơda wăl.’ 8Cal khôm anẵu găy gô kơñ, gừn ông kơnău dî kơ̆ntàs gô dê, mơya ông ơ̆ gư̆t cal trôh bơh sigăy hala cal swà trôh sigăy. Gừn kŭng gư̆p tîgư̆n gôtrê kơp lơ̆gay cro găy dî bơda wăl bơh Yang Hwîng.” 9Nikôđem pẵư dẵư gư̆m lùp Kơnràñ: “Lơh amơh bră dô digơlăn sơlôh tơmtom dî?” 10Yang Jesu hăư wăl gư̆m tơs î ông lah: “Ông la cro bơtău lang bol Israel dê mà ông ơ̆ wơng lơ̆gay jơno gư̆n ya? 11Iyŏ ngăn, iyŏ ngăn, ăñ tơs î ông lah ƀòn hî tơs bơh jơno mà ƀòn hî sŏng gư̆t, gư̆m ƀòn hî lơh cư̆ng bơh jơno mà ƀòn hî sŏng tơmpơl, hôm lơ̆gay ƀòn ông ơ̆ dưñ don jơno lơh cư̆ng ƀòn hî dê. 12Dilah ăñ sŏng tơs ma lơ̆gay ƀòn ông bơh lơ̆gay bră nơ̆m ù mà lơ̆gay ƀòn ông gừn ơ̆ don, gừn lơh amơh lơ̆gay ƀòn ông rơp don dilah ăñ tơs ma lơ̆gay ƀòn ông bơh lơ̆gay bră cŭngsî trồ? 13Ơ̆ cro găy tom hao lêh cŭngsî trồ nư̆ng Bơtao sŏng jư nteàh bơh cŭngsî trồ — gư̆n la Kon-Mơnùs. 14Môise sŏng iyông beh cŭngsî nơ̆m ƀlang cas gư̆p tîgay, gừn Kon-Mơnùs kŭng păl kŏng iyông cŭngsî gư̆p tîgư̆n, 15lơi cro găy don nơ̆m Kơnràñ kŭng tom dî jơno jîng miek miek.

16Bơh Yang Tơm Trồ kơñ-kơloh dunya trôh dî Kơnràñ dờp Kon Dul Kơnràñ dê, lơi ma jơh lơ̆gay cro don nơ̆m Kon gư̆n ơ̆ kŏng roh-rùi, mơya tom dî jơno jîng miek miek. 17Bơh Yang Tơm Trồ ơ̆ pơđơ Kon swà nơ̆m dunya lơi cahrña dunya, mơya lơi dŏng dunya bơh Kon gư̆n. 18Cro găy don anẵu Kon gư̆n gừn ơ̆ kŏng cahrña, hôm cro găy ơ̆ don gừn sŏng kŏng cahrña glài lờt, bơh sŏng ơ̆ don trôh sơnăn Kon Dul Yang Tơm Trồ dê. 19Gư̆n pơnah nde, dô la jơno cahrña, gư̆n la: jơno ang sŏng mơ̆t nơ̆m dunya, mơya cro kơñ-kơloh hwîng jơno ñô̆ng rlo jơno ang tài bơh lơ̆gay bră lơh ƀòn gô dê la bờk-mơsăk. 20Bơh kơp hê cro lơh bờk-mơsăk gừn tơcao jơno ang, gư̆m ơ̆ trôh î jơno ang, lơi ma lơ̆gay bră lơh mơ̆n dê klàs kađòng sơđah tơlôh. 21Mơya, cro lơh jơno-tơpăt gừn trôh î jơno ang, lơi lơ̆gay bră mơ̆n dê dî sơđah tơlôh lah gô dî lơh bơh nơ̆m Yang Tơm Trồ.”

22Ma-ngkơi lơ̆gay bră gư̆n, Yang Jesu î lơ̆gay cro bơtê Kơnràñ swà nơ̆m ƀòn Juđe. Kơnràñ ăm wăl anẵu gư̆n î ƀòn gô gư̆m lơh ƀaptem. 23Mơya, Jăng kŭng ndăng lơh ƀaptem nơ̆m anẵu Enôn en Salim, bơh anẵu gư̆n tom khăi dà, lang bol swà trôh gư̆n kŏng lơh ƀaptem — 24bơh Jăng hôm dahrăư kŏng kơ̆p mơ̆t nơ̆m jam. 25Gư̆n la, du jơno tơmbơkai sơlôh trôh tơlôh bơh lơ̆gay cro bơtê Ông Jăng dê băl î du hôi cro Juđa bơh jơno pơđơ blăm lơh sang-goh. 26Gư̆n ƀòn gô trôh î Jăng gư̆m tơs î ông lah: “Raƀi, cro bơh lai ăm î cro bơtău đah manăy dà Jôđăn, mà cro bơtău sŏng lơh cư̆ng bơh cro gư̆n, lăng cĕ tò, ông gư̆n ndăng lơh ƀaptem, gư̆m lơ̆gay lang bol ndăng swà trôh î ông gư̆n.” 27Jăng kla dẵư gư̆n tơs lah: “Cro ơ̆ rgê dưñ dî jơno găy, du-lăm jơno kŭng ơ̆, dilah ơ̆-iyŏ gư̆n la jơno sŏng dî dờp ma cro gư̆n bơh cŭngsî trồ. 28Să tơm oh mi lơh cư̆ng ma ăñ lah ăñ tơs: ‘Ăñ ơ̆-iyŏ la Yang Dŏng-Klàs,’ mơya gư̆n la ‘ăñ la cro dî pơđơ trôh lai Bơtao gư̆n.’ 29Cro găy tơmhòp bo-ua gừn la cro bơtô. Hôm bơyô cro bơtô dê, la cro ñă gư̆m iet jơno gô, gừn dưñ-lăñ jơno sơhờp bơh jơno cro bơtô dê. Tîrơ̆ gư̆n, jơno sơhờp gư̆n ăñ dê sŏng dî wêl-tăl. 30Jơno păl lơh gôtrê î Bơtao gư̆n la tơngyơng cŭngsî, hôm gôtrê î ăñ la tư̆ng duh jư nteàh.

31Bơtao trôh bơh cŭngsî yơng gừn ăm cŭngsî jơh lơ̆gay. Cro tơlôh bơh ù gừn gôtrê bơh ù gư̆m tơs lơ̆gay bră gôtrê bơh ù. Bơtao trôh bơh trồ gừn ăm cŭngsî lơ̆gay. 32Kơnràñ lơh cư̆ng bơh jơno mà Kơnràñ sŏng tơmpơl gư̆m kơnău, mơya ơ̆ cro găy dưñ don jơno lơh cư̆ng Kơnràñ dê. 33Cro găy sŏng dưñ don jơno lơh cư̆ng Kơnràñ dê gừn tăp ƀăng-kì cư̆ng-tang lah Yang Tơm Trồ la tơpăt-durư̆ng. 34Bơh Bơtao mà Yang Tơm Trồ sŏng pơđơ trôh gừn tơs jơno Yang Tơm Trồ dê. Bơh Kơnràñ dờp ma Yang Hwîng jăt dubă ơ̆ gư̆t nhẵư. 35Bàp kơñ-kơloh Kon gư̆m sŏng dờp lơ̆gay jơno nơ̆m tê Kon. 36Cro găy don anẵu Kon gừn tom jơno jîng miek miek, hôm cro găy ơ̆ don dẵư Kon rơp ơ̆ tơmpơl jơno jîng, mơya jơno tơcao dơng Yang Tơm Trồ dê hôm kư̆ ăm cŭngsî cro gư̆n.”