Jăng 1:5

1Bơhsơm tom Bơtao-Jơno, Bơtao-Jơno ăm băl î Yang Tơm Trồ, gừn Bơtao-Jơno la Yang Tơm Trồ. 2Kơnràñ tom bơhsơm băl î Yang Tơm Trồ. 3Lơ̆gay jơno kơnơm bơh Kơnràñ dî bơjîng tơlôh, gừn tơm tô̆ ơ̆ dî bơjîng tơlôh bơh Kơnràñ, gừn ơ̆ tom du-lăm jơno găy dî bơjîng tơlôh. 4Nơ̆m Kơnràñ la jơno jîng, gừn jơno jîng la jơno ang kon-mơnùs dê. 5Jơno ang bơang nơ̆m anẵu ñô̆ng, gừn jơno ñô̆ng ơ̆ pha-lĭn dơi rlo jơno ang.

6Tom du hôi cro dî pơđơ swà bơh Yang Tơm Trồ, sơnăn ông dê la Jăng. 7Ông sŏng trôh nơ̆m jơno lơh cư̆ng lơi ông digơlăn lơh cư̆ng bơh jơno ang, lơi kơnơm bơh ông, lơ̆gay cro digơlăn don. 8Să tơm ông gư̆n ơ̆-iyŏ la jơno ang, mơya ông sŏng trôh lơi ông lơh cư̆ng bơh jơno ang. 9Jơno ang ngăn, la jơno ang bơang lơ̆gay cro, sŏng trôh nơ̆m dunya. 10Kơnràñ sŏng ăm nơ̆m dunya, gừn dunya dî bơjîng bơh Kơnràñ, mà dunya ơ̆ đăl gư̆t Kơnràñ. 11Kơnràñ sŏng swà trôh nơ̆m anẵu gôtrê ma Kơnràñ, mà lang bol gôtrê ma Kơnràñ ơ̆ wă-rẵu Kơnràñ. 12Mơya lơ̆gay kơp cro don Kơnràñ, gừn Kơnràñ dờp ma ƀòn gô gơnoăr sơlôh jîng kon Yang Tơm Trồ dê, rơ̆ la ma lơ̆gay cro găy don anẵu sơnăn Kơnràñ. 13Tơmpôl ƀòn gư̆n ơ̆-iyŏ dî bơda bơh mham, kŭng ơ̆ bơh jơno ham-kơñ să-jăn, hala bơh nùs-kơñ kon-mơnùs, mơya la bơh Yang Tơm Trồ. 14Bơtao-Jơno Jîng sŏng sơlôh gôjîng să-jăn î ăm nhòng ƀòn mơ̆n, gừn ƀòn mơ̆n sŏng dî lăng tơmpơl jơno gơklŏ Kơnràñ dê, gư̆ptî jơno gơklŏ Kon Dul trôh bơh Bàp, bîng-jut jơno sơmah băl î jơno-tơpăt. 15Jăng lơh cư̆ng gôtrê bơh Kơnràñ î dơng dẵư tơs lah: “Dô la Bơtao mà ăñ sŏng tơs lah: ‘Bơtao trôh ma-ngkơi ăñ sŏng gôjîng dơng mang rlo ma ăñ, bơh Kơnràñ ờs tom lai ăñ.’” 16Bơh jơno bîng-jut Kơnràñ dê, lơ̆gay ƀòn mơ̆n dî dưñ-lăñ lơ̆gay jơno sơmah dô trôh jơno sơmah nde. 17Bơh jơno-bơlăm sŏng dî dờp e bơh Môise. Jơno Sơmah î jơno-tơpăt sŏng trôh bơh Yang Dŏng-Klàs Jesu. 18Ơ̆ cro găy lăng tơmpơl Yang Tơm Trồ. Sî nư̆ng Kon dul Yang Tơm Trồ, Bơtao ăm nhòng nùs Bàp, să tơm Bơtao gư̆n tơs sơđah bơh Bàp.

19Dô la jơno lơh cư̆ng Jăng dê tơm tô̆ lang bol Juđa pơđơ lơ̆gay cro gơnoăr ăn jơno duh-khoai î cro Lebi bơh nơ̆m Jerusalem trôh lơi lùp ông lah: “Ông la mơ̆t cro?” 20Ông tơs tơpăt nê̆-năn — ơ̆ tom tăm pôn mà tơs — lah: “Ăñ ơ̆-iyŏ la Yang Dŏng-Klàs.” 21Ƀòn gô lùp ông lah: “Gư̆n la mơmơh? Ông la Êli ơ̆?” Ông kla dẵư lah: “Ăñ Ơ̆-iyŏ.” “Ông la Cro gơnoăr-hwơr ơ̆?” Ông kla dẵư: “Ơ̆.” 22Bơh gư̆n, ƀòn gô tơs î ông lah: “Ông la mơ̆t cro, lơi ƀòn hî digơlăn dî jơno kla dẵư ma lơ̆gay cro pơđơ ƀòn hî trôh? Ông tơs jơno găy gôtrê bơh sătan ông?” 23Ông kla dẵư lah:

“Ăñ la dẵư tơs dreo dơng nơ̆m ƀlang-càs:

‘Lơh tơpăt-durư̆ng cĕ gung Yang dê,’

gư̆ptî cro gơnoăr-hwơr Esai sŏng tơs.” 24Nhẵư hê cro dî pơđơ swà ờs gôtrê mađah tơmpôl cro Pharisi, 25ƀòn gô khao lùp ông, gư̆m tơs băl î ông lah: “Dilah ông ơ̆-iyŏ la Yang Dŏng-Klàs, kŭng ơ̆-iyŏ Êli, hala Cro Gơnoăr-Hwơr, tîrơ̆ gừn ngglơh ông lơh ƀaptem?” 26Jăng kla dẵư ƀòn gô lah: “Ăñ ndăng lơh ƀaptem bơh î dà. Mơya Bơtao ñă ăm nhòng ƀòn ông mà ƀòn ông ơ̆ gư̆t, 27la Bơtao trôh ma-ngkơi ăñ, Bơtao mà ăñ ơ̆ dî păl lơi hồ săy kăt cơkhŏ Kơnràñ dê.” 28Lơ̆gay bră gư̆n tom tơlôh nơ̆m Ƀethani mamằ manăy dà măy Jôđăn, anẵu mà Jăng ờs ndăng lơh ƀaptem. 29Nge ma-ngkơi, Jăng tơmpơl Yang Jesu swà mađah bơlao mơ̆n, gừn tơs lah: “Lăng năy, Belàt Kon Yang Tơm Trồ dê, Bơtao tă tồi-glài dunya dê! 30Rơ̆ la gôtrê bơh Bơtao gư̆n mà ăñ sŏng tơs lah: ‘Cro trôh ma-ngkơi ăñ la Bơtao ờs dơng mang rlo ăñ, bơh Kơnràñ tom lai ăñ.’ 31Ăñ ơ̆ gư̆t Kơnràñ, mơya lơi Kơnràñ dî tơs sơđah ma lang bol Israel, ăñ trôh lơh ƀaptem bơh î dà bơh jơno pơnah gư̆n.” 32Jăng sŏng lơh cư̆ng, tơm tô̆ tơs lah: “Ăñ sŏng tơmpơl Yang Hwîng Goh bơh trồ jư nteàh gư̆ptî sêm kơ̆ntơp, gừn răp nơ̆m Kơnràñ. 33Ăn kŭng ơ̆ đăl gư̆t Kơnràñ, mơya Bơtao pơđơ ăñ lơh ƀaptem bơh î dà, Bơtao gư̆n tơs î ăñ lah: ‘Nơ̆m kơp cro găy mà kon tơmpơl Yang Hwîng Goh jư nteàh gừn răp nơ̆m gô, gừn cro rơ̆ la Bơtao lơh ƀaptem bơh î Yang Hwîng Goh.’ 34Sŏng gư̆n ăñ lăng tơmpơl î lơh cư̆ng lah dô la Kon Yang Tơm Trồ.”

35Du dơ̆ te, tơmjăt nơ̆m nge ma-ngkơi, Jăng ndăng ñă ăm băl î bea hê nơ̆m khà lơ̆gay cro bơtê mơ̆n dê, 36gừn tơm tô̆ tơmpơl Yang Jesu swà găn, ông tơs lah: “Lăng năy, Belàt Kon Yang Tơm Trồ dê!” 37Bea hê cro bơtê gư̆n Jăng dê kơnău tơs gư̆p tîgư̆n gừn ƀòn gô swà jăt Yang Jesu. 38Tơm tô̆ Yang Jesu tơmblăc wăl gừn tơmpơl ƀòn gô ndăng swà jăt mơ̆n, Kơnràñ lùp ƀòn gô lah: “Mơ̆t cro ƀòn mê jôi?” Ƀòn gô kla dẵư Kơnràñ lah: “Raƀi (jơno dô dî cêh tơlôh la ‘Cro Bơtău’), Cro Bơtău ndăng ăm anẵu găy?” 39Kơnràñ tơs î ƀòn gô lah: “Trôh cĕ sŏng gư̆n oh mi rơp tơmpơl.” Bơh gư̆n la ƀòn gô swà, tơmpơl anẵu Kơnràñ ndăng ăm, gừn ƀòn gô ăm wăl î Kơnràñ nơ̆m nge gư̆n. Jơ gư̆n la nơ̆m jơ dơ̆ jư̆t. 40Du hôi nơ̆m bea hê cro dî kơnău bơh Jăng gừn swà jăt Yang Jesu la Andre, oh klo Simôn Pier. 41Lai ngăn, ông jôi tơmtom amî mơ̆n dê la Simôn sŏng gư̆n tơs wăl î gô, lah: “Ƀòn hî tơmtom sŏng Bơtao Dî Bŏng Mơñà” (jơno dô dî tơs tơlôh la Yang Dŏng-Klàs). 42Ông bơlăm amî mơ̆n trôh î Yang Jesu. Ma-ngkơi jơ lăng gô, Yang Jesu tơs lah: “Mê la Simôn, kon Jăng dê. Mê rơp dî sơnăn la Sepha” (sơnăn gư̆n dî tơs tơlôh la “Pier”).

43Nge ma-ngkơi, Yang Jesu kơñ tơlôh bơh anẵu gư̆n swà trôh nơ̆m lơgơ Galile, gừn Kơnràñ jôi tơmtom Philip sŏng gư̆n tơs î ông lah: “Swà jăt cĕ Ăñ.” 44Philip cro ƀòntơm Ƀetsaiđa, rơ̆ la bơh nơ̆m ƀòn dơng Andre î Pier. 45Philip jôi tơmtom Nathanael gừn tơs î ông lah: “Ƀòn hî mhăy jôi tom Bơtao mà Môise sŏng cêh nơ̆m jơno-bơlăm î lơ̆gay cro gơnoăr-hwơr kŭng tîgư̆n — la Jesu, kon Jôsep dê, bơh Nasaret.” 46Mơya Nathanael kla dẵư ông lah: “Digơlăn tom jơno găy niem rlo tơlôh bơh Nasaret dî ya?” Philip tơs î ông lah: “Trôh cĕ gừn lăng.” 47Yang Jesu tơmpơl Nathanael ndăng trôh î Kơnràñ, gừn Kơnràñ tơs bơh ông: “Lăng dô, du hôi cro Israel tơpăt-ngăn, ơ̆ tom jơno mablăc ăm nơ̆m cro dô!” 48Nathanael lùp Kơnràñ lah: “Bơh găy Cro Bơtău gư̆t ăñ?” Yang Jesu kla dẵư, Kơnràñ tơs î ông lah: “Lai jơ Philip hôi amî, dơ̆ ndăng ăm nơ̆m tơm sî ƀăl, gư̆n Ăñ tơmpơl sŏng amî.” 49Nathanael tơs î Kơnràñ lah: “Raƀi, Cro Bơtău la Kon Yang Tơm Trồ! Cro Bơtău la Bơtao Israel dê!” 50Yang Jesu kla dẵư gư̆m tơs î ông lah: “Tom iyŏ amî don bơh Ăñ sŏng tơs î amî lah: ‘Ăñ sŏng tơmpơl amî nơ̆m tơm sî ƀăl’? Amî rơp tơmpơl lơ̆gay bră phadêh rlo gư̆p tîgư̆n te.” 51Sŏng gừn Kơnràñ tơs î ông lah: “Iyŏ ngăn, iyŏ ngăn, ăñ tơs î oh mi, oh mi rơp tơmpơl trồ tơpẵư, gư̆m lơ̆gay cro gơndrơh Yang Tơm Trồ dê jư hao cŭngsî Kon-Mơnùs.”