Jakơ 5

1Hôm jơ dô, kơlôi nê̆ cĕ, ơ lơ̆gay cro kơnhơ̆p-mơ̆nda, ñim kôh-kồt cĕ î kơkrẵy dreo bơh jơno kơsòt-rƀah ƀòn mê dê ndăng trôh. 2Jini-jơno ƀòn mê kŏng ôm-lề, hôm ao cơmpha ƀòn mê gôjîng jơno sa ma mŏ moa. 3Màh, î priè ƀòn mê dê sŏng kŏng grŏ-sa, î jơno rơmbă ƀơƀêh ƀòn gô dê rơp la cư̆ng-tang tơmdră wăl î ƀòn mê, gừn gô rơp sa lon poăc-să ƀòn mê gôlơh gư̆ptî oềs. Ƀòn mê sŏng rơndăp prăp lơi jini-jơno mơ̆n nơ̆m lơ̆gay nge lŭi-dơ̆t. 4Lăng cĕ tò, priè tơnge lơ̆gay cro lơh ơpah dê — rơ̆ la lơ̆gay cro rgê koh nơ̆m lơ̆gay ƀlang srăy ƀòn mê dê, priè rơ̆ sŏng kŏng prăp wăl anẵu ƀòn mê, gô ndăng dreo kơkrẵy dơng — î lơ̆gay dẵư ñim dreo alô̆ng nơ̆m lơ̆gay cro rgê koh rơ̆ sŏng trôh đah tua lơ̆gay Mpôl Lĭñ Yang dê. 5Ƀòn mê sŏng jîng ñô sa rui răm nơ̆m ple-ù gư̆m lơh lơ̆gay ală-alai pơnah să-jăn. Ƀòn mê sŏng rong lamă să nùs tua mơ̆n lơi ma nge lơh rlău. 6Ƀòn mê sŏng lơh-glài lơh tơngsơ̆t cro tơpăt-durư̆ng, cro rơ̆ ơ̆ tơmdră wăl ƀòn mê.

7Bơh tîrơ̆, ơ oh mi rôh lŏ, ăt-ăl cĕ trôh dî jơ Yang trôh. Lăng năy, cro lơh bră miê ăm cang ple-đău dơng mang bơh nơ̆m ù hon tơlôh, ăm cang gô trôh dî jơ ù lăñ dî mih sơm kơnnhe î lơ̆ kơnnhe. 8Oh mi rôh lŏ kŭng păl ăt-ăl. Lơh cĕ jîng kơđư̆ng nùs mơ̆n, bơh jơno sơđah trôh Yang dê sŏng trôh en lờt. 9Ơ oh mi rôh lŏ, bư̆ng đas mờc tơmdră băl î găp, lơi oh mi rôh lŏ klàs kŏng cahrña. Lăng năy, Cro Kwăng Cahrña ndăng ñă ăm anẵu mpông. 10Ơ oh mi rôh lŏ, păl lơh krơh bơh jơno kŏng gleh-glăr î ăt-ăl lơ̆gay cro gơnoăr-hwơr dê, lơ̆gay cro e sơnăn Yang tơs bơtău. 11Lăng dô, ƀòn mơ̆n sơnăn lơ̆gay cro bơkhê nùs tua la cro dî lơnge. Oh mi rôh lŏ sŏng kơnău tơs bơh jơno kŏng-ăt Jop dê, î oh mi rôh lŏ sŏng tơmpơl jơno bră lơh Yang dê, bơh Yang sơmah nùs kơñ-kơloh î lơbăn-niem.

12Mơya, lai ngăn, ơ oh mi rôh lŏ ăñ jê, bư̆ng sràt-să, bư̆ng sơđah trồ, hala sơđah ù hala kơp jơno găy sràt-să nde. Mơya, “tom” gừn păl tơs la “tom”, mơya “ơ̆” gừn păl tơs “ơ̆”, lơi oh mi rôh lŏ ơ̆ duh tơmơ̆t nơ̆m jơno cahrña.

13Tom cro găy nhòng oh mi rôh lŏ ndăng kŏng gleh-glăr ơ̆h? Cro rơ̆ păl hôi-dăn cĕ. Tom cro găy sơhờp-sờhơn ya? Cro rơ̆ păl jong-rơ mơnê cĕ. 14Tom cro găy nơ̆m oh mi rôh lŏ kòp jê ya? Cro rơ̆ păl jà lơ̆gay cro kwăng kra nơ̆m hîh jư̆m goh trôh gư̆m nơ̆m sơnăn Yang dê, ƀòn gô păl hôi-dăn ala e ma cro. Kŏng bŏng mơñà e ma cro gư̆n. 15Jơno hôi-dăn jơno don dê rơp tơmdŏng cro kòp jê lơbăn-lơñô, gừn Yang rơp pồ cro rơ̆ lôh atẵy. Dilah cro dô digơlăn sŏng tom tìs-glài, gừn cro rơ̆ rơp dî hồ glài. 16Gừn, păl tơs tơlôh glài makin băl î găp gư̆m hôi-dăn ma găp, lơi oh mi rôh lŏ digơlăn dî sămƀeah. Jơno hôi-dăn cro tơpăt-durư̆ng tơm tô̆ dî tơs tơlôh gừn sơlôh iyŏ ngăn ngăn. 17Êli la du hôi cro jăt gư̆ptî ƀòn mơ̆n, gừn ông hôi-dăn î lơ̆ nùs gô hôi-dăn, dăn î trồ bư̆ng brê mih, gừn brê ơ̆ tom mih nơ̆m ƀòn lơgơ rlo păy năm pro kơnnhe. 18Sŏng gư̆n Êli hôi-dăn wăl, gừn trồ tôh mih, î ù bơjîng ple-đău.

19Ơ oh mi rôh lŏ ăñ jê, dilah cro găy nơ̆m oh mi rôh lŏ lơbà tìs gung bơh jơno-tơpăt î du hôi cro găy iyà cro rơ̆ bơlăm trê wăl, 20păl gư̆t lah cro găy kơñ tề lăm cro tìs-glài tơlôh bơh gung dà tìs kơ̆mprah gô dê, cro gư̆n rơp dŏng-klàs hwîng-soan cro rơ̆ bơh jơno sơ̆t, gừn rơp trơ̆p tơmbàk khăi ngăn tồi-glài.