1 Pier 1

1Pier, cro gơnoăr bơtău dơng Yang Dŏng-klàs Jesu, pơyoa ma lơ̆gay cro dî săc-rwơh bơh nơ̆m lơ̆gay lang bol kơ̆mprah-kơ̆mprĭng kơp anẵu nơ̆m lơgơ Pôntu, Galati, Kapadôs, Asi î Ƀithini, 2jăt jơno gư̆t lai Yang Tơm Trồ dê, la Bàp, bơh jơno ăn dêh Yang Hwîng Goh ma jơno don jăt î jơno sêh mham Yang Dŏng-Klàs Jesu. Dăn jơno sơmah î jơno lơngăp-lơnge sơlơ nge sơlơ tơngkah-tơngkăñ nơ̆m oh mi rôh lŏ.

3Dăn jong-rơ Yang Tơm Trồ î Bàp Yang ƀòn mơ̆n dê, la Yang Dŏng-klàs Jesu, Bơtao jăt nùs kơñ-kơloh dơng mang Kơnràñ dê, sŏng lơh mhăy ƀòn mơ̆n mơ̆t nơ̆m jơno cang-kơnơm jơno jîng kơnơm bơh jơno jîng wăl Yang Dŏng-Klàs Jesu bơh anẵu sơ̆t, 4blăc lêh ma du srăy-brê ơ̆ ôm-lề, ơ̆ sơmơ̆-sơmĭñ gư̆m ơ̆ roh làt, sŏng dî rcăng lai cŭngsî trồ ma oh mi rôh lŏ, 5la ăn lơi ma tơmpôl cro kơnơm bơh jơno don, dî lăng jư bơh gơnăp-gơnoăr Yang Tơm Trồ ma jơno dŏng-klàs, la jơno dî rcăng lơi dî rang sơđah nơ̆m nge lŭi-dơ̆t. 6Kơnơm bơh gư̆n, oh mi rôh lŏ sơhờp-sờhơn ngăn, bulah jơ dô păl kŏng jơno moat-jrum du êt jŏ nơ̆m wêl-tăl lơ̆gay jơno lòng 7lơi ma jơno cư̆ng-tang ngăn bơh jơno don oh mi rôh lŏ — jơno dơng mang rlo ma màh, la jơno kŏng bơcah-lề mà hôm kŏng lòng bơh î oềs — digơlăn dî dưñ-lăñ lơi iyà trôh jơno jong-rơ, jơno gơklŏ î jơno kingam nơ̆m jơno sơđah-să Yang Dŏng-Klàs Jesu, 8Bơtao mà oh mi rôh lŏ kơñ-kơloh bulah hôm dahrăư tơmpơl, jơ dô bulah ơ̆ tơmpơl Kơnràñ mơya bơh don kơnơm anẵu Kơnràñ, gư̆n-jîng oh mi rôh lŏ jong-rơ î jơno sơhờp-sờhơn tơs ơ̆ lơ̆ gư̆m dî bîng-tăl jơno gơklŏ, 9dưñ-lăñ công nha nơ̆m anẵu jơno don oh mi rôh lŏ dê, rơ̆ la jơno dŏng-klàs hwîng-soan. 10Lơ̆gay cro gơnoăr-hwơr sŏng jôi jăt î lăng swì nê̆-năn bơh jơno dŏng-klàs dô, rơ̆ la tơmpôl cro sŏng tơs tơnggư̆t bơh jơno sơmah ăn lơi ma oh mi rôh lŏ, 11tơm tô̆ jôi jăt bơh cro găy hala jơ găy mà Yang Hwîng Goh Yang Dŏng-Klàs dê nơ̆m ƀòn gô ờs sŏng rang sơđah, e gư̆t lai bơh jơno kŏng jê-sồt Yang Dŏng-Klàs dê î jơno gơklŏ ma-ngkơi lơ̆gay bră gư̆n. 12Jơno sŏng dî rang sơđah ma ƀòn gô, rơ̆ la ƀòn gô ờs ơ̆ dŏng bră ma sătan ƀòn gô, mơya ma oh mi rôh lŏ, gôtrê bơh lơ̆gay jơno mà jơ dô sŏng dî tơs tơnggư̆t ma oh mi rôh lŏ bơh tơmpôl cro tơs bơtău Jơno Niem ma oh mi rôh lŏ kơnơm bơh Yang Hwîng Goh dî pơđơ bơh trồ — gôtrê î lơ̆gay jơno gư̆n, lơ̆gay cro gơndrơh kŭng kơp kơñ lăng tơmpơl.

13Gư̆n-jîng, bơh î jơno rcăng nùs-kơlôi oh mi rôh lŏ gôlơh gư̆ptî săy bơ̆t, gư̆t kah-rngăl, păl ăn wêl-tăl jơno cang-kơnơm nơ̆m jơno sơmah dî iyà trôh ma oh mi rôh lŏ nơ̆m jơno sơđah-să Yang Dŏng-Klàs Jesu. 14Gư̆ptî kon so gư̆t don jơno, ơ̆ lơh-jăt lơ̆gay jơno ham-kơñ bơh lai ƀua nơ̆m jơno wì-lơngôh oh mi rôh lŏ, 15tơblơ̆ wăl, gư̆ptî Bơtao sŏng hôi-săc oh mi rôh lŏ la sang-goh, să tơm oh mi rôh lŏ kŭng păl dî gôjîng sang-goh nơ̆m lơ̆gay jơno rai-jîng mơ̆n dê. 16Bơh tom jơno cêh lah: “Ƀòn kon rơp gôjîng sang-goh bơh Ăñ la sang-goh.” 17Gừn dilah oh mi rôh lŏ sơnăn Bơtao cahrña tơpăt-durư̆ng jăt kơp bră lơh kơp cro dê la “Bàp”, gừn păl jîng î nùs duh kơ̆mbrit nơ̆m tô̆ jơ hôm jîng mơ̆n dê, 18bơh gư̆t lah ơ̆-iyŏ kơnơm bơh lơ̆gay jơno digơlăn ôm-lề gư̆ptî priè hala màh mà oh mi rôh lŏ sŏng dî tơwai-klàs bơh rai-jîng ơ̆ kwơ mơ̆n dê bơh ông-pang lơi wăl, 19mơya la kơnơm bơh mham mang Yang Dŏng-Klàs, gư̆ptî belàt kon ơ̆ sồt-rmañ gư̆m ơ̆ sơmơ̆-sơmĭñ, 20sŏng dî rcăng lai tơm jơ bơjîng ù-teàh, mơya dî rang sơđah tơlôh makin nơ̆m tô̆ tơnge lŭi-dơ̆t dô tài bơh oh mi rôh lŏ, 21la tơmpôl cro kơnơm bơh Kơnràñ don anẵu Yang Tơm Trồ, Bơtao sŏng lơh Kơnràñ jîng wăl bơh anẵu sơ̆t gư̆m dờp jơno gơklŏ ma Kơnràñ, lơi jơno don î jơno cang-kơnơm oh mi rôh lŏ dê ăm nơ̆m Yang Tơm Trồ. 22Tơm tô̆ sŏng dî rao lơhiê hwîng-soan mơ̆n kơnơm bơh jơno don-duh nơ̆m jơno-tơpăt gôtrê trôh jơno oh mi tơpăt-ngăn, oh mi rôh lŏ păl kơloh găp dubă ngăc-ngăr bơh î nùs sang-goh, 23bơh sŏng dî lơh jîng mhăy wăl, ơ̆-iyŏ bơh gơ digơlăn ôm-lề, bơh gơ ơ̆ digơlăn ôm-lề, kơnơm bơh jơno tơs jîng miek gư̆m hôm miek Yang Tơm Trồ dê. 24Tài bơh:

“Lơ̆gay să-jăn gư̆ptî khơ̆,

gư̆m lơ̆gay jơno gơklŏ gô dê gư̆ptî khơ̆ bơkao.

Khơ̆ rău, î bơkao ru,

25mơya jơno Yang hôm trôh miek miek.”

Rơ̆ la Jơno Niem sŏng dî tơs tơnggư̆t ma oh mi rôh lŏ.