1 Pier 2

1Gư̆n-jîng, tơm tô̆ sŏng lơi căư lơ̆gay jơno bờk-mơsăk, lơ̆gay jơno blăc blơ̆ î nùs mablăc, jơno tơmngañ băl î lơ̆gay jơno tơs bơcĕ, 2gừn gư̆ptî lơ̆gay kơmom bloh, sơmồt tơhiê dà toh sang-goh đah hwîng, lơi kơnơm bơh gư̆n oh mi rôh lŏ digơlăn dî lơh gôjîng teh dơng nơ̆m jơno dŏng-klàs, 3dilah oh mi rôh lŏ sŏng gư̆t lah Yang la lơbăn-niem, 4tơm tô̆ trôh en ma Kơnràñ, la ne-lô̆ jîng, sŏng kŏng cro lơi căư, mơya gôjîng la jơno săc-rwơh dơng mang sơđàp măt Yang Tơm Trồ, 5gừn să tơm oh mi rôh lŏ, kŭng gư̆ptî lơ̆gay ne-lô̆ jîng, ndăng dî băt-tơngñă jîng hîh đah hwîng, ăn lơi ma cro gơnoăr ăn jơno duh-khoai sang-goh lơi ăn jơno duh-khoai đah hwîng niem-nùs Yang Tơm Trồ kơnơm bơh Yang Dŏng-Klàs Jesu. 6Gư̆n-jîng, jơno dô dî cêh nơ̆m Sră-Goh lah:

“Lăng dô, Ăñ ăn anẵu Siôn du ne-lô̆ joñ hîh,

dî săc-rwơh, dơng mang ngăn.

Gừn cro găy don anẵu Kơnràñ nên-nôn ngăn ơ̆ kŏng ƀasmăt.”

7Gư̆n-jîng, jơno dơng mang gư̆n ăn lơi ma oh mi rôh lŏ la tơmpôl cro don. Hôm gôtrê î tơmpôl cro ơ̆ don:

“Ne-lô̆ mà lơ̆gay cro băt-tơngñă hîh lơi căư,

lô̆ gư̆n sơlôh gôjîng lô̆ joñ hîh”

8gư̆m la

“Ne-lô̆ lơh sơndăc jư̆ng, ne-lô̆ lơh jîng duh sơmprah.”

Ƀòn gô duh sơmprah bơh ơ̆ don jăt jơno Yang, mà gôtrê bơh bră dô ƀòn gô kŭng dî rcăng lai sŏng. 9Mơya oh mi rôh lŏ la nŏk-noi dî săc-rwơh, la cro gơnoăr ăn jơno duh-khoai cro bơtao, la lang bol sang-goh, du lang bol gôtrê mađah Yang Tơm Trồ dê, lơi oh mi rôh lŏ tơs tơnggư̆t lơ̆gay bră phadêh-phadai ngăn Bơtao sŏng hôi oh mi rôh lŏ tơlôh bơh anẵu ñô̆ng mơ̆t nơ̆m jơno ang crêh-crai Kơnràñ dê, 10mà oh mi rôh lŏ bơh lai ƀua “ơ̆ iyŏ la du tơmpôl lang bol”, mơya jơ dô la “lang bol Yang Tơm Trồ dê”; la tơmpôl cro bơh lai ƀua “ơ̆ dî kơñ-kơloh”, mà jơ dô sŏng “dî kơñ-kơloh”.

11Ơ oh mi rôh lŏ kơñ-kơloh, ăñ bơtău tơngkah oh mi rôh lŏ, gư̆ptî tơmpôl cro ăm bơdơh î cro năc swà gung, păl pleh wĭc lơ̆gay jơno ham-kơñ să-jăn, la jơno tơmdră î hwîng-soan oh mi rôh lŏ, 12tơm tô̆ jư jơno rai-jîng oh mi rôh lŏ niem nhòng tĕdơ tơmpôl cro bơdih, lơi bơh gư̆n, nơ̆m jơno găy ƀòn gô tơs bờk bơh oh mi rôh lŏ gư̆ptî tơmpôl cro lơh jơno bờk-mơsăk, gừn bơh lăng tơmpơl nê̆ lơ̆gay bră niem oh mi rôh lŏ, ƀòn gô digơlăn jong-rơ Yang Tơm Trồ nơ̆m nge Kơnràñ swà còp.

13Tài bơh Yang, don-duh cĕ lơ̆gay jơno-bơlăm kon-mơnùs, digơlăn rơ̆ la bơtao gư̆ptî cro ăt-bồ dơng mang, 14hala lơ̆gay cro kwăng dơng, tơmpôl cro dî bơtao pơđơ swà iyà trôh jơno lơh-glài cro lơh jơno bờk-mơsăk gừn jong-rơ cro lơh niem. 15Bơh dô la jơno kơp kơñ Yang Tơm Trồ dê: lơh bră niem lơi lơh ma tơmpôl cro wì-lơngôh tơs jơno prŏi jơno wơng gư̆t păl ăm-ƀơt, 16nơ̆m jơno gư̆ptî lơ̆gay jơno cro khăt-gơboh, gư̆n ơ̆ ngui jơno khăt-gơboh mơ̆n dê gư̆ptî kơmang tơmbàk ma bră mơsăk, mơya gư̆ptî lơ̆gay dê̆-gơna Yang Tơm Trồ dê. 17Kingam cĕ lơ̆gay cro. Kơñ-kơloh cĕ oh mi rôh lŏ mơ̆n. Păl kơ̆mbrit Yang Tơm Trồ. Păl kingam bơtao.

18Ơ lơ̆gay oh mi rôh lŏ lơh cro dŏng bră, don-duh cĕ pơnhơm mơ̆n î jơh lơ̆gay nùs kingam, ơ̆-iyŏ nư̆ng cro pơnhơm niem î lơbăn-niem, mà hôm cro pơnhơm bờk-mơsăk te. 19Bơh dilah cro găy kŏng dơi jơno sơòs-gleh nơ̆m jơ kŏng lòng jơno ơ̆ niem tài bơh nùs-nhim trê ma Yang Tơm Trồ, gừn rơ̆ la jơno lơngăp-lơnge. 20Tom jơno sơhờp găy dilah tìs-glài sŏng oh mi rôh lŏ păl kŏng pơng lơh? Mơya dilah lơh niem gừn oh mi rôh lŏ păl kŏng sơòs-gleh, gừn gư̆n la du jơno sơmah lơnge sơđàp măt Yang Tơm Trồ. 21Bơh oh mi rôh lŏ sŏng dî hôi-săc ma jơno gư̆n, bơh Yang Dŏng-Klàs kŭng sŏng kŏng gleh ala oh mi rôh lŏ, lơi wăl du lơ̆m krơh niem ma oh mi rôh lŏ lơi ma oh mi rôh lŏ digơlăn jăt têl jư̆ng Kơnràñ,

22“Bơtao ơ̆ tìs-glài,

kŭng ơ̆ tom jơno blăc-pơlum găy dî jôi tơmpơl nơ̆m anẵu kơndẵư Kơnràñ”;

23la Bơtao tơm tô̆ kŏng wac-rma, Kơnràñ ơ̆ wac-rma wăl; tơm tô̆ kŏng gleh, Kơnràñ ơ̆ tơng-î̀, mà Kơnràñ jao phi mơ̆n ma Bơtao cahrña tơpăt-durư̆ng; 24să tơm Bơtao gư̆n sŏng añ tồi-glài ƀòn mơ̆n nơ̆m să-jăn Kơnràñ lêh sî pư̆ng, lơi ma-ngkơi jơ sŏng sơ̆t gôtrê î tồi-glài, ƀòn mơ̆n digơlăn jîng ma jơno tơpăt-durư̆ng, kơnơm lơ̆gay sồt-rmañ Kơnràñ dê mà oh mi rôh lŏ sŏng dî sămƀeah. 25Bơh oh mi rôh lŏ ờs gư̆ptî belàt kŏng tìs-kơ̆mprah, mơya dô oh mi rôh lŏ sŏng dî trê wăl bơh î Bơtao jư belàt gư̆m Bơtao lăng jư hwîng-soan mơ̆n dê.