1 Pier 3

1Ơ lơ̆gay oh la lơ̆gay cro bo-ua, kŭng gư̆ptî gư̆n, păl don-duh bo-klo mơ̆n, lơi dilah du pơnah cro bo-klo ơ̆ don jăt jơno niem, mơya kơnơm bơh rai-jîng cro bo-ua dê mơya ơ̆ kơnơm bơh jơno tơs, gừn lơ̆gay bo-klo rơ̆ rơp dî sơlôh jîng cro don, 2ma-ngkơi jơ sŏng tơmpơl dî rai-jîng tơpăt-ngăn băl î jơno duh kơ̆mbrit lơ̆gay cro-ua dê, 3mà mhơ̆ să lơ̆gay oh mi ua dê ơ̆-iyŏ bơh đah makin pă sŏ î dẵu wan màh, hala dưñ cù ôi-ao màng-ryŭ, 4mơya la nùs-nhơ̆m cro đah ngglăm nùs, î mhơ̆ her hôm miek bơh nùs-nhơ̆m lơbăn-niem dê gư̆m lơnge-lơngồ, jơno gư̆n la dơng mang sơđàp măt Yang Tơm Trồ. 5Bơh lơ̆gay cro-ua sang-goh yo ƀua, la lơ̆gay cro ăn jơno kơnơm anẵu Yang Tơm Trồ, kŭng mhơ̆ her sătan gư̆ptî gư̆n tơm tô̆ don duh bo-klo mơ̆n, 6gư̆ptî Sara sŏng don dẵư Abraham tơm tô̆ hôi ông la yang, lơ̆gay oh mi ua dî sơlôh jîng kon so mò dê tơm tô̆ lơh jơno niem gư̆m ơ̆ kơ̆mbrit bơh du-lăm jơno kơ̆mbrit găy.

7Ơ oh mi la lơ̆gay cro bo-klo, kŭng gư̆ptî gư̆n, bơh î jơno gư̆t wơng, gư̆n păl ăm băl î bo-ua gư̆ptî bơh la cro lơbăn rlo, bơh sơgư̆n tơmpà jơno dơng mang gư̆ptî cro dî pơnah nơ̆m jơno sơmah-sơmai jơno jîng dê, lơi kơp kơñ jơno hôi-dăn oh mi dê ơ̆ kŏng cơkhă.

8Lŭi-dơ̆t, jơh lơ̆gay păl tom du nùs-kơlôi băl, jơno kơñ-kơloh, kơloh oh mi rôh lŏ găp bơyô, nùs lơbăn-niem, jơno tơng-êt să, 9bư̆ng dưñ bờk kla bờk, hala jơno sơmăm tìs kla wăl jơno sơmăm tìs, mà tơblơ̆ wăl, kư̆ e lơnge, bơh oh mi rôh lŏ sŏng dî hôi-săc trôh jơno gư̆n, lơi oh mi rôh lŏ dî dưñ jơno lơnge-lơngồ. 10Bơh,

“Cro găy kơñ-kơloh jơno jîng î tơmpơl nge kơnnhe niem

păl cơkhă lơm-piet mơ̆n bơh jơno bờk-mơsăk, gư̆m yôi mơ̆n ơ̆ tơs jơno blăc blơ̆.

11Cro gư̆n păl lơi căư jơno bờk gư̆m păl lơh jơno niem.

Cro gư̆n păl jôi jơno lơngăp-lơnge gừn păl jôi jăt jơno gư̆n,

12bơh măt Yang ăm nơ̆m cro tơpăt-durư̆ng gư̆m tua Kơnràñ ăm en jơno hôi-dăn ƀòn gô dê,

mơya măt Yang tơmdră wăl cro lơh bờk.”

13Cro găy la cro rơp lơh bờk oh mi rôh lŏ dilah oh mi rôh lŏ sơlôh gôjîng tơmpôl cro ngăc-ngăr bơh jơno niem? 14Mơya, bulah oh mi rôh lŏ păl kŏng sơòs-gleh bơh jơno tơpăt-durư̆ng, gừn oh mi rôh lŏ dî lơnge ngăn. Đah pơnah nde, bư̆ng kơ̆mbrit jăt gư̆ptî jơno kơ̆mbrit ƀòn gô dê, kŭng bư̆ng mơrêh-mơrăñ, 15mà păl jong-rơ Yang Dŏng-Klàs, la Yang nơ̆m nùs mơ̆n, păl rcăng miek miek nơ̆m bră hăư wăl dẵư lơ̆gay kơp cro găy khao lùp oh mi rôh lŏ bơh jơno cang-kơnơm nơ̆m oh mi rôh lŏ, 16mơya nơ̆m jơno lơbăn-niem gư̆m jơno kingam, bơh dî nùs-nhơ̆m niem, lơi nơ̆m jơno găy mà oh mi rôh lŏ kŏng tơs bơcĕ, gừn tơmpôl cro tơs tơngyŏ rai-jîng niem-lơhơn oh mi rôh lŏ dê nơ̆m Yang Dŏng-Klàs păl kŏng ƀasmôh ƀasmăt. 17Bơh dilah la nùs-kơñ Yang Tơm Trồ, gừn păl kŏng sơòs gleh lơh niem, rlo la lơh bờk-mơsăk. 18Bơh Yang Dŏng-Klàs kŭng kŏng sơòs-gleh bơh tồi-glài — Bơtao tơpăt-durư̆ng sơ̆t măư ma cro tìs-glài — lơi Kơnràñ digơlăn iyà ƀòn mơ̆n trôh î Yang Tơm Trồ, tơm tô̆ kŏng sơ̆t mađah să-jăn î dî lơh jîng wăl mađah hwîng-soan, 19nơ̆m hwîng gư̆n, Kơnràñ kŭng sŏng tơs bơtău tơm tô̆ dî trôh ma hwîng-soan kŏng ăm jam, 20la tơmpôl cro bơh lai ƀua ơ̆ don dẵư tơm tô̆ jơno kŏng-ăt Yang Tơm Trồ dê ờs ăm cang nơ̆m rai Nôe, ndăng tơm jơ ahẵu dî pư̆ng, mà nhòng ahẵu gư̆n, bea băy hê cro — gư̆n la pham lơ̆m hwîng-soan — sŏng dî dŏng-klàs bơh dà, 21mà dô kŭng la rồp sơntu nge dô dŏng-klàs oh mi rôh lŏ, gư̆n la gơnoăr ƀaptem — ơ̆-iyŏ bră lơi căư buh sơmơ̆ nơ̆m poăc-să, mơya la jơno lơh nên du nùs-nhơ̆m niem dê ăn ma Yang Tơm Trồ — kơnơm jơno jîng wăl Yang Dŏng-Klàs Jesu dê, 22la Bơtao, ma-ngkơi jơ trê lêh cŭngsî trồ, ndăng ăm đah ma Yang Tơm Trồ, mà lơ̆gay cro gơndrơh î lơ̆gay bơtao tom dî gơnoăr băl lơ̆gay gơnoăr-pran păl don-duh Kơnràñ.