1 Pier 4

1Tîrơ̆ gừn, bơh Yang Dŏng-Klàs kŏng sơòs-gleh nơ̆m poăc-să, gư̆n-jîng oh mi rôh lŏ kŭng kŏng cĕ rcăng băl î jơno kơlôi-sơnư̆ng gư̆n, bơh cro găy sŏng kŏng sơòs-gleh nơ̆m poăc-să gừn sŏng mbư̆ng căư î tồi-glài, 2lơi kờp tô̆ jơ hôm wăl nơ̆m poăc-să, cro gư̆n ơ̆ hôm jîng ma nùs ham-kơñ kon-mơnùs dê te, mơya bơh jăt nùs kơñ Yang Tơm Trồ dê. 3Bơh tô̆ jơ sŏng swà sơlèt tăl lơi lơh dî jăt nùs kơñ lang bol bơdih dê, tơm jơ jîng nơ̆m jơno ñô sa khăt-gơboh, ham-kơñ, mañơ̆l-lơmbẵy, ñô sa, lîng-lang î duh-khoai rồp-ràk sơmơ̆-sơmĭñ ngăn, 4mà nơ̆m bră dô, ƀòn gô kŏng ndrăt-să tơm tô̆ oh mi rôh lŏ ơ̆ swà jăt băl ƀòn gô nơ̆m du mơ̆ntô rơm-bôh dà bô̆ jơno ală-alai dê, gư̆n-jîng tơs jơno bờk-mơsăk; 5ƀòn gô rơp tơs sơđah bră sơđàp Bơtao sơmơn cahrña cro jîng băl î cro sơ̆t. 6Kŭng bơh jơno gư̆n, Jơno Niem kŭng dî tơs bơtău ma tơmpôl cro jơ dô sơ̆t lờt, lơi bulah ƀòn gô sŏng kŏng cahrña jăt kon-mơnùs nơ̆m đah să-jăn, gừn dô ƀòn gô digơlăn jîng jăt Yang Tơm Trồ nơ̆m đah hwîng-soan.

7Pơnah nde, jơno lŭi-dơ̆t lơ̆gay jini-jơno mơñ trôh en sŏng. Gư̆n-jîng, păl ngăc-ngăr gư̆m ngăc-măt tơs sơđah lơ̆gay jơno hôi-dăn; 8tơm tô̆ lai ngăn dî nùs kơñ-kơloh ngăc-ngăr ăn lơi băl ma găp, bơh jơno kơloh rơp tơmbàk gư̆t nhẵư tồi-glài; 9dî nùs sơmah-sơmai î găp mà ơ̆ tom jơno rƀu găy; 10gừn jăt gư̆ptî kơp cro sŏng dưñ-lăñ jơno e gời, ngui gô duh bră băl ma găp, ơ̆ phadêh găy î tơmpôl cro ăt-bồ jăk-sai gôtrê î jơno sơmah gư̆t nhẵư Yang Tơm Trồ dê. 11Dilah cro găy tơs bơtău — gừn gôlơh gư̆ptî tơs jơno Yang Tơm Trồ dê; dilah cro găy duh bră — gừn lơh bơh î pran mà Yang Tơm Trồ dờp e, lơi nơ̆m lơ̆gay kơp jơno Yang Tơm Trồ dî jong-rơ kơnơm bơh Yang Dŏng-Klàs Jesu, la Bơtao dî păl dî jơno gơklŏ î jơno gơnăp-gơnoăr trôh dî miek miek ơ̆ lơ̆. Amen.

12Ơ oh mi rôh lŏ kơñ-kơloh, bư̆ng kơ̆mbrit-kơ̆mbròt bơh oềs hit rhô ăm nhòng oh mi rôh lŏ, tơm tô̆ tom tơlôh anẵu oh mi rôh lŏ lơi lòng bơtê, gôlơh gư̆ptî jơno phadêh tơmtom trôh ma mơ̆n, 13tơblơ̆ wăl, jăt oh mi rôh lŏ dî pơnah nhẵư nơ̆m lơ̆gay jơno jê-sồt Yang Dŏng-Klàs, gừn păl sơhờp-sờhơn dư̆ng rơ̆, lơi nơ̆m jơno rang sơđah jơno gơklŏ Kơnràñ dê, oh mi rôh lŏ dî hưh hơh, bîng-jut jơno sơhờp-sờhơn. 14Dilah oh mi rôh lŏ kŏng tơngyŏ-tơnghiel bơh sơnăn Yang Dŏng-Klàs, gừn dî lơnge ngăn, bơh Yang Hwîng Goh jơno gơklŏ dê î Yang Tơm Trồ dê, ăm nơ̆m oh mi rôh lŏ. 15Bư̆ng cro găy nơ̆m oh mi rôh lŏ kŏng sơòs-gleh gư̆ptî cro tơngsơ̆t cro, cro kơntô̆ng, cro lơh jơno bờk-mơsăk, hala gư̆ptî cro swì nơ̆m bră cro nde, 16mơya dilah kŏng gleh-glăr bơh la Cro Don Bơtao Krist, gừn cro gư̆n bư̆ng ƀasmăt, mà nơ̆m jơno sơnăn gư̆n jong-rơ cĕ Yang Tơm Trồ. 17Tài bơh trôh jơ sơmơn jơno cahrña bơh hîh Yang Tơm Trồ; mà dilah lai ngăn la bơh ƀòn mơ̆n, gừn jơno lŭi-dơ̆t tơmpôl cro ơ̆ don jăt Jơno Niem Yang Tơm Trồ rơp mơmơh tîgay?

18Gừn “Dilah cro tơpăt-durư̆ng kălkê dî nơ̆m jơno dŏng-klàs,

gừn cro ơ̆ don kơ̆mbrit î cro tom glài rơp ăm anẵu găy?”

19Gư̆n-jîng, tơmpôl cro găy kŏng gleh-glăr jăt nùs-kơñ Yang Tơm Trồ dê phi jao hwîng-soan mơ̆n cĕ ma Bơtao Bơjîng lơh-jăt jơno hăư nơ̆m bră lơh jơno niem.