Jakơ 4

1Lơ̆gay jơno tơmbơkai trôh bơh anẵu găy î lơ̆gay jơno tơmpìt-tơmhà tơlôh bơh găy nhòng tơmpôl oh mi rôh lŏ? Ơ̆-iyŏ gô tơlôh bơh lơ̆gay nùs ham kơñ oh mi rôh lŏ dê, la jơno ờs ndăng tơmlơh nhòng lơ̆gay pơnah să-jăn oh mi rôh lŏ dê ơ̆h? 2Oh mi rôh lŏ ham-kơñ mà ơ̆ tom dî, oh mi rôh lŏ tơngsơ̆t cro. Oh mi rôh lŏ sơmồt tơhiê, mà ơ̆-rgê tăl dî, oh mi rôh lŏ tơmbơkai î tơmlơh. Oh mi rôh lŏ ơ̆ dî bơh oh mi rôh lŏ ơ̆ dăn. 3Oh mi rôh lŏ dăn mơya ơ̆ lăñ dî bơh oh mi rôh lŏ dăn dubă tìs jơno, lơi ngui ma lơ̆gay jơno ham-kơñ dêh mơ̆n dê. 4Ơ tơmpôl cro rês-àr bơnan năy! Oh mi rôh lŏ ơ̆ gư̆t lah bră lơh bơyô î dunya la jơno tơmdră î Yang Tơm Trồ ơ̆h? Gư̆n-jîng, dilah cro găy kơñ lơh bơyô î dunya, gừn cro rơ̆ kŏng ăn tơmơ̆t nơ̆m anẵu cro tơmdră Yang Tơm Trồ dê. 5Hala oh mi rôh lŏ kơlôi lah Sră-Goh tơs ơ̆ kwơ: “Yang Hwîng Goh mà Kơnràñ lơh jîng ngglăm ƀòn mơ̆n tien gơs bîng nùs tơmngañ î Bơtao kơñ-kơloh ngăn teh”? 6Mơya, Kơnràñ dờp e khăi rlo jơno sơmah-sơmai, gư̆n-jîng Sră-Goh tơs lah: “Yang Tơm Trồ tơmdră wăl î cro pơnhừ-să, mơya Kơnràñ dờp e jơno sơmah-sơmai ma cro tơng-êt să.” 7Bơh tîrơ̆ gừn, păl don-duh Yang Tơm Trồ. Mơya păl tơmdră cĕ î cà-ràk, sŏng gư̆n gô rơp pleh wĭc bơh oh mi rôh lŏ. 8Păl trôh en Yang Tơm Trồ, gừn Kơnràñ rơp trôh en oh mi rôh lŏ. Lơ̆gay cro tìs-glài, păl lơh lơhiê cĕ tê mơ̆n; lơ̆gay cro bea đah nùs, păl rao sang lơhiê cĕ nùs mơ̆n. 9Păl moat-jrum cĕ, kôh-kồt ñim, gư̆m dreo kơkrẵy! Tơmbơgăl cĕ jơno yŏ oh mi rôh lŏ dê tơlôh jîng jơno ñim lơngŏ, gừn bơgăl jơno sơhờp tơlôh jơno moat-jrum. 10Păl tơng-êt dêh să mơ̆n nteàh sơđàp măt Yang, sŏng gư̆n Kơnràñ rơp yŏk oh mi rôh lŏ lêh cŭngsî.

11Ơ oh mi rôh lŏ, bư̆ng tơs bờk găp. Cro tơs bờk oh mi rôh lŏ ờs cahrña oh mi rôh lŏ mơ̆n la tơs bờk jơno-bơlăm î cahrña jơno-bơlăm. Mơya dilah mê cahrña jơno-bơlăm gừn mê ơ̆-iyŏ la cro kơñ lơh-jăt jơno-bơlăm, mơya la cro gơnoăr cahrña. 12Nư̆ng du hôi Bơtao dờp e jơno-bơlăm î cahrña, la Bơtao dî gơnoăr dŏng-klàs î tơngroh. Hôm mê la mơ̆t cro, ơ cro cahrña cro ăm en đàp mơ̆n teh?

13Jơ dô, iet cĕ dô, lơ̆gay cro ndăng tơs lah: “Nge dô hala nge nhîng ƀòn hî rơp swà trôh ƀòn dơng năy, sŏng gư̆n rơp lơh bră anẵu gư̆n du năm, kă-brău î kơnhơ̆p-mơ̆nda.” 14Rơ̆ la lơ̆gay cro ơ̆ gư̆t dî bră rai-jîng oh mi rôh lŏ dê, nge nhîng la amơh teh? Bơh oh mi rôh lŏ la gư̆ptî ñhằt dà mờt gô tơlôh nơ̆m dư̆ng-iè jŏ sŏng gư̆n kŏng sơlơ̆ làt ha-ău thơ̆t. 15Ala nơ̆m gư̆n, oh mi rôh lŏ păl tơs lah: “Dilah Yang kơñ, gừn ƀòn hî rơp dî jîng gừn rơp lơh bră dô hala bră năy.” 16Mơya jơ dô oh mi rôh lŏ ndăng tơngyeh să nơ̆m pơnah lơh pơnhừ-să mơ̆n dê. Lơ̆gay bră tơngyeh dêh să gư̆ptî rơ̆ la bờk-mơsăk. 17Gư̆n-jîng, cro găy gư̆t păl lơh jơno niem mà ơ̆ lơh wăl, gừn cro rơ̆ tom glài.