Jakơ 3

1Ơ oh mi rôh lŏ ăñ jê, bư̆ng tom khăi cro nơ̆m oh mi rôh lŏ lơh jîng cro bơtău, bơh gư̆t lah ƀòn mơ̆n rơp păl dưñ-lăñ jơno cahrña dơng rlo te. 2Bơh ƀòn mơ̆n kŭng sơmăm tìs nơ̆m khăi bră lơh. Dilah cro găy ơ̆ sơmăm tìs nơ̆m jơno tơs, gừn rơ̆ la cro wêl-tăl, digơlăn katîng swì lơ̆ să-jăn gô dê. 3Dilah ƀòn mơ̆n tơmkot săy kĕp lòs nơ̆m kơ̆mbung aseh lơi lơh ƀòn gô kŏng kơ̆p dê̆, jăt ƀòn mơ̆n gừn ƀòn mơ̆n pơđơ ăt-bồ lơ̆ să-jăn ƀòn gô dê. 4Kŭng păl swì nê̆ cĕ lơ̆gay ahẵu, tom dơnău thươk dơng yơng î kŏng cal khôm rơnggô kơdăng ngăn, mơya kơp ahẵu dî sơđah gung bơh du-lăm tieng weh êt ngăn lơi trôh kơp anẵu găy cro weh ahẵu kơp kơñ. 5Gư̆ptî rơ̆ ya, lơm-piet la du-lăm pơnah êt mơya tơngyeh wăl lơ̆gay bră dơng. Lăng cĕ du-lăm oềs êt su oềs sa lơ̆ dubă brê dơng tơlôh amơh! 6Lơm-piet kŭng gư̆ptî oềs, du dunya ơ̆ tơpăt-durư̆ng. Lơm-piet dî ăn lơi ăm nhòng lơ̆gay pơnah să-jăn ƀòn mơ̆n dê, lơh sơmơ̆-sơmĭñ lơ̆ să-jăn gư̆m oềs sa lơ̆ du rai-jîng, mà să tơm gô gừn kŏng oềs sa lơ̆ nơ̆m nhòng brŏng-oềs. 7Lơ̆gay jơno puôn jư̆ng î sêm brê, jơno wîn ngsrong nteàh î jơno ăm nơ̆m dàlîng gừn sŏng dî kon-mơnùs ăt-bồ. 8Mơya ơ̆ tom cro găy digơlăn ăt-bồ lơm-piet. Gô ơ̆ bơdê lơh mơ̆ndơm du-lăm jơno bờk-mơsăk, bîng kăm khêh lơh tơngsơ̆t cro. 9Bơh gô ƀòn mơ̆n jong-rơ mơnê Yang î Bàp, kŭng băl î gô, ƀòn mơ̆n wac-rma, la kon-mơnùs sŏng dî mon bơjîng jăt rồp-să Yang Tơm Trồ dê. 10Bơh băl î du-lăm kơ̆mbung tơlôh makin Jơno jong-rơ mơnê î jơno wac-rma. Ơ oh mi rôh lŏ ăñ jê, lơ̆gay bră gư̆ptî rơ̆ bư̆ng lơi gô tơlôh. 11Du rbong dà bơh du-anẵu mằc lô̆ băl ơ̆ rgê tơlôh dà lơnguơ̆t gư̆m dà bơtăng, iyŏ ờ? 12Ơ oh mi rôh lŏ ăñ jê, sî ƀăl ơ̆-rgê jîng tơlôh ple ôlibe ờ ơ? Hala sî ple ño gôjîng ple sî ƀăl ờ ơ? Dà ăng kŭng ơ̆-rgê jîng tơlôh dà lơnguơ̆t ya.

13Cro găy jăk-sai gừn gư̆t wơng nhòng tơmpôl oh mi rôh lŏ teh? Cro rơ̆ păl sơđah nê̆ rai-jîng lơbăn-niem tơlôh jîng bơh lơ̆gay bră lơh gô dê nơ̆m nùs tua tơng-êt să jơno jăk-sai dê. 14Mơya dilah oh mi rôh lŏ tom jơno ƀoah pơnhừ-să bơtăng bơkhê î jơno ham-kơñ ngglăm nùs mơ̆n, gừn bư̆ng tơngyeh să î tơs blăc tơblơ̆ wăl î jơno tơpăt-ngăn. 15Dô ơ̆-iyŏ la jơno jăk-sai trôh nteàh bơh cŭngsî, mơya la jơno gôtrê ma dunya, poăc-să, cà-ràk. 16Bơh anẵu găy tom jơno pơnhừ-să î ham-hà, gừn anẵu rơ̆ tom jơno sơlô̆ng-sơlăng î lơ̆gay bră bờk-mơsăk. 17Tơblơ̆ wăl, jơno jăk-sai bơh cŭngsî lai ngăn la sang-goh, ma-ngkơi gư̆n la kơp kơñ dî lơngăp-lơnge, lơbăn-niem, nùs tua păl don-duh, bîng nùs lơbăn-niem î lơ̆gay ple-bơkao niem-lơhơn, ơ̆ kơlôi-sơnư̆ng mađàp ma-ngkơi, ơ̆ tơblơ̆ nùs. 18Ple-bơkao jơno tơpăt-durư̆ng dê dî sêh nơ̆m jơno lơngăp-lơnge tài bơh lơ̆gay cro kơñ lơh jîng jơno lơngăp-lơnge.