Jakơ 2

1Ơ oh mi rôh lŏ ăñ jê, păl prăp jư jơno don anẵu Yang ƀòn mơ̆n, la Yang Dŏng-Klàs Jesu ang gơklŏ, bư̆ng tơmpẵu du hôi cro găy. 2Bơh dilah du hôi cro dẵu sơmbèt màh băl î ôi-ao niem hơt mơ̆t nơ̆m hîh jơnư̆m oh mi rôh lŏ dê, mà du hôi cro kơsòt bơh î cù ôi-ao sơmơ̆-sơmĭñ kŭng mơ̆t băl, 3mơya oh mi rôh lŏ lăng nê̆ nơ̆m cro cù ao cơmpha niem hơt gừn tơs lah: “Dăn jà ông nggui anẵu niem hơt dô!”, gừn î cro kơsòt, oh mi rôh lŏ tơs: “Mê ñă đah năy!”, hala “Păl nggui đah anẵu kơ̆mpang jư̆ng ăñ dô!”, 4gừn ơ̆-iyŏ oh mi rôh lŏ sŏng sơntu dêh nhòng tơmpôl să tơm oh mi rôh î sơlôh gôjîng cro cahrña î lơ̆gay nùs-kơlôi bờk-mơsăk ơ̆h? 5Ơ oh mi rôh lŏ kơñ-kơloh ăñ jê, iet kơnău cĕ: Ơ̆-iyŏ Yang Tơm Trồ sŏng săc-rwơh cro kơsòt-rƀah nơ̆m dunya lơi sơlôh gôjîng cro kơnhơ̆p-mơ̆nda nơ̆m jơno don î cro dî pơnah cơdô̆ lơgơ mà Kơnràñ sŏng hăư î tơmpôl cro kơñ-kơloh Kơnràñ ơ̆h? 6Tîgư̆n mà oh mi rôh lŏ sŏng lơh bờk wăl cro kơsòt! Ơ̆-iyŏ cro kơnhơ̆p ờs kơ̆p rôn-bơklơ̆n oh mi rôh lŏ gư̆m ƀòn gô ờs kơtô̆k oh mi rôh lŏ ma tơmpôl cahrña ya? 7Ơ̆-iyŏ ƀòn gô dơm lơh sơmăm tìs sơnăn dơng mang sŏng dî ăn ma oh mi rôh lŏ ya? 8Mơya, dilah oh mi rôh lŏ lơh wêl-tăl jơno-bơlăm cro Bơtao jăt gư̆ptî Sră-Goh bơtău, lah: “Kơñ-kơloh cĕ cro ăm tĕdơ mơ̆n gư̆ptî să tơm mơ̆n”, gừn oh mi rôh lŏ lơh nên iyŏ ngăn. 9Mơya dilah oh mi rôh lŏ mờc-bơsah dî cro găy, gừn oh mi rôh lŏ tìs-glài, î kŏng jơno bơlăm lơh-glài gư̆ptî cro lơh tìs jơno-bơlăm. 10Bơh cro găy digơlăn prăp jư jơh lơ̆gay jơno-bơlăm, mơya lơh tìs nơ̆m du-lăm jơno gời, gừn cro rơ̆ gôjîng cro tìs-glài lơ̆gay jơno-bơlăm. 11Bơh Bơtao sŏng tơs lah: “Bư̆ng tìs-glài rês-àr bơnan!”, kŭng sŏng tơs lah: “Bư̆ng tơngsơ̆t cro!”. Mơya dilah oh mi rôh lŏ ơ̆ tìs-glài rês-àr bơnan, mơya tơngsơ̆t wăl cro, gừn oh mi rôh lŏ gôjîng cro tìs-glài jơno-bơlăm. 12Gư̆n-jîng păl răk-sa î lơh jơno gư̆ptî tơmpôl cro rơp kŏng cahrña bơh jơno-bơlăm jơno khăt-gơboh dê. 13Bơh jơno cahrña ơ̆ kơloh-kơlài cro ơ̆ lơh nùs kơloh-kơlài. Nùs kơloh-kơlài tơngyeh să yơng rlo jơno cahrña!

14Ơ oh mi rôh lŏ ăñ jê, tom jơno kwơ găy dilah cro găy gư̆n tơs mơ̆n dî jơno don mơya ơ̆ dî bră lơh? Jơno don gư̆n ơ̆ dŏng-klàs dî cro gư̆n, iyŏ ơ̆h? 15Dilah tom nư̆ng du hôi oh mi hala rôh lŏ să-jăn ăm săkôh gư̆m prŏi jơno sa kơp nge, 16mơya du hôi cro nơ̆m oh mi rôh lŏ tơs î ƀòn gô: “Swà cĕ nơ̆m jơno lơngăp-lơnge, păl prăp jư dî răm gư̆m sa dî hơm!”, mà oh mi rôh lŏ ơ̆ e ma ƀòn gô lơ̆gay jơno să-jăn kơñ ngui, gừn tom kwơ găy teh? 17Jơno don kŭng tîrơ̆, dilah ơ̆ tom bră lơh gừn să tơm gô sơ̆t. 18Mơya, tom cro găy gư̆n rơp tơs lah: “Mê dî jơno don, hôm ăñ dî bră lơh.” E cĕ ma ăñ tơmpơl jơno don ơ̆ tom bră lơh mê dê, sŏng gư̆n ăñ rơp e mê tơmpơl jơno don bơh î bră lơh ăñ jê. 19Mê don lah nư̆ng du hôi Yang Tơm Trồ gời; Mê don iyŏ ngăn. Cà-ràk kŭng don î ƀòn gô kơ̆mbrit ntơ-să. 20Ơ cro wì-lơngôh, mê kơñ gư̆t lah jơno don ơ̆ tom bră lơh la ơ̆ jîng công nha ya? 21Ơ̆-iyŏ Abraham, la ông-pang ƀòn mơ̆n, sŏng dî sơnăn la tơpăt-durư̆ng bơh î bră lơh tơm tô̆ ông ăn kon klo mơ̆n la Isăk nơ̆m kaƀang duh-khoai ya? 22Mê tơmpơl lah jơno don dubă băl î bră lơh ông dê, gừn ñăư bơh bră lơh, jơno don sŏng dî lơh-tăl lơ̆. 23Jơno Sră-Goh dô sŏng dî sơlôh gôjîng iyŏ ngăn, lah: “Abraham don Yang Tơm Trồ, jơno gư̆n dî tơs la tơpăt-durư̆ng ma ông”, î ông dî sơnăn la cro bơyô Yang Tơm Trồ dê. 24Oh mi rôh lŏ tơmpơl gư̆n, du hôi cro dî sơnăn tơpăt-durư̆ng bơh î bră lơh, gư̆m ơ̆ dî nư̆ng bơh jơno don gời ờ. 25Kŭng jăt gư̆ptî rơ̆ ya, ơ̆-iyŏ cro-ua kliê Rahap sŏng dî sơnăn tơpăt-durư̆ng bơh î bră lơh tơm tô̆ wă-rẵu lơ̆gay cro kŏng pơđơ swà î lơboh ƀòn gô swà bơh î tî gung nde ya? 26Bơh gư̆ptî să-jăn ơ̆ tom hwîng-soan gừn sơ̆t, jơno don ơ̆ tom bră lơh gừn kŭng sơ̆t gư̆ptî rơ̆ ya.