Jakơ 1

1Jakơ, cro dê̆-gơna Yang Tơm Trồ î Yang Dŏng-Klàs Jesu, pơyoa ma jư̆t-bea nŏk-noi nơ̆m jơno kơ̆mprah-kơ̆mprĭng: Dăn còp-să oh mi rôh lŏ nơ̆m nùs sơhờp-sờhơn. 2Ơ oh mi rôh lŏ ăñ jê, tơm tô̆ oh mi rôh lŏ păl kŏng wêl-tăl lơ̆gay jơno têl lòng, lăng cĕ gư̆n la nùs sơhờp-sờhơn bîng-tăl, 3bơh gư̆t lah jơno têl lòng jơno don oh mi rôh lŏ sơlôh tơlôh jîng jơno rgê kŏng-ăt. 4Mơya, jơno rgê kŏng-ăt păl lơh bîng-tăl bră lơh gô, lơi oh mi rôh lŏ digơlăn dî têl dơng î dî wêl-tăl, ơ̆ hôm prŏi jơno găy. 5Hôm dilah cro găy gư̆n nơ̆m oh mi rôh lŏ prŏi jơno jăk-sai, cro gư̆n păl hôi-dăn cĕ jơno rơ̆ bơh Yang Tơm Trồ, Bơtao dờp e gời dubă dơng ơnàng ma lơ̆gay cro mà ơ̆ ƀoah-đas, gừn jơno jăk-sai rơp dî dờp e ma cro gư̆n. 6Mơya cro gư̆n păl hôi-dăn nơ̆m jơno don, bư̆ng pên wêl-wăl jơno găy. Bơh cro pên wêl-wăl gôlơh gư̆ptî sơn-gàc dàlîng, kŏng cal pôh madô manăy î wì wang. 7Cro tîgư̆n bư̆ng kơp kơñ lah mơ̆n rơp dî dưñ-lăñ jơno găy bơh Yang, 8rơ̆ la cro ờs kơlôi ghi-ga, ơ̆ lơh nên nơ̆m lơ̆gay gung dà mơ̆n. 9Cro oh mi rôh lŏ nơ̆m anẵu kơsòt-rƀah păl tơngyeh să cĕ bơh gơnoăr bră dơng mang mơ̆n dê, 10Hôm cro kơnhơ̆p tơngyeh cĕ bơh bră êt ahên mơ̆n dê, bơh cro gư̆n rơp ha-ău roh gư̆ptî bơkao dang lơngôh nơ̆m ƀlang khơ̆. 11Măt tơnge tơlôh băl î jơno dôh tơal hư̆k gừn lơh rău răng khơ̆ sî. Bơkao gô duh ru, rồp-să niem-lơhơn gô dê roh thơ̆t. Jăt gư̆p tîrơ̆, cro kơnhơ̆p kŭng rơp kŏng rău răng nhòng du rai-jîng tơte jăt gô dê. 12Lơnge ma cro kŏng têl lòng, bơh tơm tô̆ sŏng dî kŏng jơno têl lòng, cro gư̆n rơp dưñ-lăñ dî sơgơn bơtao-jơno jîng, la jơno mà Yang Tơm Trồ sŏng hăư dờp e ma lơ̆gay cro kơñ-kơloh Kơnràñ. 13Tơm tô̆ kŏng jơno ơn-ñai, bư̆ng tom cro găy tơs lah: “Ăñ kŏng Yang Tơm Trồ ơn-ñai!”, bơh Yang Tơm Trồ la ơ̆ tom kŏng jơno bờk-mơsăk ơn-ñai, mà să tơm Kơnràñ kŭng ơ̆ ơn-ñai cro găy. 14Mơya kơp cro kŏng jơno ơn-ñai, tơm tô̆ kŏng kơtô̆k î pơlum mơ̆ndơm bơh nùs ham-kơñ să tơm mơ̆n dê. 15Pơnjăt ma gư̆n, ma-ngkơi jơ sŏng tơwă, nùs ham-kơñ sơlôh tơlôh gôjîng tồi-glài, mà ma-ngkơi jơ sŏng dî dơng pran, tồi-glài sơlôh tơlôh gôjîng jơno sơ̆t. 16Ơ oh mi rôh lŏ kơñ-kơloh ăñ jê, bư̆ng lơi să tơm mơ̆n kŏng pơlum. 17Lơ̆gay jơno dờp e niem-lơhơn î lơ̆gay jơno e gời wêl-tăl kŭng la tơlôh bơh cŭngsî yơng, la jơno trôh bơh Bàp jơno ang dê, mà nơ̆m Kơnràñ ơ̆ tom jơno tơmbơgăl, hala sơntu rồp-să sơlơ̆ tơmbơgăl. 18Jăt gư̆ptî sŏng lơh nên, Kơnràñ sŏng bơjîng ƀòn mơ̆n tơlôh bơh î jơno tơs jơno tơpăt-ngăn, lơi ƀòn mơ̆n la du-ne ple sơm năm nơ̆m lơ̆gay jini-jơno Kơnràñ mon bơjîng. 19Ơ oh mi rôh lŏ kơñ-kơloh ăñ jê, gư̆t cĕ lah: Kơp cro kŭng păl khơñ kơnău, brĕ tơs, brĕ tơcao. 20Bơh jơno tơcao kon-mơnùs dê ơ̆ lơh gôjîng jơno tơpăt-durư̆ng Yang Tơm Trồ dî ờ. 21Gư̆n-jîng, ma-ngkơi jơ sŏng hồ lơi căư lơ̆gay jơno sơmơ̆-sơmĭñ băl î gư̆t nhẵư jơno bờk-mơsăk, păl dưñ-lăñ nơ̆m jơno dî tùc tăm, la jơno digơlăn dŏng-klàs hwîng-soan oh mi rôh lŏ dê. 22Păl sơlôh gôjîng tơmpôl cro lơh-jăt jơno, bư̆ng nư̆ng sî la tơmpôl cro iet kơnău mà pơlum dêh să tơm mơ̆n. 23Bơh dilah cro găy la cro iet jơno Yang mà ơ̆-iyŏ la cro lơh-jăt, gừn cro rơ̆ gư̆ptî du hôi cro năy trieng bơang môh măt mơ̆n nhòng krơh. 24Cro gư̆n trieng sŏng să mơ̆n sŏng gư̆n swà, gừn hwơbê̆ thơ̆t să tơm mơ̆n ờs la gư̆p tîgay. 25Mơya cro găy gư̆t swì nê̆ nơ̆m jơno bơlăm wêl-tăl jơno khăt-gơboh dê, gừn kư̆ kơđư̆ng nùs lơh tîgư̆n, ơ̆ sơlôh gôjîng cro kơnău khơñ hwơbê̆, mơya la cro lơh jơno păl lơh nên, gừn cro gư̆n rơp dî lơnge nơ̆m bră lơh mơ̆n dê. 26Dilah cro găy kơlôi mơ̆n la cro ngăc-ngăr bră Yang mà ơ̆-rgê ăt-bồ lơm-piet mơ̆n, mơya kư̆ pơlum dêh nùs să tơm mơ̆n, gừn jơno Yang cro gư̆n dê la ơ̆ kwơ mang găy ờ. 27Jơno niem Yang sang lơhiê î ơ̆ sồt-rmañ sơđàp măt Yang Tơm Trồ, Bàp ƀòn mơ̆n rơ̆ la tơmdŏng cro ơ̆ dî bàp, cro-ua mơ̆ndro nơ̆m jơno gleh-glăr ƀòn gô dê, î prăp jư să tơm mơ̆n ơ̆ kŏng dunya lơh sơmơ̆-sơmĭñ.