Heƀrơ 13

1Jơno kơñ-kơloh oh mi rôh lŏ păl kư̆ hôm miek. 2Bư̆ng hwơbê̆ nùs wă-rẵu cro năc, tài bơh jơno dô, du pơnah cro ơ̆ gư̆t bulah wă-rẵu kơp cro gơndrơh. 3Kah sơdơ trôh cĕ lơ̆gay cro kŏng ăm jam, gôlơh gư̆ptî kŏng săy srê̆ băl î ƀòn gô, î tơmpôl cro kŏng kơ̆p rôn-bơklơ̆n, gôlơh gư̆ptî să tơm oh mi rôh lŏ kŭng kŏng băl nơ̆m du să-jăn. 4Jơno tơmhòp bo păl la jơno kingam nhòng tĕdơ lơ̆gay cro, î jư adô̆ tơmhòp bo gừn păl ơ̆ sơmơ̆-sơmĭñ, bơh Yang Tơm Trồ rơp cahrña tơmpôl cro rês-àr bơnan î tơmpôl cro sơlăp-sơbêl. 5Rai-jîng oh mi rôh lŏ gừn păl bư̆ng ham-kơñ jên-priè, tơm tô̆ niem-nùs î lơ̆gay jơno ndăng dî, bơh să tơm Kơnràñ sŏng tơs lah: “Ăñ rơp ơ̆ dơ̆ găy lơi căư kon, Ăñ kŭng rơp ơ̆ dơ̆ găy lơi căư kon,” 6tien gơs, bơh dî nùs khơ̆n-sa, ƀòn mơ̆n tơs lah:

“Yang la Bơtao Dŏng-kơl ăñ gừn ăñ rơp ơ̆ kơ̆mbrit.

Cro nde rơp lơh ăñ mơmơh tîgay?”

7Kah sơdơ trôh cĕ tơmpôl cro tề-lăm mơ̆n, la tơmpôl cro tơs bơtău Jơno Yang Tơm Trồ dê ma oh mi rôh lŏ, tơm tô̆ lăng kơlôi wăl công nha rai-jîng ƀòn gô dê, kơt jăt cĕ jơno don ƀòn gô dê. 8Yang Dŏng-Klàs Jesu nge ma-ua, nge dô gư̆m trôh dî miek miek gừn ờs hôm tî yo. 9Bư̆ng kŏng pơlum bơh jơno wêl-tăl lơ̆gay jơno bơtău pơđơ nde. Bơh jơno niem-lơhơn ma nùs-nhơ̆m la dî lơh pran-kơdăng bơh jơno sơmah, ơ̆-iyŏ bơh lơ̆gay jơno sa, mà î lơ̆gay jơno gư̆n, tơmpôl cro jîng kơnơm bơh gô ơ̆ dî kwơ găy. 10Ƀòn mơ̆n dî du kaƀang duh-khoai, mà bơh dô, tơmpôl cro dŏng bră nơ̆m hîh duh-khoai ơ̆ dî gơnoăr sa. 11Bơh mham tơwai-glài, la jơno tơlôh bơh lơ̆gay jơno puôn jư̆ng, dî iyà mơ̆t nơ̆m lơ̆gay anẵu sang-goh bơh cro gơnoăr bơlăm-găl ăn jơno duh-khoai dơng, đah pơnah să-jăn gô dê gừn kŏng su makin kơdang tơmpôl lĭñ. 12Gư̆n-jîng, Yang Jesu kŭng sŏng kŏng jê-sồt makin mpông ƀòn dơng, lơi Kơnràñ digơlăn lơh lang bol gôjîng sang-goh kơnơm bơh mham să tơm mơ̆n dê. 13Gư̆n-jîng, ƀòn mơ̆n păl swà trôh ma Kơnràñ makin kơdang tơmpôl lĭñ, kŏng băl jơno tơngyŏ-tơnghiel Kơnràñ dê. 14Bơh ƀòn mơ̆n ơ̆ tom du ƀòn dơng găy hôm miek nơ̆m anẵu dô, tơblơ̆ wăl, ƀòn mơ̆n ndăng jôi lăng du ƀòn dơng mơñ trôh. 15Kơnơm bơh Kơnràñ, ƀòn mơ̆n digơlăn ăn jơno duh-khoai jong-rơ ma Yang Tơm Trồ nơ̆m lơ̆gay jơno, rơ̆ la jơno ple-đău bơh dẵư yôi tơs tơlôh sơnăn Kơnràñ. 16Hôm bră lơh jơno niem î jơno tơmpà tơmdŏng gừn bư̆ng hwơbê̆ bơh Yang Tơm Trồ dî sơhờp-sờhơn bơh lơ̆gay jơno ăn duh-khoai gư̆p tîgư̆n. 17Don jơno cĕ gư̆m don kơnău tơmpôl cro tề-lăm oh mi rôh lŏ, bơh ƀòn gô lăng jư hwîng-soan oh mi rôh lŏ gư̆ptî rơp tơs tơlôh bră, lơi ma ƀòn gô digơlăn lơh bră gư̆n î nùs sơhờp-sờhơn mà ơ̆ ƀoah-yoam, bơh jơno dô ơ̆ dî kwơ găy ma oh mi rôh lŏ.

18Hôi-dăn cĕ ma ƀòn hî, bơh ƀòn hî don nên-nôn ngăn lah mơ̆n dî nùs-nhơ̆m niem, tơm tô̆ kơp kơñ jîng dubă niem tơpăt-ngăn nơ̆m lơ̆gay bră. 19Mơya ăñ mơ̆ndơm-mơ̆nieng oh mi rôh lŏ lơh gư̆p tîgư̆n khăi rlo te, lơi ăñ dî lơboh trê khơñ wăl î oh mi rôh lŏ.

20Yang Tơm Trồ lơngăp-lơnge, Bơtao iyà Bơtao Jư Belàt Dơng, rơ̆ la Yang Jesu ƀòn mơ̆n, trê wăl bơh anẵu sơ̆t kơnơm bơh mham jơno hăư-băl miek miek, 21dăn Kơnràñ rcăng ma oh mi rôh lŏ bơh î lơ̆gay jơno niem lơi lơh jăt nùs kơñ Kơnràñ dê, tơm tô̆ lơh jơno niem-nùs sơđàp măt Kơnràñ nơ̆m ƀòn mơ̆n, kơnơm bơh Yang Dŏng-Klàs Jesu, la Bơtao mà jơno gơklŏ gôtrê mađah Kơnràñ trôh dî miek miek ơ̆ lơ̆ ơ̆ lŭi. Amen.

22Ơ oh mi rôh lŏ, ăñ dăn oh mi rôh lŏ ăt-ăl î jơno bơtău mơ̆ndơm-mơ̆nieng dô, bơh ăñ cêh ma oh mi rôh lŏ nư̆ng dư̆ng-iè jơno ƀeh. 23Oh mi rôh lŏ gư̆t lah cro oh mi Timôthe ƀòn mơ̆n dê sŏng dî kla khăt-gơboh, mà băl î gô gư̆n ăñ rơp tơmtom măt oh mi rôh lŏ dilah gô trôh ơm.

24Dăn còp-să lơ̆gay tơmpôl cro tề-lăm oh mi rôh lŏ băl î lơ̆gay kơp cro sang-goh. Kơp cro sang-goh bơh Itali còp-să oh mi rôh lŏ.

25Dăn jơno sơmah ăm băl î jơh lơ̆gay oh mi rôh lŏ.