Heƀrơ 12

1Bơh tîgư̆n gư̆n-jîng, tơm jơ ndăng tom du khô̆k tô̆ dơng ngăn bơh anẵu khăi cro lơh cư̆ng ăm kơwang tĕdơ mơ̆n, gừn ƀòn mơ̆n, ma-ngkơi jơ tă lơi căư lơ̆gay jơno kơjơ̆ gư̆m tồi-glài ƀòn lŭi lơh cơkhă, kŭng păl toat cơplŏk jăt jơno ăn mađàp măt mơ̆n bơh î jơno jơh nùs, 2ăm iyờp lăng ma Yang Jesu, Bơtao Mon Bơjîng î Bơtao Lơh Wêl-Tăl jơno don, la Bơtao bơh jơno sơhờp ăn sađàp măt mơ̆n sŏng kŏng-ăt nơ̆m sî pư̆ng, lăng ơ̆ săp jơno tơngyŏ-tơnghiel, mơya Kơnràñ sŏng nggui mađah ma sơban Yang Tơm Trồ. 3Lăng kơlôi nê̆ cĕ Bơtao sŏng kŏng-ăt jơno tơmdră dư̆ng gư̆n bơh tơmpôl cro tồi-glài gôtrê mađah ƀòn gô, lơi oh mi rôh lŏ ơ̆ sơòs-gleh ngglăm nùs mơ̆n, lơh gôjîng gơplơ̆ nùs.

4Oh mi rôh lŏ hôm dahrăư tơmdră trôh dî hua mham tơm tô̆ tơmlơh tơmdră wăl tồi-glài, 5mà oh mi rôh lŏ sŏng hwơbê̆ lơ̆gay jơno ƀăn tơngkah, la jơno ƀăn sơđah bơtău oh mi rôh lŏ gư̆ptî kon, lah:

“Ơ kon ăñ jê, bư̆ng lăng ơ̆ săp jơno bơtău tơngkah Yang,

kŭng bư̆ng gơplơ̆ nùs tơm tô̆ kŏng Kơnràñ ƀoah-đas;

6Bơh cro Yang kơñ-kơloh, gừn Kơnràñ rơp lơh-glài tơmal,

gư̆m Kơnràñ pơng lơh lơ̆gay cro kon mà Kơnràñ don dờp.”

7Oh mi rôh lŏ ndăng kŏng-ăt nơ̆m jơno lơh-glài tơmal; rơ̆ la Yang Tơm Trồ ndăng lăng oh mi rôh lŏ gư̆ptî kon. Bơh cro kon găy mà bàp ơ̆ lơh-glài tơmal? 8Mơya dilah oh mi rôh lŏ ơ̆ kŏng jơno lơh-glài tơmal, la jơno mà jơh lơ̆gay kon so sŏng gôjîng tơmpôl cro kŏng băl, tîgư̆n oh mi rôh lŏ la tơmpôl kon-tơr, mà ơ̆-iyŏ la tơmpôl kon ngăn. 9Rlo te, ƀòn mơ̆n dî tơmpôl cro bàp đah să-jăn mơ̆n dê, gư̆ptî tơmpôl cro lơh glài tơmal, gừn ƀòn mơ̆n ờs kingam; hôm gôtrê î Bàp đah hwîng-soan, ơ̆-iyŏ ƀòn mơ̆n rơp lơh-jăt sî nge sî khăi, gừn ƀòn mơ̆n rơp jîng ya? 10Bơh bulah bàp đah să-jăn lơh glài tơmal ƀòn mơ̆n nơ̆m du êt nge jăt jơno gôlơh gư̆ptî la niem ngăn gôtrê î ƀòn gô, mơya Bàp đah hwîng-soan lơh glài tơmal tài bơh iyà wăl jơno kwơ ma ƀòn mơ̆n, lơi ngui băl nơ̆m pơnah jơno sang-goh Kơnràñ dê. 11Jăt lơ̆gay kơp jơno lơh-glài tơmal nơ̆m jơ tom tơlôh ơ̆ tom jơno găy la jơno sơhờp, tơblơ̆ wăl la jê-kơkua, mơya ma-ngkơi dô, jơno gư̆n tơlôh ple lơngăp-lơnge jơno tơpăt-durư̆ng ma tơmpôl cro găy sŏng dî bơtê kơnơm bơh gô. 12Gư̆n-jîng, păl pran-kơdăng wăl lơ̆gay kơ̆mpang tê lơgah î lơ̆gay krô̆ng kŏng lơbăn-lơñô, 13gư̆m lơh tơpăt cĕ lơ̆gay gung swà ma jư̆ng oh mi rôh lŏ, lơi cro kwềt-kơte jư̆ng ơ̆ kŏng sơndăc jư̆ng, mà ala sơgư̆n la dî sămƀeah.

14Tơte jăt cĕ jơno lơngăp-lơnge î lơ̆gay cro, băl î jơno sang-goh, mà ơ̆ tom jơno dô gừn ơ̆ cro găy rơp dî lăng tơmpơl Yang, 15bơh î bră kơhea-să ăm jư, lơi bư̆ng cro găy prồt bơh jơno sơmah Yang Tơm Trồ dê, kơ̆mbrit la reh bơtăng găy hon lơh sơlô̆ng-sơlăng, gừn khăi cro digơlăn kŏng jơno sơmơ̆-sơmĭñ bơh gô, 16bư̆ng lơi cro găy gư̆n tìs-glài rês-àr bơnan hala sơmăm tìs-glài gư̆ptî Esao, la cro nư̆ng bơh du jơno sa mà brău gơnoăr kon sơm mơ̆n dê. 17Bơh oh mi rôh lŏ gư̆t lah tien gơs ma-ngkơi gư̆n, tơm tô̆ kơp kơñ dưñ-lăñ jơno lơngăp-lơnge, gừn ông sŏng kŏng khan lơi căư makin, bơh ông ơ̆ jôi dî tô̆ jơ lơwah mbư̆ng lơi căư glài, bulah jôi lăng gô băl î dà măt.

18Bơh oh mi rôh lŏ ơ̆ trôh en î jơno digơlăn tơmpơ̆p dî, î oềs sa rhô, î kơnăm-kơnom, î ñô̆ng, gư̆m î cal rbơ̆t 19băl î jơno kơ̆ntàs kơluôk, gư̆m î jơno kơ̆ntàs lơ̆gay jơno mà lơ̆gay cro kơnău sŏng tơm dăn lơi ƀòn gô ơ̆ kŏng dưñ du-lăm jơno găy te. 20Bơh ƀòn gô ơ̆ kŏng dơi jơno gơnoăr dî tơs, lah: “Dilah jơno puôn jư̆ng găy tien gơs nư̆ng tơmpơ̆p nơ̆m yồ, gô rơp kŏng kơ̆ndang lô̆.” 21Gư̆m jơno dî rang sơđah gừn kơ̆mbrit-kơ̆mbròt ngăn tien gơs Môise sŏng tơs lah: “Ăñ kơ̆mbrit-kơ̆mbròt î ntơ să.” 22Mơya, oh mi rôh lŏ trôh sŏng sî Yồ Siôn î ƀòn dơng Yang Tơm Trồ jîng miek, î Jerusalem cŭngsî trồ, î hang hieng rbô cro gơndrơh, î jơno jong-rơ, 23î hîh jư̆m lơ̆gay kon sơm sŏng dî cêh sơnăn măt cŭngsî lơ̆gay dăp trồ, î Yang Tơm Trồ la Bơtao cahrña lơ̆gay cro, î lơ̆gay hwîng lơ̆gay cro tơpăt-durư̆ng sŏng dî lơh wêl-tăl, 24î Yang Jesu, Bơtao Đơng-Kưh jơno hăư-băl mhăy, gư̆m î mham jơno sêh-prài tom dẵư tơs pran-kơdăng rlo ma î Abel. 25Kơhea-să cĕ, kơ̆mbrit oh mi rôh lŏ khan lơi căư Bơtao ndăng tơs bơtău. Bơh dilah tơmpôl cro năy ơ̆ klàs dî ma-ngkơi jơ khan lơi căư cro tơs tơngkah mơ̆n ăm nơ̆m ù, gừn ƀòn mơ̆n sơlơ nge sơlơ lŭi lang, tơm tô̆ la tơmpôl cro tơmblăc să wăl î Bơtao bơh cŭngsî trồ, 26mà jơno tơs Bơtao gư̆n sŏng lơh ù wăl lơnggơh nơ̆m ñăm tô̆ jơ gư̆n, hôm jơ dô Kơnràñ sŏng hăư pơngon lah: “Du dơ̆ te să tơm Ăñ rơp lơh ù wăl lơnggơh, ơ̆-iyŏ nư̆ng sî ù, mà la gư̆m trồ.” 27Mơya jơno tơs “Du dơ̆ te”, ndăng sơđah nê̆-năn bră tă lơi căư lơ̆gay jơno kŏng wăl lơnggơh, gư̆ptî lơ̆gay jơno sŏng dî bơjîng, lơi ma lơ̆gay jơno ơ̆ kŏng wăl lơnggơh digơlăn hôm wăl. 28Gư̆n-jîng, ƀòn mơ̆n păl dî nùs gư̆t ưnngai tơm tô̆ dưñ-lăñ du lơgơ ơ̆ wăl lơnggơh, mà kơnơm bơh gư̆n ƀòn mơ̆n digơlăn duh-khoai Yang Tơm Trồ dubă niem-nùs, î nùs kingam gư̆m duh kơ̆mbrit, 29bơh Yang Tơm Trồ ƀòn mơ̆n la lơngkòt oềs su hit.