Heƀrơ 11

1Jơno don la jơno bơkhê ngăn bơh lơ̆gay jơno dî cang-kơnơm, la cư̆ng-tang bơh lơ̆gay bră ơ̆ tơmpơl dî. 2Kơnơm bơh jơno don, lơ̆gay cro rai yo sŏng dî lơh cư̆ng niem. 3Bơh jơno don ƀòn mơ̆n đăl gư̆t la lơgơ dunya dô sŏng dî bơjîng bơh jơno tơs Yang Tơm Trồ dê — lơi jơno tơmpơl dî sŏng ơ̆ bơjîng bơh jơno digơlăn lăng tơmpơl. 4Bơh jơno don Abel sŏng ăn lêh ma Yang Tơm Trồ du lơ̆m jơno ăn duh-khoai niem rlo jơh î jơno Kain, mà kơnơm bơh gư̆n ông dî lơh cư̆ng la tơpăt-durư̆ng, tơm jơ Yang Tơm Trồ dờp sơđah jơno dưñ-lăñ nơ̆m lơ̆gay jơno ăn duh-khoai ông dê, gư̆m kơnơm bơh jơno don, Abel gư̆n hôm tơs bulah sŏng sơ̆t. 5Bơh jơno don Enŏk dî iyà cŭngsî trồ, ơ̆ gư̆t kŏng jơno sơ̆t, gừn “ông ơ̆ dî jôi tơmpơl, bơh Yang Tơm Trồ sŏng iyà ông swà.” Bơh sơđàp jơno iyà swà mơ̆n dê, ông dî lơh cư̆ng la lơh niem-nùs Yang Tơm Trồ. 6Mơya, ơ̆ dî jơno don rơp ơ̆ lơh niem-nùs Yang Tơm Trồ, bơh jơno păl lơh î cro trôh băl î Yang Tơm Trồ la păl don lah Kơnràñ tom ngăn gư̆m Kơnràñ la Bơtao dờp e phăn-ƀan ma tơmpôl cro jôi jăt Kơnràñ. 7Kơnơm bơh jơno don, ma-ngkơi jơ dî e tơnggư̆t lai bơh lơ̆gay jơno hôm dahrăư dî tơmpơl, gừn bơh duh kơ̆mbrit, Nôe sŏng pư̆ng du-lăm ahẵu rcăng ma jơno dŏng-tă hîh nhă mơ̆n, mà bơh jơno gư̆n, ông sŏng kơ̆p glài dunya gừn sơlôh gôjîng cro cơdô̆ jơno tơpăt-durư̆ng jăt jơno don. 8Kơnơm bơh jơno don, bơh dî hôi-săc, Abraham sŏng don jơno lơi tơlôh swà trôh anẵu mà mơ̆n rơp dưñ-lăñ lơh srăy-brê, gừn ông sŏng tơlôh swà tơm tô̆ ơ̆ gư̆t mơ̆n swà sơgăy. 9Kơnơm bơh jơno don, ông ăm nơ̆m ù hăư pơngon gư̆ptî lang bol, tơm tô̆ sŏng ăm nơ̆m kơjang băl î Isăk gư̆m Jakôp, tơmpôl cro cơdô̆ băl du jơno hăư pơngon, 10bơh ông cang-kơnơm du ƀòn dơng dî mơnang, mà Cro Jăt Tău Dơnău î Cro Băt-Tơngñă ƀòn dơng gư̆n la Yang Tơm Trồ. 11Kơnơm bơh jơno don, tien gơs să tơm Sara sŏng dưñ-lăñ dî pran lơi tơwă ƀăt tơm jơ sŏng rlo tô̆ tơnge niem năm dê, bơh mò don lah Bơtao sŏng hăư pơngon la tơpăt-durư̆ng. 12Gư̆n-jîng, kŭng bơh anẵu du hôi cro — gừn bulah kŏng lăng gư̆ptî sơ̆t lờt — lơ̆gay rai kon so sŏng dî bơda, gư̆ptî khà khăi jơh lơ̆gay sơmăñ cŭngsî trồ, gư̆m gư̆ptî càs ơ̆ katîng khà dî nơ̆m mằ dàlîng. 13Nơ̆m jơno don, lơ̆gay tơmpôl cro dô sơ̆t lờt tơm jơ hôm dahrăư dưñ-lăñ lơ̆gay jơno hăư pơngon, mơya lăng tơmpơl î wă-rẵu gô bơh ma wĭc, kŭng sơnăn băl lah mơ̆n la lang bol î cro năc nơ̆m ple-ù. 14Bơh tơmpôl cro tơs lơ̆gay jơno tîgư̆n kŭng dờp gư̆t nê̆ lah ƀòn gô ndăng jôi lăng du ƀòn lơgơ. 15Dilah ƀòn gô sơdơ kơlôi bơh lơgơ mà ƀòn gô bơh anẵu gư̆n tơlôh swà, gừn nên-nôn ngăn la ƀòn gô sŏng dî tô̆ jơ lơwah lơi blăc trê wăl. 16Mơya jơ dô ƀòn gô kơp kơñ du-anẵu niem rlo, rơ̆ la lơgơ cŭngsî trồ. Gư̆n-jîng Yang Tơm Trồ ơ̆ ƀasmăt bơh ƀòn gô, lơi dî sơnăn la Yang Tơm Trồ ƀòn gô dê, bơh Kơnràñ sŏng rcăng du ƀòn dơng ma ƀòn gô. 17Kơnơm bơh jơno don, Abraham ăn Isăk tơm jơ kŏng lòng, tien gơs ma-ngkơi tơm jơ dưñ-lăñ dî jơno hăư pơngon, ông sŏng ăn kon klo dul mơ̆n dê, 18mà gôtrê bơh kon gư̆n, tom jơno tơs lah: “Kơnơm bơh Isăk, nŏk-noi kon dê rơp dî ăn sơnăn,” 19bơh sŏng kơlôi lah Yang Tơm Trồ dî gơnoăr lơh jîng wăl, bulah bơh nơ̆m anẵu sơ̆t, gừn nơ̆m jơno tơs jăt đah hwîng, ông sŏng dưñ wăl kon mơ̆n bơh nơ̆m anẵu gư̆n. 20Kŭng kơnơm bơh jơno don, Isăk e lơnge ma Jakôp î Esao bơh lơ̆gay bră rơp tom tơlôh trôh. 21Kơnơm bơh jơno don, dơ̆ mơñ sơ̆t, Jakôp e lơnge ma kơp du hôi kon klo Jôsep, gư̆m sơ̆mƀîng sî găl mư̆ng-jra mơ̆n, ông cơdơn krô̆ng duh-khoai Yang. 22Kơnơm bơh jơno don, tơm tô̆ mơñ sơ̆t, Jôsep tơs wăl bơh jơno tơlôh swà kon so Israel dê gư̆m ƀăn tơngkah ƀòn gô bơh katîng ƀùc mơ̆n dê. 23Kơnơm bơh jơno don, ma-ngkơi jơ dî bơda tơlôh, Môise sŏng dî mơi bàp mơ̆n iyà ăn ămpôn nơ̆m păy kơnnhe bơh ƀòn gô tơmpơl kon bloh mơnĕ-mơnài, gư̆m ƀòn gô ơ̆ kơ̆mbrit jơno gơnoăr pơđơ bơtao. 24Kơnơm bơh jơno don, dơ̆ sŏng dơng lờt, Môise khan lơi căư sơnăn la kon klo kon ua bơtao Pharaôn. 25Ala sơgư̆n, ông jăt mađah gung kŏng jê gleh-glăr băl î lang bol Yang rlo la dưñ-lăñ jơno sơhờp-sờhơn ăm dơh tồi-glài dê. 26Ông swì lăng tơmpơl jơno tơngyŏ-tơnghiel cro dî bŏng mơñà la jơno kơnhơ̆p-mơ̆nda dî dơng mang rlo ma lơ̆gay phăn-ƀan Ejiptơ, bơh ông ăm lăng dubă nê̆-năn gôtrê trôh jơno phăn-ƀan mơ̆n dê. 27Kơnơm bơh jơno don, ông lơi căư Ejiptơ, ơ̆ kơ̆mbrit jơno tơcao bơtao, bơh ông kŏng ăt-ăl gôlơh gư̆ptî ndăng lăng tơmpơl Bơtao ơ̆ tơmpơl dî. 28Kơnơm bơh jơno don, ông Bơjư̆m-Sa Swà-Găn băl î jơno sêh mham, lơi bơtao tơngroh lơ̆gay kon sơm ơ̆ lơh bờk-mơsăk trôh lang bol. 29Kơnơm bơh jơno don, lang bol swà găn Dàlîng Brông gôlơh gư̆ptî swà găn nơ̆m ù tơsoh, la anẵu mà cro Ejiptơ sŏng kŏng dà bô̆ sơ̆t lơ̆ ma-ngkơi jơ grat pran. 30Kơnơm bơh jơno don, lơ̆gay piê ƀòn dơng Jerikô rlăm, ma-ngkơi jơ swà bơdăc tĕdơ miek nơ̆m poh nge. 31Kơnơm bơh jơno don, cro-ua kliê Rahap ơ̆ sơ̆t băl î tơmpôl cro ơ̆ don, ma-ngkơi jơ wă-rẵu tơmpôl cro swà rwang lăng î nùs sơmah-sơmai. 32Gừn ăñ digơlăn tơs rlo te jơno găy te? Bơh tô̆ jơ rơp ơ̆ tăl ma ăñ tơm tô̆ tơs wăl bơh Gideôn, Ƀarak, Samsôn, Jepthe, Dabit, gư̆m î Samuel băl î lơ̆gay cro gơnoăr-hwơr, 33la tơmpôl cro, kơnơm bơh jơno don, sŏng pha-lĭn lơ̆gay dà lơgơ, lơh-jăt jơno tơpăt-durư̆ng, dưñ-lăñ dî jơno hăư pơngon, cơmêm kơ̆mbung phơ̆m, 34pên tơngsơ̆t oềs rhô, klàs bơh pàs-đao, dî pran-kơdăng bơh nơ̆m anẵu lơbăn-lơñô, dî gôjîng pran-kơdăng nơ̆m jơno tơmlơh-tơmpìt, lơh ma lơ̆gay tơmpôl lĭñ lang bol bơdih păl alah-atà. 35Khăi cro-ua dưñ-lăñ wăl cro găp să mơ̆n sơ̆t lờt bơh bră jîng wăl, mơya tơmpôl cro nde kŏng lơh sơòs-gleh, ơ̆ kơp kơñ jơno hồ-toh, lơi ƀòn gô digơlăn dưñ-lăñ jơno jîng wăl niem rlo; 36hôm du pơnah nde te sŏng kŏng jơno lòng bơh lơ̆gay jơno tơngyŏ-tơnghiel gư̆m pơng lơh, mà rlo sơgư̆n te la kŏng căp săy-srê̆ î ăm jam. 37Ƀòn gô kŏng kơ̆ndang lô̆, kŏng òt jîng bea, ƀòn gô kŏng lòng, sơ̆t bơh pàs-đao, ƀòn gô swà sơdô sơdă nơ̆m ao kato belàt, kato băy, kŏng prŏi, kŏng rŭng-rai, kŏng kơ̆p rôn-bơklơ̆n; 38(mà dunya gừn ơ̆ dî păl î ƀòn gô), kŏng kơ̆mprah-kơ̆mprĭng nơ̆m ƀlang-càs, yồ grôi, nơ̆m lơ̆gay gòp î trôm jrô ngglăm ù. 39Gừn ma-ngkơi jơ dî jơno lơh cư̆ng niem bơh jơno don, lơ̆gay tơmpôl cro dô hôm dahrăư dưñ-lăñ wăl jơno hăư pơngon ma mơ̆n, 40bơh Yang Tơm Trồ sŏng rcăng jơno niem rlo ma ƀòn mơ̆n, lơi bulah ơ̆ tom ƀòn mơ̆n, ƀòn gô ơ̆ dî lơh gôjîng wêl-tăl.