Heƀrơ 10

1Bơh jơno-bơlăm — tơm tô̆ nư̆ng dî rồp sơntu lơ̆gay jơno niem mơñ trôh dê, ơ̆-iyŏ să tơm rồp sơntu lơ̆gay jơno gư̆n dê — ơ̆ dơ̆ găy digơlăn lơh wêl-tăl cro găy trôh en Yang Tơm Trồ î băl lơ̆gay jơno ăn duh-khoai mà ƀòn gô kư̆ iyà ăn miek miek kơp năm. 2Dilah bră gư̆n digơlăn, cro duh-khoai sŏng dî lơh lơhiê du dơ̆ la tăl lờt gừn ơ̆ hôm kŏng jơno ƀasmăt jơno tồi-glài te, gừn ơ̆-iyŏ lơ̆gay jơno ăn duh-khoai sŏng bơdê pơdư̆ng ăn hala ơ̆h. 3Tơblơ̆ wăl, î lơ̆gay jơno ăn duh-khoai gư̆n, tom du jơno tơngkah wăl bơh tồi-glài kơp năm. 4Bơh mham lamău kwăng dê î băy kwăng ơ̆ rgê tă tồi-glài dî ơ̆. 5Bơh gư̆n, tơm tô̆ mơ̆t nơ̆m dunya, Kơnràñ tơs:

“Yang ơ̆ kơñ

jơno pơdư̆ng ăn î jơno duh-khoai,

mơya Kơnràñ sŏng rcăng lai du-lăm să-jăn ma Kon;

6Kơnràñ kŭng ơ̆ kơñ

bơh lơ̆gay jơno su pơ î jơno tơwai-glài.

7Ma-ngkơi gư̆n, ăñ tơs: ‘Dăn lăng dô, Kon trôh —

jăt gư̆ptî jơno nơ̆m pơnah sră bôt sŏng cêh bơh kon —

lơi lơh-jăt jơno kơñ Kơnràñ dê, ơ Yang Tơm Trồ.’”

8Tơm tô̆ Kơnràñ tơs gư̆ptî lai lah: “Yang ơ̆ kơñ jơno duh-khoai î jơno ăn duh-khoai, băl î lơ̆gay jơno ăn su pơ î jơno tơwai-glài. Kơnràñ kŭng ơ̆ kơñ lơ̆gay jơno gư̆n” (mà gô dî ăn jăt jơno-bơlăm), 9ma-ngkơi gư̆n, Kơnràñ tơs: “Dăn lăng dô, Kon trôh lơi lơh-jăt jơno kơñ Kơnràñ dê.” Kơnràñ lơi căư jơno dơ̆ sơm lơi băt bơtao jơno dơ̆ bea. 10Bơh nùs-kơñ gư̆n, ƀòn mơ̆n dô sŏng dî sang-goh kơnơm bơh jơno ăn să-jăn Yang Dŏng-Klàs Jesu dê lơh jơno duh-khoai du dơ̆ tăl jai. 11Ngăn, kơp du hôi cro gơnoăr ăn jơno duh-khoai kơp nge ñă dŏng bră gư̆m ờs kơp nge ăn băl î jơno duh-khoai, mà gô ơ̆ dơ̆ găy digơlăn tă lơi căư tồi-glài dî. 12Mơya Kơnràñ, ma-ngkơi jơ tài bơh tồi-glài ăn jơno duh-khoai du-lăm trôh dî miek miek, gừn sŏng ăm nggui đah ma Yang Tơm Trồ, 13ăm cang bơh tô̆ jơ gư̆n trôh dî jơ lơ̆gay cro tơmdră Kơnràñ kŏng lơh jơno ăn jư̆ng ma Kơnràñ. 14Bơh kơnơm nư̆ng du-lăm jơno ăn duh-khoai, Kơnràñ sŏng lơh lơ̆gay cro dî rao lơhiê sơlôh jîng wêl-tăl trôh dî miek miek. 15Hôm Yang Hwîng Goh kŭng lơh cư̆ng ma ƀòn mơ̆n, bơh ma-ngkơi gư̆n sŏng tơs lah:

16“Dô la jơno hăư-băl mà Ăñ rơp băt bơtao băl î ƀòn gô

ma-ngkơi lơ̆gay nge gư̆n, Yang tơs,

tơm tô̆ ăn jơno-bơlăm Ăñ nơ̆m nhòng nùs ƀòn gô,

Ăñ kŭng rơp cêh gô nơ̆m nùs-kơlôi ƀòn gô.”

17Gừn:

“Ăñ ngăn la rơp ơ̆ hôm sơdơ trôh tồi-glài ƀòn gô

î lơ̆gay bră ơ̆ jăt jơno-bơlăm ƀòn gô dê te.”

18Mơya anẵu găy tom jơno hồ glài lơ̆gay jơno tìs-glài gư̆n, anẵu gư̆n ơ̆ hôm jơno ăn duh-khoai tơwai-glài.

19Gư̆n-jîng, ơ oh mi rôh lŏ, bơh tom dî nùs ngăc-ngăr ma bră mơ̆t nơ̆m lơ̆gay anẵu sang-goh kơnơm mham Yang Jesu dê, 20la Bơtao sŏng sơntơm pẵư ma ƀòn mơ̆n du-lăm gung mhăy î swà găn bơh tî kơmang, rơ̆ la să-jăn Kơnràñ, 21gừn du hôi cro gơnoăr ăn jơno duh-khoai dơng mang ăt-bồ cŭngsî hîh Yang Tơm Trồ dê, 22gư̆n-jîng ƀòn mơ̆n păl trôh en Yang Tơm Trồ bơh nùs tua don tơpăt nơ̆m jơno lơh nên jơno don dê, nùs dî brùi mham rao lơhiê bơh nùs-kơlôi bờk-mơsăk gư̆m să-jăn dî rao bơh î dà sang lơhiê. 23Ƀòn mơ̆n păl jư bơkhê jơno hăư-băl bơh jơno kơnơm mơ̆n dê ơ̆ wăl lơnggơh, bơh Bơtao sŏng hăư pơngon la tơpăt-ngăn. 24Gừn ƀòn mơ̆n păl kah kơlôi băl î găp lơi kơlôi trôh bră tơm bơtrôt nùs kơñ-kơloh î lơ̆gay bră lơbăn-niem, 25tơm tô̆ ơ̆ lơi căư jơno bơjư̆m băl î găp ƀòn mơ̆n dê gư̆ptî jơno ờs dơm lơh gôtrê ma du pơnah cro, tơblơ̆ wăl la pơndơm băl î găp, gừn dilah oh mi rôh lŏ tơmpơl nge gư̆n trôh en nhẵư gừn păl lơh khăi sơlơ rlo nhẵư te.

26Bơh dilah ƀòn mơ̆n kư̆ kơñ lơh tìs-glài ma-ngkơi jơ sŏng dưñ-lăñ jơno gư̆t wơng wêl-tăl bơh jơno tơpăt-ngăn, gừn ơ̆ hôm ăn jơno tơwai-glài te, 27mơya la jơno cơkhă-cang dubă kơ̆mbrit-kơ̆mbròt nên-nôn ngăn bơh jơno cahrña gư̆m bơh oềs rhô sơmơn kŏng su tơngroh lơ̆gay cro tơmdră. 28Kơp cro găy, dilah lơi căư jơno-bơlăm Môise kơnơm nơ̆m bea hala băy hê cro lơh cư̆ng, gừn sơ̆t căư ơ̆ kơloh-kơlài. 29Oh mi rôh lŏ kơlôi cro jă pên Kon Yang Tơm Trồ, î lăng mham jơno hăư-băl la ơ̆ săp sơmơ̆-sơmĭñ — mà bơh mham gư̆n, mơ̆n sơlôh dî sang-goh — gừn sơmăm tìs Yang Hwîng Goh jơno sơmah dê, gô rơp păl kŏng jơno lơh-glài kơjơ̆ rlo khăi gư̆t nhẵư? 30Bơh ƀòn mơ̆n gư̆t Bơtao sŏng tơs lah: “Jơno kla tê gôtrê ma Ăñ; Ăñ rơp kla wăl.” Gừn tơs lah: “Yang rơp cahrña lang bol Kơnràñ.” 31Duh bơh nơ̆m tê Yang Tơm Trồ hôm jîng miek la du-lăm jơno kơ̆mbrit-kơ̆mbròt!

32Mơya sơdơ cĕ wăl lơ̆gay nge lai ƀua, mà sŏng dî pẵư bơang nơ̆m lơ̆gay nge gư̆n, lah oh mi rôh lŏ sŏng kŏng du jơno tơmlơh dơng ngăn khăi jơno sơòs-gleh dê, 33dơ̆ dô gừn kŏng lơ̆gay jơno tơngyŏ-tơnghiel î jơno sơòs-gleh sađàp lang bol, hôm dơ̆ nde gừn dî sơlôh jîng cro tơmpà î cro găy kŏng rôn-bơklơ̆n jăt tîgư̆n. 34Bơh oh mi rôh lŏ kŭng sŏng dî nùs kơñ-kơloh lơ̆gay cro kŏng jam, gư̆m sŏng dưñ-lăñ jơno kŏng dưñ kơntô̆ng phăn-mơna mơ̆n î jơno sơhờp, bơh gư̆t să mơ̆n tom dî phăn-mơna niem rlo î hôm miek. 35Bơh gư̆n, oh mi rôh lŏ bư̆ng lơi căư nùs don nên mơ̆n dê, la jơno dưñ-lăñ du-lăm phăn-ƀan dơng ngăn. 36Bơh oh mi rôh lŏ păl dî bơh jơno kŏng-ăt, lơi ma-ngkơi jơ lơh-jăt nùs-kơñ Yang Tơm Trồ dê, oh mi rôh lŏ digơlăn dưñ dî jơno hăư pơngon.

37“Bơh nơ̆m du êt jŏ te,

Bơtao ndăng trôh rơp trôh, gừn rơp ơ̆ băt nge.

38Mơya cro tơpăt-durư̆ng Ăñ jê rơp jîng bơh jơno don;

hôm dilah cro rîc wăl, gừn hwîng-soan Ăñ ơ̆ niem-nùs î gô.”

39Mơya sătan ƀòn mơ̆n ơ̆ ăm nơ̆m jơno rîc wăl trôh anẵu kŏng tơngroh, tơblơ̆ wăl la nơ̆m jơno don kơlôi trôh anẵu dŏng tơwai hwîng-soan dê.