Heƀrơ 9

1Bơh gư̆n, jơno hăư-băl dơ̆ sơm gư̆n ờs tom lơ̆gay jơno pơđơ bơlăm bơh jơno duh-khoai, pơnjăt du anẵu sang-goh nơ̆m ù, 2bơh du-lăm kơjang bơdơh sŏng dî băt bơtao, pơnah dơ̆ sơm, nơ̆m gư̆n tom gư̆m jư̆ng đeng băl î kaƀang, băl î lơ̆gay ƀĕ ƀăñ ăn duh-khoai, la anẵu dî sơnăn la “Anẵu Sang-Goh”, 3hôm đah ma-ngkơi kơmang dơ̆ bea la pơnah kơjang bơdơh, anẵu dî sơnăn la “Anẵu Sang-Goh”, 4tom du-lăm kaƀang duh-khoai su kơlhô î màh, gư̆m thô̆ng jơno hăư-băl dî klî tĕdơ jơh lơ̆gay î màh, nơ̆m nhòng gư̆n la du-lăm kơlŏ î màh ăn mana, mư̆ng-jra sơ̆mbơ̆t bơkao Arôn dê, gư̆m lơ̆gay kapan jơno hăư-băl, 5hôm đah cŭngsî thô̆ng, lơ̆gay ceruƀin gơklŏ tơmbàk kơ̆ndrư̆p tơwai-glài, mà bơh lơ̆gay jơno gư̆n gừn ơ̆-iyŏ dơ̆ lơi tơs nê̆-năn jơh kơp bră. 6Sŏng gư̆n tơm jơ lơ̆gay jơno gư̆n sŏng dî rcăng rơndăp gư̆p tîgư̆n, lơ̆gay cro gơnoăr ăn jơno duh-khoai ờs swà mơ̆t nhòng pơnah kơjang bơdơh dơ̆ sơm, lơh wêl-tăl jơno duh bră mơ̆n dê; 7mơya nư̆ng cro gơnoăr ăn jơno duh-khoai dî mơ̆t nhòng pơnah dơ̆ bea du dơ̆ nhòng năm, gư̆m ơ̆ rgê ơ̆ tom mham, la jơno duh-khoai mà ông ăn ala ma sătan gô kŭng gư̆ptî lơ̆gay jơno tồi-glài lang bol dê. 8Yang Hwîng Goh kơnơm bơh bră gư̆n e tơmpơl nê̆-năn lah gung mơ̆t lơ̆gay anẵu sang-goh hôm dahrăư dî sơđah tơlôh, tơm tô̆ kơjang bơdơh dơ̆ sơm ndăng hôm anẵu gư̆n, 9mà gư̆n la du-lăm rồp sơntu rcăng ma nơ̆m pah rai dô, mà jăt bơh jơno gư̆n, lơ̆gay jơno duh-khoai băl î jơno pơn-dư̆ng dî ăn duh-khoai ơ̆ tom rgê lơi lơh wêl-tăl cro duh-khoai bơh jăt pơnah nùs tua, 10nư̆ng gôtrê trôh jơno sa gư̆m jơno ñô, băl î lơ̆gay jơno pơđơ rao lơhiê phadêh, rơ̆ la lơ̆gay jơno pơđơ bơh poăc-să, dî lơh nên trôh dî tô̆ tơnge bơgăl mhăy.

11Mơya Yang Dŏng-Klàs, tơm tô̆ trôh nơ̆m gơnoăr bră cro gơnoăr dơng bơlăm-găl ăn jơno duh-khoai lơ̆gay jơno niem dê ờs sŏng hôm miek, kơnơm bơh kơjang bơdơh dơng mang rlo î wêl-tăl rlo ơ̆ bơh tê kon-mơnùs băt bơtao, gư̆n la ơ̆ gôtrê bơh dunya sŏng mon bơjîng dô, 12kŭng ơ̆-iyŏ bơh mham băy kwăng dê î lamău kon, mơya bơh mham să tơm mơ̆n dê, Kơnràñ sŏng mơ̆t nơ̆m anẵu sang-goh du dơ̆ la tăl, să mơ̆n jôi dêh jơno tơwai-glài miek miek. 13Bơh dilah mham băy kwăng î lamău kwăng băl bră brùi buh lamău măy dăm cŭngsî lơ̆gay cro sŏng kŏng sơmơ̆-sơmĭñ hôm iyà trôh jơno sang-goh, ngui nơ̆m bră rao lơhiê să-jăn ƀòn gô, 14gừn mham Yang Dŏng-Klàs dê, la Bơtao bơh Yang Hwîng Goh miek miek sŏng ăn să tơm mơ̆n lơh jơno duh-khoai ơ̆ sồt ơ̆ rmañ ma Yang Tơm Trồ, rơp sơlơ rao lơhiê nùs tua oh mi rôh lŏ dê trôh gư̆t nhẵư klàs bơh lơ̆gay bră sơ̆t lơi duh bră Yang Tơm Trồ jîng miek! 15Tài bơh gư̆n, Kơnràñ la Bơtao Đơng-Kưh jơno hăư-băl mhăy dê, lơi tơm jơ jơno sơ̆t ăn lơi ma bră tơwai-glài lơ̆gay jơno tìs-glài kơnơm nơ̆m jơno hăư pơngon dơ̆ sơm dî rang sơđah, lơ̆gay cro sŏng dî hôi-săc digơlăn dưñ-lăñ jơno hăư pơngon bơh srăy miê miek miek. 16Bơh sơgăy tom sră pà jơtài, sơgư̆n lơh nên jơno sơ̆t cro dê lơh sră pà jơtài gư̆n păl dî lơh nên ngăn. 17Bơh sră pà jơtài nư̆ng tom dî gơnoăr kơnơm nơ̆m jơno sơ̆t, tîrơ̆ gư̆n gô ơ̆ tom jơ găy dî gơnoăr tơm tô̆ cro lơh sră pà jơtài hôm jîng. 18Bơh gư̆n, bulah jơno hăư-băl dơ̆ sơm kŭng sŏng ơ̆ dî păl kơnơm mà ơ̆ tom mham. 19Bơh dơ̆ kơp jơno pơđơ lăm jăt jơno-bơlăm sŏng dî Môise tơs ma jơh lơ̆gay lang bol, ma-ngkơi jơ dưñ mham lamău kon î băy kwăng, băl î dà, săy leng brông, î mbơlong sî ngưu-tât, ông sŏng brùi nơ̆m cŭngsî băl lơ̆ du bôt sră băl î jơh lơ̆gay lang bol, 20tơs lah: “Dô la mham jơno hăư-băl mà Yang Tơm Trồ sŏng tơs bơtău ma oh mi rôh lŏ.” 21Sŏng jăt gư̆ptî jơno gư̆n, ông sŏng sràc mham cŭngsî kơjang bơdơh gư̆m jơh lơ̆gay jơno ngui nơ̆m jơno duh-khoai. 22Bơh lơh jăt jơno-bơlăm, jơh lơ̆gay jơno dî lơh lơhiê kơnơm bơh mham, gư̆m ơ̆ tom jơno hua mham gừn ơ̆ tom jơno hồ glài.

23Gư̆n jîng, pơnah dô, jơno păl lơh gư̆n la lơ̆gay jơno sơntu sơđah lơ̆gay jơno cŭngsî trồ dî rao lơhiê bơh lơ̆gay jơno ăn duh-khoai dô, mơya pơnah nde, la jơh lơ̆gay jơno cŭngsî trồ păl rao lơhiê bơh î lơ̆gay jơno ăn duh-khoai niem rlo lơ̆ cŭngsî lơ̆gay jơno ăn duh-khoai gư̆n, 24bơh ngăn, Yang Dŏng-Klàs sŏng ơ̆ mơ̆t nơ̆m anẵu sang-goh bơh tê kon-mơnùs lơh jîng — la lơ̆gay jơno sơntu sơđah lơ̆gay jơno dê dî iyŏ ngăn — tơblơ̆ wăl la mơ̆t nơ̆m lơgơ cŭngsî trồ, lơi jơ dô sơđah sơđàp măt Yang Tơm Trồ dê ala ma ƀòn mơ̆n, 25kŭng ơ̆-iyŏ lơi ăn să tơm mơ̆n khăi dơ̆, gôlơh gư̆ptî cro gơnoăr dơng lăm ăn jơno duh-khoai kơp năm swà mơ̆t nơ̆m anẵu sang-goh băl î mham gôtrê bơh cro nde; 26bơh dilah ơ̆-iyŏ tîgư̆n, gừn jơno păl cang ma Kơnràñ la păl kŏng gleh khăi dơ̆ bơh jơ bơjîng lơgơ dunya. Mơya jơ dô, nư̆ng du dơ̆ nơ̆m lŭi-dơ̆t nơ̆m kơp rai, tài bơh bră kŏng tơngroh tồi-glài, Kơnràñ sŏng dî sơđah tơlôh bơh jơno phi să Kơnràñ dê. 27Gừn jăt gư̆ptî jơno dî rcăng lai ma kon-mơnùs păl sơ̆t du dơ̆, sŏng ma-ngkơi gư̆n la jơno cahrña, 28gừn kŭng tîgư̆n, ma-ngkơi jơ dî pơdư̆ng ăn nư̆ng du dơ̆ lơi añ-ơnòng tồi-glài khăi cro, Yang Dŏng-Klàs rơp dî sơđah să nơ̆m dơ̆ bea, ơ̆ lơi añ-ơnòng glài, mơya lơi jơno dŏng-klàs trôh î cro găy kơp kơñ cơkhă-cang Kơnràñ.