Heƀrơ 8

1Tîrơ̆ gừn, jơno dơng mang bơh jơno ndăng dî tơs la tî dô: Ƀòn mơ̆n tom du hôi cro gơnoăr dơng bơlăm-găl ăn jơno duh-khoai gư̆p tîgư̆n, la Bơtao sŏng nggui ăm đah ma sơban Bơtao Ryŭ-Ryơ̆m cŭngsî lơ̆gay tăp trồ, 2du hôi dê̆-gơna anẵu sang-goh dê î hîh duh-khoai tơpăt-ngăn mà să tơm Yang sŏng bơtao dî, ơ̆-iyŏ kon-mơnùs. 3Bơh kơp du hôi cro gơnoăr dơng bơlăm-găl ăn jơno duh-khoai gừn dî sơđah lơi ăn lơ̆gay jơno ăn băl î lơ̆gay jơno ăn duh-khoai, mà tài bơh gư̆n, Bơtao gư̆n kŭng păl tom jơno găy gư̆n mà Kơnràñ digơlăn lơi ăn. 4Gư̆n, dilah Kơnràñ hôm nơ̆m ù, gừn ngăn la Kơnràñ tien gơs sŏng ơ̆ lơh cro gơnoăr ăn jơno duh-khoai, bơh sŏng tom tơmpôl cro ăn jơno duh-khoai jăt jơno-bơlăm; 5la tơmpôl cro duh bră jăt du rồp sơntu î du rồp lơ̆gay jơno cŭngsî trồ dê, gư̆ptî Môise sŏng dî bơtău tơngkah tơm tô̆ bơtao mơñ lơh sŏng kơjang bơdơh, bơh Yang Tơm Trồ tơs lah: “Kơhea cĕ, kon rơp păl lơh lơ̆gay jơno jăt têl sơnoa-rnoas sŏng dî sơđah ma kon nơ̆m cŭngsî yồ mơnăm.” 6Mơya jơ dô, Kơnràñ sŏng dưñ-lăñ du gơnoăr bră dơng mang rlo gư̆t nhẵư, Kơnràñ kŭng la Bơtao Đơng-Kưh du jơno hăư-băl niem rlo gư̆t nhẵư dê, la jơno hăư-băl sŏng dî lơh nên kơnơm nơ̆m lơ̆gay jơno hăư pơngon niem rlo. 7Bơh dilah jơno hăư-băl dơ̆ sơm gư̆n sŏng la ơ̆ anẵu ƀoah-đas dî, gừn ngăn la anẵu ma jơno hăư-băl dơ̆ bea sŏng ơ̆ tom jôi tơmpơl. 8Bơh tơm tô̆ ƀoah-đas lang bol, Yang Tơm Trồ tơs lah:

“Lăng lăng cĕ, lơ̆gay nge gư̆n ndăng trôh, Yang tơs lah:

gừn ăñ rơp lơh sŏng du jơno hăư-băl mhăy

î hîh Israel gư̆m î hîh Juđa;

9ơ̆ iyŏ jăt jơno hăư-băl

mà Ăñ sŏng bơtao î lơ̆gay ông-pang ƀòn gô dê

nơ̆m nge Ăñ kơ̆p kơdum tê ƀòn gô

lơi bơlăm ƀòn gô tơlôh bơh lơgơ Ejiptơ,

bơh ƀòn gô sŏng ơ̆ kư̆ ăm nơ̆m jơno hăư-băl Ăñ jê,

Ăñ kŭng sŏng lơi căư ƀòn gô,

Yang tơs.

10Bơh dô la jơno hăư-băl

mà Ăñ rơp bơtao î hîh Israel

ma-ngkơi lơ̆gay nge gư̆n,

Yang tơs lah,

tơm tô̆ ăn lơ̆gay jơno bơlăm Ăñ jê nơ̆m nùs-kơlôi ƀòn gô,

Ăñ kŭng rơp cêh gô lêh nơ̆m nùs ƀòn gô,

gư̆m Ăñ rơp la Yang Tơm Trồ gôtrê ma ƀòn gô,

gư̆m ƀòn gô rơp la du lang bol ăn lơi ma Ăñ.

11Ngăn la ƀòn gô rơp ơ̆ bơtău tư̆ng hê cro găp du ƀòn mơ̆n

băl î nơ̆m kờp hê oh mi mơ̆n, lah: ‘Đăl gư̆t cĕ Yang,’

bơh jơh lơ̆gay ƀòn gô rơp gư̆t Ăñ,

bơh cro êt lŭi nơ̆m ƀòn gô trôh dî cro dơng ngăn rlo.

12Bơh Ăñ rơp e nùs kơñ-kơloh gôtrê î lơ̆gay bră lơh bờk-mơsăk ƀòn gô dê,

gư̆m Ăñ ngăn la rơp ơ̆ hôm sơdơ trôh tồi-glài ƀòn gô dê te.”

13Bơh bră tơs la “mhăy”, gừn Kơnràñ sŏng lơh ma jơno hăư-băl dơ̆ sơm sơlôh jîng yo-rkŏ, mà jơno kŏng lơh ma yo-rkŏ gư̆n sơlôh jîng yu-yo gừn ieng gư̆ptî la dơ̆ sŏng roh thơ̆t.