Heƀrơ 7

1Bơh Melcisedek dô, rơ̆ la bơtao Salem dê, cro gơnoăr ăn jơno duh-khoai Yang Tơm Trồ Cŭngsî Rlo Lơ̆ dê, gô sŏng tơmtom Abraham ndăng tơm jơ gô trê bơh anẵu tơmlơh tơngsơ̆t lơ̆gay bơtao, gư̆m sŏng e lơnge ma ông, 2mà Abraham kŭng sŏng ăn dêh du pơnah jư̆t bơh lơ̆gay jơno tơmlơh-tơmpìt lơi ăn ma bơtao gư̆n; lai ngăn, Melcisedek dî cêh sơnăn la “bơtao tơpăt-durư̆ng,” mà kŭng la bơtao Salem dê, gơtha la “bơtao lơngăp-lơnge,” 3bơtao ơ̆ tom bàp, ơ̆ tom mơi, ơ̆ tom nŏk-noi, kŭng ơ̆ tom lơ̆gay nge bơhsơm hala anẵu lŭi-dơ̆t rai-jîng, mơya dî gôlơh gư̆ptî Kon Yang Tơm Trồ, bơtao kư̆ lơh cro gơnoăr ăn jơno duh-khoai trôh dî miek miek.

4Mơya ngơ lăng cĕ bơtao gư̆n dơng mang tîgay, mà ông-pang Abraham sŏng ăn pơnah jư̆t bơh nơ̆m lơ̆gay jơno tơmlơh-tơmpìt niem. 5Hôm tơmpôl cro bơh nŏk-noi Lebi, dơ̆ dưñ-lăñ gơnoăr ăn jơno duh-khoai, gừn tom gơnoăr pơđơ lơi dưñ cĕ pơnah jư̆t bơh lang bol jăt jơno-bơlăm, gơtha la bơh oh mi roh lŏ mơ̆n, bulah jơno tơlôh bơh nùs Abraham. 6Mơya, tơm tô̆ ơ̆ dî băl nơ̆m nŏk-noi tơlôh bơh gô, bơtao dô sŏng dưñ-lăñ pơnah jư̆t bơh anẵu Abraham, gừn sŏng e lơnge ma cro tom dî lơ̆gay jơno hăư pơngon. 7Pơnah nde, ơ̆ tom jơno tơmbơkai găy tơm tô̆ cro kơnă yôh nteàh rlo dî e lơnge bơh cro kơnă yơng rlo. 8Gừn nơ̆m bră dô, tơmpôl cro ndăng mơn sơ̆t dưñ-lăñ pơnah jư̆t, hôm nơ̆m bră năy, bơtao gư̆n dî lơh cư̆ng la ndăng hôm jîng. 9Digơlăn tơs du jơno gư̆p tîgư̆n, Lebi, cro dưñ-lăñ lơ̆gay pơnah jư̆t, kŭng sŏng dî dưñ-lăñ pơnah jư̆t kơnơm bơh Abraham, 10bơh gô hôm ăm nơ̆m nùs ông-pang mơ̆n dê dơ̆ Melcisedek tơmtom măt Abraham.

11Tîgư̆n, dilah jơno niem wêl-tăl la kơnơm bơh gơnoăr bră ăn jơno duh-khoai cro Lebi dê (bơh jăt nơ̆m jơno gư̆n, lang bol sŏng dî dờp e jơno-bơlăm), gừn nokă lơh păl pồ bơtao bơtăl te cro gơnoăr ăn jơno duh-khoai nde jăt noi Melcisedek mà ơ̆ dî jăt noi Arôn? 12Bơh tơm tô̆ gơnoăr bră ăn jơno duh-khoai kŏng tơmbơgăl, gừn bơh jơno kŏng pơđơ, jơno tơmbơgăl bơh jơno-bơlăm kŭng păl tom tơlôh. 13Bơh Kơnràñ, Bơtao mà lơ̆gay jơno dô ndăng dî tơs trôh, gôtrê ma du nŏk-noi nde, mà bơh nơ̆m nŏk-noi gư̆n hôm dahrăư tom cro găy du dơ̆ găy dŏng bră nơ̆m kaƀang duh-khoai. 14Bơh nê̆-năn ngăn lah Yang ƀòn mơ̆n tơlôh bơh Juđa, mà gôtrê î nŏk-noi gư̆n, Môise sŏng ơ̆ tơs jơno găy gôtrê trôh lơ̆gay cro gơnoăr ăn jơno duh-khoai. 15Jơno dô tien gơs sî nê̆-năn rlo te dilah du hôi cro gơnoăr ăn jơno duh-khoai nde dî pồ bơtao jăt gư̆ptî rồp-să Melcisedek dê, 16la Bơtao sơlôh gôjîng cro gơnoăr ăn jơno duh-khoai ơ̆ jăt jơno-bơlăm nơ̆m jơno lơh nên bơh đah să-jăn, mơya la jăt gơnăp-gơnoăr jơno jîng ơ̆ kơlôi dî. 17Bơh Kơnràñ dî lơh cư̆ng lah:

“Kon la cro gơnoăr ăn jơno duh-khoai miek miek jăt nŏk-noi Melcisedek.”

18Bơh du pơnah, bră lơi căư jơno-bơlăm bơh lai ƀua tom tơlôh bơh gô ơ̆ tăl pran gừn ơ̆ kwơ 19(gư̆n bơh jơno-bơlăm ơ̆ lơh wêl-tăl niem ma jơno găy), gư̆m pơnah nde la bră iyà wăl jơno cang kơnơm niem rlo, mà kơnơm bơh gư̆n ƀòn mơ̆n dî trôh en Yang Tơm Trồ. 20Gừn ơ̆-iyŏ dî jơh lơ̆gay jơno gư̆n mà ơ̆ tom jơno hăư pơngon, — bơh bulah tơmpôl cro năy ơ̆ dî jơno hăư pơngon gừn sŏng sơlôh gôjîng lơ̆gay cro gơnoăr ăn jơno duh-khoai, 21mơya Kơnràñ gừn tơm kađia î jơno hăư pơngon, kơnơm bơh Bơtao tơs î Kơnràñ lah:

“Yang hăư sŏng gừn rơp ơ̆ tơmbơgăl nùs:

‘Kon la cro gơnoăr ăn jơno duh-khoai trôh dî miek miek.’” —

22gư̆n-jîng jăt bơh jơno dơng mang gư̆n, Yang Jesu sŏng sơlôh gôjîng Bơtao kơđư̆ng-bơkhê du jơno hăư-băl niem rlo. 23Gừn bulah tơmpôl cro bơh lai gôjîng cro gơnoăr ăn jơno duh-khoai la khăi rlo, tài bơh kŏng jơno sơ̆t cơkhă wăl lơi kư̆ lơh te, 24mơya, Kơnràñ jư gơnoăr bră ăn jơno duh-khoai ơ̆ rgê tơmbơgăl, bơh Kơnràñ hôm trôh dî miek miek, 25mà tài bơh jơno gư̆n, Kơnràñ kŭng tom dî gơnoăr lơi dŏng-tă trôh dî wêl-tăl tơmpôl cro trôh en Yang Tơm Trồ kơnơm bơh Kơnràñ, la Bơtao jîng miek lơi hôi-dăn ala ma ƀòn gô. 26Bơh du hôi cro gơnoăr dơng bơlăm-găl ăn jơno duh-khoai gư̆p tîgư̆n ngăn iyŏ la ăn lơi ma ƀòn mơ̆n: Bơtao sang-goh, ơ̆ tom glài, niem lơhiê, dî ăn dêh bơh lơ̆gay cro tồi-glài, gừn gôjîng dơng mang rlo lơ̆gay dăp trồ; 27la Bơtao ơ̆ tom kơp kơñ kơp nge gư̆ptî lơ̆gay cro gơnoăr dơng bơlăm-găl ăn jơno duh-khoai nde, păl ăn jơno duh-khoai, lai ngăn la ala ma tồi-glài dêh sătan mơ̆n dê, sŏng gư̆n la tồi-glài lang bol dê, bơh Kơnràñ sŏng lơh lờt bră gư̆n ma-ngkơi jơ ăn phi sătan mơ̆n du dơ̆ la tăl. 28Bơh jơno bơlăm pồ bơtao lơ̆gay cro tom lơbăn-lơñô lơh jîng cro gơnoăr dơng bơlăm-găl ăn jơno duh-khoai, mơya jơno sràt-să, la jơno trôh ma-ngkơi jơno bơlăm, gừn rang sơđah Kon, la Bơtao sŏng dî lơh niem wêl-tăl trôh dî miek miek.