Heƀrơ 6

1Gư̆n-jîng, tơm tô̆ sŏng lơi căư bơdơh gung duh-khoai ƀă-liă bơh Yang Dŏng-Klàs, ƀòn mơ̆n păl swà trôh dî nơ̆m jơno wêl-tăl, ơ̆ bơtao wăl mơnang bơh jơno mbư̆ng glài pleh wĭc lơ̆gay bră jơno sơ̆t, bơh jơno don anẵu Yang Tơm Trồ, 2jơno bơtê bơh gơnoăr ƀaptem, gư̆m jơno ăn tê băl î jơno jîng wăl cro sơ̆t dê, î jơno cahrña hôm miek miek. 3Ƀòn mơ̆n rơp lơh jơno gư̆n dilah Yang Tơm Trồ e gơnoăr. 4Bơh gư̆n la bră ơ̆ lơh dî — gôtrê î lơ̆gay cro sŏng tom dî jơno bơang-ang, bơh sơgư̆n sŏng gư̆t lăm jơno sơmah e gời bơh cŭngsî trồ, sơlôh jîng cro dî pơnah băl bơh Yang Hwîng Goh 5gừn gư̆t lăm jơno niem Yang Tơm Trồ dê băl î lơ̆gay jơno gơnăp-gơnoăr rai ma-ngkơi mơñ trôh dê 6mà sơmăm blă — lơi wăl jơno lơh dờp wăl lơ̆gay cro gư̆n blac trôh nơ̆m jơno rơmbư̆ng glài, tơm tô̆ pư̆ng điñ Kon Yang Tơm Trồ ma mơ̆n du dơ̆ te, gư̆m tơs jơno tơngyŏ-tơnghiel Kơnràñ. 7Bơh dubă ù, tơm tô̆ sŏng khăi dơ̆ suh miek dà mih duh ñhằt nơ̆m gô gừn hon tơlôh jơno dî kwơ ma cro, rơ̆ la ma tơmpôl cro găy tùc tăm gô, gừn dî pơnah nơ̆m jơno lơngăp-lơnge bơh Yang Tơm Trồ, 8hôm tơm jơ hon tơlôh lẵu î khơ̆-hơ̆t, gừn dubă ù gư̆n la jơno lơi căư gừn gôlơh gư̆ptî du jơno sràt-rma, mà jơno lŭi-dơ̆t gô dê la ăn lơi nơ̆m oềs sa.

9Mơya hôm gôtrê ma oh mi rôh lŏ, tơmpôl cro dî kơñ-kơloh, ƀăt nơ̆m tơm jơ tơs tîgư̆n, ƀòn hî sŏng dî mơ̆ndơm-mơ̆nieng bơh lơ̆gay jơno niem rlo gư̆m prăp ăn jư jơno sơmah dŏng-klàs. 10Bơh Yang Tơm Trồ ơ̆-iyŏ la ơ̆ tơpăt-ngăn bơh gư̆n hwơbê̆ bră lơh oh mi rôh lŏ, băl î jơno kơñ-kơloh mà oh mi rôh lŏ sŏng rang sơđah bơh sơnăn Kơnràñ, tơm tô̆ kŭng tom dŏng bră lơ̆gay cro sang-goh gư̆m jơ dô kŭng hôm dŏng bră ƀòn gô. 11Mơya ƀòn hî kơp kơñ ngăn kơp hê cro nơ̆m oh mi rôh lŏ rang sơđah nùs ngăc-ngăr gư̆p tîgư̆n, gôtrê trôh ma jơno lơh nên wêl-tăl bơh jơno don kơnơm mơ̆n dê trôh dî lŭi-dơ̆t, 12lơi ma oh mi rôh lŏ ơ̆ gôjîng tơmpôl cro alah-atà, mơya la tơmpôl cro lơh-jăt lơ̆gay krơh kơnơm bơh jơno don î nùs ăt-ăl ma dưñ-lăñ jơno hăư pơngon.

13Bơh Yang Tơm Trồ, tơm tô̆ hăư pơngon î Abraham, bơh ngăn Kơnràñ ơ̆ tom cro găy dơng rlo lơi kơnơm nơ̆m gư̆n ma sràt-să, gừn sŏng sràt-să kơnơm nơ̆m să tơm mơ̆n, 14lah: “Bơh nên-nôn ngăn la dilah e jơno sơmah, Ăñ rơp tôh jơno lơnge cŭng kon, gừn dilah bơtăl khăi, Ăñ rơp lơh kon bơtăl khăi rlo te.” 15Tîrơ̆ gư̆n, ma-ngkơi jơ ăt-ăl ăm cang jŏ, ông sŏng dưñ-lăñ dî jơno hăư pơngon gư̆n. 16Bơh cro sràt-să bơh î bră kơnơm bơh nơ̆m du hôi cro găy gư̆n dơng rlo ma mơ̆n, gừn gôtrê ma gô, anẵu dơ̆t-lŭi kờp jơno tơm pơndăng bơlăm trôh anẵu dubă băl gư̆n la jơno sràt-să, 17bơh jơno gư̆n, tơm tô̆ kơñ rang sơđah dubă tơngkah-tơngkăñ rlo ma rơ̆ te ma tơmpôl cro cơdô̆ jơno hăư pơngon bơh jơno kơñ lơh nên ơ̆ tơmbơgăl Kơnràñ dê, gừn Yang Tơm Trồ sŏng cơkhă bơh î du jơno sràt-să 18lơi kơnơm bơh bea-lăm jơno ơ̆ tơmbơgăl gư̆n, gôtrê bơh bea-lăm jơno gư̆n ơ̆ dî jơno găy lơi Yang Tơm Trồ tơs blăc, ƀòn mơ̆n, la tơmpôl cro toat cơplŏk trôh anẵu ămpôn, digơlăn dî jơno mơ̆ndơm-mơ̆nieng pran-kơdăng lơi kơ̆p bơkhê jơno cang-kơnơm jai dô sŏng ăn sơđàp măt mơ̆n; 19rơ̆ la jơno cang kơnơm mà ƀòn mơ̆n dưñ-lăñ gư̆ptî du kơnoĕ ma hwîng-soan, gư̆m lơnge gư̆m bơkhê, î swà mơ̆t nhòng ngglăm kơmang, 20anẵu mà Yang Jesu sŏng swà mơ̆t gư̆ptî Bơtao swà lai ala ma ƀòn mơ̆n, ma-ngkơi jơ sơlôh gôjîng cro gơnoăr bơlăm-găl ăn jơno duh-khoai dơng trôh dî miek miek jăt tơmpôl Melcisedek.