Heƀrơ 5

1Bơh kơp hê cro gơnoăr bơlăm-găl ăn jơno duh-khoai dơng, tơm tô̆ dî săc-rwơh bơh nhòng lang bol, dî pồ bơtao lơh cro ala măt ma lang bol nơ̆m lơ̆gay gơnoăr bră gôtrê bơh Yang Tơm Trồ, lơi digơlăn ăn jơno duh-khoai î jơno duh-khoai tơwai-glài; 2tơm tô̆ digơlăn ăt-ăl î tơmpôl cro wì-lơngôh î tìs kơ̆mprah, bơh sătan gô kŭng kŏng nơ̆m jơno lơbăn-lơñô. 3Tài bơh jơno gư̆n, cro gư̆n păl ăn jơno duh-khoai tơwai-glài, gư̆ptî lơh ma lang bol tîgay, gừn kŭng păl lơh ma sătan mơ̆n tîrơ̆. 4Ơ̆ tom du hôi cro găy dưñ-lăñ jơno dơng mang dô ma sătan mơ̆n, mà nư̆ng dî Yang Tơm Trồ hôi-săc, kŭng gư̆ptî Arôn. 5Kŭng gư̆p tîgư̆n, Yang Dŏng-Klàs kŭng ơ̆ pồ tơngñă dêh să tơm mơ̆n lơh jîng cro gơnoăr bơlăm-găl ăn jơno duh-khoai dơng. Ala bơh gư̆n la Bơtao sŏng tơs î Kơnràñ lah:

“Kon la Kon Ăñ;

Nge dô Ăñ sŏng bơda Kon.”

6Gư̆ptî Bơtao gư̆n kŭng tom tơs nơ̆m du-anẵu nde lah:

“Kon la cro gơnoăr ăn jơno duh-khoai trôh dî miek miek,

jăt tơmpôl Melcisedek.”

7Kơp lơ̆gay nge ăm nơ̆m đah să-jăn mơ̆n, Kơnràñ sŏng tơs jơno hôi-dăn băl î jơno răc-dăn, băl î jơno dreo dơng ñim-rèa lơ̆ nùs gư̆m dà măt trôh ma Bơtao dî gơnăp-gơnoăr dŏng-kơl mơ̆n klàs bơh jơno sơ̆t, gừn Kơnràñ sŏng dî iet kơnău bơh rai-jîng don kingam mơ̆n dê. 8Bulah la Kon, mơya Kơnràñ sŏng dî bơtê gư̆t jơno don-duh bơh lơ̆gay jơno mà Kơnràñ kŏng-ăt. 9Gừn dơ̆ sŏng dî lơh jîng wêl-tăl, Kơnràñ gôjîng jơno dŏng-klàs miek miek ma jơh lơ̆gay cro găy don jăt Kơnràñ, 10ma-ngkơi jơ dî Yang Tơm Trồ sơnăn lơh jîng cro gơnoăr bơlăm-găl ăn jơno duh-khoai jăt tơmpôl Melcisedek,

11mà gôtrê bơh cro dô gừn jơno lam kơnău tơs ma ƀòn mơ̆n la khăi ngăn, î tơs tơlôh kălkê ngăn, tài bơh oh mi rôh lŏ sŏng gôjîng alah-atà nơ̆m jơno ơ̆ kơñ iet kơnău. 12Bơh tien gơs trôh dî jơ dô, bơgăy păl la tơmpôl cro gơnoăr bơtău, oh mi rôh lŏ digơlăn jôi cro găy gư̆n ƀăn mơntău mơ̆n lơ̆gay jơno bơtău bơh sơm nơ̆m lơ̆gay jơno bơtău Yang Tơm Trồ, gừn oh mi rôh lŏ sŏng gôjîng tơmpôl cro dî ăm cang bơh dà toh, ơ̆ tom iyŏ jơno sa tơhoa! 13Tài bơh lơ̆gay kơp cro găy ñô nư̆ng dà toh gừn prŏi jơno wơng gư̆t gôtrê bơh jơno bơtău jơno tơpăt-durư̆ng, bơh cro gư̆n kŭng hôm la kơmom bloh. 14Mơya jơno sa tơhoa la lơi ma tơmpôl cro dơng, rơ̆ la tơmpôl cro kơnơm bơh jơno dơm lơh-jăt jơno dăn gư̆t î jơno sơntu jơno niem băl î jơno bờk-mơsăk.