Heƀrơ 4

1Gư̆n-jîng, ƀòn mơ̆n păl gư̆t kơ̆mbrit, ơ̆ kơhea lah tơm jơ jơno hăư mơ̆t nơ̆m jơno bơdê să Kơnràñ dê ờs hôm sơgư̆n, gừn cro găy gư̆n nơ̆m oh mi rôh lŏ gôlơh gư̆ptî ơ̆ kơ̆p dî jơ lơwah. 2Bơh gư̆ptî î ƀòn gô, ƀòn mơ̆n sŏng dî tơs bơtău Jơno Niem. Mơya, bră iet kơnău jơno bơtău gư̆n ơ̆ tom dî kwơ găy ma ƀòn gô, bơh ơ̆ dî jơno dubă băl î jơno don ăm nơ̆m tơmpôl cro iet. 3Gôtrê î ƀòn mơ̆n, la tơmpôl cro don lờt, gừn dî mơ̆t nơ̆m jơno bơdê să, jăt gư̆ptî jơno mà Kơnràñ sŏng tơs lah:

“Gư̆ptî Ăñ sŏng sràt-să nơ̆m jơno tơcao dơng Ăñ dê,

‘… ƀòn gô rơp ơ̆ dơ̆ găy dî mơ̆t nơ̆m jơno bơdê să Ăñ dê!’”

bulah lơ̆gay bră lơh Kơnràñ dî lơh sŏng bơh jơ bơjîng ple-ù. 4Bơh tom anẵu Kơnràñ sŏng tơs tîdô bơh nge dơ̆ poh lah:

“Gừn Yang Tơm Trồ bơdê lơ̆gay bră lơh Kơnràñ nơ̆m nge dơ̆ poh.”

5Gừn du dơ̆ te nơ̆m du-anẵu nde lah:

“… Ƀòn gô rơp ơ̆ dơ̆ găy dî mơ̆t ăm nơ̆m jơno bơdê să Ăñ dê.”

6Tîgư̆n, tơm tô̆ jơno hăư hôm ăn lơi ma du khà cro lơi mơ̆t nơ̆m jơno bơdê să gư̆n, mà tơmpôl cro lai mađàp ƀua ờs dî tơs bơtău Jơno Niem ơ̆ mơ̆t dî bơh jơno ơ̆ don băl, 7gừn Yang Tơm Trồ lơh nên wăl du-nge nde, sơnăn la “Nge dô,” tơm tô̆ tơs bơh Dabit nơ̆m du jŏ tô̆ tơnge, gư̆ptî jơno dî tơs bơh lai ƀua:

“Nge dô, dilah ƀòn kon kơnău jơno tơs Kơnràñ,

gừn ƀòn kon bư̆ng lơh krañ kơdăng nùs.”

8Bơh dilah Jôsue sŏng iyà trôh jơno bơdê să ma lang bol, gừn nên-nôn ngăn Kơnràñ ơ̆ tơs bơh du-nge nde ma-ngkơi bơh lơ̆gay bră dô. 9Gư̆n-jîng, kŭng hôm jơno bơdê să nơ̆m nge Saƀat rcăng ma lang bol Yang Tơm Trồ dê. 10Bơh cro găy sŏng dî mơ̆t nơ̆m jơno bơdê să Kơnràñ dê, sătan cro gư̆n kŭng bơdê lơ̆gay bră lơh mơ̆n dê, gư̆ptî Yang Tơm Trồ bơdê lơ̆gay bră lơh Kơnràñ dê. 11Tîgư̆n, ƀòn mơ̆n păl ngăc-ngăr mơ̆t nơ̆m jơno bơdê să gư̆n, lơi ơ̆ cro găy mơ̆t băl î nơ̆m jơno đom krơh jơno ơ̆ don băl gư̆n. 12Bơh jơno Yang Tơm Trồ la jơno jîng, gôjîng ngăn î sồt rlo lơ̆gay pàs-đao bea đah măt, srăp blôh tien gơs tơmcơlah hwîng-soan î hwîng-nùs, băl ple klăc gư̆m khu, î digơlăn lăng swì lơ̆gay jơno kơlôi-sơnư̆ng băl î jơno sơmơn rcăng nùs-nhơ̆m. 13Ơ̆ tom jơno bơjîng găy la ndăp-ndơ sơđàp măt Kơnràñ. Tơblơ̆ wăl, lơ̆gay jơno ăm săkôh gừn sŏng kŏng rang sơđah tơlôh makin sơđàp măt Kơnràñ, la Bơtao mà ƀòn mơ̆n păl tơs wăl lơ̆gay bră.

14Tîgư̆n, tơm jơ ndăng dî du hôi cro gơnoăr bơlăm-găl ăn jơno duh-khoai dơng mang sŏng swà găl lơ̆gay dăp trồ, rơ̆ la Yang Jesu Kon Yang Tơm Trồ, gừn ƀòn mơ̆n păl jư kơđư̆ng-bơkhê jơno don mơ̆n dê. 15Bơh ơ̆-iyŏ ƀòn mơ̆n dî du hôi cro gơnoăr bơlăm-găl ăn jơno duh-khoai dơng ơ̆ digơlăn ăt-ăl î lơ̆gay jơno lơbăn-lơñô ƀòn mơ̆n dê, tơblơ̆ wăl la Bơtao sŏng kŏng jơno pơlum nơ̆m lơ̆gay jơno gư̆ptî ƀòn mơ̆n, mà ơ̆ tom tìs-glài găy. 16Tîrơ̆ gừn, bơh î nùs khơ̆n-sa, ƀòn mơ̆n digơlăn trôh en sơban jơno sơmah, lơi dưñ-lăñ jơno kơñ-kơloh gư̆m jôi dî jơno lơngăp-lơnge nơ̆m jơno tơmdŏng ñăm tô̆ tơnge.