Heƀrơ 3

1Gư̆n-jîng, ơ oh mi rôh lŏ sang-goh, la tơmpôl cro dî pơnah nơ̆m jơno hôi-săc bơh cŭngsî trồ, lăng kơlôi cĕ nơ̆m Cro Kŏng Pơđơ î Cro Gơnoăr Bơlăm-Găl Ăn Jơno Duh-Khoai Dơng dê nơ̆m jơno dưñ-lăñ ƀòn mơ̆n, rơ̆ la Yang Jesu, 2tơm tô̆ don-tơpăt î Bơtao sŏng pồ bơtao Kơnràñ, kŭng gư̆ptî Môise nơ̆m hîh Yang Tơm Trồ. 3Bơh Bơtao dô dî tơs la dî păl ngăn î jơno gơklŏ dơng mang rlo ma Môise, kŭng gư̆ptî cro băt-tơngñă hîh dî kingam khăi rlo gư̆t nhẵư î hîh. 4Bơh lơ̆gay kơp hîh gừn dî băt-tơngñă bơh du hôi cro găy gư̆n, mơya Yang Tơm Trồ la Bơtao bơjîng lơ̆gay jini-jơno. 5Môise gừn don-tơpăt gư̆ptî du hôi cro dŏng bră nơ̆m hîh Yang Tơm Trồ, lơi gư̆ptî jơno lơh cư̆ng lơ̆gay jơno rơp dî tơs trôh nơ̆m rai ma-ngkơi dô; 6mơya Yang Dŏng-Klàs, gư̆ptî du hôi Cro Kon gôtrê î hîh Yang Tơm Trồ dê (ƀòn mơ̆n la hîh Kơnràñ dilah ƀòn mơ̆n jư kơđư̆ng-bơkhê nùs don gư̆m bư̆ng tơngyeh bơh jơno don kơnơm mơ̆n dê). 7Gư̆n-jîng, iyŏ ngăn gư̆ptî jơno Yang Hwîng Goh tơs lah:

“Nge dô, dilah ƀòn kon kơnău jơno tơs Kơnràñ,

8gừn ƀòn kon bư̆ng lơh kơdăng nùs

gư̆ptî nơ̆m jơno sơlô̆ng-sơlăng,

miek nơ̆m tô̆ tơnge kŏng lòng nơ̆m ƀlang-càs

9la anẵu ông-pang ƀòn kon sŏng pơlum Ăñ bơh bră lòng Ăñ,

sŏng gư̆n ƀòn gô sŏng tơmpơl lơ̆gay bră lơh Ăñ dê

10miek nơ̆m puôn-jư̆t năm. Gư̆n-jîng, Ăñ tơcao ngăn nŏk-noi gư̆n,

î Ăñ tơs lah: ‘Ƀòn gô kư̆ kŏng pơlum tìs-kơ̆mprah nơ̆m anẵu nùs mơ̆n,

mà ƀòn gô ơ̆ dăn gư̆t lơ̆gay gung dà Ăñ dê.’

11Gư̆ptî Ăñ sŏng sràt-să nơ̆m jơno tơcao dơng mơ̆n dê lah:

‘… Ƀòn gô rơp ơ̆ mơ̆t nơ̆m jơno bơdê să Ăñ dê!’”

12Ơ oh mi rôh lŏ, kơhea cĕ, kơ̆mbrit nùs-nhơ̆m ơ̆ don bờk-mơsăk rơp tom tơlôh anẵu du hôi cro găy gư̆n nơ̆m tĕdơ oh mi rôh lŏ, rơ̆ la cro lơi căư Yang Tơm Trồ jîng miek. 13Mơya, păl mơ̆ndơm-mơ̆nieng băl ma găp kơp nge, trôh dî jơ găy hôm ndăng dî sơnăn la “nge dô,” lơi ơ̆ cro găy nhòng tĕdơ oh mi rôh lŏ kŏng lơh krañ kơdăng nùs bơh jơno tơs blăc-pơlum jơno tồi-glài. 14Bơh ƀòn mơ̆n sŏng gôjîng tơmpôl cro dî pơnah băl Yang Dŏng-Klàs dê, dilah la ƀòn mơ̆n jư kơđư̆ng-bơkhê jơno bơhsơm nùs don mơ̆n dê trôh dî dơ̆t-lŭi, 15gư̆ptî jơno dî tơs lah:

“Nge dô, dilah ƀòn kon kơnău jơno tơs Kơnràñ,

bư̆ng lơh krañ kơdăng nùs ƀòn kon

gư̆ptî nơ̆m jơno sơlô̆ng-sơlăng.”

16Bơh tơmpôl cro găy lơh Kơnràñ tơcao nùs ma-ngkơi jơ sŏng kơnău? Ơ̆ cro găy nư̆ng sî jơh lơ̆gay tơmpôl cro sŏng tơlôh bơh nơ̆m Ejiptơ kơnơm bơh Môise ya? 17Hôm Kơnràñ sŏng tơcao ngăn nùs î tơmpôl cro găy miek nơ̆m puôn-jư̆t năm? Ngăn ơ̆-iyŏ la î lơ̆gay cro tìs-glài, mà ƀùc ƀòn gô dê sŏng blă ndăng nơ̆m ƀlang-càs ơ̆h? 18Sŏng gư̆n Kơnràñ sŏng sràt-să î tơmpôl cro găy rơp ơ̆ dî mơ̆t nơ̆m jơno bơdê să Kơnràñ dê, ơ̆-iyŏ la băl î lơ̆gay cro ơ̆ don ya? 19Ƀòn mơ̆n tơmpơl lah ƀòn gô ơ̆ digơlăn lơi mơ̆t dî tài bơh nùs ơ̆ don.