Ephesô 2:8

1Hôm gôtrê ma pơnah oh mi rôh lŏ, la cro sơ̆t nơ̆m lơ̆gay tìs-glài î tồi-glài mơ̆n, 2la nơ̆m lơ̆gay jơno mà bơh lai ƀua, oh mi rôh lŏ sŏng ăm jîng jăt jơno ờs dơm dunya dô, jăt cro ăt-bồ băl î gơnăp-gơnoăr nơ̆m anẵu lơwah gời, la hwîng cà nge dô ndăng iyà-găl nơ̆m lơ̆gay kon so ơ̆ don kơ̆mbrit, 3mà bơh lai ƀua, nơ̆m nhòng ƀòn gô, lơ̆gay ƀòn mơ̆n kŭng sŏng ăm jîng nơ̆m lơ̆gay jơno ham-kơñ poăc-să mơ̆n dê, lơh lơ̆gay jơno ham-kơñ poăc-să î tơngoh-kơlôi. Jăt jơno ờs dơm, ƀòn mơ̆n ờs la kon so jơno tơcao dơng kŭng gư̆ptî lơ̆gay cro nde. 4Mơya Yang Tơm Trồ, la Bơtao bîng-jut nùs kơñ-kơloh, bơh jơno kơñ-kơloh dơng ơnàng Kơnràñ dê mà Kơnràñ sŏng kơloh ƀòn mơ̆n, 5gư̆n-jîng tơm tô̆ ƀòn mơ̆n la lơ̆gay cro sơ̆t nơ̆m lơ̆gay jơno tìs-glài mơ̆n, gừn Kơnràñ sŏng lơh ƀòn mơ̆n jîng băl nhòng Yang Dŏng-Klàs — rơ̆ la kơnơm bơh jơno sơmah mà oh mi rôh lŏ sŏng dî dŏng-klàs — 6Kơnràñ lơh ƀòn mơ̆n jîng băl wăl, î ăn nggui băl î Kơnràñ nơ̆m lơ̆gay anẵu cŭngsî trồ nơ̆m Yang Dŏng-Klàs Jesu, 7lơi nơ̆m lơ̆gay rai mơñ trôh, Kơnràñ digơlăn rang sơđah jơno kơnhơ̆p-mơ̆nda ơ̆lơ̆ ơ̆lŭi jơno sơmah Kơnràñ dê kơnơm bơh jơno lơbăn-niem gôtrê î ƀòn mơ̆n nơ̆m Yang Dŏng-Klàs Jesu. 8Bơh jơno sơmah, oh mi rôh lŏ dî dŏng-klàs kơnơm bơh jơno don, jơno dô ơ̆ trôh bơh oh mi rôh lŏ, mà la jơno e gời Yang Tơm Trồ dê, 9ơ̆-iyŏ tơlôh bơh lơ̆gay bră lơh, lơi ơ̆ du hôi cro găy digơlăn tơngyeh să. 10Bơh ƀòn mơ̆n la bră lơh bơh tê Kơnràñ dê, dî mon bơjîng nơ̆m Yang Dŏng-Klàs Jesu ma lơ̆gay bră lơh niem mà Yang Tơm Trồ sŏng rcăng lai lơi ƀòn mơ̆n digơlăn jîng ăm nơ̆m lơ̆gay bră gư̆n.

11Gư̆n-jîng, păl kah sơdơ lah bơh lai mađàp gư̆n, oh mi rôh lŏ la lang bol bơdih nơ̆m să-jăn, lang bol kŏng sơnăn la “hôm dahrăư kŏng koh kato” bơh lang bol dî sơnăn la “sŏng dî koh kato” nơ̆m poăc-să, du jơno pơđơ bơlăm bơh tê kon-mơnùs lơh, 12bơh jơ gư̆n, oh mi rôh lŏ ờs kŏng tơm tơklah î Yang Dŏng-Klàs, tơm tô̆ kŏng ăn lơi makin lang bol Israel, gư̆m ờs la năc crêh gôtrê î lơ̆gay jơno hăư-băl jơno hăư pơngon, gư̆n-jîng ơ̆ tom jơno cang-kơnơm, kŭng ơ̆ tom Yang Tơm Trồ nơ̆m dunya dô. 13Mơya, nơ̆m Yang Dŏng-Klàs Jesu, oh mi rôh lŏ la tơmpôl cro bơh lai ƀua ờs ăm wĭc ngai, jơ dô sŏng dî iyà trôh en kơnơm bơh mham Yang Dŏng-Klàs. 14Bơh sătan Kơnràñ la jơno lơngăp-lơnge ƀòn mơ̆n dê, la Bơtao sŏng lơh bea đah gôjîng dubă băl î lơh rlăm lề piê jơno tơm tơklah, rơ̆ la kla wăl jơno tơmdră, nơ̆m să-jăn Kơnràñ, 15tơm tô̆ sŏng tă lơi căư jơno-bơlăm bơh lơ̆gay jơno pơđơ bơlăm nơ̆m lơ̆gay gơnoăr pơđơ, lơi ma Kơnràñ digơlăn lơh bea đah gôjîng du hôi cro mhăy nơ̆m Kơnràñ, pồ lơh nên jơno lơngăp-lơnge, 16gừn lơi Kơnràñ digơlăn lơh jơno tơmrơm bea đah î Yang Tơm Trồ nơ̆m du să-jăn kơnơm bơh sî pư̆ng, ma-ngkơi jơ tơngroh jơno bră tơmdră nơ̆m gư̆n. 17Dơ̆ Kơnràñ trôh lờt, Kơnràñ tơs bơtău jơno lơngăp-lơnge ma oh mi rôh lŏ, la lơ̆gay cro ăm wĭc, î jơno lơngăp-lơnge ma lơ̆gay cro ăm en, 18kơnơm bơh Kơnràñ, bea đah dî gơnoăr trôh en nơ̆m du hôi Yang Hwîng lơi trôh î Bàp. 19Gư̆n-jîng, oh mi rôh lŏ ơ̆-iyŏ la cro năc crêh hala la cro lang bol bơdih te. Ala bơh gư̆n, oh mi rôh lŏ la cro ăm du ƀòn băl î lơ̆gay cro sang-goh î la cro nơ̆m hîh nhă Yang Tơm Trồ dê, 20bơh sŏng dî băt-tơngñă cŭngsî mơnang lơ̆gay cro sang-goh î lơ̆gay cro gơnoăr hwơr, tơm tô̆ să tơm Yang Dŏng-Klàs Jesu la lô̆ joñ hîh, 21mà nơ̆m Kơnràñ, lơ̆gay bră lơh băt-tơngñă, tơm tô̆ dî tơmklăc-băl î găp, gừn lơh jîng du-lăm hîh duh-khoai sang-goh nơ̆m Yang, 22î kŭng nơ̆m Kơnràñ, oh mi rôh lŏ dî băt bơtao băl î găp gôjîng anẵu ăm Yang Tơm Trồ nơ̆m Yang Hwîng.