Ephesô 1

1Pol, cro gơnoăr bơtău dơng Yang Dŏng-Klàs Jesu dê bơh nùs-kơñ Yang Tơm Trồ dê, lơboh ma lơ̆gay cro sang-goh, la lơ̆gay cro don ăm nơ̆m Ephesô î la tơmpôl cro don-tơpăt nơ̆m Yang Dŏng-Klàs Jesu. 2Dăn jơno sơmah î jơno lơngăp-lơnge bơh Yang Tơm Trồ, Bàp ƀòn mơ̆n, î Yang, la Yang Dŏng-Klàs Jesu, trôh ma oh mi rôh lŏ.

3Păl jong-rơ Yang Tơm Trồ, Bàp Yang Dŏng-Klàs Jesu dê, Yang ƀòn mơ̆n, la Bơtao sŏng e lơnge ma ƀòn mơ̆n î lơ̆gay jơno lơngăp-lơnge đah hwîng ăm lơ̆gay anẵu cŭngsî trồ nơ̆m Yang Dŏng-Klàs; 4kŭng gư̆ptî Kơnràñ sŏng săc-rwơh ƀòn mơ̆n nơ̆m Yang Dŏng-Klàs bơh lai tơm tô̆ mon bơjîng dunya, lơi ƀòn mơ̆n dî gôjîng sang-goh gư̆m ơ̆ anẵu găy ƀoah-đas dî sơđàp măt Kơnràñ. Bơh jơno kơñ-kơloh 5Kơnràñ sŏng rcăng lai ƀòn mơ̆n ma anẵu lơh kon rong Kơnràñ dê kơnơm bơh Yang Dŏng-Klàs Jesu, jăt jơno sơhờp-sờhơn nùs-kơñ Kơnràñ dê, 6lơi tơlôh ple-bơkao bơh î jơno jong-rơ gơklŏ jơno sơmah Kơnràñ dê mà Kơnràñ sŏng lơh dơng ơnàng e gời ma ƀòn mơ̆n nơ̆m Kon Kơñ-Kơloh Kơnràñ dê, 7mà nơ̆m Kon gư̆n, ƀòn mơ̆n dî jơno dŏng tơwai kơnơm bơh mham Kơnràñ, jơno hồ-toh tồi-glài jăt jơno kơnhơ̆p-mơ̆nda sơmah Kơnràñ dê, 8la jơno sơmah mà Kơnràñ sŏng dờp e ma ƀòn mơ̆n dubă tơngkah-tơngkăñ nơ̆m lơ̆gay jơno jăk-sai î wă wơng, 9lơh ma ƀòn mơ̆n đăl gư̆t jơno ndăp-ndơ nùs-kơñ Kơnràñ dê jăt jơno sơhờp-sờhơn Kơnràñ, la jơno mà Kơnràñ sŏng rcăng bơh lai nơ̆m Yang Dŏng-Klàs, 10lơi tơm jơ trôh tô̆ jơ lơh sŏng jơno rơndăp tăp sên sŏng dî lơh nên, gừn tơmƀù lơ̆gay jơno wăl nơ̆m Yang Dŏng-Klàs, la lơ̆gay jơno cŭngsî trồ gư̆m lơ̆gay jơno nteàh ù, nơ̆m Kơnràñ, 11rơ̆ nơ̆m Bơtao mà ƀòn mơ̆n kŭng dî tơmpà pơnah srăy-brê, bơh sŏng dî rcăng lai jăt jơno rơndăp Bơtao lơh jîng lơ̆gay bră jăt gư̆ptî jơno rơndăp tăp sên nùs-kơñ Kơnràñ dê, 12lơi ma ƀòn mơ̆n, tơmpôl cro lai ngăn ăn jơno cang-kơnơm anẵu Yang Dŏng-Klàs, dî tơlôh ple-bơkao bơh î jơno jong-rơ bơh jơno gơklŏ Kơnràñ dê. 13Gừn kŭng nơ̆m Kơnràñ, ma-ngkơi jơ kơnău jơno tơpăt-ngăn jơno Yang dê la Jơno Niem gôtrê bơh jơno dŏng-klàs oh mi rôh lŏ, î tơm tô̆ don anẵu Kơnràñ lờt, gừn oh mi rôh lŏ sŏng dî tăp ƀăng-kì bơh î Yang Hwîng Goh jăt jơno hăư, 14mà Bơtao gư̆n la jơno lơh cư̆ng gôtrê bơh srăy-brê ƀòn mơ̆n dê trôh dî jơ dŏng tơwai jơh lơ̆gay srăy-brê, lơi tơlôh ple-bơkao bơh î jơno jong-rơ gôtrê bơh jơno gơklŏ Kơnràñ dê.

15Gư̆n-jîng, bơh jơ ăñ kơnău bơh jơno don oh mi rôh lŏ nơ̆m Yang, la Yang Jesu, î jơno kơñ-kơloh e ma lơ̆gay cro sang-goh, 16gừn ăñ ơ̆ bơdê ăn jơno ưnngai bơh oh mi rôh lŏ, kah trôh oh mi rôh lŏ nơ̆m jơno hôi-dăn mơ̆n dê, 17lơi Yang Tơm Trồ Bàp Yang Dŏng-Klàs Jesu dê, Yang ƀòn mơ̆n, la Bàp gơklŏ, rơp dờp ma oh mi rôh lŏ hwîng-nùs jơno jăk-sai î jơno sơđah tơnggư̆t lai nơ̆m bră đăl gư̆t Kơnràñ, 18lơh gơ-măt nùs oh mi rôh lŏ dê dî bơang-ang, lơi oh mi rôh lŏ gư̆t dî jơno cang-kơnơm bơh jơno hôi-săc Kơnràñ dê la jơno găy, jơno kơnhơ̆p-mơ̆nda srăy-brê gơklŏ Kơnràñ dê nơ̆m lơ̆gay cro sang-goh la mơmơh tîgay, 19î jơno ryŭ-ryơ̆m ơ̆ jơno găy sơntu dî gơnăp-gơnoăr Kơnràñ la mơmơh tîgay gôtrê î ƀòn mơ̆n, la tơmpôl cro dî nùs don, jăt jơno iyà jư bơh gơnoăr-pran gơnăp-gơnoăr Kơnràñ dê, 20mà Kơnràñ sŏng lơh nơ̆m Yang Dŏng-Klàs tơm tô̆ lơh Yang Dŏng-Klàs bơh nơ̆m anẵu sơ̆t jîng wăl î ăn nggui mađah ma Kơnràñ nơ̆m lơ̆gay anẵu cŭngsî trồ, 21wĭc rlo ngai lơ̆gay gơnoăr-pran, gơnoăr ăt-bồ, gơnăp-gơnoăr, î gơnoăr ăt-bồ dà lơgơ, băl î lơ̆gay sơnăn dî tơng sơnăn, ơ̆ dî nư̆ng nơ̆m rai dô mà gư̆m băl nơ̆m rai mơñ trôh te. 22Kơnràñ sŏng lơh lơ̆gay jơno ăm nteàh jư̆ng Yang Dŏng-Klàs î pồ tơngñă Yang Dŏng-Klàs bơlăm-găl nơ̆m cŭngsî lơ̆gay kơp jơno gôtrê bơh Hîh Jư̆m Goh, 23mà hîh jư̆m goh la să-jăn Kơnràñ, la jơno bîng-tăl Bơtao lơh bîng-jut lơ̆gay kơp bră nơ̆m lơ̆gay kơp jơno.