Bră 28

1Tơm tô̆ dî lơngăp-lơnge lờt, gừn jai gư̆n ƀòn hî đăl gư̆t nê̆ lah bôt bơlao dô dî sơnăn la Malta. 2Pơnjăt ma rơ̆, cro lang bol tơm lơgơ gôtrê ma ƀòn hî jơno dubă sơmah-sơmai ngăn, tài bơh ƀòn gô sŏng wă-rẵu lơ̆gay ƀòn hî bơh î bră sơ̆n oềs bơh du brê mih ndăng trôh î bơh lơngềt. 3Mơya tơm tô̆ Pol sŏng tơmƀù dî du căp lòng gư̆m sơ̆n nơ̆m oềs, gừn du-lăm beh tơ̆nglơ, ma-ngkơi jơ wîn tơlôh bơh nơ̆m anẵu bơdo, sŏng pùc bơkhê khơh nơ̆m tê ông. 4Jơ gư̆n, tơm tô̆ cro lang bol tơm lơgơ lăng tơmpơl du-lăm beh pùc nơ̆m tê ông, ƀòn gô tơs î găp lah: “Cro dô nên-nôn ngăn la tê cro tơngsơ̆t cro, la cro mà bulah dî klàs bơh dàlîng, mơya jơno tơpăt-ngăn ơ̆ e jîng.” 5Sŏng gư̆n, tơm jơ sŏng tơtôh beh nơ̆m oềs, ông ơ̆ tom sồt-rmañ găy ờ. 6Mơya, ƀòn gô ờs tôn-lah ông sơmơn kŏng pô̆ eh hala sơni-sơna blă sơ̆t. Mơya ma-ngkơi jơ ƀòn gô ăm lăng miek du a-thoa jŏ gừn tơmpơl ơ̆ tom jơno găy tom tơlôh ma ông, gừn dơ̆ sŏng bơgăl-nùs, ƀòn gô tơs ông la du hôi cro hwîng Yang.

7Dơ̆ gư̆n, tĕdơ anẵu gư̆n la lơ̆gay srăy-brê cro kwăng ăt-bồ hîh jam bôt bơlao, sơnăn la Ƀuplius, la cro wă-rẵu ƀòn hî, sŏng pồ jơno sa dubă lơbăn niem nơ̆m păy nge. 8Jơ gư̆n, bră tom tơlôh rơ̆ la bàp Ƀuplius dê ndăng bĭc nơ̆m cơnờng bơh kŏng kòp dôh să băl jê klô̆ng mham, gừn Pol, ma-ngkơi jơ swà mơ̆t tơmtom ông, î ăn tê nơ̆m să ông hôi-dăn, sŏng sămƀeah ma ông. 9Bơh gư̆n, ma-ngkơi jơ jơno bră gư̆n tom tơlôh, lơ̆gay cro nde nơ̆m bôt bơlao kŏng kòp jê kŭng swà trôh gừn dî sămƀeah lơ̆, 10mà ƀòn gô kŭng sŏng lăng dơng mang ƀòn hî bơh î jơno kingam dơng, tien gơs tơm jơ ndăng swà gung tî dàlîng, ƀòn gô iyà dờp gời khăi jơno ăn lơi ma jơno kơñ ngui ƀòn hî dê.

11Jơ gư̆n, păy kơnnhe ma-ngkơi, ƀòn hî swà gung tî dàlîng nơ̆m du-lăm ahẵu tom cêh mon rồp yang bea hê oh mi bơda băl, bơh Aleksandri, sŏng ăm bĭc kơnnhe lơngềt anẵu bôt bơlao. 12Tơm tô̆ dî dah mơ̆t nơ̆m ƀòn dơng Sirakus, ƀòn hî ăm wăl nơ̆m gư̆n păy nge. 13Bơh anẵu gư̆n swà gung tî dàlîng, ƀòn hî swà trôh nơ̆m ƀòn dơng Regium, sŏng gư̆n du-nge ma-ngkơi, bơh du ayoa cal siem đah đăm pôh trôh, ƀòn hî sŏng swà trôh nơ̆m ƀòn dơng Puteôli nơ̆m nge pơnjăt ma-ngkơi gư̆n. 14Gư̆n la anẵu mà ma-ngkơi jơ sŏng tơmtom du pơnah oh mi, ƀòn hî sŏng dî răc-dăn ăm wăl băl î ƀòn gô nơ̆m poh nge, gừn kư̆ gư̆ptî rơ̆, ƀòn hî swà trôh nơ̆m Rôma. 15Nơ̆m gư̆n, dơ̆ kơnău tơs bơh ƀòn hî, lơ̆gay oh mi sŏng swà tơmtom ƀòn hî nơ̆m drà Apius î Păy Lăm Hîh kă-brău, tơm tô̆ lăng tơmpơl ƀòn gô, Pol sŏng dî jơno kơđư̆ng nùs, ưnngai Yang Tơm Trồ.

16Bơh gư̆n, tơm tô̆ ƀòn hî sŏng mơ̆t nơ̆m ƀòn dơng Rôma, Pol dî gơnoăr ăm dêh du hôi ông î du hôi cro lĭñ ăm jư ông.

17Jơ gư̆n, bră tom tơlôh nơ̆m păy nge ma-ngkơi gư̆n la ông hôi jà lơ̆gay cro la lơ̆gay cro ăt-bồ nơ̆m lang bol Juđa trôh băl. Gừn tơm tô̆ ƀòn gô sŏng tơmƀù wăl, ông tơs î ƀòn gô lah: “Ơ ƀòn ông, lơ̆gay oh mi, bulah ơ̆ lơh jơno găy tơmdră wăl lang bol hala jơno lơh ờs dơm ông-pang ƀòn mơ̆n dê, mơya bơh nơ̆m Jerusalem ăñ sŏng kŏng iyà swà gư̆ptî cro glài nơ̆m tê cro Rôma, 18mà să tơm ƀòn gô, ma-ngkơi jơ khao lùp ăñ lờt, ờs kơñ kla khăt-gơboh ma ăñ bơh ơ̆ jôi tom du glài găy nơ̆m anẵu ăñ păl sơ̆t ờ. 19Mơya bơh cro Juđa tơmdră, ăñ păl kŏng yă bră lêh ma Sesa, tơm jơ ơ̆ tom kơñ yă lang bol ăñ ờ. 20Gừn, kŭng bơh jơno gư̆n, ăñ sŏng hôi jà ƀòn mê trôh, lơi tơmtom gư̆m răk-sa. Tài bơh jơno don kơnơm Israel dê, mà ăñ ndăng kŏng săy-srê̆ dô.” 21Mơya, ƀòn gô tơs î ông lah: “Ƀòn hî hôm dahrăư dưñ lăñ dî sră bơ-a găy gôtrê bơh ông nơ̆m Juđe, kŭng hôm dahrăư tom oh mi găy trôh lơi tơs tơnggư̆t hala tơs kơp jơno bờk găy gôtrê bơh ông. 22Mơya ƀòn hî tơmpơl dî păl ngăn lơi iet kơnău bơh đah mê, mê kơlôi lơ̆gay jơno bơh đah gung duh-khoai dô, ăm anẵu ƀòn hî jơno dî gư̆t gư̆n la gô kŏng cro tơmdră lam kơp anẵu.”

23Bơh gư̆n, ma-ngkơi jơ lơh nên nge ma ông, gừn khăi cro rlo te sŏng trôh băl ma ông nơ̆m anẵu ông ăm, mà bơh ang ndrư̆m trôh dî mhău ñô̆ng, ông tơs sơđah nê̆ î ƀòn gô, bơh î bră lơh cư̆ng bơh dà lơgơ Yang Tơm Trồ, mơya mơ̆ndơm-mơ̆nieng ƀòn gô bơh Yang Jesu gư̆m băl jơno bơlăm Môise băl î lơ̆gay cro gơnoăr-hwơr. 24Bulah du pơnah cro kơñ don lơ̆gay jơno dî tơs sơđah, mơya du pơnah nde gừn ơ̆ don. 25Jơ gư̆n, tơm tô̆ tom jơno ơ̆ du nùs băl î găp, ƀòn gô tơlôh swà ma-ngkơi jơ Pol tơs du jơno, lah: “Kơnơm bơh cro gơnoăr-hwơr Esai, Yang Hwîng Goh sŏng tơs iyŏ ngăn î ông-pang oh mi dê, 26lah: ‘Păl swà trôh ma lang bol năy gừn tơs lah:

“Tơm tô̆ kơnău, gừn ƀòn kon rơp kơnău dî, mà ƀòn kon nên-nôn ngăn ơ̆ wơng;

gừn tơm tô̆ lăng, ƀòn kon rơp tơmpơl, mà ƀòn kon nên-nôn ngăn ơ̆ đăl gư̆t dî.”

27Tài bơh lang bol dô sŏng gôjîng kră kơdăng nùs,

tua ƀòn gô gôlơh gư̆ptî ơ̆ kơnău,

î măt ƀòn gô gừn kơñư̆m khơh.

Kơ̆mbrit du nge găy gư̆n, ƀòn gô digơlăn tơmpơl bơh î măt,

kơnău dî bơh î tua, gư̆m wơng dî bơh î nùs-nhơ̆m,

sŏng gư̆n ƀòn gô rơp blăc trê wăl,

gừn ăñ rơp sămƀeah ma ƀòn gô.’

28Gư̆n-jîng, jơno wơng gư̆t păl tom anẵu oh mi, rơ̆ la jơno dŏng-klàs dô Yang Tơm Trồ dê sŏng dî tơs bơtău ma lơ̆gay lang bol bơdih, gừn ƀòn gô rơp kơnău.” 29[Tơm tô̆ ông tơs sŏng nhẵư jơno gư̆n lờt, tơmpôl cro Juđa tơlôh trê, tom jơno tơmbơkai pran-kơdăng ngăn nhòng tơmpôl ƀòn gô]

30Jơ gư̆n, ông ăm nơ̆m bea năm nơ̆m hîh tăc ơpah mơ̆n dê, î wă-rẵu jơh lơ̆gay cro găy swà trôh băl ma ông. 31Tơm tô̆ tơs bơtău bơh lơgơ Yang Tơm Trồ î ƀăn mơntău lơ̆gay jơno gôtrê bơh Yang, la Yang Dŏng-Klàs Jesu, bơh î lơ̆gay nùs khơ̆n-sa, ơ̆ tom jơno tơm cơkhă găy.