Bră 27

1Jơ gư̆n, tơm tô̆ jơno lơh nên sŏng dî e tơnggư̆t lơi dờp ƀòn hî swà bơh î gung dàlîng trôh nơ̆m Itali gừn ƀòn gô jao gư̆m Pol băl î du pơnah cro ăm jam nde ma du hôi cro kwăng ăt-bồ sơnăn la Julius, gôtrê mađah tơmpôl Lĭñ Ôgustơ. 2Dơ̆ gư̆n, tơm tô̆ sŏng lơbà jư̆ng mơ̆t nơ̆m du-lăm ahẵu bơh Atramit, ndăng sơmơn swà găn dàlîng trôh nơ̆m lơ̆gay anẵu jăt tî mằ Asi, gừn ƀòn hî dî iyà swà tî dàlîng, Aritak, cro ƀòn dơng Tesalônika, lơgơ Maseđoan, ăm băl î ƀòn hî. 3Gừn nge ma-ngkơi, ƀòn hî dah mơ̆t nơ̆m mamằ ƀòn dơng Siđôn, mơya Julius, bơh wă-rẵu niem î Pol sơmah-sơmai ngăn, sŏng e gơnoăr ông trôh î lơ̆gay oh mi bơyô lơi dî jơno rong-siem ƀòn gô dê. 4Bơh anẵu gư̆n, ma-ngkơi jơ tơlôh swà tî dàlîng, ƀòn hî dờp ahẵu dah swà jăt tîpô̆ng bôt bơlao Ciprơ, tài bơh cal ndăng pôh tơblơ̆ gung. 5Mơya, ma-ngkơi jơ swà găn bơlao dàlîng jăt tî mằ Silisi gư̆m Pamphili, ƀòn hî sŏng dah mơ̆t mamằ Mira, gôtrê mađah Lisi. 6Nơ̆m gư̆n, cro kwăng ăt-bồ lĭñ jôi dî du-lăm ahẵu bơh Aleksandri tom jơno rơndăp swà bơh gung dàlîng trôh nơ̆m Itali, gư̆n-jîng ông iyà ƀòn hî hao lêh nơ̆m ahẵu gư̆n. 7Bơh gư̆n, miek nơ̆m khăi nge swà gung brĕ brăy gừn dơ̆ swà trôh en Kơnit dubă kălkê ngăn, gừn bơh cal khôm tơblơ̆ gung ơ̆ e gơnoăr ƀòn hî trôh en rlo te, ƀòn hî sŏng e ahẵu swà jăt tî mằ bôt bơlao Kret, ăm rôn dăng Salmôn. 8Sŏng gư̆n kư̆ swà pơnjăt tî mằ bôt bơlao gư̆n dubă kălkê, ƀòn hî swà trôh du-anẵu năy dî sơnăn la Rơ-nưh Niem, anẵu dô ăm en ƀòn dơng Lase.

9Mơya tài bơh sŏng roh khăi ngăn tô̆ jơ, gư̆m gung swà jăt tî dàlîng gừn sŏng gôjîng sơbư̆ng-roh bơh tien gơs sŏng swà găn kơnnhe ăt sa lờt, gư̆n-jîng Pol khă lai. 10Tơm tô̆ tơs î ƀòn gô, lah: “Ơ oh mi, ăñ tơmpơl lah gung swà jăt tî dàlîng dô sơmơn rơp tơmtom jơno roh kơ̆mprah gư̆m roh tơcoh, ơ̆ nư̆ng jini-jơno î ahẵu, mà gư̆m rai-jîng ƀòn mơ̆n dê te.” 11Mơya cro kwăng ăt-bồ tơmpôl lĭñ kơnău jơno cro ăt-bồ ahẵu gư̆m pơnhơm ahẵu rlo la lơ̆gay jơno Pol tơs. 12Mơya, bơh nơ̆m rơ-nưh ahẵu ơ̆ digơlăn weh mơ̆t ăm nơ̆m kơnnhe lơngềt, gư̆n-jîng khăi cro sŏng lơh nên tơlôh swà jăt gung dàlîng bơh anẵu dô, dilah lơh mơmơh, gừn ƀòn gô digơlăn jư ăm nơ̆m anẵu Phenik, du rơ-nưh anẵu Kret ngơ lăng jăt ma bơlao tăy nam gư̆m jăt ma bơlao tăy ƀăk, lơi ăm kơnnhe lơngềt. 13Jơ gư̆n, tơm tô̆ cal đah đăm pôh brĕ, bơh kơlôi lah sŏng dî iyŏ pơnah dơng păl cang, gư̆n-jîng, ma-ngkơi jơ yŏk lòs kơnoĕ, ƀòn gô e ahẵu swà jăt tî mằ, swà jăt en bôt bơlao Kret. 14Mơya ơ̆ tom jŏ, du ayua cal pôh kơdăng dî sơnăn la cal Ơrakilôn, bơh bôt bơlao pôh jư. 15Jơ gư̆n, dơ̆ ahẵu sŏng kŏng kơbôt swà gư̆m ơ̆ gẵư ưm cal dî te, gừn ma-ngkơi jơ păl lơi bră gô, ƀòn hî kŏng dà bô̆ jăt ayua cal. 16Mơya, ma-ngkơi jơ swà jăt tî mađah ơ̆ tom cal nơ̆m du bôt bơlao năy dî sơnăn la Kaôda; Gừn gleh-glăr ngăn gư̆n ƀòn hî digơlăn lăng jư wăl du-lăm ahẵu dŏng-klàs, 17la jơno mà tơm tô̆ kơtô̆k cŭngsî, cro ngui lơ̆gay jơno, pùc bơkhê ahẵu. Mơya, bơh kơ̆mbrit lah, amơh gư̆t dî digơlăn kađòng nơ̆m anẵu thơl nơ̆m ƀlang-càs Sirtơ, gừn tơm tô̆ sŏng pơđơ tơngduh kơnoĕ nteàh, ƀòn gô kư̆ lơi dà bô̆ tîgư̆n. 18Mơya tơm tô̆ ƀòn hî kŏng rbơ̆t lơh sơwi sơwăng, gừn nơ̆m nge ma-ngkơi, cro sơntơm mbư̆ng jini-jơno nơ̆m dàlîng lơi lơh ngkhờc ahẵu. 19Mơ̆t nge dơ̆ păy, ƀòn gô e tê dưñ mbư̆ng dêh lơ̆gay jini-jơno ngui bơh nơ̆m ahẵu jư nơ̆m dàlîng. 20Jơ gư̆n, nơ̆m jŏ nge ơ̆ tom măt tơnge kŭng ơ̆ tom lơ̆gay sơmăñ, ơ̆ dî nư̆ng tîgư̆n rbơ̆t kơdăng ờs ndăng lơh gleh ƀòn hî, gừn lơ̆gay jơno cang-kơnơm hôm wăl ƀòn hî dî dŏng-klàs sŏng kŏng roh. 21Gừn tơm tô̆ swà găn du tô̆ tơnge jŏ ơ̆ sa ơ̆ ñô, gừn Pol, dơ̆ ñă atẵy nơ̆m nhòng ƀòn gô, sŏng tơs lah:

“Ơ oh mi, bơgăy păl kơnău jăt ăñ bư̆ng tơlôh bơh nơ̆m Kret, gừn kŭng pleh dî jơno roh tơcoh gư̆m jơno roh kơ̆mprah dô. 22Jơ dô, ăñ tơngkah oh mi păl bơkhê nùs, bơh rơp ơ̆ tom jơno kŏng roh bơh rai-jîng nhòng tơmpôl oh mi, mà nư̆ng roh sî du-lăm ahẵu dô gời. 23Bơh tơmăng dô, du hôi cro gơndrơh bơh Yang Tơm Trồ, Bơtao gôtrê mađah ăñ î la Bơtao ăñ duh-khoai, sŏng ñă ăm mađah ma ăñ, 24tơs lah: ‘Ơ Pol, bư̆ng kơ̆mbrit. Mê păl ñă ăm sơđàp Sesa, gư̆n-jîng lăng cĕ năy, tài bơh nùs lơbăn-niem Yang Tơm Trồ sŏng dờp ma mê lơ̆gay cro ndăng swà nơ̆m gung jăt tî dàlîng băl î mê.’ 25Gư̆n-jîng, ơ oh mi, kơđư̆ng cĕ nùs! Bơh ăñ don kơnơm Yang Tơm Trồ, lah jơno bră rơp tom tơlôh gư̆ptî gư̆n, jăt gư̆ptî bră sŏng dî e tơnggư̆t ma ăñ. 26Mơya ƀòn mơ̆n păl kađòng nơ̆m du anẵu bôt bơlao găy gư̆n.”

27Jơ gư̆n, tơm tô̆ trôh tơmăng dơ̆ jư̆t-puôn, nơ̆m jơ ƀòn hî hôm ndăng dàbô̆ du noh nơ̆m Dàlîng Ađriatik, gừn nơ̆m brê nggùl măng, lơ̆gay cro wiè ahẵu kơlôi lah ƀòn gô ndăng swà trôh en anẵu du bơlao ù găy gư̆n. 28Ma-ngkơi jơ tơngduh săy ple kơnoĕ tău, ƀòn gô tơmpơl jrô bea-jư̆t làis; Sŏng gư̆n swà wĭc dî du dư̆ng-iè te, gừn tơngduh wăl săy ple kơnoĕ tău, ƀòn gô tơmpơl hôm jư̆t-prăm làis. 29Mơya, bơh kơ̆mbrit, amơh gư̆t dî ƀòn hî digơlăn sơ̆mpĭñ nơ̆m lô̆ tơlăp anẵu găy gư̆n, gư̆n-jîng tơm tô̆ sŏng tơngduh puôn dăng săy kơnoĕ bơlao tieng ahẵu jư, ƀòn gô kơp kơñ brê-ang khơñ. 30Mơya tơm tô̆ lơ̆gay cro wiè ahẵu, jôi kơp jơno swà toat bơh nơ̆m ahẵu gừn pơđơ tơngduh găy dŏng klàs cro jư nơ̆m dàlîng, lơh bleh gư̆ptî swà tơngduh săy kơnoĕ bơh găl ahẵu. 31Mơya Pol tơs î cro kwăng ăt-bồ gư̆m lơ̆gay mpôl lĭñ lah: “Dilah lơ̆gay cro dô ơ̆ ăm wăl nơ̆m ahẵu, ƀòn ông ơ̆-rgê dî dŏng-klàs.” 32Tîrơ̆ la tơmpôl lĭñ koh tĕ săy thư̆ng găy dŏng-klàs dê gư̆m lơi ma gô dà bô̆ căư. 33Jơ gư̆n, trôh dî jơ brê gôjîng mơñ ang, Pol mơ̆ndơm-mơ̆nieng lơ̆gay cro sa cĕ dư̆ng-iè jơno, lah: “Tơm jơ ndăng ăm cang trôh dî nge dô, nge dơ̆ jư̆t-puôn, oh mi kŭng kư̆ hôm ăt sa, ơ̆ kơñ sa jơno găy. 34Gừn, ăñ dăn oh mi păl sa dư̆ng-iè jơno, bơh jơno gư̆n la ăn lơi ma jơno dŏng klàs oh mi. Bơh ơ̆ cro găy nơ̆m oh mi rơp roh du-dăng săy sŏ găy cŭngsî găl ờ.” 35Bơh gư̆n la, dơ̆ sŏng tơs tîgư̆n î dưñ ƀăñ, ông ưnngai Yang Tơm Trồ sơđàp măt kơp cro, Gừn ma-ngkơi jơ pêh ƀăñ, ông sơntơm sa. 36Sŏng gư̆n tơm tô̆ kơp cro dî jơno mơ̆ndơm-mơ̆nieng, gừn sătan ƀòn gô sŏng ngui băl jơno sa. 37Jơ gư̆n, lơ̆gay ƀòn hî nơ̆m ahẵu la bea-rhieng poh-jư̆t pro hê. 38Bơh gư̆n, tơm jơ sŏng sa lờt, ƀòn gô lơh ngkhờc ahẵu, bơh î bră tư̆ng kôi-mi nơ̆m dàlîng. 39Jơ gư̆n dơ̆ brê ang lờt, ƀòn gô ơ̆ đăl gư̆t bơlao ù gư̆n, mơya ƀòn gô tơmpơl du awơ̆ bôt bơlao năy tom ƀlang-càs mằ dàlîng, la anẵu mà ƀòn gô tơmbơyê băl î găp lăng amơh digơlăn wiè ahẵu mơ̆t dî hă ơ̆h. 40Koh mbư̆ng săy kơnoĕ sŏng, ƀòn gô lơi wăl nơ̆m dàlîng. Mơya, ma-ngkơi jơ hồ săy kŏng wiè ahẵu gư̆m tơngñă ôi păng cal nơ̆m găl ahẵu, gừn jăt gung ayua cal, ƀòn gô dờp ahẵu swà tơpăt trôh ƀlang-càs mằ dàlîng. 41Mơya tơm tô̆ tơmtom anẵu bea sơnah dà tơmtom găp gừn ahẵu kŏng kađòng, gừn bơh găl ahẵu kađòng khơh nơ̆m gư̆n, ahẵu ơ̆ tơsê̆ dî dư̆ng-iè găy ờ, hôm tieng ahẵu gừn kŏng bơcah-lề tài bơh sơn-gàc dà kơdăng. 42Dơ̆ gư̆n, bră jơno rơndăp tơmpôl lĭñ dê la lơh amơh lơi ƀòn gô tơngsơ̆t lơ̆gay cro ăm jam, kơ̆mbrit lah, cro găy gư̆n digơlăn klàs kơnơm bơh răy swà. 43Mơya bơh kơñ dŏng-kơl Pol, cro kwăng ăt-bồ tơmpôl lĭñ sŏng cơkhă jơno rơndăp ƀòn gô dê, mơya ông e gơnoăr pơđơ ma lơ̆gay cro găy gư̆t răy sơndŏng tơlôh klàs bơh ahẵu lai ngăn lơi răy lêh mamằ, 44gừn tơmpôl cro hôm wăl, nhẵư hê cro dô cah nơ̆m lơ̆gay kapan, hôm du pơnah cro năy ngui lơ̆gay jơno nde bơh nơ̆m ahẵu, sŏng gư̆n jăt dubă tîrơ̆, jơno tom tơlôh ma lơ̆gay ƀòn hî la dî iyà mơ̆t lêh mamằ dubă lơngăp-lơnge.