Bră 26

1Bơh gư̆n, bơtao Agrippa tơs î Pol lah: “Ông dî gơnoăr lơi tơs bơh sătan mơ̆n.” Nơ̆m jơ dô, Ma-ngkơi jơ yŏk tê cŭngsî, Pol tơmpẵu dêh sătan, lah:

2“Ơ bơtao Agrippa, gôtrê bơh lơ̆gay jơno mà ăñ kŏng yă glài bơh cro Juđa, ăñ tơmpơl sătan bơtoah bơtwai ngăn tơm tô̆ sơmơn tơmpẵu dêh sătan ăñ sơđàp măt bơtao nge dô; 3lai ngăn la bơh bơtao la cro wơng gư̆t lơ̆gay kơp jơno lơh ờs dơm yo gư̆m lơ̆gay bră lơh tơmbơkai nhòng tơmpôl cro Juđa dê. Gư̆n-jîng ăñ dăn bơtao ăt-ăl kơnău iet ăñ. 4Ngăn tîrơ̆, lơ̆gay cro Juđa kŭng gư̆t du rai-jîng ăñ jê bơh hôm kơmom să, bră lơh jơno tơs bơh dơ̆ sơm nhòng tĕdơ nŏk-noi ăñ kŭng gư̆ptî nơ̆m anẵu Jerusalem. 5Bơh sŏng gư̆t lai ăñ bơh jŏ lờt, gư̆n-jîng dilah ƀòn gô dî nùs lơi lơh cư̆ng, gừn rơ̆ la ăñ sŏng jîng jăt mađah căk-cê ngăn nơ̆m gung duh-khoai ƀòn hî dê, la mađah Pharisi. 6Jơ dô, ăñ ăm ñă sơdô kŏng cahrña la bơh jơno cang-kơnơm anẵu jơno hăư Yang Tơm Trồ sŏng lơh nên î lơ̆gay ông-pang ƀòn hî dê, 7la jơno hăư mà jư̆t-bea nŏk-noi ƀòn hî nơ̆m jơno ngăc-ngăr, ndăng ăm cang lơi dưñ lăñ dî, tơm tô̆ duh-khoai Yang Tơm Trồ, tơnge gư̆m tơmăng. Ơ bơtao kŭng tài bơh jơno cang-kơnơm gư̆n, ăñ ndăng kŏng yă glài bơh cro Juđa. 8Dilah Yang Tơm Trồ lơh cro sơ̆t jîng wăl, gừn no-gwơh jơno gư̆n kŏng lăng la bră ơ̆ don dî nhòng oh mi teh? 9Ngăn tîrơ̆, sătan ăñ sŏng kơlôi dêh lah păl lơh khăi bră tơmdră wăl gôtrê î sơnăn Jesu cro Nasaret, 10la lơ̆gay bră mà ăñ sŏng lơh ƀăt tơm jơ ăm nơ̆m Jerusalem, ăñ tien gơs hôm kơ̆p jam khăi cro sang-goh nơ̆m hîh jam, ma-ngkơi jơ dưñ-lăñ dî gơnoăr bơh lơ̆gay cro gơnoăr bơlăm-găl ăn jơno duh-khoai dơng, î gư̆m dơ̆ ƀòn gô kŏng tơngsơ̆t, gừn ăñ sŏng tă khà du nùs băl. 11Tơm tô̆ ờs dơm lơh-glài ƀòn gô nơ̆m lơ̆gay hîh jơnư̆m, ăñ sŏng grat lơh ƀòn gô păl tìs-glài î Yang, mơya bơh tơcao-gơget ngăn ƀòn gô, ăñ tien gơs sŏng swà jôi kơ̆p rôn-bơklơ̆n ƀòn gô trôh dî lơ̆gay ƀòn dơng tơmpôl bơdih, 12mà nơ̆m lơ̆gay bră kơ̆p rôn-bơklơ̆n gư̆n, tơm jơ ndăng swà gung trôh nơ̆m Damas băl î gơnăp-gơnoăr gư̆m gơnoăr bră bơh lơ̆gay cro gơnoăr bơlăm-găl ăn jơno duh-khoai dơng, 13gừn ơ bơtao, nơ̆m brê nggùl nge, nơ̆m gung swà, ăñ lăng tơmpơl jơno ang bơh trồ, ang gơcrà rlo ma măt tơnge, jroh bơang tĕdơ ăñ gư̆m tơmpôl cro ndăng swà băl î ăñ. 14Pơnjăt ma rơ̆, ma-ngkơi jơ lơ̆gay ƀòn hî duh blă nteàh ù, ăñ kơnău du jơno tơs î ăñ bơh î jơno tơs Heƀrơ lah: ‘Ơ Sol, Sol, ngglơh kon kơ̆p rôn-bơklơ̆n Ăñ teh? Jê-kơkua ngăn ma kon tơm tô̆ coh nơ̆m srông sồt.’ 15Ma-ngkơi gư̆n, ăñ kla dẵu lah: ‘Ơ Yang, Kơnràñ la măt cro teh?’ Sŏng gư̆n Yang tơs lah: ‘Ăñ la Jesu, Bơtao mà kon ndăng kơ̆p rôn-bơklơ̆n. 16Mơya, păl lôh cĕ gư̆m ñă tơpăt bơh jư̆ng mơ̆n; tài bơh jơno dô mà Ăñ sŏng sơđah tơlôh î kon, lơi săc-rwơh kon lơh jîng dê̆-gơna gư̆m lơh jîng cư̆ng gôtrê bơh lơ̆gay jơno kon sŏng tơmpơl anẵu Ăñ, băl î lơ̆gay jơno Ăñ rơp sơđah ma kon; 17Tơm tô̆ dŏng-tă kon klàs bơh lang bol mơ̆n gư̆m klàs bơh lơ̆gay lang bol bơdih mà Ăñ pơđơ kon trôh, 18lơi pẵư măt ƀòn gô, lơi tơmblăc klàs bơh jơno kơnăm ñô̆ng gôtrê mađah jơno ang, gư̆m klàs bơh gơnoăr-pran Satan dê trôh băl ma Yang Tơm Trồ, lơi ƀòn gô dưñ-lăñ jơno hồ toh tồi-glài, băl î srăy-brê nhòng tơmpôl cro sŏng dî rao lơhiê kơnơm bơh jơno don anẵu Ăñ.’ 19Gư̆n-jîng, ơ bơtao Agrippa, ăñ sŏng ơ̆ khơ̆n tơm bơgat gôtrê î jơno e tơnggư̆t bơh trồ gư̆n; 20Tơblơ̆ wăl, lai ngăn ăñ sŏng tơs bơtău ma tơmpôl cro nơ̆m Damas, sŏng gư̆n nơ̆m Jerusalem, băl î lơ̆gay kơp nơ̆m lơgơ Juđe, băl ma lơ̆gay lang bol bơdih, păl tơcao mbư̆ng glài gừn blăc trê wăl băl ma Yang Tơm Trồ, lơh nên lơ̆gay bră dî păl î nùs tơcao mbư̆ng glài gư̆n. 21Tài bơh lơ̆gay bră gư̆n, cro Juđa ma-ngkơi jơ kơ̆p jư ăñ nơ̆m hîh duh-khoai, kư̆ jôi jơno tơngsơ̆t ăñ. 22Gừn, kơnơm lăñ dî jơno tơmdŏng bơh Yang Tơm Trồ dê trôh dî nge dô, ăñ sŏng ñă atẵy, lơh cư̆ng gư̆m ma cro dơng gư̆m ma cro êt, ơ̆ tơs jơno găy nde rlo lơ̆gay jơno găy mà gư̆m lơ̆gay cro gơnoăr-hwơr băl î Môise sŏng tơs la mơñ tom tơlôh, 23lah Yang Dŏng-Klàs dî lơh nên păl kŏng gleh-glăr, gừn bơh la cro dơ̆ sơm tơlôh bơh jơno jîng wăl nhòng lơ̆gay cro sơ̆t dê, Kơnràñ rơp tơs tơnggư̆t jơno ang gư̆m ma lang bol ƀòn hî băl î lơ̆gay lang bol cro bơdih.”

24Jơ gư̆n, tơm tô̆ ông ndăng tơmpẵu dêh sătan bơh î lơ̆gay jơno dô, Phestus tơs dơng dẵư lah: “Ơ Pol, ông mòs lờt; bră bơtê khăi ngăn lơh ông gôjîng cro roh tơngoh.” 25Mơya Pol tơs lah: “Ăñ ơ̆ tom mòs ơ̆h, ơ ông Phestus dî păl kingam, tơblơ̆ wăl ăñ ndăng tơs lơ̆gay jơno tơpăt-ngăn gư̆m ngăc-ngăr. 26Bơh cro bơtao gư̆t bơh lơ̆gay bră dô, ăñ tien gơs khơ̆n-sa tơs î cro bơtao lah; tài bơh ăñ don nên-nôn ngăn lah ơ̆ tom du-lăm jơno găy nơ̆m lơ̆gay bră dô ămpôn dî cro bơtao, bơh jơno bră gư̆n gừn ơ̆ tom dî lơh nên nơ̆m du-anẵu ndăp-ndơ găy gư̆n. 27Ơ bơtao Agrippa, bơtao tom don lơ̆gay cro gơnoăr-hwơr ha ơ̆h? Ăñ gư̆t lah bơtao don.” 28Mơya bơtao Agrippa kla dẵư Pol lah: “Ông ndăng mơ̆ndơm ăñ lơi lơh sơlôh jîng cro don Krist nơ̆m tô̆ tơnge khơñ rơ̆ ờ ơ?” 29Mơya Pol kla dẵư lah: “Rơ̆ la ăñ hôi-dăn î Yang Tơm Trồ bulah nơ̆m tô̆ tơnge khơñ hala jŏ, ơ̆-iyŏ nư̆ng bơtao, mà hôm lơ̆gay tơmpôl găy iet ăñ nge dô dî gôjîng gư̆ptî du pơnah băl î ăñ ndăng dî, makin nư̆ng nhẵư dăng săy-srê̆ dô.”

30Sŏng gư̆n bơtao ñă atẵy, băl î cro kwăng dơng lơgơ, gư̆m mò Ƀerenis băl î tơmpôl cro ndăng nggui băl î ƀòn gô, 31gừn ma-ngkơi jơ tơlôh swà, ƀòn gô bơyê băl î găp, tơs lah: “Cro dô ơ̆ lơh jơno găy păl sơ̆t hala kơ̆p ăm jam.” 32Sŏng gư̆n bơtao Agrippa tơs î Phestus lah: “Cro dô ờs digơlăn dî hồ, dilah ông gư̆n ơ̆ yă lêh ma Sesa.”