Bră 25

1Tîrơ̆ gừn, tơm tô̆ sŏng trôh lăñ gơnoăr bră nơ̆m ƀòn dơng, gừn păy nge ma-ngkơi, Phestus swà bơh Sesare hao lêh trôh Jerusalem. 2Bơh sơgư̆n, lơ̆gay cro gơnoăr dơng ăn jơno duh-khoai gư̆m lơ̆gay cro dî gơnoăr ăt-bồ nơ̆m lang bol Juđa sơđah-să sơđàp măt Phestus tơmdră wăl Pol gư̆m ƀòn gô jơh nùs dăn ông, 3tơm tô̆ dăn du jơno sơmah gời tơmdră î Pol, gư̆n la kwăng dơng digơlăn pơđơ hôi Pol swà lêh Jerusalem, nơ̆m dơ̆ rơndăp rcăng bơyê ăm cơkhă lơs lơi tơngsơ̆t ông nơ̆m gung. 4Ma-ngkơi gư̆n, Phestus kla dẵư lah Pol gừn ndăng kŏng jam anẵu Sesare, e să tơm ông gừn păl khơñ khơñ sơmơn swà. 5Ông tơs lah: “Tîrơ̆ gư̆n, lơ̆gay cro ăt-bồ nhòng tơmpôl ông ma-ngkơi jơ jư băl nơ̆m gư̆n. Dilah tom jơno găy tìs sơloah anẵu cro dô, gừn ƀòn mê kư̆ yă cĕ ông gư̆n.”

6Bơh jơ gư̆n, tơm tô̆ sŏng ăm î ƀòn gô ơ̆ khăi rlo pham hala jư̆t nge, ông gư̆n swà jư trôh Sesare. Nge pơnjăt te, ma-ngkơi jơ nggui nơ̆m kơgề cahrña, ông gư̆n pơđơ dî iyà lơboh ma Pol. 7Tîrơ̆ gừn, dơ̆ ông sŏng trôh, lơ̆gay cro Juđa ờs bơh Jerusalem jư sŏng kơwang kơ̆p ông, sơđah khăi jơno yă glài kơjơ̆ ngăn mà ƀòn gô ơ̆ rgê tom jơno cư̆ng-tang dî, 8tơm jơ Pol tơmpẵu dêh lah: “Ăñ ơ̆ tom tìs du-lăm glài găy lơi tơmdră wăl jơno-bơlăm cro Juđa dê ơ̆ tơmdră wăl hîh duh-khoai, kŭng ơ̆ tơmdră wăl Sesa.” 9Mơya bơh kơñ lơh niem-nùs cro Juđa, Phestus pơnjăt jơno Pol lah: “Ông tom kơñ, dilah swà lêh Jerusalem, lơi kŏng cahrña anẵu gư̆n sơđàp măt ăñ bơh lơ̆gay bră dô ơ?” 10Mơya, Pol kla dẵư lah: “Ăñ ndăng ñă sơđàp toa Sesa dê, la anẵu dî păl ma ăñ păl kŏng cahrña. Ăñ ơ̆ lơh jơno găy tìs ma cro Juđa, gư̆ptî kơnràñ kŭng gư̆t loh-lang. 11Tîrơ̆ gừn, dilah ăñ lơh jơno tìs gư̆m sŏng lơh jơno găy păl sơ̆t, gừn ăñ ơ̆ dăn dî klàs bơh jơno sơ̆t. Mơya dilah ơ̆ tom glài găy nơ̆m khà lơ̆gay jơno găy ƀòn gô yă ăñ, gừn ơ̆ cro găy digơlăn jao ăñ ma ƀòn gô. Ăñ yă wăl trôh ma Sesa.” 12Ma-ngkơi gư̆n, tơm tô̆ răk-sa î tơmpôl jơnư̆m bơdê bră, Phestus kla dẵư lah: “Ông sŏng yă bră trôh Sesa. Ông rơp swà trôh ma Sesa.”

13Jơ gư̆n, ma-ngkơi jơ nhẵư nge swà găn lờt, bơtao Agrippa î mò Ƀerenis sŏng swà jư trôh nơ̆m Sesare lơi còp-să lơh sa î Phestus. 14Gừn nơ̆m jơ lơ̆gay ƀòn gư̆n ăm nơ̆m gư̆n khăi nge, Phestus tơs sơđah ma bơtao lơ̆gay bră gôtrê bơh Pol, lah: “Du hôi cro-klo tò, la du hôi cro ăm jam dî Phelik lơi wăl, 15mà gôtrê bơh cro dô, lơ̆gay cro gơnoăr bơlăm-găl ăn jơno duh-khoai dơng gư̆m lơ̆gay cro kwăng kra cro Juđa sŏng yă glài, tơm tô̆ ăñ ăm nơ̆m Jerusalem, pơđơ lơh nên glài tơmdră wăl î ông gư̆n. 16Ăñ sŏng kla dẵư î ƀòn gô lah jơno lơh ờs dơm Rôma dê la ơ̆ lơboh jao cro găy lai jơ cro kŏng yă glài digơlăn tơmtom măt î lơ̆gay cro tơmyă, mơya lơi lăñ dî tô̆ lơ̆m pah tơmpẵu dêh sătan bơh jơno tơmyă gư̆n. 17Gư̆n-jîng, tơm tô̆ sŏng hwa găp trôh nơ̆m dô, ơ̆ ăm cang jŏ dư̆ng-iè găy ờ, gừn nge ma-ngkơi, dơ̆ sŏng nggui nơ̆m kơgề cahrña lờt, ăñ pơdơ dờp cro gư̆n dî iyà mơ̆t cĕ, 18mà gôtrê trôh tơmpôl tơmyă, ma-ngkơi jơ tơmpôl cro tơmyă dî pơđơ ñă atẵy, ƀòn gô ơ̆ tom yă bơh lơ̆gay jơno găy glài găy gư̆ptî lơ̆gay glài bờk-mơsăk mà ăñ kơlôi ờ. 19Ala sơgư̆n, ƀòn gô tom du khà jơno tơmbơkai î ông gư̆n gôtrê bơh gung duh-khoai mơ̆n dê gư̆m gôtrê bơh Jesu năy sơ̆t lờt mà Pol tơs nê̆ la ndăng hôm jîng. 20Tîrơ̆ la, bơh ơ̆ gư̆t nê̆-năn jơno tơmdră gôtrê bơh lơ̆gay bră dô. Ăñ sŏng lùp ông gư̆n tom iyŏ kơñ swà trôh nơ̆m Jerusalem lơi dî cahrña nơ̆m gư̆n gôtrê bơh lơ̆gay bră gư̆n. 21Mơya tơm tô̆ Pol tơmyă lơi mơ̆n dî kơ̆p ăm jam ăm cang jơno cahrña bơtao dê, ăñ sŏng e gơnoăr lơi ông gư̆n dî kơ̆p jam jư trôh dî jơ ăñ digơlăn lơboh ông gư̆n lêh ma Sesa.” 22Sŏng gư̆n Agrippa tơs î Phestus lah: “Sătan ăñ kŭng kơñ kơnău cro dô.” Phestus kla dẵư wăl lah: “Nge nhîng bơtao rơp dî kơnău ông gư̆n.”

23Gừn, nơ̆m nge ma-ngkơi, tơm tô̆ Agrippa î Ƀerenis sŏng trôh băl î jơno rôn dăp dơng mang ngăn gư̆m swà mơ̆t nơ̆m ơdô̆ hîh cahrña băl î lơ̆gay ăt-bồ tơmpôl lĭñ, băl î lơ̆gay cro jăt sơnoa gơnoăr bră ƀòn dơng dê. Gừn tơm tô̆ Phestus e gơnoăr pơđơ, gừn Pol dî iyà lơboh mơ̆t. 24Phestus pẵư dẵư tơs lah: “Ơ bơtao Agrippa gư̆m lơ̆gay oh mi tom măt băl î ƀòn hî, oh mi ndăng lăng tơmpơl cro dô, la cro mà du tơmpôl khăi cro Juđa sŏng băl î găp răc-dăn ăñ, gư̆m nơ̆m Jerusalem băl î anẵu dô, dreo kơkrẵy ơ̆ lơi ma ông gư̆n jîng te. 25Mơya ăñ gư̆t dî ông gư̆n ơ̆ tom lơh jơno găy păl sơ̆t; mơya, bơh sătan cro dô sŏng yă trôh ma bơtao, gư̆n-jîng ăñ lơh nên iyà ông gư̆n swà, 26mà gôtrê bơh ông gư̆n, ăñ ơ̆ tom dî jơno găy nê̆-năn lơi tơs lêh ma bơtao. Gư̆n-jîng ăñ iyà ông gư̆n tơlôh nơ̆m sơđàp măt oh mi, gừn lai ngăn la nơ̆m sơđàp măt bơtao, ơ bơtao Agrippa, lơi ma-ngkơi jơ tô̆ tơnge swì lùp jîng tơlôh dô, ăñ dî jơno găy gư̆n lơi digơlăn tơs wăl. 27Bơh î ăñ, tơm tô̆ iyà lơboh du hôi cro glài swà mà ơ̆ sơđah nê̆-năn lơ̆gay glài tơmdră wăl gô, gừn ngăn la tìs sơloah ngăn.”