Bră 24

1Bơh sơgư̆n, ma-ngkơi prăm nge, cro gơnoăr dơng ăn jơno duh-khoai la Anania, băl î nhẵư hê cro kwăng kra tò, gư̆m cro jăk tơs tơmpẵu la Tertulus năy sŏng swà jư, la lơ̆gay cro sơđah să lơi yă sơđàp cro kwăng dơng lơgơ lơi tơmdră Pol. 2Gừn tơm tô̆ ông sŏng dî hôi trôh. Tertulus sơntơm yă yom ông, tơm tô̆ tơs lah: “Bơh dî dờp jơno lơngăp-lơnge dơng kơnơm bơh kơnràñ, gư̆m bơh khăi jơno tơmbơgăl tơmtom trôh ma lang bol dô tài bơh jơno lăng wĭc dơng ơnàng kơnràñ dê, 3gư̆n-jîng ơ kơnràñ Phelik ryŭ-ryơ̆m ngăn, lơ̆gay nơ̆m kơp bră băl lơ̆ lam kơp anẵu, ƀòn hî cêh prăp lơ̆gay bră lơh rơ̆ băl î jơh lơ̆gay nùs gư̆t ưnngai. 4Mơya, lơi ăñ klàs lơh mơrêh-mơrăñ kơnràñ bơtăl khăi rlo, ăñ dăn kơnràñ, î jơno ăt-ăl mơ̆n dê, iet ƀòn hî tơs dư̆ng-iè jơno. 5Ngăn, bơh tơmpơl nê̆ cro dô gư̆ptî jơno ƀô ôm, gư̆m la cro lơh ndrăm-ndròm lơ̆gay anẵu cro Juđa lam lơgơ dunya, lơh jơno sơlô̆ng-sơlăng. Bơh gô la cro bơlăm găl bơnòr cro Nasaret, 6la cro tien gơs sŏng grat lơh sơmơ̆-sơmĭñ hîh duh-khoai, kŭng la cro ma ƀòn hî sŏng kơ̆p jư, — [gư̆m ƀòn hî kơñ cahrña jăt jơno pơđơ bơlăm ƀòn hî dê. 7Mơya cro kwăng ăt-bồ lĭñ Lisia, ma-ngkơi jơ trôh anẵu, sŏng tơmpìt dưñ gô klàs bơh tê ƀòn hî î gơnoăr-pran, 8e gơnoăr ma lơ̆gay cro yă yom gô păl trôh sơđàp kơnràñ] — mà bơh anẵu gô, kơnràñ rơp digơlăn să tơm khao lùp bơh jơh kơp lơ̆gay bră dô lơi gư̆t lơ̆gay glài mà ƀòn hî ndăng yă kơ̆p gô.” 9Tîrơ̆ gừn, cro Juđa kŭng jăt băl, cư̆ng-tang lơ̆gay bră gư̆n la gư̆p tîgư̆n.

10Pol kŭng sŏng kla wăl, ma-ngkơi jơ cro kwăng dơng lơgơ lơh têl ma ông tơs lah: “Bơh gư̆t kơnràñ sŏng lơh kwăng cahrña ma lang bol dô nơ̆m khăi năm, gư̆n-jîng ăñ sơhờp nùs tơmpẵu dêh bơh lơ̆gay bră gôtrê trôh ma mơ̆n, 11bơh Kơnràñ digơlăn đăl gư̆t lah bơh tơm tô̆ ăñ swà hao lơi duh-khoai nơ̆m Jerusalem la ơ̆ rlo jư̆t-bea nge; 12gư̆m ƀòn gô ơ̆ tom kơ̆p dî ăñ tơmbơkai î cro găy nơ̆m hîh jư̆m, kŭng ơ̆ lơh sơlôh sơlô̆ng-sơlăng anẵu mpôl khăi hala nơ̆m lơ̆gay hîh jơnư̆m hala lam kơp ƀòn dơng, 13ƀòn gô kŭng ơ̆ tom rgê gư̆t lơh cư̆ng-tang găy ma kơnràñ bơh lơ̆gay glài mà ƀòn gô jơ dô ndăng yă ăñ. 14Mơya ăñ tơs tơpăt î kơnràñ jơno dô, lah jăt gư̆ptî Jơno Niem mà ƀòn gô sơnăn la jăt gư̆ptî Gung Duh-Khoai, mà jăt bơh gư̆n ăñ duh bră Yang Tơm Trồ lơ̆gay ông-pang dê, ăn nùs don nơ̆m jơh lơ̆gay jơno găy kơnơm nơ̆m jơno-bơlăm gư̆m lơ̆gay jơno dî cêh nơ̆m lơ̆gay sră cro gơnoăr-hwơr, 15mà ăñ tom nùs cang-kơnơm nơ̆m anẵu Yang Tơm Trồ mà să tom ƀòn gô kŭng ndăng ăm cang, tơm tô̆ lơh nên la hă tom jơno jîng wăl băl lơ̆gay cro tơpăt-durư̆ng dê î cro bờk-mơsăk. 16Tài bơh rơ̆, sătan ăñ kŭng grat pran ayua lơi tom du nùs-nhơ̆m ơ̆ tom anẵu păl đas sơđàp măt Yang Tơm Trồ î sơđàp măt cro nơ̆m kơp jơno. 17Bơh jơ gư̆n, ma-ngkơi jŏ năm, ăñ trê wăl, iyà jăt băl gư̆m priè lơi tơmdŏng ma dà lơgơ mơ̆n, băl î jơno ăn duh-khoai, 18mà mơ̆t nơ̆m gư̆n, ƀòn gô hăl tơmtom ăñ lơh jơno rao lơhiê nơ̆m hîh jư̆m, ơ̆ băl î tơmpôl khăi, kŭng ơ̆ băl î jơno lơh sơlô̆ng-sơlăng. 19Mơya nhẵư hê cro Juđa tò bơh Asi trê, la lơ̆gay cro bơgăy păl trôh sơđah-să sơđàp măt kơnràñ gừn tơm yă, dilah ƀòn gô tom bulah kư̆ bră găy tơmdră wăl î ăñ. 20Hala la, să tơm lơ̆gay cro ăm nơ̆m dô păl tơs tơlôh jơno sơloah tìs găy mà ƀòn gô sŏng jôi dî tơm tô̆ ăñ ñă sơđàp Mpôl Jơnư̆m cro Juđa dê; 21Tom iyŏ la bơh du-lăm jơno tơs tơlôh tîdô mà ăñ sŏng dreo dơng dơ̆ ñă nhòng ƀòn gô, lah: ‘Ăñ ndăng kŏng cahrña sơđàp ƀòn ông nge dô gôtrê trôh mà jơno jîng wăl cro sơ̆t dê.’”

22Tîrơ̆ gừn Phelik, bơh gư̆t ƀeah tơpăt lơ̆gay jơno bră gôtrê trôh jơno Yang, sŏng dơh wăl cahrña kơp đah, tơm jơ tơs lah: “Dơ̆ găy cro kwăng ăt-bồ Lisia digơlăn swà jư nơ̆m dô, ăñ rơp lơh nên lơ̆gay bră gôtrê trôh ƀòn ông.” 23Gư̆m e gơnoăr ma cro kwăng ăt-bồ lăng jư Pol, bơh sơgư̆n păl e ma ông tom dî jơno khăt-gơboh, gư̆m bư̆ng khă bơkô̆ lơ̆gay cro oh mi bơyô ông dê trôh duh bră ông.

24Gừn nhẵư nge ma-ngkơi gư̆n, Phelik, tơm tô̆ tơmblăc wăl băl î Drusil, bo-ua mơ̆n, la du hôi cro-ua Juđa, gừn sŏng pơđơ hôi Pol trôh gư̆m êt ông tơs tơnggư̆t bơh jơno don anẵu Yang Dŏng-Klàs Jesu. 25Mơya tơm tô̆ ông ndăng bơtău nê̆-năn bơh jơno tơpăt-durư̆ng, gư̆m jơno gư̆t kơhea, băl jơno cahrña rơp trôh, gừn Phelik, bơh sơlôh ntơ-să kơ̆mbrit, sŏng hăư wăl lah: “Tô̆ dô rîc cĕ mande, mơya tơm tô̆ dî tô̆ lơwah, ăñ rơp pơđơ hôi ông trôh.” 26Băl dơ̆ gư̆n, kŭng bơh cơkhă-cang lah rơp tom dư̆ng-iè jên-priè dî Pol pơjô̆ e ma mơ̆n, gư̆n-jîng tài bơh rơ̆, kwăng dơng kư̆ răk-sa î ông tơm tô̆ pơđơ hôi ông trôh ờs kơp dơ̆. 27Mơya, tơm tô̆ sơlèt lơ̆ bea năm, Phelik tom cro cơdô̆ Porsius Phestus, bơh sơgư̆n bơh kơñ lơh niem-nùs lang bol Juđa, gư̆n-jîng Phelik sŏng lơi Pol kŏng jam.