Bră 23

1Jơ gư̆n, ma-ngkơi jơ lăng nê̆ nê̆ nơ̆m tơmpôl jơnư̆m, Pol tơs: “Ơ ƀòn ông, ơ lơ̆gay oh mi, ăñ sŏng jîng sơđàp măt Yang Tơm Trồ î lơ̆gay nùs tua lơhiê-lơhàc trôh dî nge dô.” 2Mơya, cro gơnoăr dơng ăn jơno duh-khoai Anania e gơnoăr ma lơ̆gay cro ñă en ông pah nơ̆m yôi ông. 3Nơ̆m dơ̆ dô, Pol tơs î ông gư̆n: “Bơh piê kŏng brah bẵu năy, Yang Tơm Trồ sơmơn pah ông! Ông nggui cahrña ăñ jăt jơno-bơlăm, mà e gơnoăr lơi ăñ kŏng pơng sơloah î jơno bơlăm ơ?” 4Mơya, lơ̆gay cro ñă sơđàp gư̆n tơs lah: “Ông ndăng tơngyŏ-tơnghiel cro gơnoăr dơng ăn duh-khoai Yang Tơm Trồ dê ơ?” 5Pol kla lah: “Ơ oh mi, ăñ sŏng ơ̆ gư̆t lah ông rơ̆ la cro gơnoăr dơng ăn jơno duh-khoai. Bơh sŏng tom cêh lah:

‘Mê bư̆ng tơs jơno mơsăk î cro kwăng ăt-bồ lang bol mơ̆n.’”

6Tîrơ̆ gừn, tơm tô̆ đăl tơmpơl lah du mpôl la cro Saduse, e tơmpôl năy la cro Pharisi, Pol sŏng tơs dơng dẵư nhòng Mpôl Jơnư̆m, lah: “Ơ ƀòn ông, ơ lơ̆gay oh mi, ăñ la du hôi cro Pharisi, kon so cro Pharisi dê; Ăn ndăng kŏng cahrña gôtrê trôh jơno cang-kơnơm gư̆m jơno jîng wăl cro sơ̆t dê.” 7Bơh jơ gư̆n, tơm tô̆ ông tơs jơno dô, gừn du bră tơmbơkai gôjîng sơlôh nhòng cro Pharisi î cro Saduse, gừn mpôl lang bol kŏng tơmcơlah pha să. 8Bơh cro Saduse tơs lah ơ̆ tom jơno jîng wăl, kŭng ơ̆ tom cro gơndrơh hala lơ̆gay hwîng, mơya cro Pharisi gừn don tom lơ̆ bea lơ̆m jơno gư̆n. 9Tîrơ̆ gư̆n, jơno hôi dreo dơng tơmdră ndrăm-ndròm sơlôh, gư̆m ma-ngkơi jơ ñă atẵy, du pơnah cro bơtău jơno bơlăm gôtrê đah mpôl cro Pharisi tơmbơkai, lah: “Ƀòn hî ơ̆ tơmpơl tom glài mơsăk găy anẵu cro dô ờ. Mà amơh gư̆t dî, du lơ̆m hwîng hala du hôi cro gơndrơh sŏng tơs î ông gư̆n …” 10Mơya gư̆n, tơm tô̆ tơmbơkai sơlôh jîng khuh rơndôl sơlơ, cro kwăng ăt-bồ, bơh kơlôi-kơ̆mbrit Pol digơlăn kŏng ƀòn gô crề tĕ, sŏng e gơnoăr ma tơmpôl lĭñ swà jư tơmpìt dưñ ông bơh nhòng tĕdơ ƀòn gô, bơh sơgư̆n iyà ông trê đôn-lĭñ.

11Mơya, nhòng brê tơmăng nge ma-ngkơi, tơm tô̆ trôh en đàp ông, Yang tơs lah: “Păl kơđư̆ng nùs, bơh kon sŏng lơh cư̆ng bơh Ăñ tîgay anẵu Jerusalem, gừn bră păl cang ma kon kŭng la lơh cư̆ng gư̆p tîgư̆n anẵu Rôma.”

12Tîrơ̆ gừn trôh brê-ang, ma-ngkơi jơ jôi kai-kơnĕ du nùs băl, nhẵư hê cro Juđa sràt-să dêh, lah ơ̆ sa kŭng ơ̆ ñô trôh dî jơ ƀòn gô tơngsơ̆t dî Pol. 13Dơ̆ rơ̆, tom rlo puôn-jư̆t hê cro jôi kai-kơnĕ dô. 14Mà tơm tô̆ trôh î lơ̆gay cro gơnoăr dơng ăn jơno duh-khoai gư̆m lơ̆gay cro kwăng kra, ƀòn gô tơs lah: “Ƀòn hî sŏng sràt-să du jơno sràt-rma sătan mơ̆n lơi ơ̆ sa jơno găy trôh dî jơ ƀòn hî tơngsơ̆t dî Pol. 15Bơh tîrơ̆, jơ dô, dăn ƀòn ông băl î Tơmpôl Jơnư̆m sơđah măt sơđàp cro kwăng ăt-bồ, gư̆ptî ndăng lơh nên jôi jăt nê̆-năn rlo te kơp lơ̆gay bră gôtrê trôh gô, lơi ông gư̆n digơlăn lơboh gô jư lêh ma ƀòn ông. Hôm ƀòn hî gừn sơmơn lai lơi tơngsơ̆t gô lai tô̆ jơ gô trôh.” 16Mơya kon klo rôh Pol dê, bơh sŏng kơnău gư̆t bră bơyê băl ăm cơkhă, gư̆n-jîng ma-ngkơi jơ trôh gư̆m mơ̆t nơ̆m đôn-lĭñ, sŏng tơs bră dô e ma Pol. 17Tîrơ̆ la, dơ̆ sŏng hôi du hôi nhòng lơ̆gay cro kwăng ăt-bồ wăl, Pol tơs lah: “Dăn bơlăm ha klo pơnu dô trôh î cro kwăng ăt-bồ, bơh cro pơnu tom jơno kơñ tơs ma ông rơ̆.” 18Gừn, ma-ngkơi jơ lơboh cro pơnu jăt cro kwăng ăt-bồ sŏng bơlăm cro pơnu trôh tơmtom cro kwăng dơng gừn tơs: “Cro kŏng jam la Pol, ma-ngkơi jơ hôi ăñ, sŏng kơnơm ăñ lơboh ha klo pơnu dô trôh ma kơnràñ, bơh tom jơno păl tơs î kơnràñ.” 19Tîrơ̆ la, ma-ngkơi jơ sŏng kadăm tê cro pơnu gư̆m rîc nơ̆m anẵu ăm dêh, cro kwăng ăt-bồ lùp lah: “Jơno mà mê tom lơi tơs tơnggư̆t ma ăñ la jơno găy?” 20Bơh jơ gư̆n, cro pơnu hăư lah: “Lơ̆gay cro Juđa sŏng du nùs băl kơñ dăn kơnràñ amơh lơh nge nhîng kơnràñ digơlăn lơboh Pol jư ma Tơmpôl Jơnư̆m, gư̆ptî ndăng lơh nên khao lùp nê̆-năn bơh ông rơ̆. 21Bơh rơ̆, dăn kơnràñ bư̆ng lơi mpôl ƀòn rơ̆ ăm kơ̆p, bơh rlo puôn-jư̆t hê cro nơ̆m khà ƀòn gô ndăng pôn să ăm cang cơkhă ông rơ̆, la lơ̆gay cro sŏng sràt-să dêh lah ơ̆ sa kŭng ơ̆ ñô trôh dî jơ tơngsơ̆t dî Pol. Ƀăt jai tô̆ dô ƀòn gô ndăng rcăng lơs, ăm cang jơno du nùs băl bơh kơnràñ.” 22Gừn, cro kwăng ăt-bồ e ma cro pơnu tơlôh trê, ƀăn tơngkah gô lah: “Bư̆ng e ma cro găy gư̆t lah cro pơnu sŏng e tơnggư̆t ma ăñ lơ̆gay bră dô.” 23Ma-ngkơi jơ hôi bea hê cro kwăng ăt-bồ năy, ông ƀăn dẵư lah: “Rcăng sơmơn cĕ bea-rhieng mpôl lĭñ băl î poh-jư̆t hê lĭñ hao aseh gư̆m bea-rhieng hê lĭñ iyà pas tà, amơh lơh tơmpôl lĭñ digơlăn swà gung trôh Sesare nơ̆m jơ dơ̆ păy tơmăng dô, 24bơh sơgư̆n kŭng rcăng iyà jơno puôn jư̆ng lơi e Pol hao nggui, mpôl lĭñ digơlăn lơboh ông gư̆n lơngăp-lơnge trôh anẵu cro kwăng dơng lơgơ Phelik.” 25Tơm jơ sŏng cêh sră pơyoa tom tơnggumăy gư̆ptî dô:

26“Klôdơ Lisia pơyoa cro kwăng dơng Phelik ryŭ-ryơ̆m ngăn: Jơno còp-să lơngăp-lơnge. 27Cro dô, ma-ngkơi jơ kŏng kơ̆p tài bơh cro Juđa gư̆m mơñ kŏng ƀòn gô tơngsơ̆t, gừn ăñ sŏng dŏng-klàs tơm jơ trôh khơñ băl î mpôl lĭñ, bơh gư̆t nên lah să tơm ông la cro lang bol tơm Rôma dê. 28Bơh sơgư̆n, tài bơh kơñ gư̆t bơh jơno lơh nên glài mà bơh gư̆n ƀòn gô yă yom ông gư̆n, ăñ sŏng lơboh ông gư̆n jư ma Mpôl Jơnư̆m ƀòn gô dê, 29mà ăñ tơmpơl ông gư̆n kŏng yă yom gôtrê trôh lơ̆gay bră tơmbơkai bơh jơno bơlăm ƀòn gô dê, mơya ơ̆ tom jơno yă yom găy păl sơ̆t hala kơ̆p jam. 30Tîrơ̆ gừn, ma-ngkơi jơ du jơno bơyê bờk rơp tơmtom tơmdră î cro dô dî sơđah ma ăñ, ăñ sŏng lơboh jai gư̆n cro kŏng yă trôh anẵu kơnràñ, tơm tô̆ kŭng e gơnoăr pơđơ ma lơ̆gay cro yă păl tơs yă ông sơđàp măt kơnràñ.”

31Gừn, lơ̆gay mpôl lĭñ, lơh-jăt gơnoăr pơđơ dî pơđơ ma mơ̆n, ma-ngkơi jơ lơboh Pol jăt, sŏng lơboh ông swà nơ̆m brê tơmăng trôh Antiƀatri. 32Gừn nge ma-ngkơi, tơm jơ sŏng lơi tơmpôl lĭñ hao aseh swà pơnjăt băl î ông, ƀòn gô blăc trê wăl đông lĭñ, 33mà tơmpôl lĭñ dô, tơm tô̆ sŏng mơ̆t nơ̆m ƀòn dơng Sesare, gừn dờp sră pơyoa ma cro kwăng dơng lơgơ, gừn kŭng sŏng iyà lơboh sơđah Pol ma ông rơ̆. 34Bơh sơgư̆n, ma-ngkơi jơ đŏk sră pơyoa, gư̆m lùp ông tom jîng bơh ƀòn dơng găy, gừn dơ̆ sŏng gư̆t la cro ăm nơ̆m ƀòn Silisi, 35cro kwăng dơng tơs lah: “Ăñ rơp cahrña ông jăt jơno bơlăm, tơm tô̆ lơ̆gay cro yă yom ông kŭng trôh nơ̆m dô”, gừn pơđơ ma ông dî jư cơkhă nơ̆m gơlăng Herôt dê.