Bră 22

1“Ơ ƀòn ông, lơ̆gay oh mi gư̆m tơmpôl cro bàp bơ-ề, dăn kơnău jơno tơmpẵu ăñ jê î ƀòn ông jơ dô.”

2Jơ gư̆n, tơm tô̆ kơnău lah ông ndăng tơs bơh î jơno tơs Heƀrơ î mơ̆n, ƀòn gô sî sơlơ ăm ƀơt rlo te. Sŏng gư̆n ông tơs lah:

3“Ăñ la cro Juđa, bơda nơ̆m ƀòn dơng Tarsơ lơgơ Silisi, mơya dî bơtê sră bơ-a nơ̆m ƀòn dơng dô nơ̆m dî jư̆ng cro bơtău Gamaliel, dî ƀăn mơntău jăt gung dà krañ bơkhê jơno-bơlăm cơdoh bơh ông-pang, dî nùs ngăc-ngăr bơh Yang Tơm Trồ gư̆ptî lơ̆gay ƀòn ông ndăng dî nge dô, 4la cro sŏng kơ̆p rôn-bơklơ̆n Jơno Niem dô trôh dî sơ̆t, tơm jơ kơ̆p căp î ăn nơ̆m hîh jam gư̆m cro-klo băl î cro-ua, 5gư̆ptî cro bơlăm-găl ăn jơno duh-khoai dơng lơh cư̆ng-tang ma ăñ băl î lơ̆gay kơp cro kwăng kra, la lơ̆gay cro mà ma-ngkơi jơ dưñ lăñ sră bơh anẵu ƀòn gô pơyoa ma lơ̆gay oh mi, ăñ swà gung trôh nơ̆m Damas, swà iyà tơmpôl cro kŏng kơ̆p nơ̆m gư̆n trê nơ̆m Jerusalem lơi ƀòn gô digơlăn kŏng lơh-glài. 6Jơ gư̆n, bră tom tơlôh ma ăñ rơ̆ la tơm tô̆ ndăng swà gung î mơn trôh nơ̆m Damas, brê nggùl nge, sơni-sơna, du jơno jroh ang ƀlăk bơh trồ jroh bơang tĕdơ ăñ. 7Ơ̆ dî nư̆ng tîgư̆n, ăñ blă duh kơsrơ̆p nteàh ù gừn kơnău du jơno tơs î ăñ, lah: ‘Ơ Sol, Sol, no-gwơh kon kơ̆p-cơkhă Ăñ teh?’ 8Bơh gư̆n, ăñ kla wăl dẵư lah: ‘Ơ Yang, Kơnràñ la măt cro teh?’ Kơnràñ tơs î ăñ lah: ‘Ăñ la Jesu cro Nasaret, Bơtao mà kon ndăng kơ̆p-cơkhă.’ 9Jơ gư̆n, tơmpôl cro ndăng ăm băl î ăñ lăng tơmpơl jơno jroh ang gư̆n, mơya ƀòn gô ơ̆ kơnău ơ̆ wơng dẵư Bơtao ndăng tơs î ăñ. 10Hôm ăñ gừn kla wăl dẵư lah: ‘Khoai Yang, amơh kon păl lơh?’ Sŏng gư̆n Yang tơs î ăñ lah: ‘Ma-ngkơi jơ ñă atẵy, păl swà mơ̆t nơ̆m ƀòn dơng Damas, gừn nơ̆m anẵu gư̆n kon rơp dî tơs tơnggư̆t bơh jơh lơ̆gay jơno găy sŏng dî lơh nên ma kon păl lơh.’ 11Bơh rơ̆ la, nơ̆m dơ̆ ăñ ơ̆ lăng tơmpơl nê̆-năn tài bơh jơno jroh ang gơcrà gư̆n, gư̆n-jîng kơnơm bơh tê tơmpôl cro ăm băl î mơ̆n tề bơlăm swà, ăñ sŏng swà mơ̆t nơ̆m ƀòn dơng Damas. 12Jơ gư̆n, amî Anania năy, la du hôi cro ngăc-ngăr jăt jơno-bơlăm, dî lơh cư̆ng niem bơh lơ̆gay cro Juđa jîng ăm nơ̆m gư̆n. 13Tơm tô̆ trôh băl ma ăñ gư̆m ñă en sơđàp ăñ, gô tơs î ăñ lah: ‘Ơ amî Sol, ang wăl măt cĕ.’ Ƀăt nơ̆m jơ gư̆n, ăñ ngơ lăng cŭngsî tơmpơl amî rơ̆. 14Sŏng gư̆n, ông tơs lah: ‘Yang Tơm Trồ ông-pang ƀòn mơ̆n dê sŏng săc-rwơh mê lơi gư̆t nùs-kơñ Kơnràñ, gư̆m lơi lăng tơmpơl Bơtao Tơpăt-Durư̆ng, kŭng gư̆ptî lơi kơnău jơno tơs bơh dẵư Kơnràñ. 15Bơh mê rơp la du hôi cro lơh cư̆ng-tang ma Kơnràñ sơđàp măt lơ̆gay cro gôtrê bơh lơ̆gay jơno găy mê sŏng tơmpơl î kơnău. 16Jơ dô, jơno găy mê hôm ăm cang te teh? Ma-ngkơi jơ ñă atẵy, kŏng lơh cĕ gơnoăr ƀaptem î lơh lơhiê tồi-glài mơ̆n kơnơm bơh jơno hôi-dăn sơnăn kơnràñ.’ 17Pơnjăt ma rơ̆, bră tom tơlôh ma ăñ tơm tô̆ sŏng blăc trê nơ̆m Jerusalem, gừn dơ̆ ăñ ndăng ăm hôi-dăn nơ̆m hîh duh-khoai, gừn sătan ăñ duh tơmơ̆t nơ̆m jơno sơwư̆ng khu tơngoh. 18Ăñ tơmpơl Kơnràñ tơs î ăñ lah: ‘khơñ khơñ, gừn păl tơlôh bơh nơ̆m Jerusalem dubă sơbăc-sơbăng, bơh ƀòn gô rơp ơ̆ dưñ-lăñ jơno lơh cư̆ng mê dê gôtrê bơh Ăñ.’ 19Mơya ăñ kla wăl dẵư lah: ‘Khoai Yang, sătan ƀòn gô gư̆t lah kon ờs sŏng kơ̆p jam î pơng lơh nơ̆m kơp hîh jơnư̆m lơ̆gay cro găy don anẵu Kơnràñ. 20Tơm jơ mham Etien dê, cro lơh cư̆ng Kơnràñ dê, kŏng hua tơlôh, sătan kon ờs kŭng ñă en gư̆n, du nùs băl, gư̆m ăm jư ao makin tơmpôl cro tơngsơ̆t sơ̆t amî gư̆n.’ 21Sŏng gư̆n Kơnràñ tơs î ăñ lah: ‘Păl swà, bơh ăñ rơp pơđơ kon swà trôh î lơ̆gay lang bol bơdih wĭc ngai.’”

22Bơh jơ gư̆n, lang bol ndăng kơnău ông trôh dî jơno dô, gừn ƀòn gô pẵư dẵư, tơs lah: “Păl tơngroh cĕ mpôl cro tîdô bơh nơ̆m măt ple-ù, tai bơh ơ̆ dî păl lơi gô jîng.” 23Bơh sơgư̆n, tơm tô̆ ƀòn gô ndăng hôi dreo, hồ rơmbư̆ng ao makin gư̆m sêh buh cŭngsî trồ, 24gừn kwăng ăt-bồ sŏng e gơnoăr lơi ông dî iyà mơ̆t nơ̆m đông lĭñ, tơs ông păl kŏng khao lùp bơh î mư̆ng, lơi digơlăn gư̆t bơh no-gwơh găy mà lang bol jîng dreo dơng tơmdră ông gư̆ptî gư̆n. 25Mơya tơm tô̆ ƀòn gô sŏng rềt ông î săy sơmơn bơbư̆k î mư̆ng, Pol tơs î kwăng ăt-bồ du-rhieng lĭñ ndăng ñă sơgư̆n: “Iyŏ ngăn jơno bơlăm e gơnoăr ƀòn ông ngui we pơng du hôi cro Rôma mà dahrăư lơh nên glài?” 26Dơ̆ rơ̆, bơh kơnău tîgư̆n, gừn kwăng ăt-bồ, ma-ngkơi jơ trôh băl î kwăng ăt-bồ, sŏng tơs wăl lah: “Kơnràñ ndăng sơmơn lơh jơno găy? Bơh cro dô la cro ƀòn tơm Rôma dê.” 27Tîrơ̆ la, tơm tô̆ sŏng trôh, cro kwăng ăt-bồ lĭñ tơs î ông: “E cĕ ma ăñ gư̆t, amî tom iyŏ la cro ƀòn tơm Rôma hala ờ?” Gừn ông tơs: “Ơi iyŏ.” 28Jơ gư̆n, cro Kwăng ăt-bồ lĭñ kla wăl lah: “Ăñ sŏng tăc gơnoăr ƀòn tơm gư̆n î du khà priè dơng.” Mơya Pol tơs lah: “Hôm ăñ ngăn dî bơda gư̆ptî gư̆n.” 29Tîrơ̆ gư̆n, nhẵư hê cro sơmơn khao lùp Pol ƀăt jai gư̆n rîc swà bơh ông. Hôm e cro kwăng ăt-bồ lĭñ gừn kơ̆mbrit-kơ̆mbròt tơm tô̆ gư̆t lah ông la cro ƀòn tơm Rôma, gư̆m bơh mơ̆n sŏng e gơnoăr kơ̆p căp ông.

30Tîrơ̆ gừn, nge ma-ngkơi, bơh kơñ gư̆t nê̆ no-gwơh mà ông kŏng cro Juđa yă yom, gư̆n-jîng cro ăt-bồ sŏng hồ săy căp ông, gư̆m e gơnoăr ma lơ̆gay cro gơnoăr dơng ăn jơno duh-khoai băl î lơ̆gay Tơmpôl Jơnư̆m bơyê băl. Gừn ma-ngkơi jơ lơboh Pol jư, cro kwăng ăt-bồ ăn ông ñă nhòng ƀòn gô.